(9)
ڕۆژى و ب هێزكرنا ئیرادێ
رهمهزان باشترین فێرگههه رحا مرۆڤى بلند بكهت، ونهفسا وى پاقژ بكهت، ورهفتارێ وى بهر ب باشیێ ڤه ئاراسته بكهت، وئیرادهیا وى بهر ب هێزكرنێ وعهزیمهتێ ڤه ببهت. ودڤێت نهئێته هزركرن كو رهمهزان ئهڤێ چهندا هه ب هێزا ئهمر ونههیێ، وكوتهكیا حهلالى وحهرامیێ ب تنێ دكهت.. نهخێر! ڕۆژی بهرێ خودانى ددهته ڤێ ههمیا مه گۆتى ب ڕێكا ڤیانێ وطاعهتى ووێ شهوقا ڕۆژیگرى بۆ هاتنا ڤێ ههیڤێ ههى، هێشتا ئهڤ ههیڤه نههاتى ب دهمهكى خودان باوهر ب شهوق چاڤـهڕێــی هـاتـنـا وێ دكــهن، ودهمــێ دئـێـت ئهو ب كـهیـف ڤــه ئـهو پێشوازیێ لێ دكهن، و ب شادى ڤه دهمێ خۆ د گهل دبۆرینن، وپشتى دچت بیرهاتنێن خۆش ئهو ل نك وان دهێلت.
وتشتێ ژ ههمیێ بهرچاڤتر یێ ڕۆژى د ڤێ ههیڤێ دا د نهفسا موسلمانى دا دهێلت ئهو هێز وعهزیما ڕاستگۆیه یا بهرێ وى ددهته ئنیهتا خۆڕاستكرن و(ئستاقاما) ل سهر ڕاستهڕێیا خودێ وههدیا پێغهمبهرێ وى -سلاڤ لێ بن-، ئهگهر چهند ئهڤ كاره (موصادهمێ) د گهل دلچوون وحهز وههوایێ نهفسا وى بكهت ژى، وئهڤ ئنیهته ب خۆ ب خۆ ڕهنگهكێ پهروهردهكرنا نهفسێیه ل سهر ب هێزكرنا ئیرادهیا خۆ، وخۆگههاندنا وێ ئارمانجێ یا وێ دڤێت، د سهر وان ههمى ئاستهنگان ڕا یێن دكهڤنه ڕێكێ، ووان شههوهت ودلچوونان یێن وێ ب لایێ خۆ ڤه دكێشن، وئهڤه دهرسهكا مهزنه ئهم نه ب تنێ ل ههیڤا رهمهزانێ، بهلكى د ههمى دهمێن ژینا خۆ دا ههوجه دبینى.
مرۆڤێ ڕۆژیگر دهمێ یێ ب ڕۆژى، ب ئیرادهیا خۆ وبێى كهسهك كوتهكیێ لێ بكهت، خۆ ژ گهلهك گۆتن وكریاران ددهته پاش، خۆ دهمێ ئهو یێ ب تنێ ژى وبێى وى ژ بهر كهسهكێ دى بت یان كهسهكێ دى وى ببینت، چونكى وى ئهو باوهرى ههیه كو ئهڤ گۆتنه یان ئهڤ كریاره یا دورست نینه، ئهو چیه ئهڤ ئیراده هنده ل نك وى ب هێز ئێخستى حهتا ئهو هنده سهیطهرێ ل سهر خۆ بكهت؟
بهرسڤ یا ئاشكهرایه.. ڕۆژیه، چونكى دهمێ ئهو نه یێ ب ڕۆژى ئهو هنده یێ ب هێز نینه، ووى ئیرادهیهكا وهسا نینه وى زهبط بكهت، یان بهرێ وى ژ خرابیێ وهرگێڕت..
وپسیار ل ڤێرێ ئهڤهیه: ئهرێ ڕۆژیێ چاوا شیا ڤێ هێزێ بدهته ئیرادهیا وى، ووى بگوهۆڕت ژ مرۆڤهكێ بێ هێز ولاواز وبكهته مرۆڤهكێ خودان ئیرادهیهكا هنده ب هێز؟
بۆ بهرسڤ دێ بێژین: ب ڕێكا پهیداكرنا تهقوایێ ل نك ڕۆژیگرى، ڕۆژیێ دشێت ڤێ چهندێ ژ وى چێ بكهت، ژ خۆ قورئان ژى دهمێ بهحسێ ڕۆژیێ دكهت، ههر ئیشارهتێ ددهته ڤى مفایێ مهزن، وهكى دبێژت: (يَٰٓأَيُّهَا ٱلَّذِينَ ءَامَنُواْ كُتِبَ عَلَيۡكُمُ ٱلصِّيَامُ كَمَا كُتِبَ عَلَى ٱلَّذِينَ مِن قَبۡلِكُمۡ لَعَلَّكُمۡ تَتَّقُونَ) (البقرة: 183) یهعنى: فهربوونا ڕۆژیێ ل سهر ههوه بۆ هندێ بوویه دا بهلكى ڕۆژى تهقوایێ ل نك ههوه پهیدا بكهت.
وتهقوا ئهوه مرۆڤ ههردهم خودێ ل بیرا خۆ بینتهڤه، وژێ غافل نهبت، ئهگهر خۆ یێ ب تنێ ژى بت وكهس وى نهبینت.. وئهڤ مفایێ ڕۆژیێ تشتهكه دیارى چاڤ بۆ مه ههمیان یێ ئاشكهرایه، بهلێ تشتێ مه دڤێت (تهركیزێ) ل سهر بكهین ل ڤـێـرێ ئــهوه: بـۆچـى ئــهم هند مفایى بۆ خۆ ژ ڤى عیبادهتى وهرناگرین كو ئهو دهمێ خلاس ژى دبت هندهك شنوارێن خۆ ل نك مرۆڤى بهێلت؟ یان بلا پسیارێ ب ڕهنگهكێ دى بێژین: بۆچى دهمێ مرۆڤێ ب ڕۆژى خودێ هند یێ ل بیرێ ئهو ژ ترسێن وى دا، یان ڕێزگرتن بۆ وى، ئهو ب نك خرابیێ ڤه ناچت، ودبێژت: خودێ یێ من دبینت، وگاڤا رهمهزان چوو، یان گاڤا وى فتارهكر، ئهو ژ ڤى حالهتى دهركهڤت، ونهما ئێدى (ئستحضارا) مهزنیا خودێ دكهت، و ل نك وى مانعى نینه ب بستهیى ڤه گونههێ بكهت؟
تو بێژى چونكى ئهو ب دورستى د ڕۆژیێ نهگههشتیه، وچو مفا بۆ خۆ وهرنهگرتینه؟ یان ژى ئهو خهلهت د تهقوایێ دگههت وهزر دكهت ئهو تشتهكێ گرێدای ب ڕۆژیێ ڤهیه د گهل وێ دئێت و د گهل وێ دچت؟
خوزى ئهم ژ وان كهسان باینه یێن ئیرادهیهكا هندا ب هێز ههى كو بشیێن خۆڕاگرتى بمینن دهمێ نهفس وان بۆ ڕێكێن خرابیێ گازى دكهت، و ژ وان دخوازن ئهو بهر ب لادانێ ڤه بچن!
