ناڤبرا بیست و دووێ
ل ڤان ڕۆژێت دویماهیێ ل گرتیخانهیا حهربى (هلكهفتنا نهخۆشیێ وپاشڤهبرنا ب هێز) بوو تشتهكێ عهدهتى وڕۆژانه، ههر ڕۆژ سپێدێ پشتى تێشتێ، گرتى دهاتنهبرن بۆ مهیدانێ، پاشى جۆقێ ب زهحمهت ئهوێ بێهن چك دكر، ب ڕێ دكهفت.. ژ بلى قامچیێت زهبانیان، ولههیێت خهبهران ئهوێت بێ حسێب ژ دهڤێت وان دهردكهفتن، وبهردانا صهیێت فێركرى دا ئهو گۆشتێ ههژاران بدهنه بهر لهقان، یان ب كێلبێت خۆ چهرمێ وان بدڕینن، د گهل ڕهوینا صهیان لهشكهر ژى ل گرتیان دخوڕین و ل وان دكرنه قێژى، دا بێژى وان وصهیان غاردانه د دلڕهقیێ دا كانێ كى دێ بهرى كێ ڕاكهت..
ل نیڤا مهیدانێ عهطوهیێ مهلهوانى ب پویرتێ خۆ یێ زهر وقژاڤژ ڤه ڕادوهستا ودهستێت خۆ دكرنه د بهریكا قاپویتێ خـۆ دا، و ل دۆر وڕهخـێـت وى تابوورێن تهعزیبێ ب ڕێڤه دچوون، وئهو دهێلا د نیڤا خۆ دا، بێ گومان ئهڤـ تابوورێت ڕۆژانه د گشتى بوون، ژ ههمى گرتیان دگرت، دگونههبار بان ب تاوانهكێ یان نه، بهلكى هندهك ژ وان ههما ههر بێ گونههـ هاتبوونه گرتن، وهندهك ژى ژ بهر چوونا وان ڕۆژهكێ ژ ڕۆژان د كۆمهلا ئیخوانان دا هاتبوونه گرتن.. وئهوێت ئێڤارى ل مهیدانێ دهاتنه ڕاوهستاندن، ئهوان عهزابهكا دى بۆ ههبوو، ژ بلى وێ یا وان سپێدێ د گهل گرتیێن دى دخوار.. وئاشكهرایه كو ئهڤـ دژواریا د تهعزیبێ دا یا ل ڤێ دویماهیێ بهلاڤبووى، ژ بهر كهشفكرنا وانه بۆ رێكخستیهكا نوى وهكى ئهو دبێژن، ب ڕاستى ئهو نه ڕێكخستیهكا سیاسى بوو، ونه یا دینى ژى بوو، بهلكى ئهو كۆمهكا خودان خێران بوو، وان خۆ دابوونه ئێك، وهندهك پاره بۆ وان مالێن سهمیانێت وان هاتینهگرتن وماینه بێ خودان بێش دكر، و ب دزى ڤه بۆ وان دهنارت، دا كابانیێت وان مالان بشێن زارۆكێت خۆ ب خودان بكهن، وپاریێ ژیانێ ب دهست خۆ بێخن، ودا بشێن مهصرهفێ خواندنێ وكرێیا خانى وحهقێ كارهبێ پهیدا بكهن..
ئهو ئهفسهرێت ب كارێ تهحقیقێ ڕادبوون ڤهجنقین دهمێ دیتى هندهك شاگردهیێت خواندنگههێ ههیڤێ پێنج حهتا دههـ قورووشان وهك هاریكارى وبێش بۆ دئێن، بهلێ بۆ وان دیار نهبوو كو ئێكى داخواز كر بت كو ئهو كۆمهلا هاتیه قهدهغهكرن دوباره بزڤڕتهڤه، یان كارهك كربت بێنا نهیارهتیێ ژێ بێت، لهو وان ناڤێ ڤێ ڕێكخستیێ كره (جیهازێ پارهدانێ)، ڤێ ڕێكخستیێ حوكمهت زێده ئاراند، وبێ حسێب كهرب لێ ڤهكرن، دهمێ گرتیهكى دهست دایه شــرۆڤــهكــرنـا ڤــى كارى، وبۆ وان دیاركرى كو ئهو كارهكێ ب گونههـ نینه، چونكى ئهو كارهكێ خوڕى ئینسانیه، وچو پهیوهندى ب ئنقیلاب ونهیارهتیێ ڤه نینه، بهلكى چو ئنیهتێت ڤهشارتى ژى تێدا نینن.. موحهققان تڕانهیێت خۆ ب وى كرن وئهو تێ گههاند كو حوكمهتێ هزرهكا دى ههیه، چونكى ئهڤـ كۆمهله نیشانا هندێیه كو رهحمهك ههیه خهلكى دگههینته ئێك، وئهو رهحم مهعنایا ئێكگرتنێ وڤیانێ ودۆستینیهكا كهڤن ددهت، وێ كۆمهلێ ترس تێدا ههیه، چونكى دویر نینه ئهو پێش بكهڤت وببته رێكخستیهكا نهێنى یا چهكدار، چهكى بكڕت ونهیارهتیێ بكهت، وخوینێ بڕێژت.
