حەدیسا سیهــ و هەشتێ
عَنْ أَبِي هُرَيْرَةَ - رَضِيَ الله عَنْهُ – قَالَ: قَالَ رَسُولُ الله -صَلَّى الله عَلَيْهِ وَسَلَّمَ-: ( إِنَّ الله قَالَ: مَنْ عَادَى لِي وَلِيًّا فَقَدْ آذَنْتُهُ بِالحَرْبِ، وَمَا تَقَرَّبَ إِلَيَّ عَبْدِي بِشَيْءٍ أَحَبَّ إِلَيَّ مِمَّا افْتَرَضْتُ عَلَيْهِ، وَمَا يَزَالُ عَبْدِي يَتَقَرَّبُ إِلَيَّ بِالنَّوَافِلِ حَتَّى أُحِبَّهُ، فَإِذَا أَحْبَبْتُهُ كُنْتُ سَمْعَهُ الَّذِي يَسْمَعُ بِهِ، وَبَصَرَهُ الَّذِي يُبْصِرُ بِهِ، وَيَدَهُ الَّتِي يَبْطِشُ بِهَا، وَرِجْلَهُ الَّتِي يَمْشِي بِهَا، وَإِنْ سَأَلَنِي لَأُعْطِيَنَّهُ، وَلَئِنْ اسْتَعَاذَنِي لَأُعِيذَنَّهُ ).رواه البخاري
ژ ئهبوو هورهیرهى -خودێ ژێ رازى بت- دبێژت: پێغهمبهرى -سلاڤ لێ بن- گۆت: هندى خودێیه دبێژت: ههچیێ نهیارهتیا وهلیهكێ من بكهت، من شهڕ د گهل وى ڕاگههاند، وبهنیێ من ب تشتهكى خۆ نێزیكى من نهكریه خۆشتڤیتر بت ل نك من ژ وى تشتى یێ من ل سهر وى فهرزكرى، وبهنیێ مــن هــهر دێ مینت خۆ نێزیكى من كهت ب كرنا سوننهتان، حهتا ئهز حهز ژ وى دكهم، ڤێجا ئهگهر من حهز ژ وى كر، ئهز دێ بمه گوهێ وى یێ وى پێ گوهـ لێ دبت، وچاڤێ وى یێ ئهو پێ دبینت، ودهستێ وى یێ ئهو پێ دگرت، وپیێ وى یێ ئهو پێ ب ڕێڤه دچت، وئهگهر ئهو پسیارێ ژ من بكهت ئهز دێ دهمێ، وئهگهر خۆ ب من بپارێزت، ئهز دێ وى پارێزم. بوخارى ڤهدگوهێزت
ئهڤ حهدیسه بهایێ مرۆڤێن قهنج ل نك خودێ بۆ مه ئاشكهرا دكهت، وكو حهرامه نهیارهتیا وان بێتهكرن، ههر وهسا بهایێ عیبادهتى چ یێ فهرز بت چ سوننهت بۆ مه ئاشكهرا دكهت، پێغهمبهر -سلاڤ لێ بن- ژ خودایێ خۆ ڤهدگوهێزت، كو ههر كهسهكێ نهیارهتیا وهلیهك ژ وهلیێن خودێ بكهت، خودێ دێ شهڕى د گهل وى كهت، وئهوێ خودێ شهڕێ وى بكهت، مسۆگهر ئهو دێ چته هیلاكێ.
ووهلیێن خودێ، وهكى خودێ ب خۆ د ئایهتهكێ دا ددهته زانین، دو سالۆخهتێن سهرهكى ل نك ههنه، دبێژت: (أَلَا إِنَّ أَوْلِيَاءَ اللَّهِ لَا خَوْفٌ عَلَيْهِمْ وَلَا هُمْ يَحْزَنُونَ(62) الَّذِينَ آمَنُوا وَكَانُوا يَتَّقُونَ(63))(یونس: 62-63) مهعنا: سالۆخهتێ وان یێ ئێكێ باوهریه، ویێ دووێ تهقوایه، ووان چو نیشانێن تایبهت نینن وان ژ خهلكى جودا بكهن، وهكى جلكان یان سهر وبهرى، ودڤیت نهئێته هزركرن كو وهلیێن خودێ د مهعصوومن وچو گونههان ناكهن، یان مهرتهبا وان د سهر یا پێغهمبهران ڕایه، وهكى هندهك نهزان هزر دكهن!
