( 22 )
ئعجازا هژمارێ د قورئانێ دا
ئەگەر مرۆڤێ زانا بڤێت ناڤ ونیشانەكا كورت بۆ ڤی دەمێ ئەم نوكە تێدا دژین كو سەدسالا بیست وئێكێ یە بدانت ، ئەز باوەر دكەم ئەو دێ ( چاخێ هژمارێ ) هلبژێرت دا ل سەر چاخێ مە یێ نوكە بدانت ، چونكی ئەو چو ناڤ ونیشانێن دی یێن ژ ڤێ ( دەقیقـتـر ) نابینت ب كێر بێت ببتە عنوانێ دەمێ مە یێ نوكە ، دەمێ كۆمبیۆتەر وئنتـرنێت وتۆِڕێن پەیوەندیان تێدا بووینە بەرچاڤتـرین سەر وسیما ، وقورئان ئەو كیتابا ئەم مـوسلمان دبێژین كیتابا هەمی دەمانە ، وموعجزەیەكا بەردەوامە ل هــەمــی دەمان تـــەحــەددی پێ دئێتەكرن ، چاوا دێ شێت ل ( چاخێ هژمارێ ) هەبوونا خۆ بنەجـه كەت ، و ب هژمارێ تەحەددیا چاخێ هژمارێ كەت ؟
بــەرسـڤـا ڤێ پسیارێ دێ بۆ مە ئاشكەرا بت دەمێ ئەم لایێ ( ئعجازا رەقەمی ) د قورئانێ دا پێشچاڤ دكەین ..
وبەری ئەم دەست ب ڤی بابەتی بكەین دڤێت ڕاستیەكا دیرۆكی ل بیرا خۆ بینینەڤە ئەو ژی ئەڤەیە : هندی قورئانە كیتابەكە ل درێـژیا بیست وسێ سالان پرت پرت بـۆ پێغەمبەری ـ سلاڤ لـێ بن ـ هاتبوو خوارێ ، ودەمێ پێغەمبەری ـ سلاڤ لـێ بن ـ ژ دنیایێ وەغەركری ئەڤ كیتابە هەمی ب ڕەنگێ ژبەركرنێ ویێ نڤیسینێ ژی یا پاراستی بوو ، بەلـێ ئەڤ نڤیسینە یا بــەلاڤ بوو ، هەر پارچەیەك ل سەر جهەكی هاتبوو نڤیسین ، و ل سەر دەمێ خەلیفەیێ ئێكێ صەحابیان بڕیار دا ڤان پارچەیێن نڤیسی هەمیان كـۆم بـكـەن ، وقورئانێ هەمیێ د ئێك موصحەفێ دا لێك بدەن ، بۆ هندێ دا پاراستی بمینت و ل بەر دەستێ موسلمانان بێتە دانان .
وڤێ چەندا هە .. ئانكۆ : كۆمكرنا قورئانێ ژ لایێ صەحابیان ڤە ل درێژیا دیرۆكێ بووبوو جهێ تێكڤەدانێ ژ لایێ منافق وبێ باوەران ڤە ، وهەر چەندە مانا قورئانێ ب ڤی ڕەنگی بێ دەست تێڤەدان وگوهۆڕین ل درێژیا دیرۆكێ باشتـرین بەرسڤە ل سەر وان دئێتە دان ، بەلـێ ئەڤرۆ پشتی كۆمپیۆتەر پەیدابووی وخزمەتا قورئانێ پێ هاتیەكرن ، كۆمپیۆتەری لایەكێ دی یێ ئعجازا قورئانێ ل بەر چاڤێن مە دانا و ب دەلیلەكێ بنبڕ بۆ مە ئاشكەراكر كو ئەڤ قورئانە ژ نك خودێیە ئەگەر نە یا بەرعەقل نەبوو ئەو ب ڤی ڕەنگێ زێدە موكم ژ لایێ مرۆڤەكی ڤە هاتبتە نڤیسین ئەگەر ئەو مرۆڤ چەند یێ زیرەك وشارەزا ژی بت .
قورئانا پیرۆز ئەو كیتابە یا خودێ بۆ هەمی مرۆڤان هنارتی دا ببتە ئــەو قانــویــن ودەســتـۆر یا ئەو ژینا خۆ هەمیێ ل سەر ب ڕێڤەدبەن ، وئەڤ قورئانە وەكی ئەم دزانین ژ ( 114 ) سوورەتان پێك دئێت ، وهەر سوورەتەك ژ چەند ئایەتان پێك دئێت ، وئەگەر ئەم ئایەتێن قورئانێ هەمیان بهژمێرین دێ بینین ئەو ( 6236 ) ئایەتن ، وهەر ئایەتەك ژی ژ چەند پەیڤان پێك دئێت ، مـەعـنـا : هەر پەیڤەكا قورئانێ مرۆڤ دشێت جهێ وێ ب دو هژماران دەسنیشان بكەت : هژمارا سوورەتێ ، وهژمارا ئایەتێ .. وئەڤەیە دبتە ئەو دەرگەهــ یێ ئعجازا قورئانێ یا رەقەمی تێڕا خویا دبت .
