کویراتیا جەهنەمێ و فرەهیا وێ
کویراتیا جەهنەمێ و فرەهییا وێ هند یا مەزنە ب تنێ خودێ دزانت چەندە، و ئەڤ راستییە بو مە ژ ڤان خالێن ژێری ئاشکەرا دبت:
🔘 یا ئێکێ: دگەلەك حەدیسێن دروست دا هاتییە کو کەڤرەکێ ئەگەت بهاڤێنە دجەهنەمێ دا حەفتێ سالان یان پتر دێ دژوردا چت حەتا بگەهتە بنی،(موسلم) ژ(ئەبوو هورەیرەی)ڤەدگوهێزت، دبێژت: روژەکێ ئەم ل نك پێغەمبەری بوین سلاڤ لێ بن دەنگەك هاتە مە ،ئینا پێغەمبەری سلاڤ لێ بن گوت: هوین دزانن ئەڤە چ بوو؟ مو گوت: خودێ و پێغەمبەرێ وی چێتر دزانن، گوت:(هذا حجر أرسل في جهنم منذ سبعين خريفاً فالآن انتهى إلى قعرها) ئەڤە بەرەك بوو ئەڤە حەفتێ سالە دجەهنەمێ دا هاتبوو هاڤێتن ، نوکە گەهشتە بنی.
و دحەدیسەکا دی دا( بوخاری و مسلم)ژ (ئەبوو هورەیرەی) ڤەدگوهێزن ، دبێژت پێغەمبەری سلاڤ لێ بن گوت: (إن العبد ليتكلم بالكلمة ينزل بها في النار أبعد ما بين الـمـشــرق والـمـغـرب) هندی بەنییە گوتنەکێ دبێژت، پتر ژ دویراتیا دناڤبەرا روژهەلات و روژئاڤایی دا هەی ئەو پێ دئێتە هاڤێتن دئاگری دا.
ژ ڤێ حەدیسێ ژی ئاشکەرا دبت کو کویراتییا جەهنەمێ گەلەکە ، چونکی ئەگەر مروڤەك سەرا گونەهەکا بتنێ پتر ژ دویراتییا دناڤبەرا روژهەلات و روژئاڤایی دا هەی دجەهنەمێ دا بێتە هاڤێتن ، پا خودانێن گونەهێن مەزن دێ چەند ئێنە هاڤێتن؟!
🔘یا دووێ: دحەدیسەکا دروست دا یا (موسلم)ژ(عەبدللاهێ کورێ مەسعوودی) ڤەدگوهێزت، پێغەمبەر سلاڤ لێ بن بەحسێ جەهنەمێ دکەت دەمێ ل روژا قیامەتێ دئێتە ئینان و دبێژت:(يؤتى بجهنم يومئذ لها سبعون ألف زمام ، مع كل زمام سبعون ألف ملك) وێ روژێ جەهنەم دێ ئێتە ئینان حەفتێ هزار چنبلك پێڤە هەنە ، دگەل هەر چنبلکەکێ حەفتێ هزار ملیاکەت هەنە.
ڤێجا هزر بکەن چەند ملیاکەت هێزا خو ددەنە ئێك حەتا بشێن ڤێ جەهنەمێ ژ جهــ ببەن ، و ژبیر نەکەن کو ملیاکەتەك ددنیایێ دا چەنگێ خو ل چیایەکێ بدەت دێ ژبن هاڤێت!
🔘یا سییێ: ئەو کەسێن دچنە جەهنەمێ هند گەلەکن ژ خودێ پێڤەتر کەس نزانت هژمارا وان چەندە، ئەڤ مروڤە هەمی دچنە جەهنەمێ و هێشتا جهــ بو هندەکێن دی ژی تێدا دمینت، و دحەدیسێن دروست دا هاتییە کو مروڤ دەمێ دچتە جەهنەمێ کەلەخێ وی یێ هند نابت هندی ددنیایێ دا بەلکی گەلەك مەزنتر لێ دئێت ، ڤێجا هزر بکەن دڤێت جەهنەم چەند یا مەزن بت حەتا تێرا وان هەمییان بکەت؟!
🔘 یا چارێ: و تشتێ بەرفرەهییا جەهنەمێ و کویراتییا وێ بو مە بەرچاڤ دکەت ئەوە ئەڤ روژا مە یا دنیایێ ئەوا هندە یا مەزن روژا قیامەتێ دئێتە هاڤێتن دجەهنەمێ دا وەکی دحەدیسێن دروست دا هاتی ، ڤێجا هزر بکەن روژ ب هەمی مەزنییا خوڤە دبتە بزوتەك ژ بزوتێن جەهنەمێ!