هژمارهكا دى یا گرتیان گۆت: نه ل مصرێ ونه ل چو جهێت دى یێت دنیایێ، قانوونهك نینه كۆمكرنا هاریكاریان ب خیانهتا مهزن بدهته نیاسین، نهخاسم بۆ ههوه دیار بوو كو نه ب تنێ موسلمان ب كۆمكرنا ڤان بێشان بۆ خێزانێت ئیخوانان ڕابووینه.
پشتى هنگى، وپشتى سهرهاتیا مهنشیێ، ب كرێتترین ڕهنگ سهرهدهرى د گهل كهسێت ڕێكخستیا نوى هاتهكرن، وههر چهنده مهحكهمێت بۆرین دئاشكهرا بوون، وڕۆژنامه ودهزگههێت ڕاگههاندنێ ئهو ب ڕهنگهكێ ڤاژى دابوونه نیاسین ژى، بهلێ ڤێ جارێ مهحكهمه ب دزى ڤه و ل هندهك جهێن لهشكهرى وبێ جهماوهر وپارێزهر ژى هاتنهكرن.. قازیێ ناڤدار لیوا (صهلاح حهتاته) دا ڕوینت، و ل ههر ملهكێ وى ئهندامهكێ دى دڕوینشت، ل وێڤهتر چهند نڤیسهر ژى دڕوینشتن، ل بهر سنگێ وان كۆمهكا گرتیان دداناى بوون، و ل پشت وان هژمارهكا وان زێرهڤانان یێن ئهو ژ گرتیخانهیێن لهشكهرى ئیناین ژ پێیان ڤه بوون، بێى ئهو ب خۆ ژى بزانن كانێ ئهڤا چێ دبت چیه! چونكى بۆ وان چێ نهدبوو ئهو د گهل ئێكى ژ وان باخڤن، یان بهرسڤا پسیارا ئێكى بدهن..
ل ڤى جهێ تارى ژ گرتیخانهیا حهربى كارێت زێده نهخۆش ورهزیل دهاتنهكرن، گرتیێن بێ مهحكهمه هزر دكر ڕۆژێت نهخۆشیێ وتهعزیبێ نهمان، پشتى وان دهمێن درێژ ل پشت شویرهێت بلند بۆراندین، ژ بهر هندێ نویكرنا تهعزیبێ ب ڕهنگهكێ نه یێ كێم ژ یێ بهراهیێ دبوو ئهگهرا پهیدابوونا هندهك نهخۆشیێت نوى بۆ وان، پشتى هنگى چهند ئێشێت نوى ژى د ناڤ وان دا پهیدا بوون، بۆ نموونه: چاڤێت نورهددینێ گرتى تارى بوون، نۆژدارێ گرتیخانهیێ ئهگهرا ڤێ چهندێ كره عێجزیا نهفسى، وسهعد زههرانى ژى شــهلــهلـى بوو، ئـێـدى ئهو نهدشیا نه ڕابت نه ب ڕێڤه بچت، و د گهل هندێ قامچى ههر ڤێ دكهفتن.. ئهگهرا ئێشا وى ژى وهكى نۆژدارى گۆتى، عێجزیا نهفسى بوو، وهۆسا دلگرتن ودیناتى وكهفتن ب ڕهنگهكێ بهرفرههـ چێ دبوون، تشتێ بوویه ئهگهرا هندێ هندهك ژ وان دلێ خۆ ببهنه مرنێ، دا ئهو ژ ڤان نهخۆشیێت لهشى ونهفسى خلاس ببن، ووان ئهڤـ نساخه نهبرنه خهستهخانهیهكێ یان جههكێ تایبهت، بهلكى ئهو هێلانه د گهل گرتیان، دا ئێش وكۆڤانێت وان زێدهتر لێ بێن، و د سهر وێ خۆڕاگریا غهریب ژى ڕا یا پتریا وان، بهلێ هندهك كهسێت كێم ههبوون هزر دكر تهنگاڤى ههما هندهیه، وحالێ وان ههر یێ بهر ب نهخۆشیێ ڤه دچت.. لهو وان پسیار دكر: ئهرێ بۆچى ئهم وحوكمهت پێك نائێین وخۆ تێك ناگههینین؟ پتریا وان ژ ڤێ پسیارێ درازى نهبوون، وههما وان ئهڤـ مهسهله ئێكجار قهبویل نهدكر، ههر چهنده ئارمانج ژێ ڕزگاركرنا كهسێت مایینه ژ مرنێ، ودویماهى ئینانه بۆ ئاههنگا تهعزیبێ، وخلاسكرنا نساخ وخێزانایه ژ كهفتن ونههێلانێ.. وئهو كهسێت ڤیاین د گهل حوكمهتێ پێك بێن، ههر چهنده دكێم بوون ژى، بێ هیڤى وبێ هێز نهبووبوون، ودلێت وان ژ ئارمانجێ سار نهبووبوون, بهلكى مهخسهدا وان ئهو بوو هندهك نهرمى بێته ب كارئینان، دا دژواریا نهیاران كێم ببت، وگرتى بشێن هزرێت خۆ د سهرێت خۆ دا كۆم بكهن، وبێهنا خۆ هلكێشن، ل پشت دهرگههێت گرتى دان وستاندنێت گهرم ب شهڤـ وڕۆژ بهلاڤبوون، بهلێ مهعروفى ب باوهریهكا موكم ڤه گۆت:
ــ گـهلـى برا، هوین ددورست نینن.. حوكمهت رازى نابت د گهل ههوه پێك بێت، چونكى ئهو یا ب هێزه، و ژ كار وكریارێت بهرپسیارا تشتهك ب تنێ دئێته زانین، ئهو ژى نههێلانا مهیه.. ڤێجا چ ب كوشتنێ بت، یان ژى ئهو نهفسێت مه بههڕفینن، یان تۆڤێ ژێكڤهبوونێ د ناڤـ ڕێزێت مــه دا بـچـیـنـن، یــان هــزر وبـیـرێـت مه تێك بدهن، دا ئهم خۆ ژ خهباتا خۆ یا بۆرى د رێكا خودێ دا پاشڤه ببهین.. ئهڤهیه ئارمانجا حوكمهتێ یا ئهو دهلیڤهیهكا ب تنێ ژى خۆ ژێ نادهته پاش ئهم چ بكهین چ نهكهین.. ڤێجا یا ل سهر مه ئهوه ئهم دبێنفرههـ بین وخۆ بهێلینه ب هیڤیا خودێ ڤه، وبیر وباوهرێت خۆ ژ دهست نهدهین مادهم ئهم یێت ل سهر ڕێكا ڕاست یا خودێ وپێغهمبهرى نیشا مه داى.. هـهواركرنـا نـه ژ خودێ بت شركه، ڤێجا هوین هاریكاریێ ژ خودێ بخوازن وبێنا خۆ فرههـ بكهن، پاشهڕۆژ یا چاكانه.. هزر نهكهن ئهو نهخۆشیێت هوین ئهڤرۆ دبینن دویماهیا شهڕیه، نهخێر! دویماهى هێشتا دیار نهبوویه، وشهڕێت بیر وباوهران نه ڕۆژهكه یان ههیڤهكه یان سالهكه، ئهو جهنگهكێ بهردهوامه، ب هێزترین ڕژێم بهلكى ب چهند سهعهتهكان ب سهرێك دا بێت، وحاكمێ دهسههل وزۆردار نهدویره روح ژێ بێته ستاندن ل وى دهمێ ئهوێ ڕوینشتى دكهته كهنى، یان دهمێ ئهو شهترهنجێ دكهت، یان دهمێ هندهك بڕیارێت گرنگ ئیمزا دكهت.. ژیان د دهستێ خودێ دایه.. وپشتى هنگى ما ئهم چینه؟ دهمهكێ هژمارتى ئهم ل ڤێ دنیایێ دئێین ودچـیـن، بـهلـكـى ئــهو دهم یێ درێژ بت یان یێ كورت، بـهلـێ د گهل هندێ ژى ئهو یێ هژمارتیه، ڤێجا لهز وترس یا چیه؟ د چهند دهلیڤهیهكان دا، هژیانهكا ب تنێ دههان هزار مرۆڤـ وئاڤاهیان وێران دكهت، مهسهلا مرنێ وژینێ بهێلنه ب هیڤیا خودێ ڤه.. ههر وهسا مهسهلا رزقى ژى، خۆشتڤیێ مه پێغهمبهرێ خودێ ڕاست دبێژت، دهمێ گۆتى: ((د دنیایێ دا رحهتى نینه.. ودهههلى بۆ رزقى پێ نهڤێت.. و د مرنێ دا مههدهر نینه)) ژ دهرڤهى شویرهان مه هزر وبیرێت خۆ بهلاڤـ دكرن، ونوكه ژى ل ڤى جهێ ئهم نهخۆشیێ ژ تهنهاییێ دبینین ئهم ب ڕهنگهكێ جوانتر هزر وبیرێت خۆ یێ بهلاڤ دكهین..
