ناڤبرا دوازدێ
نهبیلا د مهزهلا خۆ ڤه ل ئۆتێلێ یا ڕوینشتى بوو.. یا بێ دهنگ ورحهت بوو، تێر خهو بووبوو، وبهرى ڕۆژ بههلێت وێ نڤێژا خۆ كربوو، پاشى تێشتهكا سڤك د گهل پهرداغهكێ چاوشیرى ڤهخوار بوو.. ڕۆژێت بۆرى ب خۆشى د سهر وێ ڕا بۆرین، وێ چو نهخۆشى تێدا نهدیتن، ئهو ڕۆژ تێ نهبت یا كاغهزهك تێدا بۆ سهرۆكى نڤیساى، ل دویماهیا كاغهزا خۆ وێ گۆتبوو: "نابت ئهڤه ل سهر دهمێ ته بێتهكرن.. مهخسهدا من ئهوه دورست نینه ئهو بێتهكرن، تو دژى زولمێ یێ ڕاوهستاى وته دویماهى بۆ زهمانێ مهلكان یێ نهباش یێ داناى، تویى ته پێگاڤێت باش ل سهر ڕێكا دادیا جڤاكى هاڤێتین ئهو دادیا ل دلێ خهلكى ههمیان دئێت، ڤێجا چاوا د گهل ڤێ ههمیێ زولم ل بێ گونههان بێتهكرن ودلڕهقى د گهل كوڕێت وهلاتى بێته ب كارئینان؟ مانێ ئهم ههمى خویشك وبرا وكوڕ وكچێت تهینه، وئهگهر هندهك ههبن زولمێ ل بهر خۆ شرین بكهن ب هێجهتا پاراستنا تهناهیا وهلاتى وپاراستنا رحێت كاربدهستان، ب من وهره تو ب ڤێ چهندێ یێ رازى نینى، ب ڤى كارێ كهرب وكین ونهخۆشیێ ل پاش خۆ دهێلت، وهزر وبیرێت ئازاد سهرنخوین دكهت چونكى پاشهڕۆژا خودانێت وان دبته گرتن و ژ كارئێخستن، و ل دویماهیێ ههمى ڤیان وڕێز بۆ ته بن ئهى سهرۆكێ هێژا، وهیڤیا مه ژ دل ئهوه خودێ هاریكارێ ته بت بۆ كرنا چاكیێ..".
نهبیلایێ د پهنجهرێ ڕا تهماشهى ههلاتنا ڕۆژێ دكر، ئهو یا دلخۆش بوو ب وێ جوانیا ل دۆر وڕهخێن وێ ههى ووێ بێ دهنگیا جـه د ناڤ خۆ دا پێچاى.. كانێ ئهڤه وكانێ ئهو زیندانا ڕهش وتارى ئهوا ل نیڤا موخابهراتا گشتى؟! ئهو ژنكا ههژار هاته بیرێ.. دیمهنێ وێ خۆ ل هزرا وێ دا.. دهمێ ڕۆندك ژ چاڤان دپهشیان ودێمێ وێ یێ زهرهسپى تژى برین بووى.. "ههیلا سهلوایێ ژارێ!! كانێ نوكه حالێ وێ چیه خوزى بهحسێ وێ ژى بۆ سهرۆكى كربا د كاغهزا خۆ دا.." گێولێ وێ نهخۆش بوو وعهورهكێ خهمان ب سهر ڕویێت وێ دا هاته خوار، ئاخینكهكا پهشێمانیێ ڕاهێلا.. ڤیا خۆ ژ بیر ڤهكهت دهست دا ڕۆژنامهیا سپێدێ.. دیمهنێ سهرۆكى وهكى ههر جار ل سهر پهڕێ ئێكێ بوو، ناڤ ونیشانێت گۆتاران ب نڤیسینهكا سۆر ومهزن هاتبوونه نهخشاندن.. فهرمانێت دژى بهگلهر وكهڤنه پهڕێس وصههیونیێت داگیركهر دئاشكهرا بوون.. وبرۆسكێت بـیـرۆزباهـى