ناڤبرا شازدێ
نهبیلایێ هزرا وى تشتى نهدكر یێ دهیكا وێ گۆتیێ دهمێ زڤڕیه مال، گۆتێ : كاغهزهكا ب لهز ژ كۆچكا كۆمارى یا گههشتى، تێدا داخواز یا هاتیهكرن نهبیلا قهستا وان بكهت دا گۆتنێن وێ وهربگرن دهربارهى وێ كاغهزا وێ بۆ سهرۆكى هنارتى.. نهبیلایێ ب ڤێ چهندێ خۆش نهبوو، دیاره ئهو پهشێمان بوویه كو وێ ئهو كاغهز هنارتى، ههر تشتهكێ وێ د كاغهزا خۆ دا نڤیسى وێ ل دهمێ بێنتهنگیێ نڤیسیبوو، وهى بۆ ڤێ گرفتاریێ! ئهرێ جارهكا دى ئهو دێ تووشى زڤڕۆكا پسیار وبهرسڤان بت؟ ب وێ ڤه نائێت ئهو جارهكا دى ب ڤى كارى ڕاببت، یان بێنا خۆ ل سهر فرهه بكهت، ئهرێ ئهو جابهكێ بدهته عهطوهى دا ئهو د گهل وێ بێت؟ نوكه ژ ههمى دهمان پتر ئهوێ ههوجهیى یا ب وى ههى، ههر وهكى یێت وهكى وى ژى دپێتڤینه بۆ ڤێ ژیانێ ئهگهر نه ئهو دێ كهفته گرفتاریێت بێ هژمار وقهدرێ خۆ ورزقێ خۆ ژى دێ بڕت و ژ دهست دهت، بهلێ.. نه، مهسهله چهند یا مهزن ژى بت دڤێت ئهو نهبێژته عهطوهى، وێ بڕیاره ب زیرهكى بهرانبهرى پاشهڕۆژا خۆ ڕاوهستت وههچیا دبت بلا ببت.. مانێ وهلات ئێكه، هندهك سهروبهرێ خهلهت وێ یێ دیتى وئهو ل وێ باوهرێ یه كو ئهڤ سهروبهره نه د خێرا دهسههلاتێ دایه ونه د خێرا وهلاتیان ژى دایه.. و ژ بهر ڕاستى وئێمانهت وترسا وێ ل سهر خێرا وهلاتى وێ ڤیا مهسهلێ بۆ سهرۆكى ب خۆ ڤهگێڕت چونكى ئهو كهسێ ئێكێ یه ل وهلاتى.. مانێ ئهگهر ههر كهسهك خۆ سهرشۆڕ وبێ دهنگ بكهت دا خۆ ژ وهستیانێت مسۆگهر بدهته پاش وخۆ ژ گومانێ دویر بێخت سهروبهرێ مه پتر دێ خراب بت، وخهلهتى دێ كهڤنه سهرێك وئهو دێ بنه ئهگهرا پهقینهكا ب ترس بهس خودێ دزانت كانێ دویماهیا وێ دێ چ بت..
نهبیلایێ خۆ ب گرنگیا وى كارى قانع كر یێ ئهو پێ ڕابووى، وخۆ دیت یا دورست، وگۆته دهیكا خۆ:
ــ بۆچى دهمێ ئهز گههشتیم ته نهدگۆته من؟
ــ چونكى عهطوه یێ حازر بوو، ومن نهڤیا ل نك وى باخڤم.
ــ ڤێجا چاره چیه؟
دهیكا وێ گۆت:
ــ وان هژمارهكا تهلهفوونێ یا دایه من دا تو د گهل وان باخڤى وژڤانهكى ژێ وهرگرى..
نهبیلایێ هژمار ژێ وهرگرت ودهستكێ تهلهفوونێ ڕاكر، خۆ ب وان دا نیاسین وژێ زانى كو سوباهى دهمژمێر یازده بهرى نیڤرۆ ژڤانێ وێ یه..
