ناڤبرا سێزدێ
عهطوه ب ڤى ڕهنگى رازى نهبوو، ڕۆژهكێ هزر نهدكر ژنهك دێ ههبت ڤێ چهندێ د گهل دهزگرێ خۆ كهت، دهزگرێ وێ ئهوێ هێژا وخودان مهنصبهكێ بلند.. زهلامێت وهكى وى ئهگهر ل دهزگههێت حوكمهتێ فهرمانان بدهن ههر وێ گاڤێ فهرمانێت وان دێ ئێنه ب جهئینان، بیرا وى دئێت دهمێ هۆنهرمهندهكێ داخوازا ئێك ژ وان ب جه نهئیناى، ڤێجا وى ل پێش چاڤێت كهس وكارێت وێ ب زۆرى ئینا ووێ چو مهفهر نهدیتن وخۆ ب دهستان ڤه بهردا! و ب دههان چـیـرۆكـێـت ب ڤى ڕهنگى وى بهیستینه وگهلهك جاران وى ب چاڤێت خۆ دیتینه، ما بۆچى دێ دویر چت؟ گهلهك ژ ڤان كهسێت هه یێت مهزن (شذووذا جنسى) یا ل نك ههى، هندهك ژ وان ڤێ چهندا هه دبێژنه وى ب خۆ.. بهلێ ئهڤ چهنده بهایێ وان زهلامان نائینته خوارێ، تێرا وان ههیه ئهو بۆ كاربدهستان ددلسۆز بن، وپشتى هنگى ههچیا وان دڤێت بلا ئهو بكهن، چو ئاستهنگ د ناڤبهرا وان ودزیێ وورگرتنا بهرتیلان وژێ ستاندنا مالى دا نینه، دورسته بۆ وان ئهو بازرگانیێ ب پارهیێت قاچاخ بكهن، یان د ڕوینشتنێت خۆ یێت تایبهت دا تهماشه بكهنه فلمهكێ پویچ، دا پشتى هنگى ئــهو ب خــۆ ژى ب بــێ شــهرمــى ڤــه وى كارى بكهن یێ وان د وى فلمى دا دیتى..
ما بۆچى دێ دویر چین؟ مانێ ئهو ب خۆ ههر كهسهكێ دژى دهسههلاتێ ڕاوهستت ژههر ددهن یان دكوژن، چ ل ناڤـ وهلاتى ب خۆ بت یان ژى ژ دهرڤهى وهلاتى بت، گهلهك تشت ل وهلاتى و ژ دهرڤـه ژى دئێنهكرن بـێـى دیـنهك یان وژدانهك وان ژ ڤان تشتان بدهته پاش.. ئـهو كـار هـهمــى یێت بووینه ژ تشتێت ڕهوا ودورست، ویێت بووینه ڕێك ژى بۆ دیاركرنا دلسۆزیێ بۆ دهسههلاتێ، ڕاسته د ناڤ وان دا هندهك كهس ههبوون ب ڤێ پیساتیێ درازى نهبوون، وپشكدارى ژى تێدا نهدكر، بهلكى دلێت وان ژ نهڤیانا ڤێ چهندێ دتژى بوون بهلـێ پا وان ژى فهرمانێت كاربدهستان ئێكسهر ب كار دئینان، ڕۆژهكێ ئهفسهرهكێ ژ ڤى ڕهنگى ل پێش چاڤێت عهگوهى ئاخفتن ژ گرتیهكێ ئیخوانان وهردگرتن، دهستهكێ تزبیان ڤێ بوون وزكر د بهر ڕا دكر، ودهمێ قامچى دبارینه سه لهشێ وى ههژارى ووى ههوار دكر وكهس د ههوارێ نهدهات، ئهفسهرێ (چاك) ژ ڤێ گۆتنێ پێڤهتر نه دگۆت:
ــ كوڕێ من، ئعترافێ بكه دا ژ ڤێ عهزابێ خلاس ببى.. ئهڤه د بێ رهحمن، ئهو ته ناهێلن حهتا ئعترافێ نهكهى.
ــ بهگ مانێ تو دزانى ئه چو تشتى ناڤهشێرم..
ئهفسهرێ (چاك) سهرێ خۆ هژاند وگۆت:
ــ ئهز چو نزانم.. من چو نهدیتیه، بهس ئاخفتنان ئهز تۆمار دكهم.
ــ من ژ وان بپارێزه.. ئهزێ بێ گونههم.
