حهسهنێ بهصرى
ئهوێ دیتنا وى خودێ ل بیرا مرۆڤى دئینا
ڤێ جارێ مه ل بهره بهرپهڕێن ژینا مرۆڤهكێ ژ صنفهكێ تایبهت ڤهكهین، لهو دڤێت باش كارێ خۆ بكهین.. مرۆڤهك بوو ئهوێن ئهو دیتى وهصفا وى ههمى د پهیڤهكێ دا كۆم دكر، دگۆتن: ((دهمێ مرۆڤى ئهو ددیت بیرا مرۆڤى ل خودێ دهاتهڤه)).
ئهگهر ته بهرێ خۆ دابایێ دهمێ ئهو ب ڕێڤه دچوو، تو دا بێژى ئهو ئێخسیرهكه یێ هاتییهگرتن، ویێ دئێتهبرن دا سهرێ وى ببڕن.. گاڤا بهحسێ جههنهمێ ل نك وى هاتباكرن وه ل وى دهات تو دا بێژى جههنهم بهس بۆ وى یا هاتـییـه چـێكرن.. زهلامهك بوو هـاتـبـوو د ڤێ دنیایێ دا؛ دا دنیا ب ئهزمانێ وى باخـڤـت، پێغهمبهر نــهبــوو، وقـــهدهرا وى یـا وهسـا بوو ئهو ل زهمانێ چو پێغهمبهران ژى نهبت، بهلێ یێ تێكهلییا وى كربا هیچ گومان بۆ چێ نهدبوو كو ئهو ژ بهرمایێن پێغهمبهراتیێیه، گاڤا دئاخڤت دا بێژى دل ورح ودێمێ وى ههمى د گهل ئهزمانێ وى یێن دئاخڤن، لهو هێزهكا وهكى یا مهغناطیسى وى ههبوو نهبوو كێشانا ئاسنى بهلكى بۆ كێشانا دلێن مرۆڤان، حیكمهت ژ دهڤى دپهشى لهو دهمێ دئاخفت مرۆڤى ڤیابا نهڤیابا دا گوهێ خۆ دهتێ حهتا وى ئاخفتنا خۆ ب دویماهى ئینابا..
ڕۆژا ئهو مرى زهلامهك د باژێڕى دا نهمابوو نڤێژا ئێڤارى ل مزگهفتێ بكهت، لهو ئهو جارا ئێكێ بوو پشتى (بهصرا) هاتییه ئاڤـاكرن نـڤـێـژا ب جماعهت لێ نهئێتهكرن، هوین دزانن بۆچى؟
- چونكى زهلام ههمى د گهل جهنازهیێ (حهسهنێ بهصرى) دهركهفتبوونه سهر قهبران، دا بێژى كفنهكێ سپى یێ د بهصرا ههمییێ ئالاندى! وئهگهر مرنێ ههمییێ ئێك مهعنا ههبت ژى، دهمێ (عهزیزێ) هندهكان دمرت كانێ ئهو چهندن هند مهعنا ژ مرنێ دچن، لهو مرنا حهسهنى هندى هژمارا خهلكێ بهصرا مهعنا ژێ دچوون..!
بهلێ.. ڤێ جارێ ئهم دێ ل دیوانا ئیمامێ حهسهن ئاماده بین، ئـهوێ ب حهسهنێ بهصرى دئێته نیاسین، بهلێ تشتێ مرۆڤى حێبهتى دكهت دهمێ وى دڤێت بهحسێ حهسهنى بكهت ئهوه مرۆڤ نزانت ژ كیڤه دهست پێ بكهت، وبهحسێ چ بكهت و چ نهكهت..
