(12) مرۆڤ.. ئهو حیكمهتێن
د چێكرنا وى دا ل دویماهیێ ههین
قهلهم ئێكهمین چێكرى بوو خودێ داى؛ دا ئهو قهدهرا ههر تشتهكى بهرى چێبوونا وى بنڤیست، وئادهم چێكریێ دویماهیێ بوو، و د ئافراندنا مرۆڤى دا ل دویماهیا ههمى نفشێن چێكریان هژمارهكا حیكمهتان ههبووینه، ژ وان حیكمهتان:
یا ئێكێ: دا خـانـى بـێـتـه دورستكرن بهرى خودان لێ بێته ئاكنجیكرن، و د ڤێ چهندێ دا قهدرگرتنهكا بهرچاڤ بۆ مرۆڤه ههیه، ئهگهر تو بزانى مێڤانهك دێ ئێته نك ته، وئهو مێڤان ل بهر ته یێ ب قهدر بت، بهرى ئهو بێت تو دێ جهێ وى دورست كهى، وچونكى مرۆڤى قهدر وبهایهكێ مهزن ل نك خودێ ههبوویه، خودێ عالهم بۆ وى دورست كر، پاشى ئهو لێ دانا.
یا دووێ: ههر تشتهكێ ههى د عالهمێ دا، ل عهرد وعهسمانى، خودێ بۆ مرۆڤى و ژ بهر وى دایه، ومرۆڤ ئارمانجه، وئارمانج ل دویماهیێ دئێت.
یا سیێ: چێكهرێ زیرهك ب باشترین تشتى كارێ خۆ ب دویماهى دئینت، كانێ چاوا ئهو ب كارێ بناخه دهست پێ دكهت.
یا چـارێ: نهفس وهسا یێن هاتیه چێكرن وان بهر دمینته ل دویماهیێ، ژ بهر ڤێ چهندێ دهمێ مووسا وسێرهبهندێن فیرعهونى گههشتینه ئێك، مووساى گۆتێ: هوین بهرێ وێ بهاڤێن یا ههوه دڤێت هوین بهاڤێن، وگاڤا مرۆڤان ئهو تشت دیتى یێ سێرهبهندان هاڤێتى، بهرێ وان ما ل وى تشتێ دێ ل دویماهیێ ئێت.
یا پێنجێ: خودێ باشترین كیتابا خۆ، وباشترین پێغهمبهرێ خۆ، وئهممهتا باشتر بۆ دویماهیێ زهمانى هێلا، ووى ئاخرهت ژ دهسپێكێ چێتر لێ كر، ودویماهى ژ بهراهیان تمامترن.
یا شهشێ: ئهو ههمى تشتێ خودێ د عالهمێ بهلاڤ كرى، وى د ئادهمى دا كۆمكر، لهو ئادهم ئهو عالهما بچویكه یا عالهما مهزن تێدا كۆمبووى.
یا حهفتێ: مرۆڤ كورتیا ههبوونێ وفێقیێ وێیه، لهو یا موناسب ئهو بوو ئهو پشتى وان ههمیان بێته چێكرن.
یا ههشتێ: ژ قهدرگرتنا مرۆڤى ل سهر خودایێ وى ئهو بوو: ئهو ههوجهیى ومهصلحهتێن وى ههین، وئهو ئامیرتێن وى د ژینا خۆ دا پێتڤى پێ ههى ههمى بۆ وى بهرههڤكرن، ووى هندى دیت دهمێ وى سهرێ خۆ بلندكرى ههر تشتهك ل بهر دهستێ وى یێ حازره.
یا نههێ: دهمێ خودێ ڤیاى قهدر وبهایێ مرۆڤى ل سهر چێكریێن دى ئاشكهرا بكهت، وى ئهو بهرى وى چێكرن، لهو ملیاكهتان هزر دكر كو خودێ چێكریهكێ ژ وان باشتر چێ ناكهت، بهلێ دهمێ خودێ ئادهم ئافراندى وفهرمان ل ملیاكهتان كرى ئهو بۆ وى بچنه سوجدێ قهدرێ وى بۆ وان ئاشكهرا بوو، وگاڤا ئادهمى گونههـ كرى، ملیاكهتان هزركر ئهو قهدرێ خودێ دایه ئادهمى نهما، وهاته نهسخهكرن، بهلێ دهمێ ئادهمى تۆبهكرى وخودێ تۆبا وى قهبویل كرى، ملیاكهتان زانى كو خودێ سررهك د چێكریێن خۆ دا ههیه كهس ژ بلى وى نزانت.
یا دههێ: دهمێ خودێ چێكرنا ڤێ عالهمێ ب قهلهمى دهست پێ كرى، یا د جهێ خۆ دا بوو ئهو وى ب چێكرنا مرۆڤى ب دویماهى بینت؛ چونكى قهلهم ئامیرهتێ زانینێیه، ومرۆڤ زانایه، لهوا خودێ قهدر وبهایێ ئادهمى ب ڕێـكـا عـلـمـێ وى نـیشـا ملیاكهتان دا، دهمێ گۆتیه ئادهمى: ئهو علمێ ل نك ته ههى ب زانینا ناڤێن ڤان ناڤلێكریان، نیشا ملیاكهتان بده..
