ژڤانهك د گهل شهیتانى !
من نه دزانى ڕوینشتنا من ل وێ ئـێـڤارێ ل قههوهخانا سوپهر ماركتێ وخۆ موژیلكرنا من ب خواندنا ڕۆژنامهیێ ڤه دێ بته ئهو لهعنهت یا دۆرێ ل ستوكورا ژینا من دگرت.. هنگى من هزر دكر خۆشى ههمى ئهوه یا ئهز تێدا دژیم، ب تایبهتى دهمێ ئهو كچا بهژن زراڤ وچاڤ ڕهش ب دهلالى ڤه د بهر من ڕا بۆرى، وئاڤڕهك داناى كو ئهز عاشقا جوانیا تهمه !
بێى من هاى ژ خـۆ هـهبت ئهز ڕابوومه سهر پیان، وئهز د دویڤ وێ دا چووم، من دیت ئهو چوو د فرۆشگهههكێ ڤه، ئهز ترسیام ب دویـڤ دا بچمه ژۆر، بهلـێ ئهو ل من زڤڕى و ب دهستى ئیشارهت دا من كو وهره نهترسه.. گاڤا ئهز نێزیكى وێ بوویم، ب ئهدهب وتۆره ڤه گۆت: ئهگهر زهحمهت نهبت رهقهمێ تهلهفوونا خۆ بده من.. پشتى من رهقهمێ خۆ دایێ داخوازا لێبۆرینێ كر كو دهمێ وێ یێ بهرتهنگه لهو ئهو دێ چت.
وپشتى ئهو چووى ئهز مامه د خرگۆمانان دا، چار حێبهتى وچار دلـخـۆش، وجار مهندههووش، ئهڤه چ بوو وئهڤه كى بـوو؟ حهتا ڕۆژهكێ ل درهنگى شهڤ زهنگلا تهلهفوونا من لێداى، وكهیفا من چهند یا مهزن بوو دهمێ دهنگێ وێ هاتیه من وگۆتى: من دڤیا زویتـر ئهز د گهل ته باخڤم بهلـێ ببۆره دهمێ من گهلهك یێ بهرتهنگه.. ئهز ژنهكا بازرگانم، مالهكێ مشه من یێ ههى، وئهز یا بهردایـمـه، وبهلكى تو باوهر نهكهى ژیێ من (31) ساله..
و ب ڕاستى ههچیێ ئهو دیتبا دا هزر كهت ئهو ژ بیست سالیێ نهبۆریه.
پاشى گۆت: بهلـێ د گهل ڤێ ههمیێ ئهز ههست دكهم ههر وهكى ڤیانا من یا ڤالایه، چو تام تێدا نیه، وئهز گهلهك حهز دكهم دۆستینیا گهنجهكێ وهكى ته لاوتازه بكهم !
وپشتى هنگى ژڤان دا من وگۆته من: فلان دهمى ل فلان قههوهخانێ دێ ئێك ودو بینین، پاشى ل فلان باغچهى و ل فلان خوارنگههێ.. وهـۆسـا ژڤانێن من ووێ ل جهێن گشتى مشه بوون، وتشتێ پتـر ئهز پێڤه گرێدایم ئهو بوو گهلهك جاران من داخواز ژێ دكر كو ماچێ بدهته من یان حهتا بهێلت دهستێن وێ بكهمه د ناڤ دهسـتـێـن خــۆ دا، وێ قهبویل نهدكر، لهو من د گهل خۆ دگۆت: یا دیاره ئهڤ ژنه گهلهك یا شهریفه، وبهرى من وێ كهسێ دى نهنیاسیه.
ودۆستینیا من ووێ ب ڤى ڕهنگێ پاقژ دهمهكى ڤهكێشا، وڕۆژهكێ تهلهفوون بۆ من كر وگۆت: من دڤێت ته ببینم بۆ كارهكێ فهر.. ودهمێ ئهز ل ژڤانى حازر بوویم گۆت: كارهكێ من یێ فهر ل فلان كۆمپانیایێ ل قاهیره ههیه، وئهز ناگههم بچم، وباوهریا من نائێت ئهز كهسێ پێش خۆ ڤه فڕێكهم ژ ته پێڤهتر، لهو ئهز حهز دكهم تو بچى.. پاشى پپلێتهك ژ چانتێ خۆ ئینادهر وگۆت: وئهڤه پلێتا فڕۆكێ یه، سوبههى نه دوسبه فڕۆكه دێ ڕابت، وجههك ل ئۆتێلا (سهمیر ئهمیس) بۆ سێ ڕۆژان من بۆ ته حجز كریه، گاڤا تو گههشتیه ئۆتێلێ ڤى رهقهمى داخواز بكه مرۆڤهك دێ ئێته ته بهته كۆمپانیایێ.. وكاغهزهك ژى ئینادهر تێدا ئهز كربوومه وهكیل وهنارتیێ خۆ بۆ كۆمپانیایێ.
من گۆتێ: سهر چاڤێن خۆ ژینا من !!
وئهز ل دهمێ دهسنیشانكرى چووم، ومن قهستا وى كارێ فهر كر یێ خۆشتڤیا من ئهز بۆ هنارتیم، وگاڤا ئهز گههشتیمه ئۆتێلێ ئێكسهر من ئهو رهقهم لێدا یێ دۆستا من دایه من، وعهجێبیا من گهلهك یا زێده بوو دهمێ من گوهــ ل دهنگێ دۆستا خۆ بووى گۆتى: (موفاجهئهیه) بۆ من ئهى خۆشتڤیێ مانه؟!