ــ تو دێ خۆ پارێزى ئهگهر ئعترافێ بكهى.
* * *
بێهنا عهطوه چوو سهرێ دفنێ، ب چى ڕهنگێ ههبت لازم بگههته سهرهكى د گهل نهبیلایێ، هندهك جاران دكهفته دلێ وى ئهو نهبیلایێ بڕهڤینت وهكى گهلهك كاربدهست دكهن بهلێ ئهو نهدوێریا وهكى وان بكهت، چونكى ئهو ژ وان كێمتره، پشتى هنگى نهكو كارێ وى ئاشكهرا ببت ڤێجا مهنصبێ وى ژ دهستان دهركهڤت، ئهو مهنصبێ ل بهر دلێ وى گهلهكێ شرین وئهو گهلهكێ پێ شاهى، وههر جارهكا ئهو مهنصب ژ دهست وى چوو ئهو دێ مرت، وهكى وێ ماسیێ ئهوا ژ ئاڤێ دئیننهدهر، لهو كره دلێ خۆ ئهو وێ ماره بكهت.. ئهگهر خۆ حهفتیهكێ بت ههیڤهكێ بت یان چهند ههیڤهكان بت، پاشى بلا وێ بهاڤێته سهر شارعى سهرشۆڕ وبێ خودان، پشتى وى تشتى ژێ چێ دكهت یێ وى دڤێت، وتێنكا خۆ پێ دشكێنت، ئهو نهشێت چو جاران دهمهكێ درێژ د گهل ژنكهكێ ب تنێ بقهتینت، خۆ د گهل زهلامهكى ژى، بێ گومان ئهڤ چهنده پاشكهفتنهك بوو بۆ وى ژ وێ ڕێبازێ یا وى بۆ خۆ داناى، بهلێ ژیان پێشكهفتن وپاشكهفتنه، ئهو ل دهمێ شهڕێ فلسطینــێ یێ فێرى ڤى تشتى بوى. ل ئهسكهندهریێ ئهو د گهل نهبیلایێ چوو سینهمایێ، چاڤێت وێ مابوونه ب فلمى ڤه، دهستێ وێ گرت.. وێ نهڤیانا خۆ بۆ وى دیار نهكر، خۆ بسته كر وپشتا دهستێ وێ ماچى كر، ل تاریێ ب دو چاڤێت وهكى برویسیێ بهرێ خۆ دا وى، پاشى جارهكا دى ل فلمى زڤڕى، پێ حهسیا كو دهستێ وێ رح تێدا نینه، یێ ساره وهكى بهفرێ.. پتر وهكى یێ مریانه، خۆ ل سهر كورسیكێ لڤلڤاند، د فلمى فوكرى چـو ژێ نــهزانــى، ئهو جڕهكێشیا د فلمى دا دهــاتــهكــرن ئهو ب لایێ خۆ ڤه نهدكێشا، بهس چاڤێت وى ل ژنكێت جوان بوو دهمێ ب نازكى دهاتن ودچوون.. بێهنا وى تهنگ بوو, دهم ل بهر وى گران دبۆرى, دڤیا ب زویترین دهم فلم خلاس ببت، ل نهبیلایێ زڤڕى.. وێ هاى ژ تشتهكى نهبوو ژ بهر ڕویدانێت فلمى، عهطوهى گۆت:
ــ ئهرێ چ تشت ژ ڤى فلمى ته لایێ خۆ ڤه دكێشت؟
وهكى وى كهسێ ژ خهونهكێ هشیار ببت وێ هشێت خۆ ئینانه سهرێ خۆ وگۆت:
ــ ته چ گۆت عهطوه؟
ــ چیرۆكا ڤى فلمى ههمى یا ڤالایه..
ــ چاوا.. ئهو ل سهر هندهك هزر وبیرێت نوى دئاخڤت.. ما تو نابینى؟
ــ سهرێ من لێ بوو ئێش..
چانتێ خۆ ڤهكر وگۆت:
ــ ئهسپرین یێت د گهل من ههین.
ــ شهقى نهبه.. چى گاڤا ئهم ژ ڤێرێ دهركهفتین دێ چێبم.
ب حێبهتى ڤه بهرێ خۆ دایێ:
ــ ئهڤێ چیرۆكێ خهلاتێ ئۆسكار ودهه خهلاتێن دى یێت جیهانى ژى یێت وهرگرتین..
