(10) ئهگهر ته سهعادهتا دورست بڤێت
ئهگهر ته سهعادهتا دورست بڤێت وێ ڕێكێ بده بهر خۆ یا بهرى نوكه مه گۆتى، دهمێ مه گۆتى: دلێ خۆ بۆ وى تشتى ڤالا كه یێ ئهمر پێ ل ته هاتیهكرن، وخۆ ب وى تشتى ڤه موژیل نهكه یێ خودێ (ضهمان) ب دانا وى دایه ته.
بهلێ.. ههر كهسهكێ هیڤیا زێدهبوونێ، وترسا كێمبوونێ، بۆ خۆ نهكربته خهم، وهزرا خۆ ههمیێ د هندێ دا ب كار نهئینت، كانێ چاوا دێ خۆشیهكا پتر ب دهست خۆ ئێخت، یان نهخۆشیهكێ ژ خۆ بدهته پاش؛ چونكى ئهو دزانت خودێ ل سهر ههر تشتهكى یێ خودان شیانه، ئهوه تهدبیرێ دكهت، وڕێكێ ل بهر بهنیێن خۆ ڤهدكهت، وتهدبیرا وى بۆ بهنیێ وى چێتره ژ وێ تهدبیرا بهنیێ بۆ خۆ دكهت؛ ژ بهر كو ئهو مهصلحهتا بهنیێ خۆ ژ وى باشتر دزانت، وئهو پتر دشێت وى تشتى بگههینتێ یێ بۆ وى باش، ووى تشتى ژ وى بدهته پاش یێ زیانا وى تێدا بت. وچونكى ئهو دزانت بێى حهزكرنا خودێ ئهو نهشێت ئێك پێگاڤ پێشڤه بچت، یان پاشڤه، لهو ئهو خـۆ ب دهسـت (مهشیئهتا) وى ڤـه بـهرددهت، و ب (قهضائا) وى رازى دبت، و ل بـهر دهرگههێ رهحما وى ستوخوار وسهرچهمیاى دمینت، خۆ دهێلته ب هیڤیا وى ڤه، ودهستێ ههوجهییا خۆ ب نك وى ڤه درێژ دكهت، وباوهریێ دئینت كو ژ بلى وى ههر ئێكێ ههبت ژ هندێ كێمتره خۆشیهكێ بگههینتێ، یان نهخۆشیهكێ ژێ بدهته پاش، چونكى خودان ومهلكێ ههر تشتهكێ د دهستى دا ههر ئهو ب تنێیه.. هنگى ئهو ژ ههمى كول وكهسهر وخهم وكۆڤانان رحهت دڕوینت، وبارێ خۆ یێ گران دهێلته ب هیڤیا وى ڤه یێ منهت ب هلگرتنا چو باران نهبت ئهگهر ئهو چهند دگران ژى بن، وئهو رهحم وقهنجیا خۆ نیشا ددهت وپێش وى ڤه وى بارى ڕادكهت، بێى عهبد زهحمهتهكێ ببینت، وچونكى عهبد ب ههمى ڤه بهرێ خۆ ددهته وى، وخهما خۆ دكهته ئهو، خودایێ وى ههمى خهمێن وى یێن ب ههوجهیێن دنیایێ ڤه دگرێداى ژێ ڤهدڕهڤینت، ودلێ وى ژ وان ڤالا دكهت، وهنگى پسیارا وێ خۆشیێ نهكهن یا ئهو ژ ژیانا خۆ دبینت، ووێ سهعادهته دگههته دلێ وى!
ژ خۆ ئهگهر وى خۆ هێلا ب هیڤیا خۆ ب خۆ ڤه، وپالدا سهر تهدبیر وهلبژارتنا خۆ، وهند خهم ژ حهقێ خودایێ نهخوار هندى بهرێ وى ل پشك وبارێن نهفسا وى، خودایێ وى دێ وى هێلته ب هیڤیا هلبژارتنا وى ڤه، وبهرێ وى دێ دهته وێ ڕێكێ یا وى بهرێ خۆ دایێ، وهنگى خهم وكۆڤان دێ لێ كۆم بن، ڤێجا نه دل لێ رحهت دبت، ونه كار باش دبت، ونه هیڤى ب دهست ڤه دئێت، وپهردهیهكێ ستویر دێ كهفته ناڤبهرا وى وسهعادهتێ.. پێغهمبهر -سلاڤ لێ بن- دبێژت: ( منْ جَعَلَ الهُمُومَ هَمًّا وَاحِدًا، هَمَّ المَعَادِ، كَفَاهُ الله هَمَّ الدُّنْيَا ، وَمَـنْ تَشَعَّبَتْ بِـهِ الـهُـمُـومُ، هُمُومٌ الدُّنْيَا، لَمْ يُبَالِ الله تَبَارَكَ وَتَعَالَى فِي أَيِّ أَوْدِيَتِهَا هَلَكَ ) یهعنى: ههچیێ خهمێن خۆ ههمیان بكهته خهمهك، خهما ئاخرهتێ، خـودێ خــهمــێــن دنـیـایــێ دێ ژ وى ڤــهكــهت، وهـهچـیـێ خهمێن وى ئهو ب گــهلــهك لایــان ڤــه بـر، خهمێن دنیایێ، خودێ منهت ب وى نینه ئهو د كیژ نهالێن وێ دا بچته هیلاكێ.
وخودێ فهرمان ب هندهك تشتان ل عهبدێن خۆ كریه، وسۆز ب هندهك تشتان دایێ، فهرمان ب (ئهمر ونههیان) لێ كریه، وكهفالهت ب رزقى وسهركهفتنێ دایێ، ڤێجا ئهگهر وى فهرمان ب جهـ ئینا، خودێ ژى سۆزا خۆ د گهل وى دێ ب جهـ ئینت، وتشتێ كهفالهت پێ دایێ دێ گههینتێ، سهركهفتنێ دێ دهته وى یێ سهركهفتنێ ژێ بخوازت، ودێ وى بێ منهت كهت یێ مرادا وى ئهو بت.
ومرۆڤێ تێگههشتى ئهوه یێ ب ئهمر ونههیان ڕاببت، وخهمێ ژێ بخۆت، نه كو خۆ ب وى تشتى ڤه موژیل بكهت یێ خودێ كهفالهت دایێ ئهو وى بۆ ب جهـ بینت، ب تایبهتى ئهگهر ئهم ل بیرا خۆ بینین كو چو وهفادارێن ڕاستگۆتر ژ خودێ نینن. و ژ نیشانێن سهعادهتا دورست ئهوه مرۆڤ خهما خۆ ههمیێ بكهته ب جهئینانا فهرمانا خودێ، نه ب جهئینانا تشتێ خودێ كهفالهت پێ داى، و ژ نیشانێن زڕباریا خودانى ئهوه دلێ وى ژ خهما ب جهئینانا ئهمرێ خودێ یێ ڤالا بت، وبهس بهرێ وى ل هندێ بت ئهو وى تشتى ب جهـ بینت یێ خودێ كهفالهت داى ئهو وى بۆ ب جهـ بینت..