بابێ وێ ب ترس ڤه گۆت:
كچا من ب بهر نهدكهفت ته ئهڤ چهنده كرى، وئهز دبێژم ئهگهر ئهم مهسهلێ بێژینه عهطوهى چێتره هێشتا ژ دهست مه دهرنهكهفتى..
نهبیلایێ ب ڕكدارى ڤه گۆت:
ــ من وهسا نهڤێت..
ــ بۆچى كچا من؟ ما دوهى وى تو ژ دهستێت وان قورتال نهكربووى؟
ــ ڕاسته.. بهلێ ڤێ جارێ یان ئهز دێ خۆ ژ دهستێت وان ئینمه دهر یان دێ چم بێ زڤڕین.. وبۆچى دێ ترسم؟ من چو گونهه نهكرینه باب!
ــ كچا من، ئهڤرۆ ب گومانهكا ب تنێ مرۆڤ بۆ مرنێ دئێنه ڕاكێشان.
ــ ئهز كارهكێ خهطەر ب ئاشكهرایى دكهم، و ل بهر من یا ب زهحمهت نینه نیشانان پێشكێش بكهم..
بابێ وێ نه ژ دل گڕنژى وگۆت:
ــ نیشان!
ــ بهلێ.. یا ل سهر كاربدهستان ئهوه ئهو بچنه موخابهراتا گشتى یان گرتیخانهیا حهربى دا ببینن چاوا مرۆڤینى دكهفته بن پیان.
بابێ وێ ب دلۆڤانى ڤه دهستێ خۆ ب سهرى دا ئینا خوارێ وگۆتێ:
ــ ئهرێ تو باوهر دكهى جهلاد بێى فهرمان دێ كارهكى كهت؟
ــ ئهو تشتهكه نائێته باوهركرن.
بابێ وێ ب خهم ڤه بێنا خۆ هلكێشا وگۆت:
ــ خودێ رهحمێ ب ئیمام محهمهد عهبدهى ببهت دهمێ دگۆت: لهعنهتا خودێ ل سیاسهتێ بت.
نهبیلا كهته ڕكێ وگۆت:
ــ ئهم د ناڤ شویرههكا ئاسنى دا ناژین وهكى جیهانا شیووعیان.
ــ ناڤ ونیشانان بهێله، یا ئهڤرۆ چێ دبت دیمهنهكێ ئاشكهرایه بۆ زۆرداریهكا بێ ههڤكویڤ..
چاڤێت دهیكێ ب ڕۆندكان تهڕ بوون وگۆت:
ــ ئهم ب تهناهى دژیاین.. خودێ ئهڤه چ بهلا بوو ب سهر مه دا هاتى؟
بابێ گۆت:
ــ ئهڤه حهزكرنا خودێ یه، مه كارهكێ وهسا نهكریه ههژى ڤێ چهندێ ببین..
نهبیلایێ قهستا مهزهلكا خۆ كر، ژ دل بهرێ خۆ دا ڕهفكێت كتێب ودهفتهرێت خواندنگههێ وكاسێتێت مۆسیقێ.. هزرێت دختۆرى كرن، زوى قهستا تهلهفوونێ كر، دختۆر سالم ل عیادا خۆ بوو، ژ دهنگێ وى دیار دبوو كو ئهو ب زڤڕینا نهبیلایێ یێ كهیفخۆشه، ب مجدى ڤه وى دهست هاڤێتێ وپسیارا حالێ وێ كر، ل دویماهیێ ل سهر هندێ پێك هاتن كو ئهو بچته نك وى، ب دلێ دهیكا وێ نهبوو وێ دڤیا كچا وێ پیچهكێ بێهنا خۆ ڤهدهت، بهلێ نهبیلا یا دودل وحال نهخۆش بوو، نهدشیا ڕوینت یان بنڤت یان خۆ ب خواندنێ وگوهدانا موسیقێ ڤه موژیل بكهت.. پشتى بیست خهبهران گههشته نك دختۆرى.