❖دهسپێكهكا پیرۆز:
ل باژێڕێ (مهدینا مونهووهر) ل نێزیكى مالهكێ ژ مالێن پێغهمبهرى -سلاڤ لێ بن- دو سالان بهرى ئیمامێ عومهر شههید ببت، حهسهن هاتبوو سهر دنیایێ، بابێ وى ودهیكا وى ههردو عهبد بوون هاتبوونه ئازاكرن، دهیكا وى جاریا (أم سلمه)یێ بوو، وگهلهك جاران دهمێ كارهك بۆ دهیكا وى چێ دبوو، وێ زارۆكێ خۆ یێ ساڤا دهێلا ل نك دهیكا موسلمانان (أم سلمه)یێ حهتا دزڤڕى، وهندهك جاران دهمێ وى دكره گرى، (أم سلمه)یێ پــاخــلا خـــۆ دكـــره د دهڤـــى دا؛ دا وى تــهنــا بـكــهت، لهو دگۆتن: حهسهنى پهیوهندییهك ب پێغهمبهراتییێ ڤه ههبوو، ودبێژن: دهمێ حهسهن یێ ساڤا هندهك جاران (أم سلمه)یێ ئهو دهنارته نك صهحابییان ل مزگهفتێ، وئاشكهرایه كو مهزهلكا وێ ب رهخ مزگهفتێ ڤه بوو، وجارهكێ ژ وان جاران ئیمامێ عومهر ئهو هلگرت ودوعایهك بۆ كر وگۆت: یا رهببى تو وى زانا بكهى د دینى دا ووى ل بهر خهلكى شرین بكهى.. وههر وهكى دوعایا عومهرى د دهر حهقا وى دا ب جهـ هات.
حهسهنى گهلهك صهحابییێن مهزن دیتبوون، وهكى عوثمانى وعهلى وطهلحهى وزوبهیرى، ووى حهدیس ژ هژمارهكێ ژ وان ریوایهت دكر، بهلێ تشتێ بهر چاڤ ل نك وى ئهو بوو، دهمێ ئهو یێ جحێل وى دهمێ خۆ هند نهددا وهرگرتنا علمى هندى ددا كرنا جیهادێ، لهو ریوایهتێن وى یێن حهدیسێ ژ صهحابیان دكێم بوون..
حهسهن مرۆڤهكێ زهلام باش بوو، ههیبهتهكا زێده ل نك ههبوو، وجوانیهكا بهر چاڤ ژى وى ههبوو، (العوام بن حوشب)ى دگۆت: ئهز تهشبیها حهسهنى ب پێغهمبهرهكى دكهم.
و(ئهبوو بوریده) دبێژت: من نهدیت مرۆڤهك هندى حهسهنى وهكى صهحابییێن موحهممهدى بت. وهندهك جاران دهمێ مرۆڤهكى پسیارهك ژ صهحابییێ پێغهمبهرى ئهنهسێ كوڕێ مالكى كربا دهمێ ئهو پیر بووى، ئهو دا بێژت: پسیارا حهسهنى بكهن، وى یا ژ بهركرى ومه یا ژبیركرى.
وبۆ ڕههوانبێژى ودهڤ وئهزمانان دبێژن: ل وى زهمانى كهس ژ حهسهنى وحهججاجێ ثهقهفى ب دهڤ وئهزمانتر نهبوون. ودهمێ بهحسێ وى ل نك ئیمام (محمد الباقر)ى دهــاتــهكـــرن وى دگــۆت: حــهسـهن، ئهوێ ئاخفتنا وى وهكى ئاخفتنا پێغهمبهران؟! وگاڤا ئهو ل مزگهفتێ دڕوینشت ودهست ب وهعزى دكر ب سهدان شاشك ل دۆر وى كۆم دبوون، ودا بێژى ههر ئێكى طهیرهكێ ل سهر سهرى، وهسا ب گۆتنا وى ڤه دهاتنه گرێدان، وپتر جاران وهعز وگـۆتـنـا وى ل دۆر زوهــدێ وسلـووكى وترساندنا ژ مرنێ وئاخرهتێ بوو.
ل دۆرێن چارده سالییێ مالا وى ژ مهدینێ بۆ بهصرا هاته ڤهگوهاستن، وئهو د گهل دهیبابێن خۆ هات وقهستا ڤى باژێڕى كر، وبهصرا هنگى قهلعهیهك بوو ژ قهلعهیێن ئیسلامێ یێن مهزن، چونكى دكهفته سهر توخویبێن دهولهتا ئیسلامێ، وهژمارهكا مـهزن ژ صهحابى وتابعیێن مهزن ل ڤى باژێڕێ نوى هاتییه ئاڤاكرن ئاكنجى بووبوون، حهسهن ژى ل ڤى باژێڕى ئاكنجى بــوو، لــهو ب ناسناڤـێ (حهسهنێ بهصرى) دهاته نیاسین.