كهسێ نهڤیا بهرسڤا مهعرووفى بدهت، رزق ئیبراهیمى باش گوهێ خۆ ددا ههر ئاخفتنهكا ژ دهڤێ وى دهردكهڤت، یووسفێ شاعر ب سهرڤه دا بێژى ئهو كویر یێ چووى، بهلێ گۆتنێت مهعرووفى ب ڕهنگهكێ مۆسیقى وسهلیقه د هزرا وى دا كـۆمـبـوون، وبـوونـه بنیات بۆ شعرهكا وهسا یا خهلك ل درێژیا دهمان دێ ڤهگێڕن، عهبدلحهمید ئهلنهجار د گهل برین وئێشێت خۆ دبوو نموونهیێ حهرف وپهیڤان، مهحموود صهقر ئهوێ برینێت وى ساخ بووین، یان نێزیكه ساخ ببن، ئهو ژى بێ دهنگیێ ڕوینشتى بوو، گڕنژینا وى یا غهریب ب سهر دێمێ وى یێ زهر دا هاتبوو خوارێ، ڕۆناهیا جوان ودلكێش ژ چاڤێت وى دفڕى، بێ دهنگى درێژ بوو، ههر كهس د جیهانا خۆ یا تایبهت دا دگهڕیا، مهحموود صـهقــرى بـیـریـێـت (ئهمهلێ) دكرن.. ئهو یێ تێنیه، وپهرداغ د دهستێ وێ دا یێ دبرسقت، ئهو پهرداغێ تێنكاتى پێ دشكێت، عهبدلحهمیدى بیریێت وێ ههژارێ كرن یا دهاته تهعزیبدان دهمێ پسیارا بهلاڤۆكێت سووریێ ژێ داهاتهكرن، دلێ وى خۆ دهلاڤێت بۆ بیرهاتنا وێ:
ــ ئاخ!! دهمێ ئهز ژ نوى دهردكهڤمه دنیایێ، ئهز دێ چمه نك وێ.. وهى خودێ!! ئهز ناڤونیشانێت وێ نزانم.. چو نینه دێ ڤێ كهڤم.. دلێ من دێ وێ نیشا من دهت، بهلێ تو بێژى ئهو شوى ب شاگردهیهكێ فهلسگینى یێ فهقیر بكهت، یێ كو نهدویره گاڤا دهركهفت مصر وى دهربێخت؟ بهلێ.. كهنگى دێ دهركهڤت؟ ئهڤه دهرگههێ ڕهش یێ گرتیه، و ل پشت دهرگههى شویرههنه، وشویرههنه، وتێلێت ستریكرى، وسیاجێت بلند زێرهڤانێت ههردهم هشیار ل سهر ڕادوهستاینه، وغهددارێت وان د دهستان دانه.. وگازیێت وان یێت عهدهتى بلند دبن: ئێك دورسته.. دو دورسته.. سێ دورسته.. وهۆسا نانڤن، بهلێ ئهڤیندارا دلى یا ل وێرا هه.. ل دویر، ئهو پێ دحهسیێت كو ئهو یا نێزیكى وییه، یا د دلێ وى دا دژیت.. ((ژ كهرهما خودێ د گهل مه ئهوه ئهو نهشێن ب خهونێت مه بحهسیێن، ئهگهر ههر ئێك ژ مه ئهو دا هزار بێ بهختیان ب دویڤ ڤهنن، ما جوداهیهك د ناڤبهرا هشیار وخهونێ دا ههیه؟ مرۆڤ د گهل ههرددوان دژیت، بۆ نموونه دهمێ ئهو ل نك من یا ئاماده، دلێ من خۆ دهلاڤێت، ونوكه ژى دهمێ ئهو دئێته بیرا من، دلێ من خۆ دهلاڤێت.. ئهڤه ئهزێ دشێم وێ ببینم، ودهست بكهمێ.. د گهل وێ باخڤم وئهو د گهل من باخڤت.. پێك بێین وژێك جودا ببین.. ههر وهكى ئهڤ چهنده ب هشیارى چێ دبت.. ئهز نه یێ دینم، بهلێ.. ب ڕاستى ئهز چو جوداهیێ د ناڤبهرا هشیارى وخــهونـــێ دا نـابــیــنــم، چــى گــاڤــا ئهز گازى وێ دكهم، ئهو د گازیا من دئێت، ههر تشتێ مه د هزرا خۆ دا دڤێت ئهو ههر زوى دئێت.. بێى گوستیركا سولهیمانى یان شهملكا فڕینێ.. ئهى دلێ من! ئهى حنێرا مهزن، تو ژ چ تشتى هاتیه دورستكرن؟ تو حنێرهكى ژ حنێرێت هاتینه چێكرن..)).
