دیدارا ئێكێ
ئهڤرۆ زویتر ژ ههمى ڕۆژان وى كارێ خۆ خلاسكر، ودهمێ بوویه ئێڤار وى دهستویرى ژ سهییدێ خۆ وهرگرت كو ئهو ئهڤرۆ زوى نهزڤڕته حصنى؛ چونكى وى كارهكێ فهرێ ههى دڤێت بكهت، وهندى كهیفا سهییدێ وى ب سڤكى وپاقژیا كارێ وى هات، دهستویرى دایێ كو ئهو بچت كارێ خۆ بكهت، ووهكى ئێخسیرهكێ ژ زنجیرێن خــۆ ڤـهڕست وزوى قهستا جهێ خۆ بكهت، وى بهرێ خۆ ژ ڕێكا حصنێ (بهنوو قورهیظیان) ڤهگوهاست و ب لایێ (قوبائێ) ڤه چوو.. شهوقهكا دژوار ئهو دهاژۆت، وگاڤا دارقهسپێن قوبائێ ژ دویر ڤه ب بهرچاڤێن وى كهفتین، وى دهستێ خۆ دانا سهر سنگێ خۆ، ههر وهكى دڤیا خۆ پشت ڕاست كـهت كــانــێ دلــێ وى ل جـهـێ خۆیه یان نه، پێ حهسیا ههر وهكى دلێ وى پتر ژ ههمى جاران یێ خۆ دقوتت، ئهڤه ئێكهمین جاره ئهو بهر ب دیدارهكا هۆسا ڤه دچت، دیدارهكا (مهصیرى) ب نسبهت وى، ئهو دیدارا حوكمى ب ژینێ یان مرنێ ل سهر هیڤیا وى یا مهزن دێ دهت! وگاڤا ئهو هێدى هێدى نێزیكى قوبائێ بووى ههر زوى ئهو ب گوهۆڕینێ حهسیا، (قوباء) ئهوا بهرى نوكه وى گهلهك جاران دیتى ئهڤرۆ یا جودا بوو، كهیف د دهر وبانان دا دچوو، گڕنژین ل سهر وان ههمى دێمان یا نهخشاندى بوو یێن وى ددیتن، دا بێژى رحهكا نوى یا ب سهر ڤى جهى دا هاتى..
وسهلمانێ فارسى گهلهك زهحمهت نهدیت كو ب سهر وى جهى هل ببت یێ مێڤانێ نوى لێ داناى، چونكى ههر كهسهكێ ته پسیارا وى ژێ كربا ل قوبائێ ب كهیفخۆشى ڤه دا بێژته ته: ئهو یێ ل فلان جهى! وڕۆژا گهش دهمێ دههلێت ههمى كهس ب جهێ وێ دكهڤن.
دهمێ ئهو نێزیكى وى جهى بووى.. وى دیت زهلام ههمى وهسا ل مێڤانێ خۆ یێن كۆمبووین كا چاوا ستێر ل دۆر ههیڤێ كۆم دبن، ڤیان وتهناهى وخۆشیێ چهنگێ خۆ ب سهر وان دا ئینابوو خوارێ، وگاڤا ئهو نێزیكى كۆما زهلامان بووى، ووان دیتى مرۆڤهكێ غهریب یێ دئێت وزهمبیلهكا تژى قهسپ یا د دهستان دا، وان ب تۆره وڕێزگرتن ڤه ڕێ بۆ ڤهكر، حهتا ئهو هاتى بهرانبهر مێڤانێ وان ڕاوهستیاى، وسلاڤ كرى..
گاڤا چـاڤـێـن وى ب چاڤێن مێڤانى كهفتین دا بێژى ئهو هنده ساله ئهو یێ ب ژڤانه د گهل وى، ههیبهتهكا ئاشكهرا ل دۆرماندۆرى وى ههبوو، بێى مرۆڤى دلێ مرۆڤى ب نك وى ڤه دكێشا.. بهلێ، بهرى ئهو بڕیارا خۆ بدهت دڤێت ئهو وان نیشانان ببینت یێن سهیدایێ وى بۆ گۆتین، سهلمان ب وێ رحهتیێ یا پێ هاتیه نیاسـین ب نك (موحهممهدى) ڤه چوو، وزهنبیلا خۆ دانا بهر سنگى، و ب تۆره ڤه گۆتێ:
- من یێ زانى كو تو مرۆڤهكێ چاكى، وهندهك ههڤالێن غهریب وموحتاج یێن د گهل ته ههین، وئهڤه هندهك قهسپێن خێرێ بوون ل نك من، كهس ژ ههوه پێتڤیتر من نهدیت ئهز بدهمێ، لهو من ئهو بۆ ههوه ئینان.
