خدام
سێ برایێن بێ ژن بوون د گهل پیره دهیكا خۆ دژیان، ژینێ وپێتڤییێن وێ ئهو هند موژیل كربوون وان هاى ژ خۆ نهما بوو، دهمهكى وان هند دیت دهیكا وان ئهوا سالێن گران وخهمێن كهڤن بارێ وێ گران كرى هێدى هێدى یا دوهستیێت، وان ڤیا پیچهكێ قـهرێ دهیكا خـۆ یێ مهزن ژ سهر خۆ ڕاكهن.. ما نه وێ ب ژار وژیرى و ب ئێتیمى ئهو مهزن كرن حهتا ئهو وه لـێ هاتین ئێدى وان منهت ب كهسێ نهبت؟ ڤێجا دهم هات ئهو بێهنا خۆ ڤهدهت و ل شوینا خزمهتێ بكهت خزمهتا وێ بێتهكرن، ڕابوون چوون پسیارا خدامـهكێ كـر دا بـێـت ـ ل شوینا دهیكا وان ـ ب كارێ مالـێ ڕاببت، وئهو بوو كچهكا جحێل وزیرهك ـ وهكى وان گۆتى ـ ل " فلان " گوندى ب دهست كهفت.
ڕۆژهكێ دهمێ ئێك ژ ههر سێ برایان ئهز ڤهخواندیمه مال دا چایهكێ ل نك ڤهخۆم، بۆ جارا ئێكێ ئهو كچكا زیرهك ب بهر چاڤێن من كهفت دهمێ چا بۆ مه پێشكێش كرى، دهرسۆكهكا سپى د سهرێ خۆ ئالاند بوو و د بن ئهرزنكا خۆ ڕا بر بوو وهكى وێ یا ڕادبته نڤێژێ، ژ دێمێ وێ ئهوێ د ناڤ دهرسۆكا سپى ڕا سپـیـتـر دیار دكر ئاشكهرا دبوو كو كچهكا زیرهك وتێر جوانى بوو، بهژنا وێ ئهوا بهركۆشكێ ب ههردو دهستان خۆ تێ ئالاندى ب نازكییا خۆ دلـێ ژ ههمییان ڕهقـتـر نهرم دكر، وهـهردو چاڤـێـن وێ ب خودێ ئهز نهشێم سالۆخهتێن وان ڤهگێڕم، نهبێژه من ڕهنگێ وان یێ چاوا بوو، چونكى ئهز نزانم بێژمه ته ئهو دچاوا بوون، گاڤا بهرێ ته ڤێ دكهڤت سڕهكا وهسا یا د وان دا ههى ته ژبیـر ڤهدكهت كو تو هزرا خۆ د ڕهنگێ وان دا بكهى، تو بێژى مهغناتیسێ دلان د ناڤ دا بت؟!
پشتى ئهو دهركهفتى، من پسیار ژ ههڤالـێ خۆ كر: ئهڤه ئهو خدامه یا ههوه ئیناى؟
گۆت: بهلـێ.
وگاڤا من گۆتییێ: ڤێ نههێلنه ل مالا خۆ، ئهو ژ (تى ئێن تى) یێ دژوارتره ! وان ب من كره كهنى وهزر كر ئهزێ نوكتهیهكێ دبێژم.
پشتى ههیامهكێ مـن سوحبهتا خدامێ و (تى ئێن تى) یێ ژ بیـر كرى وهسا چێبوو جارهكا دى ئهز چوومه مالا ههڤالـێ خۆ ب سهرهدان، وجارهكا دى خدامێ چا بۆ مه پێشكێش كر، بهلـێ ڤێ جارێ یا بێ دهرسۆك بوو، وكراسێ وێ نێزیك بوو چۆكێن وێ نهڤهشێرت ! وگاڤا من پسیارا ڤێ چهندێ ژێ كرى وێ ب دهنگهكێ وهسا بهرسڤا من دا تو دا بێژى بیرهاتنا شهڤهكا ڤیانێ یه د هزرا عاشقهكێ شهیدا دا، گۆت: بێنا من ژ بهر تهنگ بوو لهو ئهز وێ ل نك مرۆڤێن بیانى ب تنێ دكهمێ وتو نه مرۆڤهكێ بیانییى مانه؟!