وئعجازا قورئانێ یا رەقـەمـی جودا ژ هەر ڕەنگەكێ دی یێ ئعجازا قورئانێ ب ڕەنگەكێ بێ گومان بۆ مە ڕادگەهینت كو حەرفەكا ب تنێ ژی د قورئانێ دا ژ قەستا نەهاتیە دانان ، چونكی ئەڤ ئعجازە ل سەر رەقەمان یا ئاڤاكریە ، ورەقەم خەبەری ژ خۆ ددەن لەو چو مەجالـێ دان وستاندنێ یان رەدكرنێ ل سەر رەقـەمـی نـیـنـن ، وئـەڤ ئـعـجـازە ژی وەكـی هەر ئعجازەكا دی یا قورئانێ ب ڕەنگەكێ گومانـبـڕ وێ ڕاستیێ بنەجـهــ دكەن كو قورئانا پیـرۆز كیتابەكا پاراستیە ژ هەمی خەلەتی وكێم وكاسان ، وەكی خودایێ مەزن گۆتی : [ كِتَابٌ أُحْكِمَتْ آيَاتُهُ ثُمَّ فُصِّلَتْ مِنْ لَدُنْ حَكِيمٍ خَبِيرٍ ـ ئــەڤ كـیـتـابــە ئایـەتێن وێ ژ كێماسی وخەلەتیان دپاراستینە ، پاشی ب ئەمر ونەهی ودیاركرنا حەلالی وحەرامی ژ لایێ خودێ ڤە یێن هاتینە ئاشكەراكرن ، ئەو خودایێ كاربنەجـهــ د ڕێڤەبرنا كاران دا ، یێ شارەزا د دویماهیا كاران دا ] ( هود : 1 ) .
وئاشكەرایە كو ئعجازا قورئانێ یا هژمارێ ل سەر علمێ ئحصائێ ڕادوەستت وپێ نەڤێت بێژین ئەگەر د ڤی چاخێ مە دا زانینا ئحصائێ نەبا علم ب ڕەنگەكێ گشتی نەدشیا ب ڤی ڕەنگی پێش بكەڤت .. و ل ڤێرێ مە دڤێت هندەك ئحصائیاتان بۆ هندەك پەیڤێن قورئانێ بەرچاڤ بكەین ، دا حنێرا قورئانێ د ڤی لایی ژی دا بۆ مە ئاشكەرا ببت :
1 ـ د زمانێ عەرەبی دا وەكی هەر زمانەكێ دی پەیڤێن بـەرانــبــەر ( الكلمات المتقابلة ) هەنە ، وهژمارەكا ڤان پەیڤان د قــورئانــێ دا هاتـیـنـە ، وهاتنا وان ـ ئەگەر ئەم بهژمێرین ـ ب ڕەنگەكێ یەكسان و ( متساوی ) یە ، بۆ نـمـوونە :
پەیـڤا ( الـحـیـاة ) 145 جاران د قورئانێ دا هاتیە ، وپەیڤا بەرانبەر وێ كو ( الموت ) ئەو ژی 145 جاران د قورئانێ دا هاتیە .
پـەیـڤـا ( الصالحات ) 167 جاران هاتیە ، ووەكی وێ پەیڤا ( السیئات ) ژی .
( الدنیا ) 115 جاران هاتیە ، ( الأخرة ) ژی هەر وەسا .
پەیڤا ( الملائكة) 88 جاران هاتیە ، وپەیڤا ( الشیطان ) 88 جاران هاتیە .
( الجهر ) 16 جاران هاتـیـە ، ( العلانیة ) ژی 16 جاران هاتیە .
( إبلیس ) 11 جاران هاتــیــە ، وخــۆپـاراسـتنا ب خودێ ( إستعاذة ) ژی 11 جاران هاتیە .
پــەیـڤـا ( جهنم ) و ( مشتقات ) ێن وێ 77 جاران هاتیە ، و ( الجنة ) ژی هەر وەسا .
2 ـ وهــنــدەك پــەیـڤ هـەنە پەیوەندی ژ لایێ مەعنایە ڤە د ناڤبەرێ دا هەیە هژمارا هاتنا وان ژی د قورئانێ دا پەیوەندیەكا ( ریاضی ) د ناڤبەرێ دا هەیە ، بۆ نـمـوونە :
پەیڤا ( الرحمن ) 57 جاران د قــورئانــێ دا هاتــیـە ، پەیڤا ( الرحیم ) 114 جاران هاتـیـە ، و 114 دو جاران هندی 57 یە .
