(21)
دههێن دویماهیێ
و ب ڤى ڕهنگى بیست ڕۆژ ژ رهمهزانێ بۆرین، ومانه ل وێرێ ههر دههـ ڕۆژێن دویماهیێ، وموسلم ژ عائیشایێ ڤهدگوهێزت، دبێژت: پێغهمبهرى -سلاڤ لێ بن- ل رهمهزانێ ئهو دكر یا ل چو دهمێن دى نهدكر، و ل دههێن دویماهیێ ژ رهمهزانێ ئهو دكر یا ل دهمێ دى نهدكر.
ئهڤ دههـ ڕۆژێن ماین ژ رهمهزانێ، ئهگهر خودێ رزقێ مه تێ بێخت، دڤێت ژ دهست خۆ نهكهین، لێ بگهڕیێین شهڤ وڕۆژێن وان بۆ كرنا عیبادهتى ئستغلال بكهین، ب تایبهتى ئهگهر ئهم ل بیرا خۆ بینین كو (لیلة القدر) دكهفته د ناڤ دا، و ژ صهحابى وتابعیان دئێته ڤهگوهاستن كو وان ل ههر دههـ ڕۆژێن دویماهیێ ژ رهمهزانێ هیممهتا خۆ بلند دكر، وكار خۆ زێده دكر، پتر ژ ههر دهمهكێ دى، وئهڤ چهنده یا غهریب نینه، چونكى دهمێ مرۆڤ غاردانێ دكهت، ونێزیكى دوماهیێ دبت، ههمى هێزا خۆ دهردئێخت، وچویا ژێ دئێت نیشان ددهت..
وبهلكى هوین د گهل من د (موتتهفق) بن كو تشتهك وهكى دهمى نینه مرۆڤ ل سهر ب حهسرهت بكهڤت دهمێ ئهو ژ دهست وى دهردكهڤت، چــونـــكــى هـــهر فــایـدهیـهكێ ژ دهست ته دهركهڤت دبت تو ب ڕهنگهكى ژ ڕهنگان بهدهل ڤهكهى، یان تشتهكێ وهكى وى یان حهتا ژ وى باشتر ژى فایده بكهى، دهم تێ نهبت، گاڤا ئهو ژ دهست ته دهركهڤت ب چو ڕهنگان ئهو نائێته بهدهل ڤهكرن، لهو ڕۆژا قیامهتێ تشتێ ژ ههمیێ پتر خهلكێ مهحشهرێ ل سهر ب حهسرهت دكهڤن دهمه، خودایێ مهزن دهمێ بهرێ مه ددهته لهزكرنا د خێران دا دبێژت: ( أن تقول نفس يا حسرتا على ما فرطت في جنب الله وإن كنت لمن الساخرين(56)أو تقول لو أن الله هداني لكنت من المتقين(57)أو تقول حين ترى العذاب لو أن لي كرة فأكون من المحسنين(58))(الـــزمـر: 56-58) یهعنى: هوين گوهدارییا خودايێ خۆ بكهن و ل وى بزڤڕن دا نــهفــســهك پـهشـێـمـان نهبت وبێژت: وهى بۆ كۆڤانا من ل سهر وى كارێ من د دنيايێ دا ژ دهســت خــۆ كــرى يــێ خودێ فهرمان پێ كرى، ومن تهخسيرى د گـوهــداریــیــا وى دا كــر، وئــهز د دنـيــايـێ دا ژ وان بووم يێن تڕانه بۆ خۆ ب كيتابا خودێ وپێغهمبهرێ وى وخودان باوهران دكر. يان ژى بێژت: ئهگهر خودێ بهرێ من دابا دينێ خۆ ئهز دا ژ وان بم يێن خۆ ژ شركێ وگونههان ددهنه پاش. يان دهمێ دبينت ل ڕۆژا حسێبێ عهزابا خودێ دۆرا لێ گرتى بێژت: خوزى زڤڕينهك بۆ ژينا دنيايێ بۆ من ههبا، ئهز دا ژ وان بم يێن ب گوهدارییا خودايێ خۆ قهنجى كرين، وكار ب وێ كرى يا پێغهمبهران فهرمان پێ ل وان كرى.
ڤێجا هێشتا دهم د دهستێن مه دا، وبهرى ئهو دهم ب سهر مه دا بێت یێ پهشێمانى تێدا چو فایدهى نهدهت، بلا ئهم حسێبێ د گهل خۆ بكهین ل سهر وان رۆژێن بۆرین ژ رهمهزانێ، و د ڕۆژێن مایین دا پتر خۆ بوهستینین وكارێ خۆ زێدهتر لێ بكهین..
د ڤان دههـ ڕۆژێن مایین دا دڤێت ڕاوهستانهكا ڕادستگۆ مه د گهل نهفسا خۆ ههبت، حسێبێ د گهل بكهین، وسهحكهینێ كانێ وێ مفایهكێ ژ ههژى بۆ خۆ ژ ڤێ دهلیڤهیێ دیت یا خودێ دایێ، كانێ ئێكا هند كریه خودایێ خۆ ژ خۆ رازى بكهت؟ و د ڤێ ههیڤێ دا دهمێ خۆ وهسا ببۆرینت وهكى خودێ حهزكرى نه وهكى دلێ وى دخوازت؟
ل ڤان دههـ ڕۆژان ودهمێ ههیڤا رهمهزانێ بهر ب دویماهیێ ڤه دچت، دڤێت ترسا مه ژ هندێ كو كارێ مه نهئێته قهبویلكرن زێده ببت، نهكو غوروور بۆ مه چێ ببت، وئهم هزر بكهین مه ب گرتنا ڤان ڕۆژیان منهتهك ل خودێ كریه، وحهقێ مه ل سهر وى ههیه ئهو مه ببهته بهحهشتێ، حهسهنێ بهصرى بهحسێ صهحابیان دكهت ودبێژت: ب شهڤێ وان حهتا سپێدێ نڤێژ دكرن، پاشى دڕوینشتن داخواز گونههـ ژێبرنێ بۆ خۆ ژ خودێ دكر!
و ژ بیر نهكهن كو پشتى ههر نڤێژهكێ وئێكسهر پشتى سلاڤا ملان پێغهمبهرى -سلاڤ لێ بن- سێ جاران دگۆت: (أستغفر الله)، لهو دهمێ رهمهزان ب دویماهى دهات، عومهرێ كوڕێ عهبدلعهزیزى كاغهز بۆ ویلایهتان دهنارتن وتێدا فهرمان ل خهلكى دكر كو ئهو ئستغفاران بكێشن.
ل ڤان دههـ ڕۆژان دڤێت ژ ههر دهمهكێ دى پتر ئهم دوعایا عهفو ولێبۆرینێ ژ خــودێ بـكــهیــن، عائیشا دبێژت: من پسیار ژ پێغهمبهرى -سلاڤ لێ بن- كر: ئهگهر ئهز گههشتمه (لیلة القدر) ئهز چ بێژم؟ وى گۆت: بێژه (اللهم إنك عفو تحب العفو فاعف عني). ودهم ئهم داخوازا عهفوێ ژ خودێ دكهین، ئهو ئهم ب ڕهنگهكێ نه یێ ئێكسهر ئعترافێ یێن ب تهخسیریا خۆ دكهین، وئهوێ ئعترافێ ب تهخسیریا خۆ بكهت، غوروور بۆ چێ نابت.