دختۆر باش تێ فوكرى وگۆت:
ــ سوپاس بۆ خودێ، ئهز دبینم تو یا چێترى..
ل بهرانبهر وى ڕوینشت ودهستكێ چانتێ خۆ تێكڤهدا وگۆت:
ــ من نهباوهره..
ــ ڕهنگێ ته هندێ دگههینت كو تو ژ بهرێ چێترى.
ــ هێشتا گرفتارى یێ ل هیڤیا من..
ب خهم ڤه وى گۆت:
ــ پێتڤیه تو ب ڤى حالى یا رازى بى و د گهل بژى وهكى ههر كارهكێ ب سهر مرۆڤى دا دئێت.
ب حێبهتى ڤه بهرسڤا وى دا:
ــ ما ئهڤهیه دهرمان؟
ــ جــانــا مــن! هــنــدهك دهرمان ههنه د دهرمانخانهیان دا نینن.
ــ ئهز دشێم ژ دهرڤه بكڕم.
ــ مهخسهدا من نهدهرمانێت دختۆرانه..
ــ پا مهخسهدا ته چیه دختۆر؟
ــ رحهتیا گیانى.. نهدئێته كڕین ونهدئێته فرۆتن.
نهبیلا د ئاخفتنا وى گههشت لهو سهرێ خۆ هژاند، دختۆر سالم یێ بهردهوام بوو د ئاخفتنا خۆ دا:
ــ خودێ ئهو رحهتى یا داى ویا كریه مافهك بۆ ههمیان، وهكى ئاڤ وباى ، بهلێ هندهك حاكم دهرگههى لێ دگرن ووێ دئێخنه گرتیخانێ..
وێ ب كهرب ڤه گۆت:
ــ ئهڤه تهعدایى یه ل سهر حهقێ خودێ.
وى دهستێ خۆ ب لایێ وێ ڤه درێژ كر وگۆت:
ــ من هیڤى ژ ته ههیه.. دیوار ب گوهن!
وێ ب بێنتهنگى ڤه گۆت:
ــ ما دێ ههر دبێ دهنگ بین؟
ــ ئهگهر خهلك بێ دهنگ بـانـه گرتـیـخـانـه ب مــرۆڤـێـن شهریف تژى نهدبوون.
دهست پێ كر بیرهاتنێت خۆ بۆ وى ڤهگێڕان.. ئهو نهخۆشیێت وێ ل گرتیخانهیا حهربى دتین، ویا عهطوه بهگێ د گهل وێ كرى، وئهو دهمێ ب زهحمهت یێ وێ ل ههر دو حهفتیێت بۆرین دیتى، ب گرى ڤه گۆت:
ــ ئهز شوى ب عهگوهى ناكهم..
دختۆرى ب حێبهتى ڤه گۆتێ:
ــ بهایهكێ گران تو دێ دهى..
ــ بلا.. ئهگهر خۆ ژیانا من ژى بت!
ــ یا دورست نینه تو ژیانا خۆ بكهیه بهایێ كارهكێ هنده بچویك.
ــ ئهڤ كاره ژ مرنێ گرانتره.
پشتى دهلیڤهیهكێ دختۆر كهفتیه هزران گۆت:
ــ چاره ل نك من ههیه..
نهبیلا ڕابوو سهر پیان.. خۆ نێزیكى وى كر، دهست دا دهرهچكێ كراسێ وى یێ سپى وپاقژ و ب لاوازى ڤه گۆتێ:
ــ چاره چیه؟
سماعا خۆ یا بهر گوهان ل دۆر تبلا دهستێ ڕاستێ زڤڕاند وگۆت:
ــ باركرن..
ــ بۆ كیڤه.. دختۆر؟
ــ بۆ ژ دهرڤهى وهلاتى.. دهمهكێ هند كو تو بشێى تهناهیێ بۆ خۆ بزڤڕینى، وگیانێ ته رحهت ببت.. ههر وهسا دێ ژ عهطوه ژى خلاس بى.