پەیڤا ( الجزاء ) 117 جاران هاتیە ، و ( المغفرة ) 234 جاران هاتیە ، وئاشكەرایە كو 234 دو جاران هندی 117 یە .
پەیڤا ( الفجار ) 3 جاران هاتیە ، وپەیڤا ( الأبرار ) 6 جاران هاتیە .
3 ـ هندەك پەیڤێن دی هەنە هژمارا هاتنا وان د قورئانێ دا مرۆڤی حێبەتی دكەت ، بۆ نـمـوونە :
پەیڤا ( الشهر ) 12 جاران د قورئانێ دا هاتیە ، وسال 12 هەیڤن .
پەیڤا ( یوم ) 365 جاران د قورئانێ دا هاتیە ، وسال 365 ڕۆژن .
پەیڤا ( البر ) و ( یبساً ) 12 جاران د قورئانێ دا هاتیە ، وپەیڤا ( البحر ) 32 جاران هاتیە ، وزانایێن جوغرافیێ دبێژن : ڕێژەیا هشكاتیێ بەرانبەر دەریایێ د عەردی دا ( 12 / 32 ) یە .
4 ـ سوورەتا ( النمل ) سوورەتا 27 یە د قورئانێ دا و ژ 93 ئایەتان پێك دئێت ، سەرێ وێ ب پەیڤا ( طس ) دەست پـێ دكــەت ، وئـەگـەر ئەم حەرفا ( ط ) د ڤێ سوورەتێ دا بهژمێرین دێ بینین 27 جاران هاتیە ، وحەرفا ( س ) 93 جاران هاتیە ، وئەگەر ئەم 27 د گەل 93 كۆم بكەین ئەنجام دێ بتە 120 ویا غەریب ئەوە حسێبا ئەبجەدی یا پەیڤا ( نمل ) ژی دبتە 120 !
5 ـ وهندەك جاران دێ بینی ( جوملەیەك ) د قورئانێ دا دئێت ، بەرانبەر وێ ( جوملەیەكا ) دی هەیە پەیوەندی ژ لایێ هژمارا پەیڤان ڤە د ناڤبەرێ دا هەیە ، بۆ نـموونە :
گۆتنا : [ لا يَسْتَأْذِنُكَ الّذِينَ يُؤْمِنُونَ بِاللّهِ وَالْيَوْمِ الآخِرِ أَنْ يُجَاهِدُوا بِأَمْوَالِهِمْ وَأَنفُسِهِمْ وَاللّهُ عَلِيمٌ بِالْمُتَّقِين] ( التوبة : 44 ) ژ 14 پەیڤان پێك دئێت ، وگۆتنا بەرانبەر : [ إِنَّمَا يَسْتَأْذِنُكَ الّذِينَ لا يُؤْمِنُونَ بِاللّهِ وَالْيَوْمِ الآخِرِ وَارْتَابَتْ قُلُوبُهُمْ فَهُمْ فِي رَيْبِهِمْ يَتَرَدَّدُونَ] ( التوبة : 45 ) ئەو ژی ژ 14 پەیڤان پێك دئێت .
گۆتنا : [ وَإِذَا قِيلَ لَهُمْ اتَّبِعُوا مَا أَنزَلَ اللّه] ژ 7 پەیڤان پێك دئـێـت بەرسڤا بەرانبەر : [ قَالُوا بَلْ نَتَّبِعُ مَا أَلْفَيْنَا عَلَيْهِ آبَاءَنَا ] ( البقرة : 170 ) ئەو ژی ژ 7 پەیڤان پێك دئێت .
وئـەڤــە چەند نـمـوونەیەكێن كورتن ل سەر ئعجازا هژمارێ د قورئانێ دا وئەگەر ئەم دویفچوونەكا كورت ل سەر لایێ هژمارێ د قورئانێ دا بكەین دێ گەلەك ژ ڤان نـموونەیان بینین ، تشتێ هندێ دگەهینت كو مەسەلە ( صودفە ) نینە بەلكی دانانەكا ب بنەجهیە ژ لایێ خودایەكێ كاربنەجـهــ ڤە : [ لِيَعْلَمَ أَنْ قَـدْ أَبْلَغُوا رِسَالاتِ رَبِّهِمْ وَأَحَاطَ بِمَا لَدَيْهِمْ وَأَحْصَى كُلّ شَيْءٍ عَدَداً ] ( الجن : 28 ) .
