5- ستوینێن ئیسلامێ وباوەرییێ
1ـ حەدیسەكا پیرۆز:
ئیمام عومەر ـ خودێ ژێ رازی بت ـ دبێژت: جارەكێ ئەم ل نك پێغەمبەرێ خودێ ـ سلاڤ لـێ بن ـ دڕوینشتی بووین، مە هند دیت زەلامەك هاتە نك مە، جلكێن وی گـەلەك دسپی بـوون، ویـێ مـوی ڕەش بوو، ونیشانێن وەغەرێ لـێ ددیار نەبوون، وكەسێ ژ مە ئەو نەدنیاسی، هات حـەتا ل نـك پـێـغـەمبەری ـ سلاڤ لـێ بن ڕوینشتی، وچۆكێن خۆ ب چۆكێن وی ڤەناین، ودەستێن خۆ داناینە سەر پێ وی، وگۆت:
ـ ئەی موحەممەد بۆ من بەحسێ ئیسلامێ بكە؟
پێغەمبەری ـ سلاڤ لـێ بن ـ گۆت:
[ ئیسلام ئەوە تو شاهدەیێ بدەی كو ژبلی خودێ چو خودایێن ب حەق نینن وكو موحەممەد پێغەبەرێ خودییە، وتو نڤێژێ بكەی، وزەكاتێ بدەی، ورەمەزانێ یێ ب ڕۆژی بی، وحەجێ بكەی ئەگەر تو بشێی ].
ئینا وی زەلامی گۆت: تو ڕاست دبێژی.
عومەر دبێژت: ڤێجا ئەم ژێ عەجێبگرتی بووین، پسیارێ دكەت ودبێژت: تو ڕاست دبێژی.
پاشی وی زەلامی گۆت: وبۆ من بەحسێ باوەرییێ بكە؟
پێغەمبەری ـ سلاڤ لـێ بن ـ گۆت:
[ كـو تـو بـاوەرییــێ ب خــودێ بـیـنـی، و ب مـلیاكـەتـێـن وی، و ب كیتابێن وی، و ب پێغەمبەرێن وی، و ب ڕۆژا دویـمـاهـییێ، وتو باوەرییێ ب قەدەرێ بینی خۆشی ونەخۆشییێن وێ ].
و ل دویماهییا حەدیسێ عومەر دبێژت: پاشی ئەو زەلام چوو، وئەز بۆ دەمەكی مام، ئینا پێغەمبەری ـ سلاڤ لـێ بن ـ گۆتە من:
[ عومەر! تو دزانی ئەڤ پسیاركەرە كی بوو؟ ].
من گۆتێ: خودێ وپێغەمبەرێ وی چێتـر دزانن.
پێغەمبەری ـ سلاڤ لـێ بن ـ گۆت: [ ئەڤە جبریل بوو هات دینێ هەوە نیشا هەوە بدەت ].
ژ ڤێ حەدیسێ ستوینێن ئیسلامێ، هەر وەسا ستوینێن باوەرییێ بۆ مە ئاشكەرا دبن.
2 ـ ستوینێن ئیسلامێ:
پێغەمبەری ـ سلاڤ لـێ بن ـ د ڤێ گۆتنا خۆ دا بۆ مە ئاشكەرا كر كو ئیسلامێ پێنج ستوین هەنە خۆ ل سەر دگرت، ئانەكۆ: حەتا مرۆڤێ ببتە موسلمانەكێ دورست دڤێت پێنج تشتان بكەت:
1 ـ ب دەڤـی شاهدە بدەت و ب دلـی باوەرییێ بینت كو (ئەللاهـ) ب تـنـێ خودایـێ ب حەقە وكو موحەمـمـەد پـێـغـەمبەرێ وییە، وبێژت: (أشهد أن لا إلە إلا الله وأشهد أن محمداً رسول الله).
2 ـ د شەڤ وڕۆژەكێ دا پێنج نڤێژان بۆ خودێ بكەت: نڤێژا سپێدێ، ویا نیڤرۆ، ویا ئێڤاری، ویا مەغرەب، ویا عەیشا.
3 ـ زەكاتا مالـێ خـۆ بـدەت، وزەكات ئەوە مرۆڤێ دەولەمەند هندەكێ ژ مالـێ خۆ بدەتە مرۆڤێن فەقیر وهەژار.
4 ـ هەیڤا رەمەزانێ یێ ب ڕۆژی بت.
5 ـ بچتە مەكەهێ بۆ كرنا حەجێ، ئەگەر بشێت بچت، وخەرجییێ چوونێ هەبت.
