جحێلهكێ حێبهتى..
وێ شهڤێ پشتى كۆچكا دههقانى ڤهڕهڤى، وكوڕێ وى یێ جحێل زڤڕیه سهر جهێ خۆ یێ خۆش ونهرم وبهرفرههـ، وى ههست ب سهرئێشانێ دكر، ئهڤه جارا ئێكێ بوو بابێ وى ڕێكێ ددهتێ كو ئهو ل كۆچكێ د ناڤ زهلامان دا ڕوینت، ودویر نهگره ئهگهر بابێ وى زانیبا سوحبهت ل كۆچكێ دێ ب ڤى ڕهنگى ب ڕێڤه چت وى ههر ل سهرى نهدهێلا كوڕێ وى ئاماده ببت.. بهلكى پتر ژ جارهكێ پشتى (رووزبه)ى دهست ب هێرشێن خۆ یێن دژوار ل سهر دینێ مهزدهكى كرى، وى داخواز ژ كوڕێ خۆ یێ نیڤ زهلام كر كو دیوانێ بهێلت وبچت بۆ خۆ بنڤت، بهلێ ژ بهر نویاتیا ڤان گۆتنێن دئێنه گوهێ وى، و ژ بهر حهزا وى یا زێده كو بزانت كانێ دویماهیا ڤێ ههڤڕكیێ دێ گههته كیڤه، وى داخوازا بابێ خۆ ب جهـ نهئینا، وما ب بێ دهنگى گوهداریا وێ دان وستاندنا گهرم كر ئهوا د ناڤبهرا بابێ وى ومێڤانان دا چێبووى..
ئهو چهند سالهك بوو بابێ وى ئهو د مالێ دا هێلابوو وهكى وى مرۆڤى یێ كـچـهكـا خـوشكـۆك هـهبـت، ودلێ وى ل سهر یێ ب ترس بت، ڤێجا وێ بهێلته د مال دا و ژ چاڤان دویر بێخت.. بابێ وى ههمى پهیوهندیێن وى د گهل جیهانا ژ دهرڤهى مالێ بڕی بوون، هندهك جاران بابێ وى ئهو د گهل خۆ دهردئێخست ودبره ئاههنگێن دینى یێن كو كاهنێن مهزدهكى پێ ڕادبوون، وهندهك جارێن كـێـمـتـر وى ئـهو د گـهل خــۆ دبــره نـاڤ بــاغ وبیستانێن وان یێن مهزن وبهرفرههـ ل ئاقار ودهور وبهرێن باژێڕێ (جى)، وپشتى بابێ وى تێ ئینایه دهر كو ئهو یێ بهر ب زهلامینیێ ڤه دچت، ووهك بهرههڤكرنهك بۆ وى ڕابوو هندهك سهیدایێن تایبهت بۆ وى گرتن، دهاتنه مال، بنهمایێن ڕهوشهنبیریا فارسى وبناخهیێن دینێ مهزدهكى نیشا وى ددان، و د پشت وى ڕا بابێ وى تهئكید ل سهر سهیدایێن وى كربوو كو ئهو وێ هزرێ د سهرێ وى دا بچینن یا دبێژت: ژبلى مهزدهكیێ چو ڕێكێن دى یێن دورسـت بـۆ مللهتێ فورسێ نینن، كا چاوا ژبلى كیسراى كهسهك ژ ههى مهزنیا ڤى مللهتى نینه!
وپشتى سهیدایێن وى نیشانێن زیرهكیێ وتێگههشتنێ ل نك وى دیتین، مزگینى دا بابێ وى كو ئهو دهرسێن خۆ زوى یێ وهردگرت، وئهو ژێ ب هیڤینه كو ل دهمهكێ نێزیك دێ بته (كاهنهكێ مهزن) یێ ب كارێ بهلاڤكرنا ڤى دینێ پـیـرۆز ڕادبــت، ووهك حــازركــرنــهكـا پێش وهخت بۆ ڤى كارێ گرنگ، دڤێت ئهو ل ئاتهشگهدههێ (پهرستگههێ) پشكداریێ د هلكرنا ئاگرێ پیرۆز دا بكهت، ووى ژى وهكى خـزمـهتكارێـن دیـنـى نۆبهیهكا هلكرنا ئاگرى ههبت.. بابێ وى ههر زوى ل بهر هات و ب گۆتنا وان قانع بوو، وڕێ دا كوڕێ خۆ كو ببته ئێك ژ وان خزمهتكارێن دلسۆز یێن نههێلن ئاگرێ پیرۆز ڤهمریێت، و ژ حهژێكرنا وى بۆ ڤى كارى ئهو جارهكا ب تنێ ژى ژ نۆبا خۆ پاش نهدكهت.
