16. نهزر دڤێت بۆ خودێ بت
(17) عَنْ عَائِشَةَ - رضى الله عنها -، عَنِ النَّبِيِّ -صلى الله عليه وسلم – قَالَ: ( مَنْ نَذَرَ أَنْ يُطِيعَ الله فَلْيُطِعْهُ ، وَمَنْ نَذَرَ أَنْ يَعْصِيَهُ فَلاَ يَعْصِهِ ). رواه البخاري
عائيشا -خودێ ژێ رازى بت- دبێژت: پێغهمبهرى -سلاڤ لێ بن- گۆت: ههچییێ نهزر كربت كو گوهدارییا خودێ بكهت، بلا گوهدارییا وى بكهت، و ههچییێ نهزر كربت بێ ئهمرییا وى بكهت، بلا بێ ئهمرییا وى نهكهت. بوخارى ڤهدگوهێزت
نهزر (النذر) د زاراڤێ شهرعى دا ئهوه مرۆڤێ موكهللهف خۆ مهجبوور بكهت كو تشتهكێ نه یێ واجب ل سهر وى ئهو بۆ خودێ بكهت، وهكى كو بێژت: نهزر بت ل سهر من ئهز دههـ ڕۆژییێن سوننهت بۆ خودێ بگرم. و ئهڤه ڕهنگهكێ طاعهت و عیبادهتییه، لهوا دڤێت ئهو بۆ خودێ ب تنێ بێته پێشكێشكرن، و ههچییێ نهزرهكێ نه بۆ خودێ بدهت دێ كهفته د شركێ دا، وهكى كو بێژت: نهزر بت ل سهر من قوربانهكى بۆ فلان مهزارى بدهم.. و ژ ڤێ حهدیسا بۆرى ئاشكهرا دبت كو ههچییێ ل سهر خۆ نهزر كربت كو ئهو تشتهكێ وهسا بكهت طاعهتێ خودێ تێدا بت، وهكى نڤێژ و ڕۆژییێن سوننهت بلا ئهو نهزرا خۆ ب جهـ بینت، و ههچییێ تشتهكێ وهسا ل سهر خۆ نهزر كربت كو بێ ئهمرییا خودێ و گونههـ تێدا بت بلا ئهو وێ نهزرێ ب جهـ نهئینت.
و ههر چاوا بت نهزر چو خێرێ د گهل خۆ نائینت، وهكى د حهدیسهكێ دا هاتى، و ئهو تشتێ خودێ ل سهر عهبدێ خۆ لازم نهكربت، یا باشتر ئهوه ئهو وى ل سهر خۆ لازم نهكهت، و ئهگهر دلێ وى چوو كرنا باشییهكێ ههما بلا ئهو وێ بكهت بێى ل سهر خۆ لازم بكهت.
و ئهوێ تشتهكێ باش ل سهر خۆ بكهته نهزر و ب جهـ نهئینت، دڤێت ئهو كفارهتا سویندێ بدهت، ژ خۆ ئهگهر وى نهزرا خۆ ب شهرتهكى ڤه گرێدا، وهكى كو بێژت: ئهگهر فلان تشت بۆ من چێبوو ئهز دێ فلان خێرێ دهم.. ئهگهر هات و ئهو تشت بۆ وى چێبوو دڤێت ئهو نهزرا خۆ ب جهـ بینت، یان كفارهتا سویندێ بدهت، و ئهگهر ئهو تشت بۆ وى ب جهـ نههات، ئهو نه وێ دكهت نه وێ.. و دڤێت ئهو بزانت كو دهمێ ئهو تشت بۆ وى چێ دبت ئهو نه ژ بهر وێ نهزرێ چێ دبت یا ئهو دێ دهت، و چ وى ئهو نهزر دابا یان نهدابا ئهو تشت دا چێ بت؛ چونكى قهدهرا خودێ ل سهر بوویه.. لهو ئهم دبێژین: چو خێر ب نهزرێ ڤه نائێت.
•ژ وان مفایێن د ڤێ حهدیسێ دا ههین ب كورتى:
1- ئهگهر مرۆڤى ل سهر خۆ نهزر كر عیبادهتهكى بۆ خودێ بكهت، بلا ئهو نهزرا خۆ ب جهـ بینت.
2- و ئهگهر وى ل سهر خۆ نهزركر بێ ئهمرییا وى بكهت بلا وه نهكهت.