وئهو ههر ل ڤى بـاژێــڕى مربوو، ل دهسپێكا ههیڤا رهجـهبـێ ژ سالا (110) مشهختى، ل سپدهییا ئهینییێ، و ل مزگهفتا بهصرا پشتى نڤێژا ئهینییێ نڤێژ ل سهر وى هاتهكرن، وخهلك ل دویڤ جهنازێ وى دهركهفت، ووێ ڕۆژێ وهكى مه گۆتى بۆ جارا ئێكێ د دیرۆكا بهصرا دا نڤێژا ئێڤارى ل مزگهفتێ نههاتهكرن، چونكى كهس نهمابوو د باژێڕى دا ههمى چووبوونه سهر زیارهتان!
❖تشتێ حهسهن بلند كرى:
ونوكه دبت هندهك ژ ههوه د گهل خۆ پسیار بكهن: ئهرێ ئهو چ بوو حهسهن گههاندییه ڤێ دهرهجێ؟ وبۆچى ئهو هنده ل بهر خهلكى یێ ب بها بوو؟
جارێ گوهێ خۆ بدهنه جیرانێ وى وههڤالێ وى (خالدێ كوڕێ صهفوانى) چاوا حهسهنى ب مه ددهته نیاسین، ڕۆژهكێ ئهمیرهكى پسیارا حهسهنێ بهصری ژ وى كر، كانێ ئهو یێ چاوایه، وى گۆت: ((ئهز باش وى دنیاسم، ئهز جیرانێ ویێ مالێ مه، وههڤالێ وى یێ مزگهفتێمه.. كانێ ئهو ب سهرڤه یێ چاوایه ژ بن ڤه ژى ئهو یێ وهسایه، گۆتنا وى وهكى كریارا وییه، ئهگهر ئهو باشییهكێ نیشا خهلكى بدهت بهرى ههمییان ئهو ب خــۆ وێ دكـــهت، وئــهگـهر ئهو وان ژ خرابییهكێ بدهته پاش ئهو بهرى ههمییان خۆ ژێ ددهته پاش، من دیت ئهوى خۆ ژ خهلكى بێ منهت دكر، دلێ خۆ نهدبره وى تشتێ د دهستێ وان دا ههى، وخهلك ههمى دههوجهیى وى بوون، داخوازا وى تشتى دكر یێ ل نك وى ههى..)).
ووهكى بهرى نوكه ژى مه گۆتى ههر بهرپهڕهكێ ههى د ژیــانــا حـهسهنێ بهصرى دا، یێ ژ ههژى هندێیه مرۆڤ ل نك ڕاوهستت وعیبرهتان ژێ وهربگرت، وهلبژارتنا هندهك ژ ڤان بهرپهڕان بۆ بهحس ژێ كرنێ د چهند دهقیقهیهكێن كێم دا كارهكێ ب ساناهى نینه، بهلێ ههر چاوا بت ئهو نوكه بۆ مه كارهكێ پێتڤییه، دا بشێین گۆتنا خۆ ل دۆر مرۆڤێن خودێ تمام بكهین..
