مشهختبوون بهر ب خودێ ڤه
ڕاسته ل گهلهك دهلیڤهیێن وێ خهلوێ یا ئهو د زیندانا خۆ دا كهفتیێ وى ب كارهكێ مهزن نهددیت كو ئهو ژى ببته كهسهك د كاروانێ درێژێ خۆگۆریكهرێن ڕاستیێ دا، بهلێ هندهك جاران ژى هیڤیا وى یا مهزن دبوو ئهو كو ئهو بشێت ڤان زنجیران بشكێنت، وئازادیا خۆ بزڤڕینت، وبچت ل عهردێ خودێ یێ بهرفرههـ -وهكى وى دڤێت- عهبدینیێ بۆ خودایێ خۆ پێشكێش بكهت، هیڤیا وى ئهو بوو ئهو بشێت خۆ ب وهلاتێ شامێ ڕا بگههینت، وقهستا ڕووگهها ڤى دینێ پیرۆز بكهت، و ل وێرێ دینى ژ سهرهكانیا وى یا زهلال وهربگرت، بهلێ وێڤه ژ كیڤه دئێت هندى ئهڤ زنجیره د پیێن وى دا بن، وئهو ل پشت ڤان ههمى دهرگههێن قهسرا بابێ خۆ بت!
وڕۆژهكێ وى دیت دهستێ قهدهرێ ب نك وى ڤه هات وپهنجهرا هیڤیێ ل بهر ڤهكر، پهرڤین.. خزمهتكارێ وى یێ تایبهت ئهوێ بابێ وى كارێ چاڤدێریا وى هێلایه ب هیڤیێ ڤه خۆ نێزیكى وى كر وگۆتێ:
- ئهز بهنى! ئهزێ د خزمهتا ته دا، ته چ دڤێت بێژه..
وى زانـى كـانـێ مهخسهدا پهرڤینى چیه، بهلێ ئهو چ ژێ بخوازت، وئهو دێ چ شێت بۆ وى كهت؟ ڕاسته ئهو گهلهك حهز ژێ دكهت، ووى وهكى كوڕێ خۆ حسێب دكهت، بهلێ ههر چاوا بت ئهو خزمهتكارهكێ بێ ڕێیه ل قهسرا دههقانێ مهزن، وئهو نهشێت ژ بن ئهمرێ وى دهركهڤت.. ڤێجا تو بێژى ئهو دێ چ بۆ وى كهت؟ بهلێ ههر چاوا بت بلا بجهڕبینت ئاخرى ئهو چو خوسارهت نابت، ما زێدهتر دێ چ ل وى كهن!
جارا دى دهمێ پهرڤینى دلپێڤهبوونا خۆ بۆ وى ئاشكهرا كرى، ونهڕازیبوونا خۆ ل سهر وى كارى دیاركرى یێ ئهو ژ مهجبوورى ونه ژ دل د گهل وى دكهت، ودیسا بهرههڤیا خۆ بۆ وى ئاشكهرا كرى كو ههر داخوازهكا وى ههبت ئهو دێ بۆ كهت، وى دهلیڤه ئستغلال كر وگۆتێ:
- ههڕه نك قهشهى ل دێڕێ، سلاڤێن من بگههینێ وبێژێ چى گاڤا كاروانهك ژ شامێ هات بلا ئهو جابهكێ بدهته من..
وقهشهى ب كهیفخۆشى ڤه داخوازا وى وهرگرت، وسستى د گههاندنا خهبهرێ هاتنا ئێكهمین كاروانى دا بۆ وى نهكر.. و ل شهڤا درهنگ، دهمێ وى ل ڕهخێ باژێڕى خاترا خۆ ژ خزمهتكارێ خۆ یێ وهفادار دخواست، وى ژ بیر نهكر بۆ جارا دویماهیێ چاڤێن خۆ ب دیتنا وان جهان تێر بكهت یێ وى زارۆكینیا خۆ وپشكهك ژ جحێلینیا خۆ ژى لێ بۆراندى، ئهو جهێ دهمهكى وى خۆشى وئازادیا خۆ لێ ددیت، پاشى بۆ وى بوویه گرتیخانه.. ودهمێ وى خۆ دایه د گهل كاروانى، پشتى قهشهى ئهو ئێمانهتى هندهك نیاسێن خۆ كرى، وپشتى نێزیك بوو ئهو توخویبێن ئهصفهانێ تێكدا ل پاش خۆ بهێلن، ئهو ل پشت خۆ زڤڕى، وزهحمهت ل خۆ دا حهتا شیاى وێ ڕۆندكێ بگرت ئهوا نێزیك بوو ژ چاڤان ڤهپهشیێت، وهێدى د گهل خۆ گۆت:
- د ڕێكا خودێ دا، وپێخهمهت ب دهستڤه ئینانا ئازادیێ، هێلانا یار وواران تشتهكێ كێمه!!