نهبیلا ما، سهحكره واران.. د پهنجهرێ ڕا بهرێ خۆ دا ئاڤاهیێت بلند، مناره وگونبهدان، ودوكێلا كارگههان، وعهسمانێ بهرفرههــ وشین.. وهێدى گۆت:
ــ هزرهكا جوانه..
ــ بهلێ هندهك تشت ههنه دڤێت هزرێ لێ بكهى..
ــ وهكى چ؟
ــ یا ئێكێ: دڤێت دهستویریێ ژ جهێ كارى وهرگرى، ویا دى: دڤێت ڕێڤهبهریا تهناهیێ ژى دهستویریێ بدهته ته..
ــ ڕاسته.. ئهڤه گرفتاریه..
دختۆرى چهقێنى ژ تبلێت خۆ ئینا وگۆت:
ــ ما ته ناسنامهیا زانكۆیێ نینه؟
ــ بۆچى؟
ــ ئهگهر ته ئهو ههبت تو دێ شێى پهساپۆرتێ بۆ خۆ دهرێخى بێى بێژى ئهز خودان كارم، دێ ل جهێ كارى نڤیسن (قوتابى) یه، ومن برادهرهكێ ههى ل فهرمانبهریا پهساپۆرتان كار دكهت دێ شێت هاریكاریا ته كهت..
ــ خۆش هزره.. ڕاسته، من ناسنامهیا زانكۆیێ یا ههى.
ــ دبــت ئــهڤـــه بـچـتـه سهرى ئهگهر ئاسایش مــایـــێ خــــۆ د چوونا ته نهكهت.
ــ من باوهره ههر تشتهكێ وان ل سهر من هــهبــت نوكه عهطوهى ژێ بریه..
دختۆرى گۆت:
ــ مرۆڤهكێ من یێ ل كوێتێ، ئهو دشێت كارتهكێ بۆ ته فڕێ بكهت وداخوازا سهرهدانێ ژ ته بكهت، ودهلیڤهیا كارهكى ل وێرێ بۆ ته ببینت..
نهبیلایێ هزرا خۆ ژ ههمى لایان ڤه د ڤى كارى دا كر، دهنگێ دختۆرى هاتێ ئهو هشیاركر:
ــ بهلێ چێ نابت كهس ب ڤى كارى بحهسیێت، خۆ مالا ته ژى.
سهرێ خۆ هژاند یهعنى: بلا، دختۆر د گۆتنا خۆ دا یێ بهردهوام بوو:
ــ ل ڤى جهێ نهخۆش تو نهشێى ژ ئێشێت خۆ یێت گیانى دهركهڤى.. ودهرمانێ ته ئهوه تو دهركهڤى، ونابت بزڤڕى حهتا..
نهبیلایێ هێدى گۆت:
ــ حهتا سهروبهر دئێته گوهۆڕین..
پاشى وێ ملێت خۆ هژاندن و ب بێ هیڤى ڤه گۆت:
ــ ب نیشانان ڤه گــوهــۆڕیــن یا دویره.. دهستێ وان یێ ل سهر ههمى تشتان.. ووهلات ههمى یێ كهفتیه بن دهستێ وان.
د پهنجهرا ڤهكرى ڕا بهرێ خۆ دا قاهیرهیا مهزن وگۆت:
ــ ئهز ناچم بهرى كو بچمه كۆچكێ.. و نك سهلوایێ..
نهبیلایێ دهست دایێ وچیرۆكا كاغهزا خۆ بۆ سهرۆكى بۆ دختۆرى ڤهگێڕا، وگۆتێ كو ژڤانێ وێ د گهل وان سوباهیه، وپێتڤیه ئهو بچته نك سهلوایا رهبهن ژى ئهوا ڤێ دویماهیێ هاتیه بهردان، دختۆرى شیرهت لێ كر كو وێ گهلهك هاى ژ خۆ ههبت وباوهریا عهگوهى ب دهست خۆ ڤه بینت حهتا ئهو ڕێ یا وان داناى ب سهركهفتنێ ب دویماهى بێت و ژ ناڤ پهنجێت وى بڕهڤت.. و ل وى دهمێ دختۆر سالمى شیرهتێت ب بها دگۆتنه وێ ئهڤ پسیاره هاته سهر هزرا وێ:
ــ دختۆر! بۆچى تو ژى نائێى؟
ــ من دشیا وه بكهم، بهلێ من وه نهكر..
