وهغهرا بهردهوام
پشتى وهغهرهكا درێژ یا نێزیكى ههیڤهكێ كێشاى ئهو د گهل كاروانیان گههشته باژێڕێ مویسل، وبهرى ئهو بێهنا خۆ ڤهدهت، ووهستیانا سهفهرێ ژ سهر ملێ خۆ بدانت، وى پسیارا ههڤالێ خۆ یێ ئوسقوف ژ خودانێ خانێ كر، ودهمهكێ درێژ پێڤه نهچوو ئهو ل نك وى مرۆڤى بوو یێ سهیدایێ وى یێ دیمهشقى بهرێ وى دایێ..
دیتنا ڤى زانایێ نوى، ئهوێ بهایهكێ زێده دایێ وپویتهیهكێ بهرچاڤ پێ داى ژ بهر شیرهتا ههڤالێ خۆ یێ دیمهشقى، خهما وهغهركرنا سهیدایێ وى یێ دیمهشقى ل بهر سڤك كر، وئهو وهستیان ژى ژ بیرێ بر یا وى دیتى حهتا شیاى ژ دیمهشقێ قهستا مویسلێ بكهت.. د گهل ڤى ههڤالێ خۆ یێ نوى، وى ههست ب دلخۆشیهكا مهزن كر، چونكى وى ژى وهكى ئوسقوفێ دیمهشقێ هیڤیهكا مهزن د دلى دا چاند كو شیرهتێن مهسیحى وتهعالیمێن ئنجیلێ نه هندهك گۆتنێن خهیالینه ب تنێ ل سهر بهرپهڕێن كتێبان دئێنه نهخشاندن، ونه هندهك هزرێن مثالینه د سهرێ زهلامێن دینى دا جهێ خۆ دگرن، بهلكى ئهو بهرنامهیهكێ عهمهلینه د ڕهفتارێ هندهك مرۆڤێن بژاره دا دئێنه ب جهئینان، لهو دهمێ ههیڤا وى یا شهشێ دهرباس بووى، ونیڤ سالا وى ل مویسلێ تمام بووى، وى وه هزر كر ئهڤه شهش ڕۆژه ئهو هاتیه نك سهیدایێ خۆ.. وهۆسا ڕۆژێن خۆش ب سهر خودانى دا دچن بێى ئهو پێ بحهسیێت!
بهلێ جارهكا دى ئێغبالێ ڕێكا خۆ ژ نك وى وهرگێڕا.. ههر وهكى قهدهرا وى ئهو بوویه ههر جارهكا ئهو نێزیكى سهرهكانیا زهلال بت، فهلهك وى بدهته بهر چهرخان ودویر بهاڤێت، سهرهكانیێ لێ شێلى بكهت، یان چهپهكا دویر ودرێژ بێخته ڕێكا وى، پشتى شهش ههیڤان ب تنێ ژ هاتنا وى بۆ نك ئوسقوفێ مویسلێ جارهكا دى وى دویماهیا پیراتیێ دیت دهمێ ب شالۆكا مرنێ دئێته دورین! جارهكا دى وى تام كره تهعلیا دربى دهمێ پهرداغ ب نیڤى دئێته هێلان، وخـۆشتـڤـیـێ دلــى بــهر ب وهغــهرهكــا دویــر ڤــه دچت.. وهكى وى عیبادهتكهرێ ب خۆشكاندن ڤه د میحرابا موناجاتێ دا سهرێ خۆ دچهمینت، وچاڤێن خۆ ددانته سهرێك و ب خهیالا خۆ ڤه دچته جیهانهكا رووحى یا فرههیا وێ ب قیاساتێن دنیایا مه نهئێته پیڤان.. ئهو ب نك سهیدایێ خۆ یێ درێژكرى ڤه چوو، دلێ وى دگۆتێ كو ئهو یێ بهرههڤیا خۆ دكهت دا بلند بهر ب جیهانا رووحى ڤه بچت، لهو ب دو چاڤێن تهڕ ژ ڕۆندكان ڤه داخوازا خۆ ئهوا گۆتیه ئوسقوفێ دیمهشقى گۆته ڤى ژى:
- ئهى باب! تو دزانى كو ئوسقوفێ دیمهشقێ بهرى بمرت بهرێ من دابوو ته.. و ل دویڤ شیرهتا وى من قهستا ته كر، وئهڤه تو ژى دێ من هێلى وچى قهستا وى كهى.. ڤێجا تو دێ بهرێ من دهیه كێ وتو شیرهتێ ل من دكهى ئهز قهستا كێ بكهم؟ ڕۆژ بۆ ڕۆژێ ڕێكا تهنگ دبت وهكى تو دبینى!
