(4)
رهمهزان مهیدانا رهحمێ
دلۆڤانى یان رهحم سالۆخهتهكێ مهزنه ئێكا هند ژ خودانێ خۆ چێ دكهت كو ئهو ههست ب دلنهرمىیێ بكهت دهمێ دبینت كهسهك یێ كهفتىیه نهخۆشىیهكێ، یان بهلا وموصیبهتهك یا ب سهر ئێكى دا هاتى، وهند بۆ وى نهخۆش بت ههر وهكى ئهو موصیبهت ب سهرێ وى هاتى، لهو هیڤىیا وى یا مهزن دێ ئهو بت ببینت ئهو نهخۆشى یا ژ سهر وى مرۆڤى ڕابووى، وئهگهر ژێ بێت ئهو دێ كارى بۆ ڕاكرن ونههێلانا وێ نهخۆشىیێ كهت..
ورهحم ب خۆ -ب چهند جوداهى ڤه- سالۆخهتهك ژ سالۆخهتێن خودایێ مهزنه، ورهحما وى ههر تشتهكێ ههبت د ڤێ دنیایێ دا ڤهگرتىیه، وكهسهك نینه ژ هندهكێ ژ رهحما وى ڤالا ببت، و ل ئاخرهتێ رهحما وى یا تایبهته بۆ خودان باوهران.
وههیڤا رهمهزانێ مهیدانهكا بهرفرههه ژ مهیدانێن رهحم ودلۆڤانىیێ، بهلكى گهلهك جاران بۆ رهمهزانێ دئێته گۆتن: (ههیڤا رهحمێ)، چونكى رهحم ب جوانترین ڕهنگێن خۆ ڤه دڤێت ل ڤێ ههیڤێ ژ لایێ ڕۆژیگران ڤه بێته بهرچاڤكرن.. ورهحم -وهكى مه ئیشارهت پێ داى- دو ڕهنگن: رهحما خودێ ب بهنىیان، ورهحما بهنىیان ب ئێك ودو، وئهڤ ههردو ڕهنگێن رهحمێ ل ههیڤا رهمهزانێ زێده وبهرفرههـ دبن.
پێغهمبهر -سلاڤ لێ بن- د گۆتنهكا خۆ دا یا (موسلم وبوخارى) ژێ ڤهدگوهێزت، دبێژت: ( إذا كان رمضان فتحت أبواب الرحمة، وغلقت أبواب جهنم ) دهمێ دبته رهمهزان دهرگههێن رهحمێ ڤهدبن، ودهرگههێن جههنهمێ دئێنه دائێخستن.
و د حهدیسهكا دى دا یا (ابن خزیمه) ڤهدگوهێزت، هاتىیه: ( إن شهر رمضان أوله رحمة، وأوسطه مغفرة، وآخره عتق من النار ( ههیڤا رهمهزانێ سهرێ وێ رهحمه، ونیڤا وێ گونههـ ژێبرنه، ودویماهىیا وێ ئازاكرنا ژ ئاگرىیه.
مهعنا: ل ڤێ ههیڤێ دهرگههێن رهحما خودێ زێدهتر ژ ههر ههیڤهكا دى دئێنه ڤهكرن، وخودێ پتر ل گونههێن گونههكاران دبۆرت، ووان ژ ئاگرى ئازا دكهت.. وئهڤهیه ئارمانجا مهزنا ههر خودان باوهرهكى.
ورهحما مرۆڤان ب ئێك ودو شوینوارهكێ جوانه ژ شوینوارێن رهحما خودێ ب مهخلووقاتى، ئهو پێ ژ ئاتافێن دنیایێ ڕزگار دبن، ودگههنه كنارێ تهناهىیێ، وئیسلام ب ڕهنگهكێ ئاشكهرا فهرمانێ ل مه دكهت كو ئهم رهحمێ د دلێن خۆ دا بچینین، ودلۆڤانىیێ ب ئێك ودو ببهین، (بوخارى) ژ پێغهمبهرى -سلاڤ لێ بن- ڤهدگوهێزت، دبێژت: ( من لا يرحم الناس لا يرحمه الله ) ههچىیێ رهحمێ ب مرۆڤان نهبهت، خودێ رهحمێ پێ نابهت. یهعنى: رهحما خودێ ب رهحما مرۆڤان ڤه یا گرێدایه، وئهو كهسێ رهحمێ ب خهلكى نهبهت، بلا ل هیڤىیا هندێ نهبت خودێ ژى رهحمێ پێ ببهت، وههر ب ڤێ مهعنایێ د حهدیسهكا دى دا یا (ترمذى) ڤهگوهاستى هاتىیه: (ارحموا من في الأرض يرحمكم من في السماء ) هوین رهحمێ ب وان ببهن یێن ل عهدرى، ئهوێ ل عهسمانى ژى دێ رهحمێ ب ههوه بهت.
و ژ وان پالدهرێن مرۆڤێ ڕۆژیگر بهر ب رهحمێ ڤه دبهن ئهوه دهمێ ئهو خـۆ ژ خـوارن وڤهخوارنێ ددهته پاش وههست ب برسێ دكهت، وئهو ب ڤێ چهندێ پشكدارییهكا شعوورى د گهل مرۆڤێن ههژار دكهت، وههست ب وێ نهخۆشىیێ دكهت یا مرۆڤێ برسى پێ دكهت، وئهڤ شعوورا هه دڤێت ئێكا هند ژ وى چێ بكهت ئهو دهستێ هاریكارىیێ بۆ مرۆڤێن ههژار بكهت، ودهمێ ئهم ل بیرا خۆ دئینینه ڤه كو بهایێ خێران د ڤێ ههیڤێ دا مهزنتر لێ دئێت، وسهرا كارێ كێم خودێ خێرهكا مهزن ددهت، دێ بۆ مه ئاشكهرا بت كو ئهڤ ههیڤه باترین مهوسمه بۆ وان كهسان یێن دڤێن تهرازىیا خۆ ژ خێران گران بكهن.
ڤێجا یا فهره ئهم بهرگهڕیانێ بكهین كو ڤێ ههیڤێ بكهینه مهیدانا رهحمێ، ئهگهر هات ومه بڤێت ئهم ب مفا ژ ڤێ ههیڤێ دهركهڤین.