حهسهن د دهمهكى دا ژیابوو، گهلهك گوهۆڕینێن مهزن ب سهر جیهانا ئیسلامى دا هاتبوون، دهمێ فتنهچى دژى خهلیفێ راشدى یێ سییێ عوثمانێ كوڕێ عهففانى ڕابووین ومهسهله گههشتییه هندى ئهو ئیمامى بكوژن، حهسهن یێ سێزده چارده سالى بوو، وپشتى خیلافهت گههشتیه ئیمامێ چارێ عهلییێ كوڕێ ئهبوو طالبى، ووى خۆ ژ مهدینێ ڤهگوهاستییه باژێڕێ كووفه ل ژێریا عیراقى، حهسهنى ژى -د گهل مالا خۆ- قهستا بهصرا كر و ل وێرێ ئاكنجى بوو، وقوویناغا ڤهگوهاستنا خیلافهتێ ژ مهدینێ بۆ كووفه، پاشى بۆ شامێ وى ب چاڤ دیت، نیڤهك ژ زهمانێ خیلافهتا راشدى، وههمى دهمێ عهدالهتا موعاویهى، پاشى پشتى خیلافهت كهفتیه دهستێ جحێلێن بنهمالا ئومهییهى، ووێ بهرفرههییا دهولهتا ئیسلامێ ل سهر دهستێ وان ب خۆ ڤه گرتى، و د گهل وێ زولما هندهك جاران ژ هندهك ژ وان پهیدا دبوو، پاشى دهمێ عومهرێ دووێ جارهك دى بــیــرا خـــهلــكــى ل زهمانێ راشدییان ئینایهڤه، وپشتى عومهر ژ مهیدانێ دهركهفتى، وجارهكا دى مهسهله زڤڕییه مهلكاتیا ب كوتهكى.. ئهڤه ههمى حهسهنى ب چاڤ دیت بوو.
ئهڤه ژ لایێ سیاسى ڤه، و ژ لایێ علمى ڤه ئهو دهمێ حهسهن لێ ژیاى دهمێ بهلاڤكرنا علمێ شهرعى بوو، صهحابییان ژ لایێ خۆ ڤه، و د گهل وان وپشتى وان ژى طهلهبێن وان ژ تابعییان ههمى هێزا خۆ بۆ بهلاڤكرنا كیتابێ وسوننهتێ، و (عهصرێ تهدوینێ) -وهكى دئێته نیاسین- دهست پێ دكر..
و ژ لایێ جڤاكى ڤه، دو دیارده د بهرچاڤ بوون: دیاردا دهولهمهندى وتهرهفێ وخۆ مژویكرنا ب دنیایێ ڤه، ودیــاردا زوهـــدێ ودهســت بــــهردانـا ژ دنیایێ، ئهوا پشتى هنگى ب ناڤێ (تهصهووفێ) هاتییه نیاسین..
وحـهســهنــێ بــهصـرى د ڤان ههمى مهیدانان دا (جهوله) ههبوون، ووى د ههمى ڤان (مهجالاتان) دا ههلویست وگۆتن وبۆچوون ههبوون، حهسهن چهند یێ دویر بوو د جڤاكا خۆ هند یێ نێزیك ژى بوو، دویر ژ سیاسهتێ وى سیاسهت دگوهاڕت، وبێى دلێ خۆ ببهته وى تشتێ د دهستێن خهلكێ دنیایێ دا ههى وى بیر وبۆچوونێن خهلكێ دنیایێ دگوهاڕتن، ههڤالینییا خهلیفه وئهمیران نهدكر وخۆ ژ كۆچك ودیوانێن وان ددا پاش، د گهل هندێ ژى مرادا ههمى خهلیفه وئهمیران ئهو بوو ههڤالینییا حهسهنى بكهن، ل وان جهێن خهلك پاشڤه دچوو حهسهن پێشڤه دچوو، و ل وان جهێن خودان جهرگ دترسیان ومهصلحهتچى بێ دهنگ دبوون حهسهنى بێ ترس دهنگێ خۆ بلند دكر، ودا هوین هزر نهكهن ئهڤ گۆتنا مه ب تنێ (ئینشائهكا بێ دهلیله) وهرن دا پێكڤه ڤى بهرپهڕى ژ دیرۆكا وى ڤهكهین، د گهل كێ؟ د گهل حهججاجى، ئهوێ -ل وى دهمى- ناڤێ وى ترس ولهز دئێخسته دلێ خهلكى، چونكى یێ حهججاج لێ ب غهزهب هاتبا حسێب بكه ئهو ژ دهیكا خۆ نهبوویه!
