ناڤبرا یازدێ
چــهنـــد ڕۆژهك د ســـهر مــهحــمــوود ئـهلـصهقرى ڕا بۆرین د (شفاخانێ) ڤه، هۆ دبێژنه خهستهخانێ ل گرتیخانا حهربى، ل سهرى گهلهك كهیفا گرتیان ب ڤێ پهیڤێ دهات.. چونكى ژ دهرڤهى گرتیخانێ ئهڤـ ناڤه بۆ وى جهى دئێته گۆتن یێ جۆتیار كهرێت خۆ لێ دهرمان دكهن.. بهلێ ڕۆژ بۆ ڕۆژێ پهیڤا (شفاخانه) بۆ تشتهكێ نه یێ غهریب، چونكى كۆمهكا گرتیا ههبوون نه بۆ وهرزشى ونه بۆ فێركرنێ بهلكى بۆ تۆل ژێ ستاندنێ نێزیكى چار سهعهتان دا كهنه غار.. نه بهس هنده بهلكى دا لهشكهر قامچیان هلگرن و ل رهخێت وان ڕاوهستن وقامچیێت خۆ داوهشیننه پشت وسهرێت وان وخۆ وان قامچى ل دێمێت وان ژى ددان، لهو هندهك گرتى كۆره دبوون، وهندهك دلگرتى دكهتنه لایێت ڕێكێ، وبێنا هندهكان چك دبوو ودكهفتن.. بهلێ ههر ئهو ژ قامچیان خلاس نهدبوون دا ڕاببن وجارهكا دى بدهنه ڕێكێ وكهنه غار، و د گهل هندێ ژى بارا پتر ژ وان خۆ ب دهست قامچیان ڤه بهرددان چونكى وان هند هێز نهبوو ئهو قویناغا درێژ ببهنه سهرى..
وپیرهمێر وئێشهوى وكۆران كۆمهكا تایبهت ههبوون دگۆتنێ: (كۆما شفاخانێ) شهرت نهبوو ئهو ل خهستهخانێ بێنه نڤاندن.. ڕۆژ بۆ ڕۆژێ كۆما شفاخانێ بهر ب زێدهبوونێ ڤه دچوو، جارهكێ عهطوه بهگ ب گهڕیانهكێ ڕادبوو ل ناڤ گرتیخانا حهربى، تهماشه دكره خهلكێ میرنشینا خۆ یا خهمگین، ئهو كۆما شفاخانێ دیت هێدى هێدى ب ڕێڤه دچوون و ب ڕهخ وان ڤه كۆمهكا دى ب غار دچوون.. ئینا خوڕى:
ــ ئهوێت هه كینه؟
چاویش یاسینى بهرسڤ دایێ:
ــ كۆما شفاخانێیه ئهز بهنى..
ــ ئهو ههمى..؟
ــ بهلێ.
ــ نه چو گۆتنه.. بلا ههمى تێكهل ببن وخۆش بچن.
بــۆ خـــاتـــرا فهرمانا وى چاویشى قامچى ل وان ڕاكر وگۆت:
ــ ههمى خۆش ههڕن.. كوڕێ صهى تو وئهوێ هه..
گاڤهك پێڤه نهچوو نساخ تێكهلى ساخان بوون، دیمهنهكێ ب گرى بوو، خودانێت ئێشا دلى وزهختێ وشهلهلێ ل بن قامچیان دكره غار، هندهك دكهفتن وگێژ دبوون، ڕێ تژى مرۆڤێت كهفتى بوو.. دلێ هندهكان ڕاوهستیا، ئێكى بێهنا وى چوو ونهزڤڕى، ب دو چاڤێت تژى ڕۆندك ڤه بهرێ خۆ دا عهسمانى، زهحمهتهكا زێده بر حهتا گۆتى: (یا خودێ).. ئێكێ دى دلێ وى ڕابوو خوین.. دیمهنهك بوو دلێ مرۆڤى تژى خهم دكر، خودانێت دشداشا وشاشكان پێكڤه غاردان دكر..
دختۆرى دهستێ وى یێ ڕاستێ د بهریكێ دا بوو ب ڕهخ عهطوهى ڤه ڕاوهستیا بوو، لێڤهك ل یا دى نهددا.. عهطوه بهگ كهنى وگۆتێ:
ــ ما من نهگـۆتـه تــه ئهو وهكى كتكانه ههر ئێك ژ وان یێ ب حهفت رحانه؟
دختۆرى گۆت:
ــ ئهڤ چهنده دێ زیانێ گههینته ژیانا هندهكان نهخاسم ئهو دلێت ئێش ههین خۆ ل بهر ڤێ زهحمهتێ ناگرن..
عهطوه بهگێ ب یارى ڤه گۆتێ:
ــ پا بۆچى دلێت وان خۆ ل بهر چوونا د ناڤ كۆمهلێت نهێنى دا دا گرت؟ بۆچى دلێت وان بۆ خۆگۆریكرنا د ڕێكا خودێ دا خۆ ئاماده كر؟ ئهڤه ڕێكا خودێیه بلا شههید ببن!
ــ گهلهك ژ وان دگریتنه وهێشتا تاوان ل سهر مسۆگر نهبوویه، ئهگهر نه دا ئهو بۆ دادگههێ ئێنه هنارتن..
ــ دختۆر، ئهو ههمى وهكى ئێكن.. ئیخوانچینه، تێشكێت حهیوانانه.
ــ ژ لایێ مرۆڤینیێ ڤه دڤێت..
عهطوه بهگێ ئاخفتنا وى بڕى:
ــ تو ب سهرێ بابێ خۆ كهى! بهحسێ لایێ مرۆڤینیێ نهكه.. ههمى حهیوانن.. دا بچینه شفاخانێ سهح كهینه نساخان، ئهز دترسم دلێ ته بمینته ب هندهكێت نهژههژى ڤه..
