(9) رزقى وئهجهلێ..خهمێ ژێ نهخۆ!
تشتێ ژ ههمیان پتر مرۆڤ د ژینا خۆ دا خهمێ ژێ دخۆت، وئهگهر وى ب دورستى حهقیقهت زانیبا، دڤیا وى ژ ههمى تشتان پتر خهم ژێ نهخواربا، رزق وئهجهله، رزقێ خۆ چاوا دێ زێده كهت، وئهجهلا خۆ چاوا دێ پاش ئێخت!! ئهڤه مرۆڤ هاتیه سهر ڕویێ عهردى ئهو ب ڤان ههردو تـشـتان ڤه یێ مهحتله.. وخودێ د ئهزهل دا وهسا حهزكریه ئهڤ ههردو تشته د دهستێ مرۆڤى دا نهبن، د ئایهتهكێ دا خودێ دبێژت: (أَهُمْ يَقْسِمُونَ رَحْمَتَ رَبِّكَ ۚ نَحْنُ قَسَمْنَا بَيْنَهُمْ مَعِيشَتَهُمْ فِي الْحَيَاةِ الدُّنْيَا ۚ وَرَفَعْنَا بَعْضَهُمْ فَوْقَ بَعْضٍ دَرَجَاتٍ لِيَتَّخِذَ بَعْضُهُمْ بَعْضًا سُخْرِيًّا ۗ وَرَحْمَتُ رَبِّكَ خَيْرٌ مِمَّا يَجْمَعُونَ)(الزخرف 32) ئهرێ ما ئهون رهحما خودایێ لێكڤه دكهن؟ نه.. ئهمین رزقێ وان وژیارا وان د دنیایێ دا د ناڤبهرا وان دا لێكڤه دكهین، ومه هندهك ژ وان ب سهر هندهكان ئێخستینه.
ئهڤه رزق.. وئهجهل، خودێ دبێژت: (يَغْفِرْ لَكُمْ مِنْ ذُنُوبِكُمْ وَيُؤَخِّرْكُمْ إِلَىٰ أَجَلٍ مُسَمًّى ۚ إِنَّ أَجَلَ اللَّهِ إِذَا جَاءَ لَا يُؤَخَّرُ ۖ لَوْ كُنْتُمْ تَعْلَمُونَ)(نوح 4)
ئهو ئهجهلا خودێ بۆ ههوه نڤیسى نائێته پاش ئێخستن، ئهگهر هوین بزانن.. ومادهم نهئێته پاش ئێخستن، مهعنا نائێته پێش ئێخستن ژی.
رزق یێ نڤیسیه، نه كێمتر لێ دئێت ونه زێدهتر، وئهجهل یا دانایه، نه پێشڤه دئێت ونه پاشڤه دچت، ڤێجا ئهڤ خهمه یا چیه؟ دلێ خۆ بۆ خهما وى تشتى ڤالا كه یێ ئهمر پێ ل ته هاتیهكرن، وخۆ ب وى تشتى ڤه موژیل نهكه یێ خودێ (ضهمان) ب دانا وى دایه ته، وباش بزانه كو رزقێ ته نائێته بڕین هندى ئهجهلا ته مابت، وئهو سهرێ خودێ داى رزقێ وى نابڕت هندى ئهجهلا وى ما بت، ورزق نه ب خۆوهستاندن وعهقلداریێیه، ئهگهر نه.. حهیوانێن بێ ئهزمان ههمى ل بنێ بهڕیێ دا ژ برسان دا مرن!