❖دناڤبهرا حهسهنى ومهزنان دا:
جارهكێ حهججاجى قهسرهكا مهزن وجوان بۆ خۆ ل باژێرێ (واسطێ) ئاڤاكر، وپشتى ئاڤاهى ب دویماهى هاتى، وى ڕێ دا خهلكى ههمییێ كو بێن بهرێ خۆ بدهنه ئاڤاهى وخۆشییێ ب دیتنا وى ببهن، ودوعایا بهرهكهتێ بۆ ئاڤاهى وخودانێ وى بكهن.. ئیمامێ حهسهن خیلافێ عهدهتێ خۆ بڕیار دا، ئهو ژى د گهل خهلكى چوو تهماشهى قهسرا ئهمیرى بكهت، گاڤا حهسهنى دیتى خهلك ب جوانیا قهسرا حهججاجى وفرههى ونهخش ونیگارێن وێ مــهنــدههــووش بــوون، ئهو د ناڤ وان دا ڕابووڤه ودهست ب خواندنا خوتبهیهكێ كر.. و د ڤێ خوتبهیێ دا گۆت: ((مه ههمییان پێكڤه ئهو ئاڤاهى دیت یێ پیسێ پیسان ئاڤاكرى، ومه دیت كو ئهو ئاڤاهییێ فیرعهونى ئاڤاكرى گهلهك ژ ئاڤاهییێ وى مهزنتر وبلندتر بوو، پاشى خودێ فیرعهون بره هیلاكێ وئاڤاهییێ وى ژى ههڕفاند.. خوزى حهججاجى زانیبا كو خهلكێ عهسمانى ئهو نهڤیایه، وخهلكى عهردى ئهو خاپاندیه حهتا غوروورێ ئهو گرتى..)).
و ب ڤى ڕهنگى ئهو پێدا چوو، د ناڤ حێبهتى ودههشهتا وى خهلكێ ئامادهبووى، حهتا هندهك ژ وان دل مایه پـێـڤـه وتـرسیاین حهججاج ل وى ب غهزهب بێت، لهو مرۆڤهكى گۆتێ: بابێ سهعیدى، هنده بهسه! وى گۆت: خودێ پهیمان ژ زانایان وهرگرتییه كو ئهو حهقییێ نیشا خهلكى بدهن وچویێ ژێ نهڤهشێرن..
وكۆما خهلكى ڤهڕهڤى.. بهلێ هندهك خودان خێران ئهوێن ل ههمى جهـ وههمى دهمان دمشه، دا خۆ ل بهر حهججاجى شرین بكهن، چوونه نك وئاخفتنا حهسهنێ بهصرى بۆ ڤهگوهاست، حهججاج ژ كهربێن خۆ دا هار بوو، و ل خهلكى زڤڕى وگۆت: تێچوون بـۆ هـهوه بـت! عـهبـدهك ژ عهبدێن بهصرا د ناڤ خهلكى دا ڕادبتهڤه وچیا وى دڤێت د دهر حهقا مه دا دبێژت، وكهس د ناڤ ههوه دا نابت لێ ڤهگێڕت؟ ترسینۆكێن ترسینۆك! ئهز ب خودێ كهمه دێ وه ل ههوه كهم هوین ژ خوینا وى فڕكهن..
پاشى هنارته ب دویڤ جهللادێ خۆ ڕا.. وگۆته هندهك ئێلچیێن خۆ: ههڕن حهسهنى بۆ من بینن.