وسالۆخدانێت حوكمكرنا گونههكار وتاواباران د گهل وێنهیێت وان .. ژبلى خهبهر وگۆتنێت سهقهت بۆ حوكمهتێت دى یێت عهرهبان ئهوێت ب حوكمهتێت كهڤنه پهڕێس هاتینه ناڤكرن.. هندى نهبیلا ل كورته چیرۆكهكێ یان شعرهكێ گهڕیا دا بخوینت چو ب بهرچاڤان نهكهفت ئهو چهند مالكێت شعرێ نهبن ئهوێت ب زارێ عامى ب شۆڕهش وشۆڕهشڤانان هاتینه ڤههاندن، خۆ كاریكاتێر ژى ــ ئهوێت ئهو حهز ژێ دكهت ــ ل سهر سیاسهتێ بوون، ودژى سهرۆكێ فرهنسا هاتبوونه نهخشاندن، ئهو بهرپهڕ وهرگێرا دا بـهرێ خــۆ بــدهتــه تـالـعـێ خۆ كانێ ستێرا وێ (الجوزاء) چ دبێژت، ئهڤ نڤیسینه دیت: "ته وتالعى ژڤانه، ئهڤ شهڤه دهلیڤهیێ ژ دهست خۆ نهكه" لێڤا خۆ یا ژێرى شۆڕكر، پاشى دهست دا چارگۆشهیێت "خاچهڕێزێ" قهلهمێ خۆ ڕاكر دا حهرفان بدانت، بهلێ.. گێولێ وێ لێ نهدا، كهفته دلى كو بچته سینهمایێ ل پێش فلمهكێ بیانى یێ ب ناڤ ودهنگ، بلا.. سپێدێ ئهو دێ چته پێش فلمى، چونكى سپێدێ كێم خهلك دئێنه سینهمایێ.. وپشتى ئهو ژ سینهمایێ دهردكهڤت دێ چته (محطة الرمل) وفراڤینێ ل وێرێ خۆت، ل وى جهى مرۆڤ وتورمبێل تێك دهلنگڤن، جهێ كار وبزاڤانه، بهلێ هێشتا زویه لهوا ئهو ب دلێ خۆ ڕابوو وجلكێن خۆ كرنه بهر خۆ، ب تبلێت خۆ یێت نازك دێمێ خۆ یێ گهش گهشتر لێكر.. ب نیشانان دنیا دێ یا سار بت لهو ئیشارهك دانا سهر سهرێ خۆ، وگۆرهكا درێژ د گهل بلۆزهكێ سۆر كره بهر خۆ..
دو جاران دهرگهه هاته قوتان.. د قۆدیكێ ڕا بهرێ خۆ دا خۆ وگۆت:
ــ كهرهمكه..
بێ گومان كاركهرێ ئۆتێلێ یه یێ هاتى دا سێنیكێت ڤالا بزڤڕینت.. دهمێ دهرگههــ ڤهبووى، د قۆدیكێ دا دێمێ وى دیت.. پێستركێ د جـه دا گرت.. پشتى بێنهكێ گۆت:
ــ كیه.. عهطوه؟
بۆ حیل حیلا وى ژ كهیفان دا وگۆت:
ــ [ أینما تكونوا یدرككم الموت ولو كنتم فـي بروج مشیده ].
زهربوو.. لێ زڤڕى وگۆت:
ــ أعوذ بالله..
ب ژۆر كهفت ودهرگههــ ل پشت خۆ گرت وگۆت:
ــ بێ گومان ئهڤـ هاتنه یا ب خافلهتى ڤه بوو، ما هاتنا ههڤالهكێ عهزیز ته كهیفخۆش ناكهت؟ ته باوهر نهدكر ئهز دێ ئێم، خۆ شهیتان نهشێت خۆ ل بهر عهطوهى ڤهشێرت..
پاشى دهستێت خۆ ل دۆر وێ ئالاندن وگۆت:
ــ بێ گومان ته گهلهك ب هاتنا من خۆشه.. چونكى دهمێ مرۆڤێ ب تنێ گهلهك نهخۆشه..