دهنگهك ژ دهرڤه هات:
ــ گــرتــى عــهبــدلـحـهمــیــد ئهلنهجار.. گرتى عهبدلحهمید ئهلنهجار.. دهرگههى بقوته كوڕێ صهى!
د گاڤێ دا عهبدلحهمیدى خۆ ل پشت دهرگههێ زیندانێ دا، و ب كهرب ڤه دهرگهه لهقاند:
ــ عهبدلحهمید ئهلنهجار، ئهفهندى، زیندانا 47 ئهفهندى.
لهشكهرى ژ دهرڤه پیێ خۆ ل عهردى ددا. عهبدلحهمیدى رازیبوونا خۆ ب ئهمرێ خۆ دیاركر.. چاڤێت برایان یێت تژى دلۆڤانى مانه لـێ، ودلێت وان دوعا بۆ وى دكرن، ڕۆندكهك ب سهر ڕویێ مهعرووفى دا هاته خوارێ، وى ئـهو ڤــهمــالـى و ب زیرهكى ڤه گۆت:
ــ خودێ د گهل ته بت عهبدلحهمید..
رزق ئیبراهیم ڕابووڤه وگۆت:
ــ خۆ زیرهك بكه..
یووسفێ شاعر د بن لێڤلێڤكان ڕا گۆت:
ــ (قل لن یصیبنا إلا ما كتب الله لنا).
مهحموود صهقر ما بێ دهنگ، گڕنژینا وى یا غهریب دێمێ وى گهش دكر، د ناڤ تاریێ ڕا چاڤێت وى روهن دكرن، عهبدلحهمیدى (آیه الكرسی) دخواند، ودهمێ گههشتیه (من ذا الذی یشفع عنده..) دهنگێ خۆ بلند كر، پاشى دهنگێ وى نزم بوو حهتا كلیل د دۆرا دهرگههێ ستویر ڕا هاتیه بادان، عهبدلحهمید دهركهفت، پاشى دهرگههــ جارهكا دى هاته گرتن.. پشتى بێنهكێ دهنگێ مهعرووفى هات:
ــ دا دوعایان بخوینین.. دێ..
* * *
دهمێ عهبدلحهمید گههشتیه مهیدانێ، وى دیت ئهو یا تژیه ژ مرۆڤان، ڕێزێت گرتیان.. فهرمان ل دویڤ ئێك دهردكهفتن، وقێڕى تێكهلى ئێك دبوون، وشێوه وڕهنگێن نوى یێت ئازاردانێ.. نوكه دهمێ تایبهتمهندیێیه، لهو یا غهریب نینه ئازاردان هۆنهرهكێ تایبهت وخودان بسپۆر بت، وهندهك خواندنگههێت بنهڕهت بۆ وێ ههبن، تهكنهلۆژیا وسایكۆلۆژیا تێدا بێنه ب كارئینان، د ناڤ ڤێ قهرهبالغێ دا عهبدلحهمید ب پهریشانى وبهرزهبوونێ حهسیا، بهلێ وى لهشكهرێ ب د دویڤ ڤه فهرمان لێ دكر: ((بۆ ڕاستێ ههڕه.. بۆ چهپێ ههڕه.. بۆ پشتێ ههڕه.. ب لهز ههڕه)) بهلێ هندهك گازیێت دى ژى ل دۆر وڕهخێت وى بلند دبوون، لهو وى چو جوداهى نهدئێخسته ناڤبهرا وان فهرمانێت ل وى دهاتنهكرن ویێت ل گرتیێت دى دهاتنهكرن.. عهبدلحهمیدى گوه لێ بوو لهشكهرهكى دگۆت: ((ئهڤ جیهازێ نوى سهرێ من گێژكر)) ههڤالێ وى گۆت: ((ما بهس گێژ؟ خوزیكێت ته!)) عهبدلحهمید گێژبوو ووهكى مرۆڤهكێ سهرخۆش د پیێت خۆ هلنگفت، لهشكهر ب حالێ وى حهسیا، ب ڕهقى ڤه زهندكا وى گرت وتبلا خۆ درێژ كر وگۆتێ:
ــ تو وێ مهزهلا هه دبینى؟ ئهوا ل چهپێ، حهتا وێرێ بكه غار..
پاشى ب ههمى هێزا خۆ قامچیهك دانایێ، عهبدلحهمیدى كره غار.. دهمێ گههشتیه بهر دهرى بێنا وى چك بووبوو، ههر ئهو ئهفسهر بوو یێ جارا دى پسیار ژێ كرین، عهبدلحهمید حێبهتى بوو دهمێ ئهو دیتى وى ب نهرمى ڤه پسیار كرى:
ــ كوڕێ من عهبدلحهمید.. وهره ڕوینه خوارێ..