گاڤا وان حهسهن ئیناى، وحهسهن گههشتییه بهر دهرى، ونیشانێن سهربڕینى د ڕویێ حهججاجى وجهللادى دا دیتین، ب دهنگهكێ نزم دوعایهك كر و ب ژۆركهفت.. وخهلكێ دیوانێ كارێ خۆ كر دا دههمهنێن خۆ هلدهن دا چپكێن خوینا حهسهنى جلكێن وان پیس نهكهن، بهلێ ههر زوى صهدمه بۆ وان چێبوو، وان دیت حهججاج ب نك وى ڤه چوو، وڕێ بۆ فرههـ كر و ب ههیبهت ڤه گۆتێ: وهره ڤێرێ بابێ سهعیدى، وهره ڤێرێ بابێ سهعیدى!! وهنگى ڕاوهستیا حهتا ئهو برى دانایه ب ڕهخ خۆ ڤه، وگاڤا حهسهن ڕوینشتى حهججاجى كهیفخۆشى د گهل كر، وهندهك پسیارێن دینى بۆ خۆ ژێ كرن.. وپشتى دهمهكى ژ ئاخفتنێ حهججاجى گۆتێ: بابێ سهعیدى تو سهروهرێ ههمى زانایانى! گاڤا حهسهن ژ دیوانێ دهركهفتى، دهرگههڤانێ حهججاجى دا ب دویڤ ڤه وگۆتێ: بابێ سهعیدى، حهججاجى تو بۆ ڤێ چهندێ داخواز نهكربووى. حهسهنى گۆت: ئهز دزانم، ژ جهللادێ وى یا دیار بوو. دهرگــههـڤــانـى گۆتێ: من تو دیتى گاڤا تو هاتییه بهر دهرى ههر وهكى ته دوعایهك كر، ئهو چ بوو ته گۆتى؟
حهسهنى گۆت: من گۆت: ئهى خودایێ نعمهت د گهل من كرین وئهز ل تهنگاڤییێ ههوارێن خۆ دگههینمێ، تو كهربا وى سار كه ل سهر من كانێ چاوا ته ئاگر ل سهر ئیبراهیمى سار كر وكره تهناهى.
وسهرهاتییهكا دى ژى حهسهنى د گهل مهزنێن دنیایێ ههبوو، دهرسهكا مهزن بۆ زانایان بهرى عامیان تێدا ههیه..
دهمێ عومهرێ كوڕێ عهبدلعهزیزى بوویه خهلیفهى، منافق ودوڕوى و(مورتهزقه) ژ بــهر دهرێ خـۆ كرنه دهر، وشاعر وئهزمان حلى ودرهوین ژ دیوانا خۆ دهرێخستن، چونكى وى باش دزانى ئهڤ صنفێن مرۆڤان هاریكارێن چوونا مرۆڤینه بۆ جههنهمێ، و ل شوینا وان وى مرۆڤێن زانا وزاهد ل خۆ كۆم كرن، وئهگهر زانایهك ههبا یێ ژ وى دویر ژی با، وهكى حهسهنى ئهوێ ل بهصرا دژیا، وى دهم بۆ دهمى كاغهز بۆ دهنارتن وداخوازا رهئی وبۆچوونا وى دكر د مهسهلێن گرنگ دا، وحهسهنى ژ لایێ خۆ ڤه بهرسڤا وى ددا، وبێى (موجامهله) ئهو حهقى بۆ دگۆت یا وى باوهرى پێ ههى، وگاڤا حهسهنى زاناى عومهر یێ بوویه خهلیفه، ئێكهمین كاغهز بۆ هنارتى، دا پیرۆزیێ لێ بكهت، ئهڤ سێ چار ڕێزكه تێدا نڤیسیبوون پشتى حهمدا ودێ كرى وصهلات داینه سهر پێغهمبهرى: ((هندى دنیایه وارهكێ ب ترسه، ڕۆژا خودێ ئادهم كرییه تێدا بۆ عقووبه كربوو تێدا، ڤێجا ئهى ئهمیرلموئمنین تو بزانه كهفتنا ب دنیایێ نه وهكى ههر كهفتنهكێیه، یێ قهدرێ وێ بگرت دێ بێ قهدر بت، وههر ڕۆژ ئهو گهلهكان دكوژت، ڤێجا تو ئهى ئهمیرلموئمنین د نیایێ دا وهكى وى بریندارى به یێ صهبرێ ل سهر نهخۆشییا دهرمانى دكێشت ژ ترسێن نهخۆشییا درێژ دا)).
ئهڤه (كیتابا پیرۆزباهیێ) بوو یا حهسهنێ بهصرى بۆ عومهرێ كوڕێ عهبدلعهزیزى هنارتى دهمێ ئهو بوویه خهلیفه!