خۆ نێزیكى وێ كر دا ماچى كهت، بهلێ وێ ب زیرهكى خۆ ژ ناڤـ دهستان ئینادهر وهێدى پاشڤه چوو وگۆت:
ــ ما تو ناڕوینى بێنا خۆ ڤهدهى وقههوهكێ ڤهخۆى؟
ناڤچاڤێت وى تێك چوون وگۆت:
ــ ئهڤ خۆ نازداركرنا ته ته من دكوژت..
ــ شهرمه عهطوه.
ــ شهرما چ ههیه د ناڤبهرا زهلامى وژنا وى دا؟
ــ هێشتا ته ئهز ماره نهكریمه.
ــ ئهڤ گۆتنه ل نك من ب چ ناچت.. ئهز ژ قاهیره نههاتیمه ڤێرێ دا یاریان بكهم..
ــ كێ جهێ من نیشا ته دا؟ پانێ من بۆ كهسێ نهگۆتیه؟
ــ دلێ من..
ب گومان ڤه گۆت:
ــ دلێ ته؟
ــ بهلێ رحا من..
ــ دبێژن: ته چو دل نینن..
ئهگهر من حهز ژ ته نهكربا ئهز ب ڤى ڕهنگى نهدهاتم..
ــ دلێ ته تو نهئیناى..
ــ پا چ؟
ــ شههوهتهكا پیس یا لهشێ ته..
عهطوه كهنى وگۆت:
ــ دل ژى ههر پرتهكا لهشییه، وئهو خوینا ژێ دهردكهڤت دچته ههمى لهشى، برایێ من یێ دختۆر ڤێ چهندێ دبێژت، مهعنا دل ژى لهشه..
ــ تشت ههمى نه ئهوه یێ دئێته دیتن.
نهبیلا كویر چوو هزران وگۆت:
ــ ئهگهر دل ههمى وهكى ئێك بان بۆچى باشى وخرابى دا ههبت، بۆچى دلهك دا یێ تژى ڤیان بت ئێكێ دى تژى كین؟
ئهڤه ل دلێ عهطوهى نههات:
ــ دل دشێت ههردووان پێكڤه بحهوینت..
ــ هندى ئێك.. عهطوه؟
ــ ئهز نزانم..
ــ تو بهس تیڤلێ ڕاستیێ دنیاسى..
ــ من تهحهمولا فهلسهفا ته نینه.
عهطوهى ئهو حشكێ د ناڤ دهستێت خۆ دا گڤاشت ودا بهر سنگێ خۆ وشداند وگۆت:
ــ دێ وه ل ته كهم تو ڤان فهلسهفێت ژهنگى وكهڤن ههمیان ژبیر بكهى.. ئهم یێ ل چهرخێ بیستێ..
وێ دڤیا خۆ ژ ناڤ دهسان بینتهدهر بهلێ نهشیا، پێ حهسیا كو بێنا وى یا نێزیكى ڕویێ وێ دبت، دهستێت وى وهكى ئاسنى ئهو گرت بوو، لێڤێت وى گههشتنه لێڤێت وێ نێزیك بوو بێنا وێ چك ببت، وهكى دهنگێ وێ كتكێ ئهوا دئێته خندقاندن ژێ هات، دهستێت خـــۆ ڤـهكـێـشـان پاشـى د ڕویێ وێ یێ سۆر وهراندن.. پاشڤه چوو پشتى دهستێت خۆ بهرداین وگڕنژى:
ــ ئهز بێ ئهدهبیێ ودژواریێ دپهرێسم!
ــ تو مرۆڤهكێ بێ قیمهتى..
ــ قیمهتێ شۆله ژ مهیه ویا ئهم تێدا؟
ــ بهلا خۆ ژ من ڤهكه وههڕه..
ــ نابت، ڤێ جارێ..
ــ دێ خۆ د پهنجهرێ دا هاڤێم..
گلیزێ ى ب دهڤى دا هات و ب كهیف ڤه گۆت:
ــ هنگى خۆشیا من دێ تمام بت.
وێ ب عێجزى ڤه گۆت:
ــ تو صهیى..
ــ ته چ دڤێت بێژه.
ــ تو نهشێى ب تهعدایى من كهیه یا خۆ.
ــ پا ب چ دێ شێم؟
ــ ب ئهخلاقێت باش وپاكیێ..