وبلا ته باوهرى ههبت كو ئهگهر خودێ ژ بهر حكمهتهكا ئهو پێ دزانت دهرگهههكێ رزقى ل بهر ته گرت، ههر ئهو ب رهحما خۆ دهرگهههكێ دى یێ پتر مفایێ ته تێدا دێ بۆ ته ڤهكهت، وئهگهر ته دهلیلهكێ بهرچاڤ بڤێت هزرا خۆ د حالێ بچویكى دا بكه، دهمێ هێشتا د زكێ دهیكێ، خوارن وڤهخوارنا وى (كو خوینه) د ڕێكهكا ب تنێ ڕا بۆ دئێت، ئهو پێ دژیت ووهرارێ دكهت، وگاڤا ئهڤڕێكه لێ هاته بڕین، وئهو ژ دهیكێ ڤهبوو، شوینا ڕێكهكێ دو ڕێكێن دى یێ رزقهكێ خۆشتر و ب تامتر ژێ دئێت (كو شیره) بۆ وى دئێنه ڤهكرن، وگاڤا ب شیرڤهبوونێ ئهڤ ههردو ڕێكه لێ هاتنه گرتن، وشیر ژێ دئێته بڕین، چار ڕێكێن دى ل بهر وى ڤهدبن یێن تمامتر وباشتر بۆ وى، دو ڕێكێن خوارنێ: ئهو خوارنێن ژ حهیوانهتى وشینكاتى دگههنێ، ودو ڤهخوارن یێن ژ شیر وڤهخوارنێن دى ژى یێن حهلال دگههنێ.. وئهگهر ئهو مر، ئهڤ ههر چار ڕێكێن ل وى دئێنه گرتن، بهلێ ئهگهر ئهو ژ بهختهوهران بت، خودێ ب رهحما خۆ ههشت درهگههێن دى ل بهر وى ڤهدكهت، كو ههر ههشت دهرگههێن بهحهشتێنه، وهندى وى رزق بڤێت بۆ وى ژێ دئێت! مهعنا: بــلا تــه باوهرى هــهبــت كــو خــودێ -د دنــیــایــێ دا- دهرگهههكى ژ دهرگههێن رزقى ل بهر عهبدهكى ناگرت، ئهگهر ئهو دهرگهههكێ باشتر بۆ وى و ب مفاتر، ل بهر وى ڤهنهكهت، وعهبد ئهگهر یێ خودان باوهر بت، وخودێ خێرا وى ڤیا بت، گهلهك جاران دهرگههێ رزقێ بێخێر ل بهرا وى دئێته گرتن، وخودێ وى ژ وى رزقى بێ بار ومهحرووم دكهت؛ چونكى خودێ ئهو بۆ وى نهڤێت، ودڤێت بپارێزت، و ژ پاراستنا خودێیه بۆ عهبدى كو ئهو وێ ڕێكێ ل بهر وى بگرت یـا رزقـێ بـێـخێر پێڤه دئێت، ئهگهر خۆ ژ بهر كێم زانینا عهبدى ئهو نهزانت ژى كو ئهڤ رزقه یێ بێخێره، ڤێجا سهرا وێ گرتنێ عێجز ببت ژى..
وچونكى مرۆڤ ژ عهجهلێ یێ هاتیه دورستكرن، وهكـى خـودێ دبـێـژت: (خُلِقَ الْإِنْسَانُ مِنْ عَجَلٍ ۚ سَأُرِيكُمْ آيَاتِي فَلَا تَسْتَعْجِلُونِ)(الأنبياء37) ئهو حهز ژ تشتێ ب لهز ژى دكهت، ووى ب سهر یێ درهنگ دئێخت، ئهگهر خۆ ئهوێ درهنگ بۆ دئێت یێ باشتر بت ژى ژ وى یێ ب لهز دگههتێ، ژ بهر ڤێ چهندێ دێ وى بینى ئـهو دلێ خـۆ دبـهتـه خـۆشـیـێـن دنیایا نزم، وخۆشیێن بلندێن ئاخرهتێ ژ بیرا خۆ دبهت، وكهنگى كۆڤانا وى مهزن دبت؟ دهمێ ل ئاخرهتێ وان خۆشیێن بلند دبینت ژ دهست وى دئێنهكرن، ژ بهر وان خۆشیێن نزم یێن وى ل دنیایێ برین، وبۆ دئێته گۆتن:(وَيَوْمَ يُعْرَضُ الَّذِينَ كَفَرُوا عَلَى النَّارِ أَذْهَبْتُمْ طَيِّبَاتِكُمْ فِي حَيَاتِكُمُ الدُّنْيَا وَاسْتَمْتَعْتُمْ بِهَا فَالْيَوْمَ تُجْزَوْنَ عَذَابَ الْهُونِ بِمَا كُنْتُمْ تَسْتَكْبِرُونَ فِي الْأَرْضِ بِغَيْرِ الْحَقِّ وَبِمَا كُنْتُمْ تَفْسُقُونَ)(الأحقاف 20)
ئهڤرۆ ههوه چو بۆ خۆ نههێلایه، چى تشتێ ههوه ڤیاى، د دنیایێ دا ههوه بارێ خۆ یێ ژێ داگرتى، وئهڤرۆ (رصیدێ) ههوه (صفره) ڤێجا هوین ل هیڤیا چنه؟!
وئهگهر ته بڤێت ژ ڤى ڕهنگێ بهختڕهش نهبى ژ مرۆڤان، بلا باوهرى ته ههبت كو خودێ تشتهك ژ ته مهنعه نهكریه ئهگهر مهنعا وى پتر فایدێ ته تێدا نهبت، وبهلایهك نهئینایه سهرێ ته ئهگهر بۆ هندێ نهبت دا ئهو ته پێ بجهڕبینت، وئهو ته نامرینت ئهگهر بۆ هندێ نهبت دا جارهكا دى ئهو ته ڕاكهتهڤه، وئهو ته ڕاناكهتهڤه ئهگهر بۆ هندێ نهبت دا بهرێ ته بدهته ئێك ژ دو ڕێكان: سهعادهتا ههروههر، یان شهقائا بێ دویماهى.