ــ تو نهوێریاى ژ ترسێت رحا خۆ دا؟
دختۆر گڕنژى وگۆت:
ــ باشه.. حالێ وهلاتى دێ چ بت ئهگهر ههمى شهریف وئازادیخواز ژێ مشهخت بوون؟ ب ملیوونان مرۆڤ دێ مهحتل بن، وئهو چو هاریكاران نابینن، ئهز ل ڤێرێ دێ مینم دا ئێمانهتێ دختۆریێ ونهدختۆریێ ژ سهر ملێت خۆ ڕاكهم، ما تو نزانى كو دادگـههـا (الشعب) حوكمێ (گرتنا ههروههر د گهل كارێت ب زهحمهت) یێ دانایه سهر برایهكێ من.
ب حێبهتى ڤه خوڕى:
ــ برایێ ته؟
ــ بهلێ.. چو مال نینن هندهك ژ زولم وزۆرداریێ نهدیت بت.
دختۆر ل بهر چاڤێت وێ وهكى قههرهمانهكێ ئهفسانهیى لێ هات، یێ مهزنتر ژ ترس ومرن وزڕتهكیا حاكمان، ووێ زانى كو د پشت ڤێ دهست بهردانا مللهتى یا ئاشكهرا ڕا ئاگرهكێ هلكرى ههیه، ئهگهر چ خولى ب سهر كهفت بت ژى بهلێ پهلێت وى ئاگرى نهڤهمرینه، وبهرگرى ل تاریترین ڕۆژێت پڕ بێ هیڤى جوانترین نیشانا زیرهكیێ یه..
نهبیلایێ ب ڕكدارى ڤه گۆت:
ــ ئهز ژى ناچم..
دختۆر ب نك وێ ڤه چوو وگۆتێ:
ــ چێ نابت.
ــ پا بۆچى چێ دبت تو بمینى؟
ــ ههر ئێكى جهێ خۆ وكارێ خۆ ههیه..
ــ وڕهڤین دێ كارێ من بت؟
ــ نهخێر.. ژ دهرڤه تو ب شهڤ وڕۆژ دێ خۆ بینى خودان كار پێخهمهت سهربهستى وئازادیێ.. ته مال وقهلهم وئازادیا لڤینێ دێ ههبت، ههر وهسا دهلیڤهیهكا چاك بێى كارتێكرنا چو لایان، وههر كهسهك بــۆ كــارهكــى یــێ هـاتــیــهدان.. ئــهز ل ڤێرێ وهوین ل وێرێ، لازم هوین كارێت مه ب ڕێڤه ببهن.. تو قانع بووى؟
سهرێ خۆ هژاند وگۆت:
ــ بهلێ..
دختۆر بێنهكێ كهفته دالغان وگۆت:
ــ وپشتى دهمهكى یێ كورت بت یان یێ درێژ دێ زڤڕى ودێ بینى ئالایهكێ كهسك یێ ل عهسمانى دهژیێت، ب حهرفێت ڕۆناهیێ یێ ل سهر هاتیه نڤیسین: (ادخلوا مصر إن شاء الله آمنین).
هێدى وێ گۆت:
من دڤێت نوكه بچم.. ئهزا جیهانهكا تژى ئازادى وڤیان وتهناهى دبینم، نه زێرهڤان لێ ههنه ونه قامچى ونه صه.. نه عهطوه ونه گرتیخانه.. جیهانا خهونانه یا تژى گول ورحان وپهیڤێت شرین وشهریف..