وبگڕنژین ڤه ل سهر پێ خۆ زڤڕى پشتى ملێن خۆ هژاندین ووهسا چووى تو دا بێژى ئهو ب پرچا خۆ ڤه ئهوا ب ناڤ ملان دا دهاته خوارێ یا سهمایێ دكهت.. وهى ! ههر وهكى ئهڤ كچه ل پاریس یا مهزن بووى نه كو ل سهر گیفكێ گوندى.
وئهو جار ژى چوو.. وجارا سییێ دهمێ من دیتى سهرێ خۆ ل دویڤ مۆدێلێ تراشى بوو، وجلكێن خاتوینان كربوونه بـهر خـۆ، وكو مهسهله گههشتییه ڤى حهددى من گۆته برایێ مهزن وڤێ جارێ پتـر ب مجدى: تشتێ ئهز ژ ههوه دزانم ئهوه هوین مالهكا دیندار و ب ئـهخـلاقـن، وئـهڤ كچه یا وهسایه مرۆڤێ ژ ههمییان زاهدتر ب دویڤ خۆ ڤه ڕادكێشت، وئهز دترسم مانا وێ د مالا ههوه دا یا ب سلامهت نهبت، ڤێجا ئهڤرۆ نه كو سوباهى، وشهرمزارى ئهگهر هات پهشێمانى فایده ناكهت.
ووى ب یا من كر.. ئهو ژ مالا خۆ دهرێخست و ل وشوینا وێ ژنهكا چاك بۆ خۆ ئینا، دا خزمهتا دهیكا وى ویا مالا وى ژى بكهت.
وبهرێ وێ كچا خدام كهفته مالهكا دى.. مالهكا تێر ودهولهمهند یا پسیارا مالى نهكهت كانێ ژ كیڤه دئێت وكیڤه دچـت، باب بـازرگـانـهكـێ نـهزان بـوو ب ڕۆژێ هـهمـییـێ ب تجارهتا خۆ ڤه یێ موژیل بوو، و ب شهڤێ ههمى ژ دهرڤهى مالـێ دیوانخانه وشهڤبێرییێن خۆ دبۆراندن.. ودهیك خهما وێ ههمى جلك وسهرهدان ومێڤاندارى بوون.. وكوڕ قوتابییێ زانكۆیێ بوو، یێ خودان دین وئهخلاق بوو، بهلـێ وى ژى وهكى ههر دیندارهكى فیشهكهكا تژى بارویت د سنگى دا ههبـوو، ئهگهر بزماركا وێ بێته كێشان یان ژى زێده گهرم ببت دێ پهقت وههر تشتهكێ ل دۆر ورهخێن خۆ ژى دێ بژكینت وكچكا خدام ئهو دهست بوو یێ بزمار كێشاى !