ــ یارا من، ئهز ب ههمى ڕێكا هاتمه ته وئهز نهشیام.
ــ چونكى هزرا تــه نـه وهكى هــــزرا مــرۆڤــهكـــێ بـــاژێــڕى وههڤچهرخه..
ــ نهزانێ! ههڤچهرخى وشارهزایى نه وهیه وهكى تو هزر دكهى.
پاشى جگارهك بــهردایـــێ وڕویــنــشــتــه سهر كورسیكێ ل نێزیكى پهنجهرێ.. عهورهكێ دوكێلێ ژ دهڤێ خۆ بهردا وگۆت:
ــ مهعنا تو یا مجدى ل سهر مارهكرنێ ئێكهمین جار؟
بهرسڤا وى نهدا، ل چانتێ خۆ گهڕیا.. هندهك تشتێت بچویك كرنه تێدا.. گوهــ ل وى دبوو:
ــ ئهو كهسێ شهقهكێ بدانته عهطوهى بهایهكێ گران دێ دهت.
ــ وئهو كهسێ زۆریێ ل من بكهت ژ ههژى كوشتنێ یه..
ــ یارا من تو یا منى.. زۆرى بۆ وى تشتیه یێ نهیێ مرۆڤى بت.
ــ ئهز نه بهنیمه..
ــ ب ناڤێ ڤیانێ تو یا منى.
ــ ڤیان نه زۆرى وتهعدایى یه.
ــ یهعنى تو ئێدى حهز ژ من ناكهى؟
دهلیڤهیهكێ خۆ بێ دهنگ كر، پاشى گۆت:
ــ عهطوه..
ــ چاڤێت عهطوهى!
ــ هیڤیدارم.. نوكه ئهزا بێنا خۆ ڤهددهم، دهم نه یێ هندێ یه ئهم بگههینه ئێك.. نۆژدارى گۆته من: گیانێ ته یێ ڤهههڕفتى، نهكو كارێ ته ئێشا من نوى بكهت.. تو ب خودێ بــهلا خــۆ ژ مـن ڤهكه حهتا ئهز ساخ دبم، تو گهلهك یێ ڕهقى د گهل من، تو هزر دكهى دێ خۆشیێ بۆ من چێ كهى.. ما دهه ڕۆژ چنه؟
ب دو چاڤێت تژى كین بهرێ خۆ دایێ:
ــ یهعنى دهست ڤالا بزڤڕمه قاهیره.. ئهز ئهوێ من هزر دكر دێ (عهككایێ) ڤهكهم؟!
ڤیا دلێ وى خۆش بكهت لهو گۆتێ:
ــ (عهككایێ)؟ ژ مێژه وهره جوهیان عهككا یا ستاندى.. ناڤێت هاتینه گوهۆڕین، وخهلك ژى..
ــ ب خودێ ڤهكرنا وێ ب ساناهیتره ژ ته.
ــ عهطوه خۆ بێ تۆره نهكه..
كهنى حهتا تژى چاڤان ڕۆندك بووین.. نهبیلایێ گۆتێ:
ــ دێ دهركهڤم؟
ــ بۆ كیڤه؟
ــ بۆ سینهمایێ.. تو ژى دێ ئێى دا دهست ڤالا نهزڤڕى؟
ــ منێ گۆتیه ته: دورست نینه یێت وهكى من بچنه ههمى جهان.
پێ حهسیا كو ئهو خۆ گهلهك دبینت، وێ ب ڤێ چهندێ نهخۆشه، ڤیا ڕێكهكێ بۆ ڤێ ئاستهنگێ ببینت، لهو گڕنژى وخۆ نێزك كر.. دهستێ وى گرت وگۆت:
ــ دڤێت د گهل من بێیه ئاههنگا سپێدێ..
پاشى كهنى وگۆت:
ــ تو دێ وهكى وان بچویكێت خواندنــگــههــێ بـــى ئهوێت ژ خواندنگههێ دڕهڤن ودچنه سینهمایێ.. نابت تو داخوازا من ب جـه نهئینى دێ ئێى ل سهر دفنا حوكمهتێ وبڕیارێت سهرۆكاتیێ..
