(16)
ئهرێ رهمهزانێ ئهڤ گوهۆڕینه
ل نك ته پهیدا كرینه؟
د پهیڤا بۆرى دا پسیارهك مه ئازراند بوو ئهو ژ ئهڤه بوو: ئهرێ تو شیاى د ڤێ رهمهزانێ دا ببیه خودان هیممهتهكا بلند، كو گۆتنێن خۆ بكهیه كریار، ووان ئنیهتێن ته كرینه دلێ خۆ و ب هاتنا رهمهزانێ ڤه گرێداین ب جهـ بینى؟
وبهرسڤ مه بۆ ههوه هێلا بوو، وئهڤرۆ وهك هاریكارى بۆ گههشتنا بهرسڤهكا دورست بۆ وێ پسیارێ، مه دڤێت ب ڕێكا هندهك پسیارێن دى مهسهلێ پتر ئاشكهرا بكهین، هندهك گوهۆڕینان دهسنیشان بكهین وپسیار بكهین: ئهرێ رهمهزان شیایه ڤان گوهۆڕینان ل نك ته پهیدا بكهت؟ ئهگهر بهسڤا ته ئهو بوو: بهلێ رهمهزانێ ئهڤ گوهۆڕینه ل نك من پهیدا كرینه.. ئهو تو كهسان بى یێن مفا ژ همهزانێ دیتى، ژ خۆ ئهگهر رهمهزانێ چو ژ ڤان گوهۆڕینان ل نك ته پهیدا نهكربن، دڤێت هشیارى خۆ بى، وخۆ زیرهك بكهى هێشتا نیڤا دووێ ژى ژ رهمهزانێ بێ فایده ژ دهست ته نۆچووى.
ئـهو ب خۆ رهمهزان دهمێ دئێت -وهكى ئهم ههمى دزانین- گوهۆڕینێ د گهل خۆ دئینت، دهرگههێن بهحهشتێ ڤهدبن، ویێن جههنهمێ دئێنهگرتن، شهیتان دئێنه گرێدان، رۆتینێ ژیانا مرۆڤى وهكى خۆ نامینت، ژڤانێن خوارن وڤهخوارنێ، یێن نڤستن وڕابوونێ، وبهلكى یێن كارى ژى دئێنه گوهاڕتن، لهو مرۆڤ پێ دحهسیێت كو سهروبهرێ ژیانا وى د ڤێ ههیڤێ دا یێ طهبیعى نینه، ومهخسهدا ب پهیڤا طهبیعى ل ڤێرێ ئهو ڕهنگێ عهدهتیه یێ بهرى وپشتى رهمهزانێ ژیان ل سهر ب ڕێڤه دچت، بهلێ پسیارا ههر ئێك ژ مه دڤێت ژ خۆ بكهت ئهڤهیه: ئهرێ رهمهزان شیایه من بگوهۆڕت یان نه؟
جارێ د گهل خۆ بهرسڤا ڤان پسیارا بده:
ئهرێ رهمهزان شیایه (هودنهیهكێ) د ناڤبهرا ته وجهدهل وههڤڕكیان دا پهیدا بكه؟
چ ئهو ههڤڕكى ئهو بن یێن د ناڤبهرا ته وژن وعهیالى دا ل مال پهیدا دبن سهرا كاروبارێن مالێ، یان ئهو بن یێن د ناڤبهرا ته وههڤالان دا پهیدا دبن سهرا شۆلى؟ پێغهمبهر -سلاڤ لێ بن- دبـێـژت: ئـهگـهر ئێك ژ ههوه یێ ب ڕۆژى بوو، وكهسهك هات وما پێڤه كهربێن وى ڤهكرن، وگــۆتــنـێــن ســهقـــهت گـۆتـنـێ، بلا ئهو بهرسڤا وى نهدهت وبێژتێ: ئهزێ ب ڕۆژیمه. یهعنى: ڕۆژى یا هندێ نینه مرۆڤ دهمێ خۆ ب ههڤڕكى وگۆتنێن سهقهت وپڕبێژیێ ڤه ببۆرینت، ئهرێ ڕۆژى هشیایه ڤێ گۆهۆڕینێ ل نك ته پهیدا كهت، سنگێ ته فرههـ بكهت، وته ژ ههڤڕكى وجهدهلێ وجڕكێشیا د گهل نهزانان بدهته پاش؟ رهمـــهزان شـــیـــایــه هند گوهۆڕینێ ل نك ته پهیدا بكهت كو (تهنازولێ) ژ حهقێ خۆ بكهى وبهرسڤا نهزانان نهدهى دا قوسویرى نهگههته ڕۆژیا ته؟ یان ژى ڕۆژیگرتنێ تو پتر بێ تبعهت وعهصهبى كرى، كو سهرا تشتهكێ بهرنهكهفتى شهڕهكى بكهى؟