ههر ژ ڕۆژا ئێكێ یا ئهو تێدا هاتییه د مالـێ دا بهرێ وێ ما ل وى جحێلى، داڤێن خۆ ل بهر ڤهنان، ئهگهر ئهو ههوجهى تشتهكى ببا یان گازى وێ كـربـا، ئهو وهكى خفشه خـهزالـێ ب لهز د گازییا وى دچوو، وههمى شهیتانێن شههوهتێ د گهل خۆ دبرن، وگاڤا وى ناڤچاڤێن خۆ لـێ كربانه گرێ، یان پویته پێ نهكربا، ئهو ب گڕنژینهكا وهسا دا بهرسڤا وى دهت خوینا وى پێ كارهب ببت وههمى لهشێ زى ڤهلهرزینت، وئهگهر جارهكێ داخواز ژێ كربا هارى وى تشتهكى ڕاكهت، یان تشهكى بدهته ڤێ، ئهو ژ فێلبازییا خۆ هند دا خۆ نێزیكى وى كهت حهتا هندهك ژ لهشێ وێ یێ گهرم وكارهبكرى ب لهشێ وى یێ ب هێز بكهڤت، یان دا هند دێمێ خۆ ب نك ڤه بهت حهتا گهرماتییا هلما وێ ب ناڤچاڤێن وى بكهڤت یان بێهنا لهشێ وێ ـ ئهوا خۆشتـر ژ ههمى بێهنێن دنیایێ ـ ب بهر دفنا وى بكهڤت ! وهندهك جاران ژى ژ قهستا حهرهكهیهكا وهسا دكر كراسێ وێ پیچهكێ بلند ببت، دا ب بێ دهنگى بێژته چاڤێن وى: ئهزا ل ڤێرێ ئهگهر تو من نهبینى !!
وئهو مسكین مرۆڤ بوو.. جحێلینى وڤیان وجوانى ههر سێ ودهلیڤهیا خۆش وبێ خهمییا دهیبابان ومالا خالى پێكڤه ب سهر دا هاتن، ڤێجا چاوا ئهو بهرگرییێ بكهت؟
وێ هزرێ بكهن.. جارهكێ دهیكا وى صابوین كره د دهستێ خدامێ دا، دا ئهو وێ بۆ وى ببهته حهمامێ، ژ خۆ پتـرییا ڕۆژێ وگهلهك جاران ب شهڤێ ژى دهیكا وى ئهوا ب سهرهدان وچوونا نك خهییاطى ڤه موژیل ئهو ههردو دهێلانه ب تنێ ل مال، ل سـهرى وى خـۆ ل سـهر ڤـێ چهندێ نهرازى دكر، وگازنده ژ دهیكا خۆ دكرن، وداخواز ژێ دكر ئهو ڤێ خدامێ دهربێخت ونههێلته ل مالا وان، بهلـێ دهیك ل بهر نهدهات، ودگۆت: ب تهعدایى حهتا ئهو ب دهست مه كهفتى چاوا هۆسا ب ساناهى دهربێخم؟ و ژ بهر چ؟ چونكى ئهو یا جوان وجحێله؟ ڤێجا ما چیه؟!
دهمهكى وى بهرگرى كر، ژ چاڤێن وێ ڕهڤى، گوه نهدا گڕنژینا وێ، بهلـێ هێدى هێدى ئهو پێ حهسیا ههر وهكى ژههر یا د ناڤ لهشێ وى دگهڕیێت، هێزا وى یا كێم دبت، حهتا ئهو ڕۆژ هاتى یا ژههر تێدا گههشتییه رحا وى ژى.
كوڕ نساخ بوو.. كهفته ناڤ نڤینان، ودهیكێ ل شوینا خۆ خدام هێلا ل نك دا ب شهڤ وڕۆژ ب كارێ وى ڕاببت ودهرمانێن وى ل وهخت بدهتێ، ب شـهڤـێ حهتا بهرى سپێدێ ب دلهكێ خۆش ئهو ل هنداڤ سهرى دما هشیار، و ل دهمێن پـێـتـڤـى وێ ب دهستێن خۆ جلكێن وى دگوهاڕتن، ووى هاى ژ خۆ نهبوو، وگاڤا ئهو ژ ئێشا خۆ هشیار بووى، وى ژ وێ پێڤهتر كهس ل بهر تهختێ خۆ نهدیت، نساخییێ هێزا وى ئێكجار لاواز كربوو، لهو سكر نهما پهنگیاى، ئاڤ هێدى هێدى د سهر دا چوو وهنگى ڕاوهستیا حهتا سكر ههمى ژ بن هاڤێتى، و ل شهڤهكێ دهمێ نقرۆسك ب سهر چاڤێن وێ دا هاتین، وى ئهو دا سویندێ كو بچته ژۆرا خۆ وپیچهكێ بۆ خۆ بنڤت، بهلـێ ئهو ل بهر نههات وگـۆتـێ: ئــهز تـه ناهـێـلمه ب تنێ.. پاشى ههڤالـێ وان یێ سییێ " شهیتانى " ڕێكهكا دى نیشا دا، ل ژۆرا وى جههكێ ڤالا ههبوو، كوڕكى گۆتێ: پا دێ ههما پیچهكێ خۆ ل ڤێرێ درێژ بكه !
