دەسپێك
هەر خودان باوەرەكێ باش هزرا خۆ د ژییێ خۆ یێ كورت دا بكەت دێ زانت كو ل دەمەكێ نێزیك ئەو دێ ژ ڤێ دنیایێ بار كەت ، ودێ پێ پشت دەتێ وقەستا خودایێ خۆ كەت ، و ل بەر دەستێ وی دێ ئامادەیی مەحكەمەیەكا مەزن بت ، وچـونـكی نڤێـژ ستوینا ئیسلامێ یا سەرەكییە د حەدیسەكا دورست دا ئەوا ئیمامێ طەبەرانی ژ پێغەمبەری ـ سلاڤ لـێ بن ـ ڤەدگوهێزت هاتییە ، پێغەمبەر ـ سلاڤ لـێ بن ـ دبێژت : [ أول ما يحاسب به العبد يوم القيامة الصلاة ، فإن صلحت صلح له سائر عمله ، وإن فسدت فسد سائر عمله ـ ئێكەمـیـن تـشتێ ڕۆژا قیامەتێ حسێبا وی د گەل عەبدی دئێتەكرن نڤێژە ، ڤێجا ئەگەر ئەو یا باش بوو كارێ وی یێ دی ژی هەمی دێ یێ باش بت ، وئەگەر ئەو یا خراب بوو كارێ وی یێ دی ژی هەمی دێ یێ خراب بت ] .
ژ بەر ڤێ چـەنــدێ دەمێ مرۆڤ ئایەتێن قورئانێ وحەدیسێن پێغەمبەری ـ سلاڤ لـێ بن ـ دخوینت دزانت كو نڤێژێ د تەرازییا شریعەتی دا بهایەكێ مەزن هەیە ، وهەما هند بەسە بێژین : پێغەمبەری ـ سلاڤ لێ بن ـ د حەدیسەكێ دا ( وەكی ئیمامێ موسلم ژجابری ڤەدگوهێزت ) دبێژت : [ إِنَّ بَيْنَ الرَّجُلِ وَبَيْنَ الشِّرْكِ وَالْكُفْرِ تَرْكَ الصَّلاة ـ د ناڤبەرا زەلامی وشركێ وكوفرێ دا نەكرنا نڤێژێ یە ] یەعنی : هـێـلانـا نڤێژێ یە وی توخویبی ڕادكەت یێ كو د ناڤبەرا مرۆڤی وكوفرێ دا هەی .
وچونكی گەلەك ژ مە ب دورستی خەمێ ژ خۆشارەزاكرنا د (شەعائیرێن) دینی دا ناخۆن ، وعیبادەت وەكی عەدەتەكی ژ باب وباپیـران وەرگرتییە ئەم دبینین گەلەك كەس د ناڤ مە دا هەنە ژ نەزانین عیبادەتی ب ڕەنگەكێ خەلەت دكەن ، وهندەك جاران دویر نینە ئەڤ خەلەتییە ببنە ئەگەرا نەقەبویلكرنا وی عیبادەتی یێ ئەو دكەن .
ودا نڤێژێن مـە ددورست بن ب وی ڕەنگی یێ ژ پێغەمبەری ـ سلاڤ لێ بن ـ هاتییە ڤەگوهاستن ، مە ڤیا ب درێژی بەحسێ فقهێ نڤێژێ بكەین: كانێ بهایێ نڤێژێ د ئیسلامێ دا چەندە ، و چ شەرت بۆ كرنا نڤێژێ هەنە ، ونڤێژا دورست چاوا دئێتەكرن ، و چ خەلەتــی هەنە ئـەم ئەڤرۆ د نڤێژێن خۆ دا دكەڤینێ ، هیڤییا مە ژ خودێ ئەوە هاریكارییا مە بكەت كو ئەم ب دورستی عیبادەتێ وی بكەین .