موحهممهدی ب گڕنژین ڤه ئهو ژێ وهرگرتن، وسوپاسیا وى كر، و ل ههڤالێن خۆ زڤڕى وگۆته وان: وهرن بخۆن.. سهلمانى بهرێ خۆ دایێ ئهو دهستێ خۆ درێژ ناكهتێ وژێ ناخۆت، ئینا د دلێ خۆ دا گۆت: ئهڤه ئێك!
پاشى ل سهر پێ خۆ زڤڕى وچوو قهستا حصنى كر، دا بگههته مالا سهییدێ خۆ بهرى ڕۆژ ئاڤا ببت، پشتى ڤێ دیدارا كورت كارتێكرنهكا مهزن ل سهر نهفسا وى هێلاى، وگوهۆڕینهكا بهرچاڤ د هزر وبیرێن وى دا كرى.. وڕۆژا د دویڤ دا وهكى ههر جار وى قهستا بیستانێ سهییدێ خۆ كر وزڤڕى سهر كارێ خۆ.. وچهند ڕۆژهكێن كێم پێڤه نهچوون، وى ژ خهلكى گوهـ لێ بوو كو موحهممهد ژ قوبائێ یێ هاتیه یهثربێ ب ئنیهتا هندێ كو ل وێرێ ئاكنجى ببت، ل یهثربێ ئهو جهێ دكهفته ناڤبهرا دو لاتێن ڕهش، وهكى سهیدایێ وى گۆتى.. وڕۆژهكێ ئهو پێ حهسیا شهوقهكا دژوار یا وى پال ددهت كو قهستا موحهممهدى بكهت، وهێشتا وى بجهڕبینت حهتا وان ههمى نیشانان ل نك ببینت یێن ئوسقوفى بۆ گۆتین، وڕۆژهكــێ دهمـــێ دیـــتـــى وى بــهرى وهخــتــى كارێ خۆ خلاسكر دیسا دهستویرى ژ سهییدێ خۆ خواست كو چهندهكێ ژ دهرڤهى حصنى گیرۆ ببت ژ بهر كارهكێ خۆ یێ تایبهت، وڤێ جارێ ئهو بهر ب یهپربێ ڤه چوو..
وگاڤا چاڤێن وى ب یهثربێ كهفتین، دا بێژى نه ئهو باژێڕه یێ بهرى هنگى وى دیتى، كانێ ئهو ههڤڕكى ودوبهرهكیا د ناڤبهرا تاخێ ئهوس وخهزرهجیان دا ههى، ئهوا گهلهك جاران بهرێ خهلكى ددا شهڕ وكوشتنێ پشتى جوهیان دهستێ خۆ یێ ڕهش ب دزى ڤه دكره د ناڤ ڕا؟ نوكه ئهو جڤاكهكا دى یێ دبینت، ههما نێزیكه ناڤێ ئهوس وخهزهجیان ب خۆ نهمینت، پشتى ناڤێ ئهنصاریان كهفتیه سهر ههمى دهڤان، ئهو ئهوس وخهزرهجیێن هێشتا خوینا وان هشك نهبووى یان وان ب دهستێن ئێك ودو ڕێتى، نوكه ملێن وان یێن پێكڤه، ووهكى دیوارهكێ مــوكــم ل دۆر موحهممهدى یێن كۆم دبن، دێ بێژى ڕۆژهكێ نهیارهتى وخویندارى د نـاڤـبـهرا وان دا نهبوویه، وههمى ههمى ئهڤه نهبوویه ههیڤهك موحهممهد هاتیه د ناڤ وان دا، ئهڤه چ هێزه وى ههى حهتا شیاى ڤێ چهندێ بكهت؟
وپشتى سهلمانى پسیارا هندهك مرۆڤان كرى كانێ موحهممهد ل كیڤهیه، وهـنـدهكـان گـۆتـیـێ: ئـهو یێ ل نك مالخالانێن بابێ خۆ ژ (بهنى نهججاریان)، ل مالا (ئهبوو ئهییووبى) ئهو ب نك ڤه چوو، وڤێ جارێ ژى وهكى جارا دى وى دیت كۆمهكا ههڤالێن وى یێن لێ كۆمبووین، پشتى ئهو نێزیكى وان بووى وسلاڤ كرى، گۆت:
- جارا دى من دیت ته قهسپێن خێرێ نهخوارن، من گۆت ڤێ جارێ هندهك قهسپێن دى ب دیارى دێ بۆ ته ئینم..
وگاڤا وى دیتى موحهممهدى ڤێ جارێ ناڤێ خودێ ئیناى ودهست ب خوارنا قهسپان كرى وگۆتیه ههڤالێن خۆ ژى: وهرن بخون.. وى هێدى د گهل خۆ گۆت: ئهڤه دو..
وهێدى زڤڕى ڤه وقهستا حصنێ جوهیان كر.