وى بهرێ خۆ دا دێمێ وێ یێ پاك وهكى فریشتهیان، وگڕنژینا وێ یا شرین وغهمگین، ههر زوى قانع بوو وهێدى گۆت:
ــ باشه دێ د گهل ته ئێم كانێ دێ چ چێ بت..
دهست دا سنبێلێت خۆ، جگاره بهره ڕهخهكێ دهڤێ خۆ.. ل بهر قۆدیكێ ڕاوهستیا وگۆت:
ــ ئاخ! نهبیلا عهطوهیێ مهلهوانى ل دویڤ خۆ بكێشت، و ب سهرشۆڕى ڤه ئهو ب دویڤ وێ بكهڤت وهكى پهزهكى..
دا كو ئهو ڤان هزران ژ بیرا وى ببهت، گۆتێ:
ــ تو حهز ژ درامایێ دكهى؟
ــ دراما چیه؟
ــ ئهو چیرۆكێت ب ترس وخهمن..
عهطوهى گۆت:
ــ ههر ڕۆژ ئهز وان دبینم..
ــ ئهڤ چیرۆكا ئهڤرۆكه دێ بینى ڕهنگهكێ نوییه.
ــ مهخسهدا ته چیه؟
ــ ههر مرۆڤهك خۆ تێڕا دبینت..
ــ ما ئێك ههیه خۆ نهنیاست؟
ــ ئهم ههمى دوهساینه.. ئهم درهوان ل خۆ دكهین، وخۆ دسهردا دبهین..
ــ یارا من، ئهز كویر ناچمه تشتان، ئهز ب سهر ڤه سهر ڤه تهماشه دكهمه تشتان.. وئهڤه تێرا من ههیه.
زهندكا وى گرت وگۆت:
ــ ب ناڤداچوونا كویر دێ دهرگههى بۆ جیهانهكا تژى نهێنى وعهجێبى ل بهر ته ڤهكهت.
ــ وه نینه..
ــ ئهو جیهانا د كویراتیا مه دا ههى ڕاستیه.
ــ ژ ڤێ دئێته زانین كو نۆت ژ سهدێ خهلك راستیێ نزانن.
وێ گۆت:
ــ نه وهسا ژى! بهلێ ههر كهسهك هندێ ژێ دزانت هندى دشێت.
ب كهرب ڤه لێ زڤڕى:
ــ بۆچى ڤێ زهحمهتێ ههمیێ بدهینه بهر خۆ؟ بۆچى ئهم دنیایێ ب ساناهى نابۆرینین؟
ــ ب كویراتى وڕاستیێ ب تنێ مرۆڤ دئێنه ژێك جودا كرن.
ــ حوكمهكێ كۆرهیه..
ــ خودێ دبێژت: [ وفي أنفسكم أفلا تبصرون ] وههر ئهو بهرێ مه ددهته هزركرنا د وى تشتى دا یێ ل دهور وبهرێ مه ههى.. ئهگهر ئهڤه یا باش نهبا عهسمانى بهرێ مه نهددایێ.
هێدى گۆت:
ــ ئهم ل عهردى دژین.
ــ ما بۆچى ئهم بهرێ خۆ سهر ئهڤراز ناكهین؟
ــ چو پهڕ ب مه ڤه نینن.
ــ بهلێ یێ ب مه ڤه ههین..
ژ نهچارى كهنى وگۆت:
ــ دێ.. دا بچینه سینهمایێ، دهمێ ئهز دزڤڕمه قاهیره دێ بێژمه ههڤالێت خۆ ئهز چووبوومه سینهمایێ.. هنگى ئهو دێ یاریێت خۆ ب من كهن..
نهبیلایێ چانتێ خۆ ڕاكر وگۆت:
ــ ما ههڤالێت ته شۆله ژێ یه؟
ــ ههڤالێت منن ودئاقلدارن.. ژیان ل بهر وان كار وجڕه وخۆشیه..
نێزیك بوو بێژت: ئهو كۆمهكا دههبانه، ترسیا ئهڤ چهنده وێ ههمیێ بههڕفینت یا ئهو گههشتیێ، گڕنژى وبهژنا خۆ ب شرینى لهقاند وگۆت:
ــ نوكه دا بچینه سینهمایێ..