ئهرێ رهمهزان شیایه (هودنهیهكێ) د ناڤبهرا ته وبێ ئهمریا خودێ دا پهیدا بكهت؟
پێغهمبهر -سلاڤ لێ بن- د گۆتنێن خۆ دا ئاشكهرا دكهت كو ڕۆژى نه بهس ئهوه مرۆڤ خۆ ژ خوارن وڤهخوارنێ بدهته پاش، بهلكى ڕۆژى ئهوه ههمى ئهندامێن لهشێ مرۆڤى ژ بێ ئهمریا خودێ ب ڕۆژى بن، ئـهزمان ژ درهوێ وغهیبهتێ وگۆتنێن سهقهت، چاڤ ژ بهرێخۆدانا حهرامیێ، گوهـ ژ گوهداران گۆتنێن بێخێر وفاحش، وهتد.. ئهرێ رهمهزان شیایه ئێكا هند ژ ته چێ بكهت كو ئـهزمــانــێ خـۆ ژ گۆتنێن زێده بگرى، چاڤێن خۆ ژ بهرێخۆدانا وێ (فوجوورێ) بگرى یا كهنالێن (عهرد وعهسمانى) بهلاڤ دكهن، وگوهێن خۆ ژ وان گۆتنێن بێخێر بگرى یێن هۆنهرێ ئهرزان گوهـ پێ تژی كرین؟ یان ههما رهمهزان بهس شیایه (مهوعدێ) تێشت وفراڤینا ته بگوڕت وچو دى نه؟
ئهرێ رهمهزان شیایه بێنڤهدانێ بدهته ئهزمانێ ته كو گهلهك نهگهڕیێت؟
پێغهمبهرى -سلاڤ لێ بن- كهفالهت ب بهحهشتێ یا دایه وى كهس یێ بشێته ئهزمانێ، وئو د گۆتنهكا خۆ دا یا ئیمام ئهحمهد ژێ ڤهدگوهێزت، دبێژت: ( من صمت نجا ) ههچیێ نهئاخڤت دێ ڕزگار بت، خۆ ئهو ئاخفتنا خێرێ ژى یا تو دبێژى ل سهر ته حسێبه، پسیار دێ ژ ته ئێتهكرن كانێ بۆچى ته ئهو گۆتبوو؟ ئهرێ رهمهزان شیایه ته بكهته ژ وان یــێــن هــهڤــالینیا بــێ دهنگـیـێ دكـهن، وئهزمانێ خۆ دگرن؟ یان ژى تو ب سهعهتان بهر تهلهفوونێ دڕوینى، و ژ دیوانخانهیهكێ دچیه ئێكا دى؟
ئهرێ رهمهزان شیایه وه ل ته بكهت تو تێكهلیا خۆ د گهل خهلكى كێم بكهى، دا ژ خرابیا وان بێیه پاراستن؟
د هندهك حهدیسان هاتیه كو دهمێ فتنه پهیدا دبن، سلامهتى د هندێ دایه مرۆڤ ئهزمانێ خۆ بگرت و د مالا خۆ دا ڕوینت، وزانایێن خودێناس ژ ڤێ ئوممهتێ ههمى ل وێ باوهرێ بوون كو تێكهلیا زێده د گهل مرۆڤان بهلایه، لهو ئێك ژ وان هند تێكهلیا خهلكى دكر كو ئاخفتنهكا خێرێ بۆ بێژت، یان وان ژ خرابیهكێ بـدهته پاش.. وهكى دى پتریا دهمێ وان ئهو ژ تێكهلیێ دڕهڤین، حهتا زانایهكێ وهكى سوفیانێ ثهورى دگۆت: زێدهكرنا برایان ژ سهخافهتا دینیه!