چو پویته ب گۆتنا وێ نهكر، ملێت خۆ هژاندن وگۆت:
ــ نه شهرته ئهو تشتێ ل بهر بیانیان یێ خۆش بت ل بهر من ژى یێ خۆش بت..
ــ بهلێ هندهك تشتێت ههین ههمى مرۆڤان دڤێن.
ل فلمێ خۆ زڤڕى.. بهلێ عهطوه ب هزرێت خۆ ڤه چوو جیهانا خۆ یا خۆشتڤى، گرتیخانهیا (حهربى)، بیریا صهیێت خۆ كر، نه كو هندهك نهخۆشیان گههیننێ، بهلێ ما ئێك ههیه تهخسیریێ د دهر حهقا وان دا بكهت؟! ههر وهسا بیریا گرتیان كر، دلێ وى دگۆتێ ئهگهر ئهو یێ حازر نهبت ئهفسهر باش ب كارێ خۆ ڕانابن، نهخۆشیا وى زێده بوو، پشتى ئهو فراڤینێ د گهل نهبیلایێ دخۆت لازم بزڤڕت، وبهرى ئهو بچته مالا خۆ دڤێت سهح بكهته گرتیخانهیێ، دا بزانت كانێ شۆل چاوا ب ڕێڤه دچت، ئهو ب خۆشیهكا زێده دحهسیێت گاڤا ل پشت مێزا خۆ دڕوینت..
دهمهكى ئهو ژ هزرێت خۆ هشیار بوو، دیت نهبیلا یا دكهته گرى ویا دڕهجفت، ب ترس ڤه گۆتێ:
ــ چ چێبوویه؟
ــ تشتهكێ ب ترسه گهلهك..
ــ ئهز تێ ناگههم..
ــ ما تو نابینى؟ بێ وژدانا یارێ وێ كوشت..
ــ ڤێجا ما چیه؟ خهلك ههر ڕۆژ دمرن..
ــ مرۆڤهكێ ڕاستگۆ وشهریف بوو، دلێ خۆ دابوویێ.. وهكى پێغهمبهران د ناڤ كۆمهلێ دا پاك دژیا.. ئهڤه گونهههكا گهلهكا مهزن بوو.
عهطوهى دهستێ وێ گرت وگۆت:
ــ ئهڤه چیرۆكه.. چ ڕاستى بۆ نینه..
ــ كریارێت وێ دڕاستن.. ئهم یێ ب چاڤێت خۆ دبینین..
ــ بهس بۆ خۆ ژبیر ڤهكرنێ یه..
ــ وبۆ چاككرنا مرۆڤانه ژى عهطوه..
ــ یارا من سینهما ژى بازرگانیه.. ئهو پاران ژ ههوه چێ دكهت وههوه ب شرانقهكا بچویك بهنج دكهت..
ــ نه ههمى گاڤان..
ژ جهێ خۆ ڕابوو و ب مجدى ڤه گۆت:
ــ دا بچین..
ــ چاوا بچین؟ هێشتا چیرۆك ب دویماهى نههاتیه..
ــ مانێ قههرهمان مر..
ــ عهطوه مرن نه دویماهیه.. قههرهمان هێشتا یێ ماى.
ــ یێ ماى بۆ ڤهشارتنێ..
ــ نهخێر.. خهلك دێ ڕابنه سهر خۆ، سهح بكێ.. چاوا وان دۆر ل تاوانبارێن كوژهك گرت.. من نهگۆته ته؟ چیرۆك هێشتا یا ماى، لهشێ قههرهمانى مر بهلێ هزروبیرێت وى مانه ساخ وكارتێكهر.. بهرێ خۆ بدێ چاوا ههمى گرتن وسهر شۆڕ برن، ئهڤهیه مرنا دورست بهرێ خۆ بدێ..
عهطوه ڕوینشت.. دهستێ وێ شداند وگۆت:
ــ نهبیلا ما تو دین بووى؟ خهلك ههمى یێ سهح دكهنه ته..
ــ ئهڤهیه قههرهمانا دى..
ــ بێژه: بیژنا دى..
ــ وێ پشتى مێرێ خۆ یێ شههید ئالا یێ هلداى..
ــ هشێت خۆ بینه سهرێ خۆ نهبیلا.. ئهڤه نابت، ئهو دێ بــۆ خــۆ ل مـــێــرهكــێ دى گهڕیـێــت، ژن بێ زهلام ناقهتینت، نهخاسم ل ئهمریكا..
ــ تو د چیرۆكێ ناگههى.