پیرهمێرى ب ئهزمانهكێ درێژیا سال وزهمانان گران كرى گۆتێ:
- كوڕێ من! مرۆڤ نهماینه ئهو مرۆڤ یێن مه دنیاسین، بارا پتر ژ وان ڕێكا ل بهر خۆ بهرزهكرى، وهندى ئهز هزرا خۆ دكهم ژ مرۆڤهكى پێڤهتر كهس نائێته سهر هزرا من ل سهر وێ ڕێكێ بت یا ئهم نوكه ل سهر، ئهو ژى (فلان) كهسێ ههڤالێ منه، یێ ل نصێبینێ، ڤێجا ئهگهر ئهز مرم ههڕه قهستا وى بكه، ئهو ژى وهكى مهیه..
وههر زوى ئهو چرایێ (جحێلێ فارسى) شهش ههیڤان ڕێكا خۆ ل بهر دیتى ڤهمریا، وپارچهیهكا دى ژ دلێ خۆ وى بن ئاخ كر، بهلێ ڤێ جارێ ل نهینهوا.. ئهو جهێ ل زهمانهكى ڕۆناهیا پێغهمبهراتیێ ل سهر دهستێ یوونسێ كوڕێ مهتتاى لێ بهلاڤ بووى..
ووهغهر بهردهوام بوو.. ڤێ جارێ ژێلهل بهر ب نصێبینێ ڤه، وههر جاهكا وى ئهو كهس ددیت یێ سهیدایێ وى ل بهر سهكهراتێ شیرهت پێ لێ دكر، ههر زوى وى ئـهو زهحـمـهت ژ بیر دكر یا وى ب ڕێكێ ڤه دیتى، ژ بهر وێ قهدرگرتنا وى ژ سهیدایێ خۆ یێ نوى ددیت ژ لایهكى ڤه، و ژ بهر وى ئهخلاق وڕهفتارێ جوان وزهدا وتهقوایا مهزن یا وى ل نك وى ددیت.. بهلێ تشتێ دلێ وى دئێشاند ئهو بوو: وى ددیت مرن ڤێ دهستهكا هلبژارتى ژ زهلامێن خودایى ڕۆژ بۆ ڕۆژێ یا بهر ب جیهانا خۆ ڤه دبهت وكێم دكهت، وچهند ئێك ژ وان دچت ئهو نابینت ئێكێ دى ههبت جهێ وى تژى بكهت.. ئهرێ تو بێژى ئهڤه دویماهى بت ئهو گههشتیێ؟
- بهلكى!! ڤێجا مادهم هۆسایه، دڤێت هندى ژ وى بێت ئهو بارێ خۆ ژ وێ زانین وتهقوایێ داگرت یا ل نك ڤان مرۆڤێن نوورانى ههى..
هێشا سهیدایێ وى ئوسقوفێ نصێبینێ یێ ساخ دلێ وى ئهو ژ هندێ دترساند كو مرن ناهێلت ئهو چاڤێن خۆ ب دیتنا ڤى ژى گهلهك تێر بكهت، وئهوا دلێ وى ئهو ژێ ترساندى ب جهـ هات.. لهو وى خۆ نهچار دیت داخوازا خۆ یا ههر جار بكهته ڤه.. وسهیدایێ وى یێ نوى ژى وهكى یێن بهرى خۆ سستى د شیرهت ونیشادانا ڕێكێ دا بۆ وى نهكر، وگۆتێ:
- كوڕێ من! بهس مرۆڤهك دئێته بیرا من وهكى مهیه، ناڤێ وى (فلانه)، وئهو نوكه یێ ل عهمووریێ ژ وهلاتێ ڕۆمێ، ڤێجا ئهگهر ئهز مرم ههڕه قهستا وى بكه..