عهبدلحهمید دودل بوو كانێ ڕوینت یان نه، چونكى كورسیك یا پاقژ وجوان وتازهیه، وجلكێت وى دكهڤنن و ژ بهر وێ خوینا پێڤه ئهودپیسن، ئهڤسهرى ئهوێ ب جلكێت مهدهنى ڤیا خۆ ب رحسڤكیێ بینته دهر، لهو گۆت:
ــ عهبدلحهمید، ب خودێ ههوه ئهم وهستاندین، خودێ ژى دلێت ههوه بوهستینت، ئهز نهشێم د ههوه بگههم كانێ هـویـن چنه.. شهیتانن؟ ئهجنهنه؟ دینن؟ پشتى هنگى هوین ژ نوى جیهازهكێ نهێنى ددانن؟ نێزیك بوو ئهم ههوه بهردهین، بهلێ ما چ بكهین؟ ههوه ب ڤان كریارێت خۆ یێت چوننه دڤێت ههمى تشتان پویچ بكهن، بۆچى تو ناڕوینى كوڕێ من؟ ڕوینه نهترسه..
عهبدلحهمید ب ترس ڤه ل سهر لێڤا كورسیكێ ڕوینشت، دلێ وى خۆ دقوتا ولهشێ وى ههمى ڤهدلهرزى.. گرفتاریهكا نوى ل بهرا وى ههیه، ڤهشارتنا وى بۆ سهرهاتیێت بۆرین، وئعترافێت وى كرین، نهدویره وى تێ ببهن، بهرێ سهیدایێ وى یێ سهرهتاییێ دگۆتێ: ((ڕاستى خودانێ خۆ ڕزگار دكهت)) بهلێ نوكه بهروڤاژیا وێ گۆتنێ چێ دبت، ڕاستى یهعنى مرن، ئهڤه جیهانا درهو وشاهده زۆریێیه، ڕاستى یێت دهرنشیف بووین، دهمهكى عهبدلحهمید ل سهر ملێ خۆ زڤڕى وسهحكره ژ دهرڤه، وى عهگوه بهگ دیت قامچیهك د دهستان دا بوو، هێڕش دكره سهر گرتیكێ نوى، وهى خودێ!! عهبدلحهمید وى دنیاست، ئهڤه قوتابى (سلێمان حجره) شاگردهیێ پهیمانگهها پهروهردهیا وهرزشــى یـا بــالا ل هــهرهمــێ.. تــو بــێــژى وى چ كربت؟ نێزیكه ئهو وى بكوژت.. عهبدلحهمیدى هند گوه لێ بوو دهنگهك هاتێ:
ــ عهبدلحهمید، ئهم گهلهك سوپاسیا ته دكهین ل سهر وێ هاریكاریا ته د گهل مهحكهمێ كرى..
عهبدلحهمید ل ئهفسهرێ پسیاركهر زڤڕى، دیت ئهو یێ بێ دهنگه و ب چهند كاغزهكان ڤه یێ موژیله، مهعنا ئهو نه ئهو بوو یێ پسیار كرى، عهبدلحهمید د مهزهلێ فوكرى.. بۆ جارا ئێكێ بوو وى زهلامهكێ دى دیتى ل پشت مێزهكا دى یێ ڕوینشتیه، ل سهر مێزا وى گولۆپهكا هلكرى بوو، ڕۆناهى ژێ دچوو، وبهرێ وێ ل عهبدلحهمیدى بوو، لهو ئهو نهدشیا وى زهلامى باش ببینت، دوباره ئهو زهلامێ زهعیف ل گۆتنا خۆ زڤڕى:
ــ ب تنێ تشتهك مه ل بهره، تشتهكێ زێده گرنگ ل نك مه، ئهز دبێژم تو دشێى هاریكاریا مه بكهى.. و ب نامویسا من ئێكسهر ئهم دێ ته بهردهین..
دهمێ عهبدلحهمیدى گوه ل پهیڤا (نامویسا من) بووى، گڕنژى.. ههر گاڤ ئهو وه دبێژن، بهلێ چو جاران ئهو ب گۆتنا خۆ ناكهن، هندهك حهرفێت بێ مهعنانه، وهكى پارهیێ قهلپ یێ چو بها پێ نهئێتهدان، عهبدلحهمیدى گۆت:
ــ ئهز د مهخسهدا ته ناگههم..
زهلامێ دى ژ نوى ژ پشت مێزا خۆ دهركهفت، و ب نك عهبدلحهمیدى ڤه چوو وگۆتێ:
ــ پێتڤیه ئهم وێ خهلهكێ بزانین یا ئیخوانێت سووریێ ومـصـرێ، هــهر وهسا یێت ئـوردنـێ وعیراقێ وكهرتێ ڕۆژئاڤایێ وسعوودیێ وكوێتێ دگههینته ئێك.. ئهگهر زهحمهت نهبت.
عهبدلحهمید گڕنژى وگۆت:
ــ دیاره هوین نزانن ئهز كیمه..