دختۆر سالمى ئهو ئاگههداركر:
ــ بهلێ نهمینه ب خهونێت گولگولى ڤه.. بلا ههر ل بیرا ته بت كو واجبهكێ مهزن یێ ل سهر ملێت ته ههى.. و ژ بیر نهكه كو ل سهر ئاخا وهلاتى ب ملیوونان مرۆڤ وهكى پهزان بهلكى كرێتتر ژى دئێنه ڕاكێشان..
ــ ئهز دزانم..
ــ وچاوا پـێـغـهمــبــهر ب دوعا ونــڤــێــژان ب تنێ ب سهر نهیاران نهكهفت بهلكى ئهو ب كار وخهبات وخوه وخوینێ ژى ب سهر كهفت.. وهسا ل ههمى دهمان دڤێت خۆگۆریكرن ههبت..
ــ ئهز دزانم..
ــ بێ گومان، مانێ تو سهیدایا دیرۆكێ یى..
ل پهنجهرێ زڤڕى وگۆت:
ــ دیرۆك!! من ئهو وهكى چیرۆكهكا خۆش وشرین دخواند.. كهیفا من ب سهرهاتیێت وێ دهات.. بهلێ ئهڤرۆ باوهرى بۆ من چێبوو كو دیرۆك تشتهكێ دیه.. سهربۆڕهكا زێندى وگهشه د سهر درێژیا دهمى ڕا بهلێ گوڕیا وێ نهڤهمریه، دیرۆك نه سهرهاتیێت زنجیرانهنه هێدى ب ڕێكا خۆ دچن، بهلكى ئهو ههڤڕكیهكا تهعل وخوینهلۆیه.. بهراهى ودویماهیه.. گوهۆڕینا تهڤایى یه د ژینێ دا.
دختۆرى ب گڕنژین ڤه گۆت:
ــ نساخ یێت ل هیڤیا من..
ــ ئهز دێ چم.. من گهلهك ژ دهمێ ته یێ ب بها بر بهلێ دڤێت تو یێ دلشاد بى، ته دهرمانهكێ دورست نیشا من دا..
ــ هیڤیا من ئهوه..
چوو دهستى ودهركهفت، ژ عیادێ دهركهفت مرۆڤهكا دى، سهربۆرا ب تــرس وعــهزاب وحهلاندن بۆرین، وڕێكا خۆ د دویڤ دا هات، ما بۆچى نهبیلا دێ ترست؟ گهلهك گهلهك دێ مرنێ بینت، ئێدى ئهو ژ مرنێ ناترست، وێ خۆ نیاسى، وڕێكا خۆ زانى، وئهڤه جوانترین تشته وێ ب دهست خۆ ئێخستى د ژیانا خۆ دا.
* * *
دهرگهههك وێ قوتا، پشتى دو دهقیقان دهرگههـــ ڤهبوو.. ڕویهكێ نهنیاس دیت، سهلوایه.. برین وسهلخین ل دێمێ وێ نهماینه، لهو دێمهكێ پاك وپاقژ بوو..
كهیف ژ چاڤێت سهلوایێ ڤهپهشى وگۆت:
ــ ئهڤه توى؟
زوى بره ژۆر، وسهلوایێ گۆت:
ــ ته خهلهتیهكا مهزن كر دهمێ تو هاتى..
ــ بۆچى؟
ــ ئهو زێرهڤانیێ ل مالا من دكهن.
ــ من ئاگههــ ژ هندێ ههبوو.. من كهس ل دۆرێت مالا ته نهدیت..
ئاخینكهك هاته سهلوایێ وگۆت:
ــ دلـێ تــه یــێ صافیه.. بهقال زێرهڤانیێ ل من دكهت، خودانێ ئۆتیخانێ.. وكى دزانت؟ نهدویره هندهك جیران ژى ب ڤى كارى ڕادبن، نه ئهز ب سهر كهسێ ڤه دچم ونه كهس ب سهر من ڤه دئێت..
نهبیلایێ گۆتێ:
ــ خۆ بهێله ب هیڤیا خودێ ڤه.. حالێ صابرى چیه؟
ــ یێ نڤستیه.