د جیهانهكا تهنا دا دژیا، د گهل وان بیر وباوهر وهزران یێن بابێ وى ل مال، وسهیدایێن وى ل پهرستگههێ د سهرى دا چاندین، لهو ل وێ شهڤا وى گوهداریا ئاخفتنێن (رووزبه)ى وههڤالێن وى كرى، ل سهرى وى گهلهك ب گۆتنێن وان نهخۆش بوو، ب تایبهتى دهمێ دیتى ئهو ب توندى یێ هێڕشێ دكهنه سهر دینێ مهزدهكى، ههر چهنده ئهو هندهك جاران د گهل خۆ یێ (موعجب) بوو ب وێ جورعهتێ یا ڤان جحێلان ههى، ڕاسته سنگ فرههیا بابێ وى پتر ڕێك ددا وان كو ئهو بسته ببن، وبێ ترس باخڤن، بهلێ ئهڤ گۆتنێن ئهو نوكه دبێژن ههر وهكى نه یێن وان ب تنێیه، ژ ئاخفتنێن وان دئێته زانین كو ههر هندهك كهسێن دى ژى یێن ههین ب مهزدهكیێ نهدرازى، وگۆتن ودهلیلێن وان ژ قهستا نینن.. دوسهد سال دهمهكێ كێم نینه بابێ من بێژت: ل دهسپێكا ههر شۆڕهشهكا نوى هندهك تشتێن ل بهر خهلكى نه دطهبیعى پهیدا دبن، ئهو تشتێ دوسهد سالان ل بهر خهلكى بمینت نهطهبیعى ئهو ژ نوى طهبیعى نابت!
وگاڤا ئهو گههشتیه ڤى جهى ژ هزرێن خۆ، بێى ب خۆ بحهسیێت، وى دیت ئهو ژ سهر جهى ڕابووڤه، وبهر ب پهنجهرا مهزهلكا خۆ ڤه چوو، پهردێ نازك وهكى ئاڤرمیشى لادا، وبێنهكێ د عهسمانى فوكرى.. تاریێ ههمى تشت د ناڤ خۆ دا پێچابوون، ستێران ئهوێن ژ دویر ڤه ڕۆناهیهكا كێم ددا نهدشیان ڤێ تاریا مهزن ڤهڕهڤینن، لازم ڕۆناهیهكا مهزنتر ههبت، بیرا وى ل گۆتنا (رووزبه)ى هاتهڤه دهمێ گۆتیه بابێ وى:
نه ئهى دههقانێ مهزن، تو قهت باوهر نهكه خهلك سهرفهرازیا خۆ د ڤێ ڕێكێ دا ببینن، لازم ڕۆناهى ب سهركهڤت، ڤێت ئهو دهنگ بێت یێ پهیڤا ئههریمهزدایێ مهزن ب سهردئێخت، وڤێ تاریێ دڤڕهڤینت یا جیهان ههمى د ناڤ خۆ دا پێچاى..
هنگى بابێ وى دهلیڤهیا خۆ دیت كو دربێ خۆ بوهشینت، وههمى هزرا وى ئهو بوو كو ئهو ب ڤى دربى نه ب تنێ دێ (رووزبه)ى وههڤالێن وى وهرگێڕت، بهلكى ئهو دێ هزرا (مانى) ههمیێ هلوهشینت.. گۆت:
كیژ دهنگ؟ دهنگێ مهسیحێ رۆمان ئهوێ ههڤالێ ههوه (مانى) بهرێ فورسێ ددا باوهرى ئینانا ب وى؟ یان ژى پێغهمبهرێ دویماهیێ ئهوێ (مانى) مزگینى ب هاتنا وى ددا؟ ئـهم میـراتگـرێـن زهرادهشتى ومهزدهكێ مهزن ژ نوى سهرێ خۆ ل بهر كهسهكێ بیانى بچهمینین؟ ئاگرێ خۆ یێ پیرۆز ئهوێ ئهڤه ب هزاران سالایه نهڤهمریاى بهێلین و ب دویڤ دهنگێ نوى بكهڤین، ئهوێ ژ ناڤ رۆمێ بلند بووى؟ یان كى دزانت بهلكى ژ صهحرایا عهرهبان بلند ببت وهكى مانیێ ههوه دگۆت؟
وههر چهنده خهلكێ دیوانێ ههمیان وهك تڕانهپێكرن ب (رووزبه)ى وههڤالێن وان كره كهنى ژى، وههر چهنده جحێلى هندهك پهیڤ د ئاخفتنا بابێ خۆ دا بهیستن تێ نهگههشت ونهزانى مهخسهدا وى پێ چیه، وهكى مهسیحێ رۆمێ، وپێغهمبهرێ دویماهیێ وصهحرائا عهرهبان.. بهلێ ئهڤ (مهنطقێ) بابێ وى پێ ئاخفتى وهزركرى ئهو ب هێزترین دهلیله، ل دلێ وى نههات؛ چونكى وى قهناعهت ب هندێ ههبوو كو تشتهكێ بهرعهقل نینه خودایێ ڕۆناهیێ ههمى نفشێن مرۆڤان بدهت پاشى ئهو نفشهكى ل سهر ههمى نفشێن دى بێخت.. پاشى وى سهرێ خۆ بلندكر وجارهكا دى د عهسمانى فوكرى، دیت چاڤێ ههیڤێ یێ بلند بووى، وڕۆناهیا خۆ یا دایه ههمى لایان.. ئینا وى هێدى د گهل خۆ گۆت: لازم ڕۆناهى ب سهركهڤت!
پاشى زڤڕى سهر جهێ خۆ، وچهند دهلیڤهیهك پێڤه نهچوون وى خۆ ب دهست خهوهكا گران ڤه بهردا.