ئهڤه گۆت وبهرێ وێ ل شاشێ بوو، عهطوه كهنى وهێدى گۆت:
ــ بهس ئهز بهرێ خۆ بدهمه سهرێ چیرۆكێ دێ زانم كانێ دویماهیێ دێ چ چێ بت..
چیرۆك نه بهس ئهو ڕویدانن یێت چێ دبن.. یا گرنكتر هزر وبیرێت وێنه..
ــ هزر وبیر چنه؟
بهرسڤا وى نهدا.. بهرێ وێ ل فلمى بوو، عهطوه نهچار بوو بێ دهنگ بڕوینته ب ڕهخ وێ ڤه حهتا فلم خلاس دبت وپهیڤا (دویماهى) دهردكهڤت، یا ل سهر وى ئهوه ئهو بێهنا خۆ فرهه بكهت، چونكى ژن ــ ب هزرا وى ــ وهكى بچویكانه ب تشتێت بێخێر ودرهو ڤهموژیل دبن، لهوا ئهو بهس ب كێر تهختى ویاریان دئێن، ئهو خهلك دخهلهتن ئهوێت دبێژن: ژن یا خودان هزر وبیره، شۆلا ژنێ بهس چێكرنا خۆشیێ ویارى وئهزمان درێژینه.. وهسا دیاره وێ چو مفا بۆ خۆ ژ وێ ڕۆژێ وهرنهگرتیه یا ئهو تێدا هاتیه گرتن، ل گوندى وى گوهــ لێ دبوو خهلكى دگۆت: "پهراسیهكا كچێ بشكێنه دێ دو پهراسى بۆ چێ بن" ئهڤه ڕاسته، ژن چێكریهكا عنتیكهیه مرۆڤ ب زهحمهت تێ بگههت، عهطوهى ددیت بهس قامچى نهێنیا ئاشكهرا دكهت، وتشتێ بهرزه دیار دكهت، ئێشاندن ئهو كلیله یا دهرگههێت گرتى ڤهدكهت، ئێشاندنه یا ژ مرنێ نهخۆشتر..
نێزیك بوو سهعهت ببته ئێك، ههردو پێكڤه ل شارعێ (محطة الرمل) ل ناڤدارترین مهیدانا ئهسكهندهریێ دچوون، عهطوهى بهرچاڤكهكا ڕهش یا دو دهستكێت زهر پێڤه دابوو بهر چاڤێت خۆ، ب خۆمهزنكرن ڤه ب ڕهخ نهبیلایێ ڤه دچوو، دهمێ دیتى ئهو خۆشا دچت ویا دچته د ناڤ خهلكى دا، گۆتێ:
ــ دڤێت ڕێڤهچوونا ته یا ژێهاتى بت، ویا هێدى بت..
ــ ئهم یێ ل شارعى..
ــ ل شارعى ژى دڤێت مرۆڤ ب تۆره ب ڕێڤه بچت..
چو پویته نهدا گۆتنا وى، ودهستێ خۆ درێژكره خوارنگهههكا كێم بها وگۆت:
ــ سهح بكێ.. ههمى نیڤرۆیان ئهز فراڤینێ ل ڤێرێ دخۆم..
عهطوه ب ڤێ چهندێ رازى نهبوو، وخۆ پاشڤهبر وگۆت:
ــ ئهڤ جهه ب كێر ته نائێت..
زانى ئاخفتنا د گهل وى یا بێ فایدهیه، لهوا گۆت:
ــ ته كیڤه دڤێت دا بچینێ..
ئهو خوارنگهها وى ئهو بریێ دهرهجه ئێك بوو، جههكێ جوان.. گلۆپێت شۆركرى یێت گرێداى ب بانهكێ خوشكۆك ڤه، كورسیكێت ب ڕهنگهكێ تازه هاتینه ب ڕێزكرن، پتریا وان یێت ڕوینشتى بیانى بوون، وهندهك ژ مهزنێت باژێڕى بوون، عهطوه ب لایێ قورنهتهكى ڤه چوو دویر ژ ڕێكا هاتن وچوونێ، ههردو ل بهر مێزهكا بچویك ڕوینشتن، خزمهتكارى لیستهیا ناڤێت خوارنان پێشكێشى وان كر.. ئێكهمین جار پێشكێشى نهبیلایێ كر، وپشتى وێ خوارنهك بۆ خۆ هلبژارتى عهگوهى ژى وهكى وێ كر، بهرى خزمهتكار بچت گۆت:
ــ وڤهخوارن بهگ؟
ــ بهلێ.. وێسكى.