ودوژمناتیا وهلیێن خودێ كارهكێ حهرامه، ئهگهر هات وئهڤ دوژمناتیه سهرا هندێ بت چونكى ئهو فهرمانا خودێ ب جهـ دئینت، بهلێ ئهگهر سهرا تشتهكێ دى یێ دنیایێ بت، ژ وان تشتێن ههڤڕكى سهرا چێ دبت، ئهو ناكهفته د بن ڤى حوكمى ڤه، ودهمێ خودێ دبێژت: (فقد آذنته بالحرب) مهعنا وێ ئهوه: من ب وى دا زانین كو ئهز دوژمنێ ویمه ودێ شهڕێ وى كهم.. وشهڕێ خودێ د گهل ئێكى مهعنا وێ تێبرنا ویه.
وباشترین كارێ مرۆڤ خۆ پێ نێزیكى خودێ بكهت، ئهو كارن یێن وى ل مرۆڤى فهرز كرین، وهكى: نڤێژێن فهرز، وڕۆژیا رهمهزانێ.. وبهلكى خۆ نهكرنا كارێن حهرام ژى د ڤێ چهندێ دا وهكى كرنا كارێن فهرز بت.
پشتى فهرزان سوننهت دئێن، ودهرگههێ سوننهتان یێ بهرفرههه، بۆ وى یێ بڤێت قهست بكهتێ، وكرنا سوننهتان وهكى ژ ڤێ حهدیسێ دئێته زانین دبته ئهگهر كو خودێ حهز ژ خودانى بكهت، وئهگهر خودێ حهز ژ ئێكى كر، بهرهكهتا ڤێ حهژێكرنێ ل سهر ژیانا وى ئاشكهرا دبت، وخودێ بۆ وى دبته هاریكار وپشتهڤان، وئێكا هند ژ وى چێ دكهت ئهو ب گوهێ خۆ گوهداریا تشتهكى نهكهت، ئهو تشت تێ نهبت یێ خودێ حهز ژێ دكهت، و ب چاڤێ خۆ بهرێ خۆ نهدهته تشتهكى، ئهو تشت تێ نهبت یێ خودێ حهز ژێ بكهت، ودهست ناكهته تشتهكێ خودێ پێ خۆش نهبت، و ب پیێ خۆ ژى ئهو ب نك تشتهكى ڤه ناچت، ئهو تشت تێ نهبت یێ خودێ حهز ژێ بكهت.. ودهمێ خـودێ دبێژت: ئــهز دێ بـمــه گـوهێ وى، وچاڤێ وى.. وهتد، ئهڤه كنایهته ژ هندێ كو خودێ دێ ڤان ئهندامێن وى پارێزت، دا ئهو كارهكێ وهسا پێ نهكهت خودێ پێ خۆش نهبت.
وتشتێ دى یێ خودێ ددهته وهلیێ خۆ ئهڤهیه: ههر پسیار ودوعایهكا ئهو ژ خودێ بكهت، خودێ د بهرسڤا وى دئێت، وچى گاڤا وى خۆ ب خودێ پاراست خودێ دێ وى پارێزت.
⚪️مفایێن حهدیسێ:
1- وهلى حورمهتا خۆ ههیه، ودڤێت نهیارهتیا وى نهئێتهكرن.
2- ئهوێ كهرب ونهڤیانێ بۆ وهلیێنخودێ هل دگرت، ئهویێ ل سهر خهطهرهكا مهزن؛ چونكى خودێ نهیارێ ویه.
3- كارێ سوننهت بهرى یێ فهرز نائێتهكرن.
4- ئـهوێ فــهرزان ب جهـ بینت، وســوننهتان ژى بكهت، ڤـیـانـا خودێ ب دهست خۆ دئێخت، وئهوێ خودێ حهز ژێ بكهت ژیانهكا ب بهرهكهت دبهته سهرى.