وپشتى عومهر چوویه بهر رهحما خودێ، وپسمامێ وى (یهزیدێ كوڕێ عهبدلمهلكى) بوویه خهلیفه، وى (عومهرێ كوڕێ هوبهیرهى) كره والییێ عیراقێ وخوراسانێ، والى هنارته ب دویڤ دوو ژ مهزنترین زانایێن عیراقێ ڕا: حهسهنێ بهصرى وعامرێ شهعبى، وپسیارا خۆ ب وان كــر، وگــۆت: هــویـن دزانن كو (ئهمیرلموئمنین)ى ئهزێ كریمه والى، وگوهدارییا وى ل سهر من واجبه، بهلێ هندهك جاران ئهو هندهك فهرمانان ل من دكهت ئهزێ ژێ رازى نینم چونكى عهدالهت تێدا نینه، هـوین چ دبێـژن ئهگهر ئـهز ئهمرێن وى ب جهـ بینم گونهههك بۆ من تێدا ههیه؟
عامرێ شهعبى جهوابهكا وهسا دایێ هندهك نهرمى تێدا بوو، دا نه دلێ خهلیفهى بمینت ونه والی تهنگاڤ ببت.. وحهسهن یێ بێ دهنگ بوو، ئینا والى ل حهسهنى زڤڕى وگۆتێ: وتو چ دبێژى بابێ سهعیدى؟
ئیمامێ حهسهن گۆتێ: كوڕێ هوبهیرهى! ژ خودێ بترسه نه ژ یهزیدى، وتو باش بزانه خودێ دشێت ته ژ یهزیدى مهنعه كهت، بهلێ یهزید نهشێت ته ژ خودێ مهنعه كهت، كوڕێ هوبهیرهى نێزیكه تو بمرى وملیاكهتهكێ زڤر ودژوار ب سهر ته دا بێت، ئهو بێ ئهمریا خودێ ناكهت، دێ ته ژ سهر ڤێ كورسیكا ته ئینته خوار، وئهو دێ ته ژ قهسرا ته یا فرههـ ڤهگوهێزته قهبرهكێ تهنگ، ل وێرێ یهزید د گهل ته نابت، ئهو عهمهلێ ته دێ د گهل ته بت یێ ته ژ بهر یهزیدى بێ ئهمرییا خــودێ پێ كـرى.. كــوڕێ هــوبهیرهى! ئهگهر تو د گهل خودێ بى وطاعهتێ وى بكهى، ئهو ل دنیایێ وئاخرهتێ بهلا یهزیدى دێ ژ تــه ڤهكهت، وئهگهر تو د گهل یهزیدى بى د بێ ئهمریا خودێ دا، خودێ دێ ته هێلته ب هیڤییا یهزیدى ڤه، وتو بزانه بۆ چو مرۆڤان چێ نابت د بێ ئهمرییا خودێ دا گوهدارییا كهسێ بكهن ئهگهر ئهو كهس كى بت.
گاڤا حهسهنى ئهڤ گۆتنه گۆتین ڕۆندك ژ چاڤێن والى بارین، ووى بهرێ خۆ دا حهسهنى، وحهسهن د چاڤێن وى دا ژ شهعبى ب بهاتر لێ هات، وگـاڤا ئهو زڤـڕینه مـزگهفتێ وخهلك لێ كۆم بووین، ئیمامێ شهعبى ب دهنگهكێ بلـند گۆته خهلكى: گهلى مرۆڤان! ههچییێ ژ ههوه بشێت ل ههمى جهان رازیبوونا خودێ ب سهر رازیبوونا خهلكى بێخت بلا وه بكهت، ئهز ب وى كهمه یێ نهفسا من د دهستى دا ئهو تشتێ حهسهنى گۆتییه عومهرێ كوڕێ هوبهیرهى من ژى دزانى بێژم، بهلێ من دڤییا كوڕێ هوبهیرهى ژ خۆ رازى كهم، وحهسهنى دڤییا خودێ ژ خودێ رازى كهت، ئینا خودێ ئهو نێزیكى كوڕێ هوبهیرهى كر وئهز ژێ دویركرم!
ئهڤه حهسهن بوو ئهوێ ههردهم د وهعزێن خۆ دا دگۆت: كوڕێ ئادهمى! خوزى ته زانیبا كو تو ئهو ڕۆژى یێن ب سهر ته دا دبۆرن، چى رۆژا ل ته ئاڤابوو، ئهو پرتهك ژ ته ڤهبوو.
