مشهختبوون بهر ب خودێ ڤه
وبڕیارا وى ئهو بوو ئهو بهر دهرازینكا مالا خۆ بكۆلت، ومالێ خۆ ههمیێ بكهته تێدا وئاخێ ڕادهته سهر، وبهرێ خۆ بدهتێ چى گاڤا چاڤێن قورهیشیان ژێ غافل بوون، ئهو خۆ بهاڤێت، و ژ مهكههێ دهركهڤت، وبهر ب خودێ ڤه مشهخت ببت وقهستا مهدینێ بكهت؛ دا بگههته خۆشتڤیێ خۆ وههڤالێن وى..
ل دهمهكێ وى هزركرى كهس وى نابینت، ئهو ل حێشترا خۆ سویار بوو، وخۆ هاڤێت.. هێشتا ئهو ل ڕهخێ باژێڕى، كۆمهكا قورهیشیان ب دهركهفتنا وى حهسیان، ههر زوى وان خۆ ڤێڕا گههاند، دهمێ صوههیبى ژ دویر ڤه ئهو دیتین، وزانى ئارمانجا وان ئهوه، وئهو نهشێت ژ وان خلاس ببت، ئهو د جهـ دا ڕاوهستیا، ژ حێشترا خۆ هاته خوارێ، شیرێ خۆ حارز كر، وكڤانێ خۆ ژ ملێ خۆ ڤه كر وتیرهك ئێخستێ، وبهرێ وى دا وان.. وگاڤا ئهو نێزیك بووین، وى گۆته وان:
- گهلى قورهیشیان.. هوین باش دزانن، كهسهك ژ ههوه وهكى من یێ سهگڤان نینه، ئهز ب خودێ كهمه هوین ناگههنه حهتا تیرێن من خلاس نهبن، وشیرێ من د دهستێن من دشكێت.. ڤێجا ئهگهر ههوه رحا خۆ نهڤێت ب نك من ڤه وهرن..
گاڤا وان صوههیب ب ڤى ڕهنگى دیتى، ئهو د جهێ خۆ دا ڕاوهستیان، وپیچهكێ هزرێن خۆ كرن، ههوجه ناكهت ئهو صوههیبى بجهڕبینن، دا ڕاستیا گۆتنا وى بزانن، ئهو وى باش دنیاسن.. لهو وان ڤیا سوحبهتێ بگوهۆڕن، ئێك ژ وان گۆت:
- ڕۆژا تو هاتیه باژێڕێ مه، تو جحێلهكێ تهلهڕویت بووى، ته تشتهك نهبوو، ل نك مه تو بوویه خودان مال وحال، وپارێن ته زێده بوون، نوكه ته دڤێت مالێ خۆ ههمیێ ببهى و ژ ناڤ مه دهركهڤى؟!
مهعنا مهسهله نه بیر وباوهرن، مهسهله جهردهییه.. ئهگهر هۆسا بت، مهسهله یا ب ساناهیه! صوههیبى ب گڕنژینهكا تێر مهعنا ڤه گۆتهوان:
- باشه، ئهگهر ئهز وى جهى نیشا ههوه بدهم، یێ من مالێ خۆ لێ ڤهشارتى، هوین دێ بهلا خۆ ژ من ڤه كهن؟
- بهلێ.. پاران بده مه، وتو كیڤه دچى وێڤه ههڕه..
صوههیبى گۆته وان:
- ل بهر دهرازینكا مالا من بكۆلن، مالێ من ههمیێ دێ ل وێرێ بینن..
گاڤا صوههیب ئهو جهـ نیشا وان داى یێ وى مالێ خۆ لێ ڤهشارتى، وان هێلا ئهو بچت.. ودهمێ ئهو زڤڕین دا بچت وى جهى بكۆلن، ئێك ژ وان گۆته ههڤالێن خۆ:
- پا ئهگهر وه نهبت..
ئێكی دى ملێ وى گرت وپالدا وگۆتێ:
- دێ وهره وهره.. ئهگهر دنیا ههمى درهوان بكهن، یێن وهكى صوههیبى وههڤالێن وى درهوان ناكهن!!
و ل قوبائێ، ئهو گوندێ دكهفته بهراهیا مهدینێ، صوههیب گههشته ههردو ههڤالێن خۆ.. پێغهمبهرى وئهبوو بهكرى، ئهوێن قهول ئهو بوو ئهو ژى د گهل وان بت، بهرى صوههیب گازندهیا خۆ بكهت، پێغهمبهر -سلاڤ لێ بن- ب بهر وى ڤه چوو، و ب ڕویهكێ گهش وگڕنژین ڤه گۆتێ:
- دێ وهره بابێ یهحیاى.. ته د كڕینا خۆ دا فایده كر، ته فایده كر!!
پاشى ئهبوو بهكرى ئهو وێڤه بر وگۆتێ:
- جبریلى ئایهتهك د دهر حهقا ته دا بۆ پێغهمبهرى سلاڤ لێ بن یا ئینایه خوارێ، وئهو ئایهت ژى ئهڤهیه: (ومن الناس من يشري نفسه ابتغاء مرضات الله والله رءوف بالعباد)ژ مرۆڤان هندهك ههنه پێخهمهت رازیبوونا خودێ نهفسا خـۆ دكـڕن، وخـودێ ب بهنیێن خـۆ یـێ مهرهبانه.. تـه ب مالێ خۆ خۆ كڕى، وتو د كڕینا خۆ دا یێ سهرفایده بووى..
و ل سیهـ وپێنج سالیا خۆ صوههیب ژ مهكههێ بهر ب مهدینێ ڤه مشهخت بوو، وبوو ئێك ژ موهاجران.. صوههیب ئهوێ ب ڤێ موهاجریا خۆ یا دویماهیێ ژ نوى ئاكنجى بووى، ودویماهى بۆ ژینا خۆ یا تژى ڤهگوهاستن وموهاجرى داناى..
