گوهۆڕینا مهزن.. و بهرێخۆدانهكا نوى
سپێدى زوى ژ خهو ڕابوو.. ووهكى ههر ڕۆژ كارێ خۆ كر دا بچته پهڕستگههێ وئاگـرێ پـیـرۆز هـل بـكـهت، پـێ حهسیا ههر وهكى ئهڤرۆ لهشێ وى ژ ههر جارهكێ گرانتره، بهلێ وى ئهگهرا ڤێ گوهۆڕینێ كره ئهو شێل وبێلیا گههشیه هزر وبیرێن وى ژ بهر وان گۆتنێن وى شڤێدى ل كۆچكا بابێ خۆ بهیستین.
هێشتا گۆتنێن (رووزبه)ى وههڤالێن وى هندهك پسیار وگومان د دلێ وى دا پهیدا دكرن.. تو بێژى ئهو گۆتنێن (رووزبه)ى گۆتین دڕاست بن؟ ئهوى دگۆت: خودایێ ڕۆناهیێ ژ هندێ مهزنتره مرۆڤینیێ هۆسا بهێلته د دهستێن هندهك زۆردارێن سهرداچووى دا حهتا حهتایێ یاریان بۆ خۆ پێ بكهن! وچهند مجدى وهیڤیا مهزن وى د چاڤێن وان دا ددیت دهمێ وان ب پشت ڕاستى ڤه دگۆت: ڕۆژهك دێ ئێت ئاگرێ ههوه یێ پیرۆز دێ ڤهمرت، وڕۆژا ئازادیێ دێ ڕۆناهى وتێنا خۆ دهته ههر جههكى! ئهو (ئینكارا) هندێ ناكهت كو وى خۆشیهكا تایبهت ژ گۆتنێن (رووزبه)ى ددیت، ژ بهر وێ رههوانیا تێدا ههى، بهلێ هزرا وى یا نازك وتهڕ زهحمهتهكا زێده ب هندێ ڤه ددیت كو ڤان گۆتنان باوهر بكهت، تو بێژى ئهڤه هندهك خهونێن شرین بن ئهو بۆ خۆ دبینن وخۆ پێڤه موژیل دكهن، وهكى بابێ وى گۆتى؟
ئهڤه نێزیكى چار سالانه ئهو ڤى كارى دكهت، بهلێ ڤێ جارێ ههر وهكى ئهو وێ ههیبهتێ د ئێتوینا ئاگرى دا نابینت یا ههر جار وى ددیت، باش بهرێ خۆ گوڕیا ئاگرى دهمێ تێك دئالیا، پاشى ب حێبهتى ڤه ناڤ چاڤێن خۆ تێك برن، وهێدى د گهل خۆ گۆت:
كانێ ئهو دیمهنێ بهرى نوكه من د ڤى ئاگرى ڕا ددیت، یان تو بێژى ئهو خهیالهك بت حهتا ئهڤرۆ من دئینا بهر چاڤێن خۆ وچو ڕاستى بۆ نهبوون؟ ئهڤرۆ ئهو ڤى ئاگرى وهكى ههر ئاگرهكێ دى یێ دبینت، ئاگرهكه یێ وان داران دخۆت یێن بۆ دئێنه هاڤێتن، وچى گاڤا وى پیچهكێ خۆ گیرۆ كر وچو دار نهدانێ ئهو دێ كز بت ودویر نینه ڤهمرت، پا كانێ ئهو پیرۆزى یا كاهن بهحس ژێ دكهن؟ كانێ ئهو نهێنیێن مهزن یێن كو د ڤى ئاگرى دا ههین ئهوێن كاهنێن مه مه پێ دخاپینن؟ ئهرێ ما ئهڤ ئاگره ژى وهكى ههر ئاگرهكێ دى ناڤهمریێت ئهگهر ئاڤهكێ پێدا بكهن؟
ڤان پسیارێن مهزن و ب ترس هندهك گومانێن مهزن د دلێ وى دا پهیدا كرن، بهلێ وى بسته نهكر وان ب ئهزمانێ خۆ بێژت، دهمێ ب ڕێڤه دهات دا بزڤڕته قهسرا بابێ خۆ، دههقانێ باژێڕى، چاڤێن وى ب سهر وچاڤێن وى خهلكى دكهت ئهوێن دهاتن ودچوون، بۆ جارا ئێكێ بوو وى وهستیانهكا ڤهشارتى ل سهر دخواند، پـێ حهسیا ههر وهكى ئهو هێدى یێن دنالن ژ بهر قامچیێن زۆرداریێ، ب بـێـن تـهنگیهكا مــهزن حـهسـیـا، وبێى هاى ژ خۆ ههبت وى گۆتنا (رووزبه)ى د گهل خۆ دوبارهكره ڤه: (لازمه ڕۆناهى ب سهركهڤت).