وپشتى ئهو ژ توخویبێن ئمبراتووریهتا فارسى دهركهفتین، وههڤالهكێ وى یێ كاروانى مزگینى دایێ كو ئهڤه ئهو چوونه د ناڤ ئاخا شامێ دا، ئاخینكهكا كویر ژ سنگى دهركهفت، وههست كر كو ژ نوى ئهو ژ وێ زیندانا مهزن دهركهفت یا هزر وبیر لێ دئێنه زنجیركرن، ژ نوى ئهو سهربهست بوو، وههست ب تهناهیێ كر پشتى زانى هنده ئێدى نه بابێ وى یێ دههقان ونه كیسرا ب ههمى هێز ولهشكهر ودهسههلاتا خۆ ڤه نهشێت دهست وپیێن وى وهزر وبیرێن وى زنجیر بكهت..
وچـهنـد كـهیـفـا وى هات ودلێ وى فرههـ بوو دهمێ شویرهێن باژێڕێ دیمهشقێ ژ دویر ڤه ل بهر چاڤان ئاشكهرا بووین، ههڤالێ وى گۆتێ:
- ل نیڤا باژێڕێ دیمهشقێ ئێك ژ مهزنترین كهنیسهیێن مهسیحییهتێ ههیه، ئێك ژ ئاسێترین كهلهێن ڤى دینیه، وهژمارهكا مهزن یا زانا وقهشه وخزمهتكارێن پهیڤا خودێ لێ ههنه..
وداخوازا وى یا ئێكانه ژ ڤێ وهغهرێ ههر ئهڤه بوو، دینێ مهسیحى ژ ژێدهر وسهركانیێ وهربگرت، لهو پشتى ئهو هاتینه د ناڤ باژێڕێ دیمهشقێ دا، بهرى ههر تشتهكى وى قهستا كهنیسا مهزن كر، ووى گهلهك زهحمهت نهدیت كو ڤێ بكهڤت؛ چونكى ئاڤاهیێ وێ یێ بلند ونهخشاندى ژ ههمى لایێن باژێڕى ڤه دهاته دیتن.. ووهكى مرۆڤهكێ ل بهڕیهكا گهڕم ههست ب تێنكاتیهكا دژوار بـكـهت، وهــزر بكهت د ناڤبهرا وى ومرنێ دا چو نهمایه، پاشى ژ نشكهكێ ڤه ب سهر كانیكهكا ئاڤا زهلال هل ببت، هند كهیفا وى هات، ئهو ل وێ باوهرێ بوو كو دێ شێت د ڤى ئاڤاهیێ ب ههیبهت ڤه تێنكا خۆ یا رووحى بۆ وێ ڕاستیێ شكێنت یا ئهو د وێ دێرا بچویك ڤه ب سهر هلبووى ئهوا دكهفته بنارێ چیایێ (جى) ل ئهصفهانێ..
وپشتى قهشهیێ مهزن شیاى ب سریانیا وى یا كێم ئهوا ئهو ژ ههڤالێن خۆ یێن كاروانى فێربوویێ سهرهاتیا وى بزانت، كهیفا خۆ گهلهك پێ ئینا، وسۆز دایێ وى وهكى شاگردهیهكێ خۆ یێ نێزیك حسێب بكهت، وڕاستیێ ههمیێ بگههینتێ، و د ڤێ دهربارهیێ دا چو بهخیلیێ د گهل وى نهكهت، وچهند ڕۆژهكێن كێم ب سهر ڤه نهچوون ئهو شیا خۆ د گهل جهووێ كهنیسێ بگونجینت، وببته ئێك ژ خزمهكارێن ئهمین بۆ پهیڤا خودێ.