ــ تو عهبدلحهمیدێ نهجارى، خۆگۆریكهرهكێ چهلهنگى..
ــ ئهز نه ڕێبهرێ گشتى یێ ئیخوانامه.. وئهز ئهندامێ دهستهكا (ئیرشادێ) نینم، ونه د دهستهكا دامهزرێنهر ژى دامه، ئهز مرۆڤهكێ سادهمه، چاوا دێ ڤێ چهندێ زانم؟
زهلامى كێلبێت خۆ ئاشكهرا كرن وگۆت:
ــ دهمێ حوكمهتێ تشتهك ڤیا، دڤێت تو بزانى.. باشه؟؟
عهبدلحهمید ڕابووڤه, ڕك وڕك بهرێ خۆ دا موحهققى وگۆت:
ــ مهسهله ههمى یا چێكریه..
ڕویێ موحهققى سۆر بوو، ههڤالێ وى ژى ژ جهێ خۆ ڕابوو، نیڤ نیڤه زڤڕى، ب نك عهبدلحهمیدى ڤه چوو ب دو چاڤێت ئاگرى ژێ دپهشى ڤه گۆت:
ــ تو چ دبێژى؟
ــ ئهزدبێژم: مهسهلا بهلاڤۆكێت سووری من چو ئاگهه ژێ نینه..
ــ ئهڤا نڤیسى ته ب دهڤێ خۆ یا گۆتى، وئهو ب دهنگێ ته مه تۆماركریه.. ته دڤێت جارهكا دى گوهێ خۆ بدهیێ؟
عهبدلحهمیدى قورچا خۆ داعویرا، و ب دو لێڤێت ڤهلهرزیاى ڤه گۆت:
ــ ههوه كوتهكى ل من كربوو حهتا من ئهو ئاخفتن گۆتین.
ــ مه كوتهكى ل ته كر؟؟ كێ ئهڤ گۆتنه نیشا ته دایه؟
ــ من وه گۆت دا ئهز ژ تهعزیبێ خلاس ببم.
موحهققى پستویێ وى گرت، وئهو كێشا، وڤههژهژاند، و ب عێجزى ڤه گۆت:
ــ تشتهكێ دى ژ بلى ڤێ گۆتنێ بێژه..
ــ ئهز چو ژ مهسهلا ڤان بهلاڤۆكا نزانم.
ــ كێ تو پالداى كو تو ل گۆتنا خۆ لێڤه ببى پشتى ته ئعترافهكا تمام كرى؟
عهبدلحهمیدى سهرێ خۆ هژاند وگۆت:
ــ كهسێ نه.. وئهز ژ بهر ئهگهرهكا بهسیگ لێڤه بووم..
ــ كیژ ئهگهرێ؟
ــ یا پێتڤى بوو ئهز ڕاستیێ بێژم..
ــ ڕاستیا چ؟ ئاخفتنا دوهى یان یا ئهڤرۆ؟
ــ من ئهو چیرۆك ههمى چێكر، دا ئهز پیچهكێ تهنا ببم، ودهلیڤهیهكا نڤستنێ ببینم..
پسیاركهرى شهقهكا ب هێز لێدا، وگۆت:
ــ وئهم چ بێژینه سهرۆكاتیا جمهوورییهتێ؟ من ئعترافێت ته ههمى بۆ وان هنارتن، ووان مهسهله ب گرنگیهكا زێده ڤه وهرگرتیه..
عهطوهیێ مهلهوانى ب ژۆر كهفت، دهمهكى ما ژ پیان ڤه، وگوهێ خۆ دا وان گۆتنێت دئێنهكرن، تێ گـههـشـت كو ئهو ل گۆتنێت خۆ یێ لێڤهبووى، عهطوهى گۆت:
ــ وى بـۆ مـن بـهـێـلـن، ئـهز دێ وه لێكهم جارهكا دى ئهو ل ئعترافێت خۆ بزڤڕتهڤه، و ب دهستێت خۆ بنڤیست، وهندهكا دى ژى لێ زێده بكهت..
موحهققێ ئێكێ گۆت:
ــ چ چارهیێت دى نینن.. یان دێ ل سهرۆكاتیێ شهرما مه بهن، وتڕانهیان بۆ خۆ ب مه كهن..
عهطوهى دهستێ خۆ ب نك عهبدلحهمیدى ڤه درێژ كر وددانێت خۆ لێك چڕكاندن، وگۆت:
ــ هێرڤه وهره.. دا ئهز ته بهلاویسم حهتا تو ئعترافێ بكهى یان بمرى..
موحهققێ دووێ گۆت:
ــ ئهز دبێژم یا باش ئهوه ئهم بهنێرینه ب دویڤ ههڤالێت وى یێت زیندانێ ڕا، بهلكى ئێك ژ وان ئهو پالدا بت كو ئهو ل گۆتنێت خۆ لێڤه ببت.