وبەری نوكە مە ب بەرفرەهی بەحسێ ڤان هەر پێنج ستوینان كرییە.
3 ـ ستوینێن باوەرییێ:
وپێغەمبەرێ مە ـ سلاڤ لـێ بن ـ نیشا مە ددەت كو باوەرییا دورست شەش ستوین بۆ هەنە:
1 ـ باوەری ئینانا ب خودێ، كو ئەو ب تنێ هێژای پەرستنییە.
2 ـ باوەری ئینانا ب ملیاكەتێن خودێ، وملیاكەت هندەك چێكرینە خودێ ئەو ژ ڕۆناهییێ ئافراندینە، وهەردەم ئەو د فەرمانا خودێ دانە، وهژمارا وان یا زۆرە، ب تنێ خودێ دزانت كانێ ئەو چەندن.
3 ـ باوەری ئینانا ب هەمی كیتابێن خودێ یێن كو وی بۆ پێغەمبەرێن خۆ هنارتـیـن، دا ئەو وان نیشا مرۆڤان بـدەن، بـۆ هندێ دا مرۆڤ كاری پێ بكەن، وخودێ گەلەك كیتاب هنارتینە: وەكی تەوراتێ ئەوا بۆ مووسا پـێـغـەمـبـەری ـ سلاڤ لـێ بن ـ هنارتی، وئنجیلێ ئەوا بـۆ عیسا پێغەمبەری ـ سلاڤ لـێ بن ـ هنارتی، وقورئان ئەوا بۆ موحەممەدی ـ سلاڤ لـێ بن ـ هنارتی.
4 ـ باوەری ئینانا ب هەمی پێغەمبەران، وهەر چەندە پێغەمبەرێن خودێ گەلەكن بەلـێ ناڤێ بیست وپێنج پێغەمبەران ب تنێ د قورئانێ دا هاتییە، وهەمی پێغەمبەر بۆ هندێ یێن هاتین دا بەرێ مە بدەنە ڕێكا ڕاست، ودڤێت ئەم باوەرییێ ب وان هـەمـییان بینن، وچو فەرق وجـوداهـییـێ نـەئـێـخـینە ناڤبەرا وان د باوەرییێ دا.
5 ـ باوەری ئینانا ب ڕۆژا دویماهییێ، ئەو ڕۆژا خودێ تێدا مرۆڤان هەمییان ساخ دكەتەڤە، وبۆ حسێب وجزادانێ كۆم دكەت، ڤێجا خودان باوەران دبەتە بەحەشتێ، وكافران دبەتە جەهنەمێ.
6 ـ باوەری ئینانا ب قەدەرا خودێ، ئانەكۆ: مرۆڤی باوەری هەبت كو هەر تشتەكێ بێتە سەرێ وی ـ چ یێ خۆش بت چ یێ نەخۆش بت ـ حەزكرنا خودێ ل سەرە، وكو چو تشت بێی خودێ چێ نابت.
پسیار وچالاكی
(1)
ناڤێ پێنج ژ وان پێغەمبەران یێن كو د قورئانێ دا هاتین بنڤیسە:
1 ـ
2 ـ
3 ـ
4 ـ
5 ـ
(2)
نڤێژا سپـێـدێ …… ركاعـەتـن
بـەلـێ نـڤـێـژا نیڤرۆ وئێڤاری وعەیشا …… ركاعەتن
ونڤێژا مەغرەب …… ركاعەتن.
(3)
ب ڕەخ ناڤێ هەر ئێك ژ ڤان پێغەمبەران ناڤێ كیتابا وی بنڤیسە ئەوا خودێ بۆ هنارتی:
مووسا ..............
موحەممەد ..............
عیسا ..............
(4)
ناڤێ وی ملیاكەتی چ بوو یێ وەحی بۆ پێغەمبەران دئینا خوارێ؟
(5)
ئەرێ تو دزانی:
ـ كو ئادەم پێغەمبەرێ خودێ یێ ئێكێ بوو، وموحەممەد پێغەمبەرێ خودێ یێ دویماهییێ بوو؟
ـ كو هەردو پێغەمبەرێن خودێ: مووسا وهاروون برایێن ئێك بوون؟
ـ كو پێغەمبەرێ خودێ داوود بابێ پێغەمبەرێ خودێ سولەیـمانی بوو؟
ـ كو پێغەمبەرێ خـودێ یـەحیا كوڕ خالەتێ پێغەمبەرێ خودێ عیسای بوو؟
(6)
ئەرێ خودێ كیتابا خۆ ئەوا دبێژنێ (زەبوور) بۆ كیژ پێغەمبەرێ خۆ هنارتبوو؟