وهێشتا ئهز ژ حێبهتیێن خۆ دهرنهكهفتیم گۆت: وهره ژۆرا رهقــهم (هـنـده) ئـهزا ب رهخ تـهڤـه.. ژ كهیفان دا من باوهر ژ گوهێن خۆ نهكر، د گاڤێ دا ئهز چوومه نك، ب كراسێ خۆ یێ روهن وتهنك ڤه ب نك من ڤه هات وئهز دامه بهر سنگێ خۆ ودامه بهر ماچان، كا چاوا ژن پێشوازیێ ل زهلامێ خۆ دكهت !!
ووهكى دو خۆشتڤیێن ژ ئێك ودو دخهریب وبۆ ئێك ودو دتێهنى نـه سـێ ڕۆژان بهلكى دههــ ڕۆژان ب شهڤ ڤه ئهم ماینه د گهل ئێك، پاشى ئهم پێكڤه و ل سهر دو كورسیكێن ب ڕهخ ئێك ڤه زڤڕین، دههــ ڕۆژ بوون یا ژ من ڤه دانهكێ ڕۆژێ بوو.
وپشتى ئهم زڤڕینهڤه پهیوهندیێن من ووێ ب ڤێ گهرمیێ مان، هندهك جاران ئهز دچوومه نك وێ ل قهسرا وێ، وهندهك جاران ئهو دهاته نك من ل مالا من یا بێ سهروبهر.
ووهسا چێبوو ڕۆژهكێ ئهز وبرایێ خۆ ب سهفهرهكێ چووینه باژێركێ دى، و ب ڕێـڤه ڕویدانهكا لێكدانێ بۆ مه چێبوو، چو ل من نههات بهلـێ برایێ من كهفته دهراڤهكێ تهنگ ونهزیفهكا دژوار بۆ چێبوو، ودهمێ مه ئهو گههاندیه خهستهخانێ، دختۆران گۆت: دڤێت نوكه وى (عهمهلى) بكهین، ووان داخواز ژ من كر ئهز خوینێ بدهمه برایێ خۆ، وگاڤا وان هندهك خوین ژ تبلا من كێشاى دا (فهحص) بكهن، دختۆر هاته نك من وناڤچاڤێن وى دتێكچووى بوون، من گۆتێ: برایێ من مر؟ گۆت: كوڕێ من ! خۆ قائیم بكه، ههمى تشت ب دهستێ خودێنه.. وهێشتا وى گۆتنا خۆ تمام نهكرى من گۆتێ: برایێ من تمام بوو؟
گۆت: نه.. خوینا ته ب كێر نائێت.
ـ بۆچى؟
دختۆرى گۆت: چونكى نهخۆشیا ئیدزێ یا ل ته.
دا بـێـژى ئێكى جهڕكهكێ ئاڤا تهزى ب من دا كر.. چ؟ ئیدز ! نابیت ئهڤه.. ومن هیڤى خواست عهرد شهق ببت وئهز تێدا بچمه خوارێ، من نهشیا خۆ ل سهر پیێن خۆ بگرم، ئهز كهفتمه عـهردى، وهندهكان ئـهز ڕاكرم برم دانامه سهر تهختهكى.. وگاڤا ئهز هشیاربوویم دختۆرى گۆت: ئێش ل ته ب خۆ نینه، بهلـێ ڤایرۆسێ ئێشێ ته یێ ههى وهندى تو یێ ساخ بى دێ د گهل ته بت !
وپشتى ڕویدانێ ب دو ڕۆژان برایێ من مر..
وپشتى تازیا برایێ من ب دویماهى هاتى ب چهند ڕۆژهكان ههڤالا من تهلهفوون بۆ من كر وگۆت: عهزیزێ من ! ئهڤه دههــ ڕۆژه تو نه یێ دیارى، تو ل كیڤهیى؟
من ب كهرب ڤه گۆتێ: ته چ دڤێت؟
وێ گۆت: ته خێره؟ چ ل ته قهومیه؟
من گۆتێ: برایێ من یێ مرى وئهزێ عێجزم..
گۆت: خۆ عێجز نهكه، ئهم ههمى دێ مرین !
پاشى گۆت: كهنگى دێ ته بینم.. ئهزا ژ تـه خـهریـب بوویم.
من گۆتێ: چو جارێن دى تو من نابینى.
ـ بۆ؟
ـ ب ڕاستى من گهلهك تو دڤێى، بهلـێ من نهڤێت زیانێ بگههینمه ته.
گۆت: زیانا چ؟
من گۆتێ: ئهزێ نهخۆشم.. نهخۆشیا ئیدزێ یا ل من دهركهفتى، ومن نهڤێت نهخۆشیێ بگههینمه ته.. پاشى من چیرۆكا خۆ وفهحصكرنا خوینێ بۆ ڤهگێڕا..
وێ گۆت: ما تو كچهكا دى ژ بلى من دنیاسى؟
من گۆتێ: نهخێر.
گۆت: جارهكێ خوینا كهسهكى بۆ ته هاتیه ڤهگوهاستن؟
من گۆت: نهخێر.
گۆت: گهلهك باشه !! هیڤیا من ب جـهــ هات.
ئهز عهجێبگرتى بووم.. ومن ب كهرب ڤه گۆتێ: چ؟!
گۆت: من دڤێت تۆلا خۆ ژ ههوه بستینم، وێ شهربهتێ بدهمه ههوه جحێلان ههمیان، هوین ئهوێن ههوه ئهڤ لهعنهته گههاندیه من.. تو یێ ئێكێ یى وگهلهكێن دى دێ ب دویڤ ته دا ئێن.