پشتى دهمهكى عهبدلحهمیدى خۆ دیت یێ هلاویستى، ڕویس وهكى ژ دهیكا خۆ بووى، وقامچى ژ ههمى لایان ڤه لێ دبارین، ب چاڤدێریا عهطوهى ب خۆ، ب دهنگهكێ لاواز ڤه عهبدلحهمیدى نال نال دكر.. خۆ هێلا ب هیڤیا خودێ ڤه، مرن د چاڤێت وى دا كێم بوو، بهلكى ئهو بۆ هیڤیا وى.. پاشى ئهو ل ڤێ هیڤیێ لێڤه بوو وئستغفار كێشان، مانێ ژین منهتهكه خودێ د گهل مرۆڤى دكهت، ونابت موسلمان ژینا خۆ بهاڤێژت، ئهو ژ خودێیه وبۆ خودێیه، لهو دڤێت ئهو صهبرێ بكێشت ویێ خۆڕاگر بت، عهگوه ب نك وى ڤه چوو.. چو چهماند دا بگههته گوهێ وى، وگۆتێ:
ــ عـهبـدلحـهمـیـد تـو دێ مــرى.. باخڤه هـێـشـتـا دهلــیـڤــه ژ دهست ته دهرنهكهفتى.
عهبدلحهمیدى ب كزگریۆك ڤه گۆت: (أینما تكونوا یدرككم الموت ولو كنتم فی بروج مشیده).
ــ ژ مێژه من گوهــ ل ڤان گۆتنان بوویه، ئهو پتر من هار ودین دكهن.
ــ ما دێ چاوا دیاركهم كو زۆرى یا ل من دئێتهكرن..
ــ ئهم زۆریێ ل كهسێ ناكهین..
ــ ئهز؟
عهطوه لێ خوڕى:
ــ تو كوڕێ صهیى.. مرۆڤهكێ درهوینى..
ــ ب تنێ خودێ ب حالێ من دحهسیێت.
ــ خودێ چ ژ مه نینه..
عهبدلحهمیدى گۆت:
ــ أستغفر الله، عهطوه بهگ..
عهطوهى دوباره كره قێڕى:
ــ لێ بدهن..
نالین.. ئێشانا گران.. دهمێت درێژ و ب ترس.. سهرێ وى یێ نشیڤكرى، ئێدى ئهو نهشێت تشتهكى ببینت، پهردهیهك كهفته بهر چاڤێت وى، سهرێ وى نێزیكه بپهقت، پێ حهسیا كو هندهك چپكێت خوینێ یێت گهرم ژ دفنا وى یێت دكهڤن، ئهرێ تو بێژى ئهڤه دویماهیا وى بت؟ عهبدلحهمید یێ پشت ڕاسته كو خودێ ڤێ گاڤێ وهكى ههر گاڤهكێ یێ وى دبینت، ووى گوهــ ل ههمى تشتان ژى دبت، د سهرێ وى یێ وهستیاى دا تشت تێكهل بوون، بهلێ ڕاستیهك ب تنێ ما د سهرى دا گهش دكر، ئهڤه دهمێ نڤێژێیه، خوزى ئهو وى بهێلن حهتا نڤێژا خۆ بكهت.. ئاه!! هزرهك بۆ وى چێبوو، بۆچى ئهو ب ڤى ڕهنگى نڤێژا خۆ ناكهت؟ ((كهعبه یا ل بهرا من.. ئنیهتا نڤێژێ من ئینا، الله أكبر)) لێڤێت وى هژیان، قامچى لێ دبارین بهلێ ئهو ب چو نهدحهسیا، ل دویماهیێ د بن لێڤلێڤكان ڕا گۆت:
ــ (إنك حمید مجید.. السلام علیكم).
عهطوه ب نك ڤه چوو:
ــ ما تو نائاخڤى؟
بهرسڤ نهدا..
ــ ئهرێ تو ژ چ هاتیه چێكرن؟؟
عهبدلحهمیدى گۆت:
ــ ژ ههڕیێ..
ــ پیسۆ!
ــ خودێ ته بهێلت..
عهگوه ب كهرب ڤه ل وان لهشكهرێن ل دهور وبهرێت خۆ خوڕى:
ــ بهێلن..
پاشى ل وان زڤڕى وگۆت:
ــ كهلامچێت وى ڤهكهن..
وپشتى دو سێ دهقیقهیهكان عهبدلحهمید ل سهر خیزى یێ هاڤێتى بوو، نال مالا وى بوو، و د گهل هندێ ژى وى ب دهنگهكێ رهزیل ڤه دگۆت:
ــ یا خودێ.. یا خودێ.. یا خودێ..