وگاڤا ئهو ل بهر چاڤێن وى رازاى.. مهسهله ژ هندێ مهزنتـر لـێ هات ئهعصابێن وى ویـێـن ههر زهلامهكى ل دنیایـێ تهحهمـمـولـێ بكهت، وهێشتا نهبوویه سپێده.. سكرێ پهنگیاى پهقی، وئاڤ ب ههمى لایان دا چوو، وسكر ئهگهر پهقی كهس نهشێت ئاڤێ بزڤڕینت، وزلكێ شخاتێ ئهگهر هاته سۆتن كهس نهشێت وهكى بهرێ لـێ بكهته ڤه.
وسپێدێ خدام ل كارێ خۆ هشیار بوو پشتى خاتوین ب ژۆر كهفتى وئهو ل بهر سنگێ كوڕێ خۆ دیتى ! وهندى ئهو ههر سێ هاتن كارێ خۆ پنى بكهن، بهلـێ وێڤه ژ كیڤه دئێت ! ئهگهر كون ژ پاتهى مهزنتـر لـێ هات پنیكرن فایدهى نادهت !
وشهیتان جارهكا دى هاته د ناڤ مهسهلـێ دا.. وى دهیك وكوڕ ههردو وه تێ گههاندن كو " موشكیله " یا كچكێ یه، ما كێ گۆتبوویێ وه بكهت ! بلا بزڤڕته مالا خۆ ل گوندى ما نه بابێ وێ دگۆت: ل ڤان نێزیكان دێ وێ دهته پسمامێ وێ؟ ههما بلا بدهتێ وبهلا وان د سهرێ وان !
وكچكێ دهنگ ژێ نههات، چونكى ئهو صهدما مهزن یا ڤێ كهفتى ئهو ژ خهونێن وێ یێن شرین هشیار كر ودانا بهرانبهر واقعهكێ نهخۆش وگران.. بهلـێ چ بكهت؟ یان چ بێژت؟ وكى ههیه گوهێ خۆ بدهتێ وبـریـنـا وێ دهرمان بكهت؟ كهس نه ! ووهكى وێ بزنێ یا قهصاب سهرێ وێ دكێشت دا ببته قهصابخانێ، وهسا وان كچك ل بابێ وێ زڤڕاند، بێى ئهگهرا زڤڕاندنێ بۆ بێژن.
وبابێ وێ زڤڕاندنا وێ ب دهلیڤه زانى كو وێ بۆ پسمامێ وێ ڤهگوهێزت.. ومهسهله زوى ب دویماهى هات، وپسمامێ وێ ئهوێ هزركرى ئهڤه (لهیلهتولقهدره) گههشتییێ وحوورییهك بۆ د گهل خۆ ئیناى، گاڤا ههردو دهستێن خۆ دوێ بهژنێ ئالاندین یا خۆشییا باژێڕى پتـر نازككرى دیت.. فـێـقى یێ هاتییه چنین !
پاشى چ چێبوو؟
پاشى دۆتمام چوو وهغهرا دویماهییێ، وپسمام چوو سجنێ !
و ب ڤى ڕهنگى بهرپهڕێ دویماهییێ ژ سهرهاتییا خدامێ هاته پێچان.
