خەونا ژ درەو وجزایێ دژوار ل ئاخرەتێ
دبت هندە كەس سستیێ د گۆتنا خەونێ دا دكەن ، یەعنی : دەمێ ئەو خەونەكا خۆ بۆ خەلكی ڤەدگێڕن ژ قەستا هندەكێ لـێ زێدە دكەن ، یان ژێ كێم دەن ، یان ژی هەما خەونەكا هەر وان نەدیـتـی ژ درەو ژ نك خۆ چێ دكەن ودبێژن : فلان خەون مە دیتیە .. هەر وەكی درەوكرنا د گۆتنا خەونێ دا ل نك وان درەو نینە ، وئەڤە هزرەكا گەلەكا خەلەتە ، چونكی حەدیسێن دورست ل سەر هندێ هاتینە كو ئەڤ ڕەنگێ درەوێ ژ ڕەنگێن دی یێن درەوێ خرابتـرە ، ژ وان حەدیسان :
1 ـ عەبدللاهێ كوڕێ عومەری دبێژت : پێغەمبەری ـ سلاڤ لـێ بن ـ گۆت : [ إِنَّ مِنْ أَفْرَى الْفِرَى أَنْ يُرِيَ عَيْنَيْهِ مَا لَمْ تَرَ ـ درەوا ژ هەمیێ درەوتر ئەوە مرۆڤ وی تشتی نیشا چاڤێن خۆ بدەت یێ وی نەدیتی ] ( بوخاری ڤێ حەدیسێ ڤەدگوهێزت) یەعنی : ئەو بێژت من فلان خەون یا دیتی وئەو ب خۆ وی ئەو نەدیتیە .
2 ـ عەبدللاهێ كوڕێ عەبباسی دبێژت : پێغەمبەری ـ سلاڤ لـێ بن ـ گۆت : [ مَنْ تَحَلّمَ بِحُلْمٍ لَمْ يَرَهُ كُلّفَ أنْ يَعْقِدَ بَيْنَ شَعيْرَتَيْنِ ، وَلَنْ يَفْعَلَ ، وَمَنِ اسْتَمَعَ إلَى حَديْثِ قَوْمٍ وَهُمْ لَهُ كارِهونَ أوْ يَفِرّونَ مِنْهُ صُبَّ فِي أذُنِهِ الآنُكُ يَوْمَ القيامةِ ، وَمَنْ صَوَّرَ صورةً عُذِّبَ ، أوْ كُلِّفَ أنْ يَنْفُخَ فيها وَلَيْسَ بِنَافِخٍ ـ هەچیێ بێژت من خەونەك دیتیە وئەو ب خۆ وی ئەو نەدیتیە دێ فەرمان لـێ ئێتەكرن ئەو دو دندكێن جەهی پـێكڤە گرێدەت وئەو وێ ناكەت وهەچیێ گوهێ خۆ بدەتە ئاخفتنا هندەك كەسان وئەو ب خۆ وان نەڤێت ئەو گوهداریا وان بكەت یان ئەو ژێ دڕەڤن ڕۆژا قیامەتێ رصاصێ حەلاندی دێ كەنە گوهێن وی ، وهەچیێ تەصویرەكی چێ كەت دێ ئێتە عەزابدان ، یان دێ فەرمان لـێ ئێتەكرن ئەو رحێ بدەتێ وئەو نەشێت رحێ بدەتێ ] (بوخاری ڤەدگوهێزت ) ئیمامێ گهبەری دبێژت : ئەڤ گەفا دژوار ل وی كەسێ ژ درەو بێژت من خەونەك دیتیە ، هەر چەندە خرابیا درەوا هشیاریێ پتـرە ژی ..
ژ بەر هندێیە چونكی درەوا د خەونێ دا درەوەكە ل سەر ناڤێ خودێ دئێتەكرن كو تشتێ وی نەدیتی خودێ نیشا وی دایە ، ودرەوا ل سەر ناڤێ خودێ بت مەزنـتـرە ژ وێ درەوا ل خەلكی دئێتەكرن ..
ودرەوا د خەونێ دا درەوەكە ل سەر ناڤێ خودێ ژ بەر وێ حەدیسا دبێژت : خەون پشكەكە ژ پێغەمبەرینیێ ، وتشتێ پشكەك ژ پێغەمبەرینیێ بت ئەو ژ نك خودێ ڤەیە .