گاڤا زڤـڕیــه مـال، خــهلكـێ مالێ تێ ئینا دهر كو ڕهنگهكێ گوهۆڕینێ یێ ب سهر دا هاتى؛ چونكى ئهو كهیفا وان ههر جار د چاڤێن وى دا دخواند، دهمێ ئهو ژ نۆبا خۆ یا ئاگرهلكرنێ دزڤڕى ئهڤرۆ یا دیار نینه، بهلێ وان گۆت: دیاره ئهو ئهڤرۆ یێ وهستیاى لهوا.. ودهمێ ئهو د ناڤبهرا ههر چار دیوارێن مهزهلا خۆ دا مایه ب تنێ جارهكا دى هزر وبیرێن ژێك جودا ئهو ئینا وبر، مهسهلا سهركهفتنا ڕۆناهیێ ئهوا (رووزبه)ى وههڤالێن وى بهحس ژێ دكر، تشتهكه وى ژى قهناعهت یا پێ ههى، بهلێ تشتێ عهقلێ وى نهدشیا قهبویل بكهت مهسهلا وێ ههڤڕكیێ بوو یا د ناڤبهرا خودایێ ڕۆناهیێ (ئههریمهزداى) وخودایێ تاریێ (ئههریمهنى) دا ههى، ئهرێ گۆتنا (رووزبه)ى بۆ ڤێ ئالۆزیێ چیه یا كو د هزرا وان دا ههى؟ ما تشتهكێ ژ ههژى خودایێ ڕۆناهیێیه ئهو ژ ئههریمهنى بڕهڤت، وعهردى بۆ وى بهێلت، وبێژته خهلكى: من شۆله ژ ههوه نینه، هوین ب هێزا خۆ ئههریمهنى بشكێنن پاشى پشتى هوین ب سهردكهڤن وهره نك من؟
و ل وى دهمێ وى هزرا خۆ د ڤێ ئالۆزیێ دا دكر ئهوا (مانى) پێ هاتى، یا وى قهناعهت ههى كو ئهو ژى گهلهك ژ وان ئهفسانهیان چێتر نینه یا (مزدهكى) بهرێ خهلكى ددایێ، هاتنا خولامێ وى ئهو ژ ڤان خرگۆمانان ئینا دهر، دهمێ هێدى ب ژۆر كهفتى و ب ڕێزگرتن ڤه ل بهرانبهر وى ڕاوهستاى وگۆتیێ: ئهز بهنى! بابێ ته یێ گۆتى بلا بێته نك من.
- تو بێژى بابێ من تێ ئینابته دهر كو گوهۆڕینهكا ب سهر هزر وبیرێن من دا هاتى، ڤێجا وى دڤێت ڕاستیا مهسهلێ بزانت، لهو هنارت بته ب دویڤ من ڕا؟
وى ئهڤ پسیاره ژ خۆ دكر دهمێ ب نك ژۆرا بابێ خۆ ڤه دچوو، بهلێ ههر زوى مهسهله ل بهر وى روهن بوو، سوباهى بابێ وى ناگههت بچته ناڤ چهم بیستانێن خۆ ل گوندى؛ چونكى ئهو دێ دهست ب ئاڤاكرنا خانیێ خۆ یێ نوى كهت، وى هژمارهكا مهزن یا بهننا ومرۆڤێن شارهزا د ئاڤاكرنێ دا یێن ئاگههدار كرین كو بێنه وى جهێ وى دڤێت قهسرا خۆ یا نوى لێ ئاڤا كهت، دا بیر وبۆچوونێن وان وهرگرت، لهو دڤێت ئهو ژى سوباهى بچته وێرێ، ڤێجا وى دڤێت كوڕێ وى یێ نیڤ زهلام قهستا گوندى بكهت، وپــێـش بابێ خۆ ڤه چـاڤــدێــریــێ ل بهنى وكۆلهیان بكهت، دا ئهو سستیێ د كارێ خۆ دا نهكهن.
ئهڤ واجبێ بابێ وى ئێخستیه سهر ملێن وى، گهلهك ل دلێ وى هات، چونكى ئهو دێ بۆ وى بته دهلیڤهیهكا باش كو بمینته ب تنێ د گهل خۆ ل چۆلى دویر ژ جهووێ قهسرێ وپهرستگههێ وكاهنان، لهو ههر زوى وى رازیبوونا خۆ ئاشكهرا كر، وبهرى ئهو ژ نك بابێ خۆ دهركهڤت بابێ وى گۆتێ:
- بهلێ خۆ گیرۆ نهكه، ل نك من تو ژ قهسر وبیستان ومالێ دنیایێ ههمیێ ب بهاترى، ئهگهر تشتهك ل ته هات عهقل د سهرێ من نامینت!
- ته خهم پێ نهبت باب..
وبهرى ئهو دهركهڤت وهكى عهدهت وى ب دهستێ بابێ خۆ ڤه ماچى كر، وخۆ بۆ چهماند، و ب كهیف ڤه قهستا ژۆرا خۆ كر.