نهبیلایێ ب بێخیرهتى زاد دخوار وكهفتبوو دالغهیان، هێشتا هزرا خۆ د چیرۆكا فلمى دا دكر، بێن بۆ بێنێ بیریا سهلوایێ دكر، ڕویێ پهتخى یێ تژى برین، وئهو دوڕندهیێت ل ئاڤاهیێ موخابهراتا گشتى دلهییزن.. كریارێت گیانێ وێ دههژینن.. بهرێ وێ ب عهطوهى كهت.. دیت چهنگال وكێرك د دهستان دا بوون ووى گۆشت پرت پرت دكر و ب لهز دخوار، وبێن بۆ بێنێ دا پهرداغهكى تژى كهت و ب سهر دا كهت، وبێژت:
ــ ما تو ژى ڤهناخۆى؟
ــ ئهو دا بێژت:
ــ دێ ئاڤێ ڤهخۆم..
دویماهیێ عهطوهى گۆت:
ــ ئهڤه ژى ههر ئاڤه.. ئهگهر ههر ڕۆژ تو دو پهرداغێت وێسكیێ ڤهخۆى ئێشێت ته ههمى دێ چن، ودلێ ته دێ تژى خۆشى بت..
بهرێ وێ ما لێ.. چاڤێ وى ڤێ كهفت.. گڕنژى وگۆت:
ــ تو هزرا چ دكهى؟
ــ تو زهلامهكى چو جاران هزرێت سوباهى ناكهى..
ــ ئهز ناگههم..
ــ دل وهشێت ته ب ڕهنگهكێ غهریب یێ ل بن كونترۆلا ته..
ــ ما نابێژن: پاشهڕۆژ یا د دهستێ خودێ دا؟
ــ بهلێ وهیه..
ــ مادهم ئهو نه ب دهستێ مهیه بۆچى هزرێت وێ بكهین؟
نهبیلایێ گۆت:
ــ هند كارى بۆ دنایا خۆ بكه ههر وهكى تو چو جاران نامرى..
ب تڕانه ڤه گۆتنا وێ تمام كر:
ــ وهند كارى بۆ ئاخرهتا خۆ بكه ههر وهكى سوباهى دێ مرى..
ــ بهلێ وهیه..
ــ ئهز ژ مرنێ ناترسم.
ــ بهلێ بێ گومان ئهو ههر دێ ب سهر ته دا ئێت عهطوه.
ــ ئهڤه نه ب دهستێ مهیه..
وێ دهڤێ خۆ ژ خوارنێ ڕاوهستاند وگۆتێ:
ــ ته باوهرى ب خودێ ههیه؟
بێنهكێ خۆ بێ دهنگ كر، پاشى چاڤێت خۆ گرتن.. كێرك وچهنگال ژ دهستێت خۆ بهردان.. پاشى گڕنژى وگۆت:
ــ ما خونه تهحقیقه؟
ــ ته بهرسڤا من نهدا..
ــ یارا من، ئهگهر خودایهك ههبا ستالین ب سهر نهدكفت وحهسهن ئهلبهنا نهدهاته كوشتن..
تبلێت وێ ڤهلهرزین، كاچك ب زاد ڤه بهردا وگۆت:
ــ دیاره وێسكیێ كار د سهرێ ته دا كر؟
یێ بهردهوام بوو د خوارنا خۆ دا.. وگۆت:
ــ ته ڕاستى بڤێت.. ئهز چو جاران هزرێت خۆ د ڤان تشتان دا ناكهم..
ــ ئهڤ تشته بناخهیه..
ــ نه ل نك من..
پشتى دهمهكى بێ دهنگ بووین، وى گۆت:
ــ د گهل هندێ یا پشت ڕاست به.. بابێ من موسلمانهكێ چاك بوو، گهلهك تشت ژ خودێ وفهرمانێت وى ئهوى یێت نیشا مه داین، ئهڤه چهند ساله من دان وستاندن ل دۆر ڤى بابهتى نهكرینه.. د گهل هندێ ژى من باوهرى ب ههبوونا خودێ ههیه..
نهبیلایێ گۆت:
ــ ئهگهر مرۆڤى باوهرى ب خودێ ههبت دێ فهرمانێت وى ب جـهــ ئینت.
