(21) ئاستهنگێن ڕێكێ
ئهگهر عهبدهكى كره دلێ خۆ بهر ب خودێ ڤه بچت، خاپینۆك و ئاستهنگ دێ كهڤنه ڕێكا وى، و ئێكهمین جار ئهو دێ ب شههوهت و مهنصب و خۆشى و ژن و جلكان ئێته خاپاندن، ڤێجا:
ئهگهر ئهو ما ب وان ڤه، ئهو دێ ژ چوونێ ڕاوهستت.
و ئهگهر وى پشت دا وان وڕانهوهستیا، و یێ مجد بوو د چوونێ دا، ئهو دێ ب گهلهكیا دویكهفتى و موریدان ئێته جهڕباندن، خهلك دێ دهستێ وى ماچى كهن، و سهرێ دیوانێ دهنێ، و ل هیڤییا بهرهكهتا وى مینن، و بێژنێ: دوعایان بۆ مه بكه.. ڤێجا:
ئهگهر ئهو ما ب وێ چهندێ ڤه، ئهو دێ وى ژ چوونا بهر ب خودێ ڤه ڕاوهستینت، و پشك و بارا وى ههما دێ ئهو بت.
و ئهگهر وى پشت دایێ و ڕانهوهستیا، ئهو دێ ب كرامهت و كهشفان ئێته جهڕباندن.. ڤێجا:
ئهگهر ئهو ما ب وێ چهندێ ڤه، ئهو دێ وى ژ چوونا بهر ب خودێ ڤه ڕاوهستینت، و ههما بارا وى دێ ئهو بت.
و ئهگهر ئهو ڕانهوهستیا، ئهو دێ ب هندێ ئێته جهڕباندن كو دلێ وى بۆ خودێ ڤالا ببت، و دهستى ژ ههر تشتهكى بهردهت، و ههما دلێ وى بۆ خودێ كۆم ببت، و دنیایێ بدهته لایهكى.. ڤێجا:
ئهگهر ئهو ما ب وێ چهندێ ڤه و ل نك ڕاوهستیا، ئهو دێ ژ ئارمانج و مهخسهدێ ئێته ڤهقهتاندن.
بهلێ ئهگهر ل نك ڕانهوهسـتـیا، و بهردهوامى دا ڕێكێ، و بهرێ وى ما ل مرادا خودێ ژ وى، و كانێ وى چ ژێ دڤێت، ب ڕهنگهكى كو عهبدهكێ وهسا بـت ل نـك وى تـشـتـى ڕاوهسـتـت یێ خودایێ وى دڤێت، ئهو تشت ل كیڤه بت و یێ چاوا بت، پێ بوهستیێت یان پێ رحهت ببت، پێ خۆش بت یان پێ خۆش نهبت، و ئهو وى بدهته د گهل خهلكى یان ژى وى ژ وان ڤهدهر كهت.. ئهو تشتهكى بۆ خۆ هل نابژێرت ئهو نهبت یێ سهییدێ وى بۆ وى هلبژارتى، ل دویڤ شیانا خۆ د فهرمانا وى دا ڕادوهستت، و ل نك وى نهفسا وى ژ هندێ كێمتره كو ئهو رحهتییا وێ پێش رازیبوونا سهییدێ خۆ بێخت.
ئهڤهیه ئهو بهنى یێ گههشتیه سهییدێ خۆ، و دهرباسبووى، بێى تشتهك ببته ئاستهنگ د ناڤبهرا وى و سهییدێ وى دا.