ــ وزهلامێ ته؟
ــ چو كاغهزێت وى ئێدى بۆ من نائێن.. دیاره حوكمهت كاغهزێت وى ووان پارێت ئهو بۆ من دهنێرت دبهت..
ــ بۆچى تو ناچیه نك وى؟
ــ من ل بهر بوو بچم.. بهلێ ناهێلن.
ــ ب چ حهق ئهو وه دكهن؟
سهلوایێ ب كهسهر ڤه بهرێخۆدایێ وگۆت:
ــ ما كى دوێرت وێ پسیارێ ژ وان بكهت؟
ــ پا چاوا تو دژى؟
ــ ئهز خدامینیێ ل مالا دكهم.. شــویـشـتـنـێ.. مالینێ.. زادلێنانێ.. چى شۆلێ ههبت.
نهبیلایێ ب عێجزى ڤه گۆت:
ــ ئهڤه تاوانه ئهو دكهن.
سهلوایێ ب كهسهر ڤه بێنا خۆ بهردا:
ــ نه بهس هنده.. چى جهێ ئهز بچمێ ئهو ب دویڤ من ڤه دئێن، لهو ههر زوى ب هاندانا وان خودانێت شۆلان من دكهنه دهر.. ئهز نزانم حوكمهتێ چ ژ من دڤێت وئهز نه لایهكم د جڕهى دا..
نهبیلایێ چانتێ خۆ ڤهكر وهندهك پاره ئینانهدهر وگۆت:
ــ بگره..
ــ چێ نابت..
ــ ئهو حهقێ تهیه.. ژ ئهڤرۆ وێڤه خهمان نهخۆ.. ئهز دێ ته ب خودان كهم.
سهلوایێ پارێت وێ زڤڕاندن وگۆت:
ــ تو د من ناگههى.. دهم بۆ دهمى دئێن مالا من سهرێك وبنك دكهن، وگاڤا وان هندهك پاره ل نك من دیتن هزر دكهن ئێك ژ ئیخوانان ئهو یێت بۆ من ئیناین..
نهبیلایێ گۆت:
ــ ڤێجا چیه؟ خهلك ههمى هارى ئێك ودو دكهن..
سهلوا ب تهعلى ڤه گڕنژى وگۆت:
ــ دێ پسیارێ ژ من كهن ئهو ژ كیڤه هاتینه.. ئهگهر نهبێژمێ دڤێت تهحهمولا قامچیان بكهم، وئهز ژنهكا لاوازم من هێزا قامچیان نینه، نه دویره ناڤێ ته بێژم وئهو نهخۆشیێ بۆ ته چێ بكهن.. ڤێجا نهخۆشیێ بۆ من وبۆ خۆ چێ نهكه.
نهبیلایێ پاره زڤڕاندن وگۆت:
ــ ناڤێ من بێژێ، بـۆ خــۆ نــهكــه خهم، ئهز دێ دهركهڤمه ژ دهرڤه، وئهو نهشێن بگههنه من، وپشى ئهز دچمه سهفهرێ ئهز دێ ڕێكهكێ بۆ ته بینم، پشت ڕاست به.
سهلوایێ پاره ژێ وهرگرتن، چاڤێت وێ تژى ڕۆندك بوون، ب نازكى نهبیلا دا بهر سنگێ خۆ و ب كزگریۆك ڤه گۆتێ:
ــ تو دزانى بۆچى وان ئهز بهردایمه؟ دا زێرهڤانیێ ل من بكهن وخهلهكا پهیوهندیێ ل ناڤبهرا من ومێرێ من بزانن، خودان خێر چاڤێ خۆ ددهنه من، وان دڤێت وهلاتى بكهنه دهحل بۆ دههبه وهرچان، خودێ د گهل وان بكهت!
نهبیلا زڤڕى مالا خۆ یا وهستیاى.. پێ حهسیا كو خهوا وێ یا دئێت.