ــ ئهڤه مهسهلهكا دیه، مانێ د چو كتێبێت خودێ دا ناڤێ وێسكیێ نههاتیه!
ودهست دا كهنیێ.. پاشى پهرداغهك تژى كر و ب نیڤى كــر.. وان هــنــد دیــت زهلامهك ل بهر چاڤێت وان دیار بوو.. ب تۆره ڤه تهمهنهك بۆ عهطوهى ڤهدا وگۆت:
ــ ئهز بهنى ته چ فهرمان نینن؟
عهطوهى كورت ڤهبڕى وگۆت:
ــ سوپاس.. سلاڤێت من بگههینه عهبدلمهجید بهگێ..
زهلامى ب تۆره ڤه خۆ چهماند حهتا بهرێ وى ب عهردى كهفتى، پاشى چهپ دا وچوو، بهرێ نهبیلایێ ما ل وى .. دیت ئهڤى زهلامى گهلهك خولكێ وان ددا یێت ئهو گرتى وبریه موخابهراتێ.. بێ گومان ئهو نه ژ وانه، بهلـێ ئـهو ژى ژ وى تهرزیه.. نهبیلایێ گۆت:
ــ ئهڤه كیه؟
ــ ئێك ژ جاسووسێت مهیه..
ــ دبت وى جهێ من نیشا ته دابت؟
عهطوه كهیفخۆش بوو، كهنى وگۆت:
ــ تو كیڤه بچى تو نهشێى ژ توخویبێ میرگهها من دهركهڤى..
وێ ب ڕكدارى ڤه گۆت:
ــ عهردێ خودێ ژ جیهانا ته یا بچویك بهرفرههتره..
وى دهستێ خۆ هژاند:
ــ تو چ بكهى وكیڤه بچى ههر دێ د ناڤ تبلێت من دا بى.. هۆسا..
بڕكهك هاتێ.. دهستێت خۆ لێكدان، خزمهتكار هات، عهطوهى دهڤێ خۆ ب كهفیكهكا سپى پاقژكر و د بهر ڕا گۆت:
ــ حهقێ ته..
خزمهتكارى كاغهزهكا بچویك كره د دهستێ وى دا.. عهطوهى دهست دا بهریكا خۆ دا جزدانكێ بینتهدهر.. گۆت:
ــ بهس چارده جونهیه؟
پاشى وى پازده جونهیه ژ جزدانكێ دهرێخستن وهاڤێتنه سهر مێزێ وگۆت:
ــ یێت زێده بۆ ته بهخشیش..
خزمهتكارى ب كهیف ڤه گۆت:
ــ خودێ عهمرێ ته درێژ كهت.. وعهمرێ خاتوینێ ژى.
پشتى خزمهتكار چووى نهبیلایێ گۆت:
ــ دانهكێ خوارێ ب مهعاشێ منێ ههیڤهكێ؟
دلێ وى تژى خۆشى بوو، دهستێ وێ گرت و ب كهیف ڤه گۆت:
ــ ملیوون جونهیه وپێلاڤا ته! تو ل نك من ژ ههمى خزینێت جیهانێ ب بهاترى.
چانتێ خۆ هلگرت و د بن لێڤ لێڤكان ڕا گۆت:
ــ سوپاس.
د تومبێلێ دا ب ڕهخ وى ڤه ڕوینشت، وى ئهو ب نك ئۆتێلێ ڤه بر، دهمێ گههشتینه ئۆتێلێ وى گۆتێ:
ــ ئهز دێ ل هیڤیا ته بم، ژ حهفتیهكێ زێدهتر ههدارا من نائێت.. پشتى تو دزڤڕى ب دو سێ ڕۆژان ئهز دێ ته ماره كهم دا ژ ڤێ نهخۆشیێ دهركهڤین.. من تو بۆ خۆ ب تنێ دڤێى.. باى باى!
دهنگ ژ خرخالێت تورمبێلێ بلند بوو دهمێ وى دهست ب هاژۆتنێ كرى، بهرێ نهبیلایێ ما ل وى حهتا وى شارعێ درێــژ خــلاس كرى و ل پێش چاڤان وندا بووى، گاڤا ڤیاى ب ژۆر كــهفـتـه ئـۆتـێـلـێ ڕاوهستیا وپشتا خۆ دا دهرگههى.. و ب نك جادێ ڤه چوو، ژ دل دڤیا تێكهلى خهلكى ببت وباخڤت.. دا نهخۆشیێت خۆ ژ بیر بكهت..