عهطوه ب نك خهستهخانێ ڤه چوو، ودختۆر ب بێ دهنگى ب دویڤ وى كهفت.. عهطوه ب ژۆر كهفته قائیشا ئێكێ.. خۆ نێزیكى ئێكى كر باش سهحكرێ وگۆت:
ــ ئهڤه كیه؟ مهحموود صهقر؟ خودێ مالا ته وێران كهت! تو وهكى ههسپان یێ لێ هاتى هوین چ شهیتانن.. وتو زادى ژى دخۆى؟ برایێ من خوزیكێت ته.
مهحموودى ب دو چاڤێت گهش بهرێ خۆ دایێ.. یێ ڕویس بوو بهس دهرپێیهكێ كورت دپیان بوو، دا ژ برینێت وى نهگرت، هژمارهكا زێده ژ برینێت وى كهویا بوون، بێنهكێ د عهطوهى فوكرى، ئهو زادێ د دهڤێ وى دا نهجوى، ڕاوهستیا.. پاشى هێدى هێدى نان وپهنیر د دهڤێ خۆ دا ئینان وبرن، ڕویێ وى یێ وهرمتى بوو..
دختۆرى د گوهێ عهطوه بهگێ دا گۆت:
ــ خودێ خلاس كر.. نیڤ عهزابدانا وى دیتى تێرا هندێ ههبوو پێ بمرت..
عهطوهى گۆت:
ــ دختۆر، تو ژێ نهترسه.. مرۆڤێ خراب نامرت.
عهطوهى پتر خۆ نێزیك كر وگۆتێ:
ــ دێ.. بـهلـكـى پـیـچـهكـێ ب عهقل كهفتبى مهحموودێ صهقر!
مهحموودى خوارن بهسكر، ئهو نان وپهنیرێ ژ بهر وى ماى دانا ب ڕهخ خۆ ڤه.. بهرسڤا وى نهدا، سهرێ خۆ نزم كر..
عهطوه گۆت:
ــ ئهز دبێژم هنده تو ساخ بووى، وئهم دشێین جارهكا دى تهحقیقێ ب ته بكهین.. مانه دختۆر؟
دلێ مهحموودى ژ ترسان دا خۆ قوتا، ئهوى باش دزانى تهحقیق چیه، قامچى وسۆتنا ب ئاگرى وپێن وشهق وخهبهر ودرهو ئهڤهیه تهحقیقا وان.. خوزى ههر ژ سهرى ئهو مربا، دیاره نهخۆشیا وى یا بێ دویماهیه، ئهڤه كێ كریه د سهرێ عهگوهى دا كو من چهكێ ههى؟ پانێ وى چو چهك نینه، ههڤالێت وى یێت گرتى بهحسێ چو چهكان نهكریه، نیشان ههمى دبێژن كو ئهڤه تاوانباریه یا ژ وى دویره "نه خوزیێت وى كهسێ ژ قهستا بێته گرتن، ل گرتیخانا حهربى" بهلێ، مهحموود ڕاست دبێژت، چونكى یێ تشتهك كرى دێ شێت بێژت: من یێ هۆ كریه هه، بلا پاشى وى فڕێكهنه دادگههێ وحوكمێ مــرنــێ یان یێ گرتنێ بۆ بێتهدان، ههما بهس ئهو ژ ڤى جهێ نهخۆش دهركهڤت بلا خۆ بمرت ژى.. بهلێ یێ چو نهكرى ئهو دێ چ بێژت؟ خونه ئهو دێ هندهك چیرۆك وچـیـڤـانـۆكان ژ نــك خــۆ چــێ كــهت؟ یان دێ هندهك تاوانان ژ درهو ب خۆ ڕادهت؟
پشتى ڤێ بێ دهنگیێ دختۆرى گۆت:
ــ چهرمێ پیێت وى ههمى ژ بهر لێدانێ یێ ڕابووى، لهو چێ نابت ئهو ب ڕێڤه بچت ونهشێت ههما..
عهطوهى گۆت:
ــ نه موشكیلهیه.. ئهم دشێین وى هلگرین وببهینه ژۆرا تهحقیقێ..
دختۆرى د گوهێ عهطوهى دا گۆت:
ــ ههر نهخۆشیهكا بگههتێ دێ كوژیت..
ــ ڤێجا ما چیه دنیا پشتى وى خراب نابت، صهیهكه وخلاس وچوو!
ــ عهطوه بهگ مهسهله ب بهر هندێ ناكهڤت.. تشتهكێ بێ مهعنایه.
عهطوه گڕنژى وگۆت:
ــ تو نوژدارى یان محامی یى؟
ــ تو دزانى..
ــ ما بۆچى ئهو ئعترافێ ناكهت وخۆ خلاس بكهت.
د گهل بچویكیا پهنجهركێ وههبوونا شفشێ هندهك حهتاڤێ ل مهزهلكێ ددا، بیرا مهحموودى ل رهحما خودێ هات، دهمێ ئهو ئینایه خهستهخانێ ئهو گهلهكێ پێتڤى هندهك دهرمانان بوو ئهگهر میكرووب دا لهشێ وى خۆن، دخـتـۆرى گۆت: مه شرانقێت پهنسلینێ ــ تشتێ ژ ههمیان ب ساناهیتر ــ نینن، خۆ حهبكێت سلفادیازین ژى نهبوون.. بـهلـێ ڕۆژهكـێ بـریـنـپـێـچــى دههـ شرانــقــێــت پهنسلین ستر بتومیسین ئینان، مهحمودى گۆتێ:
ــ ته ئهو ژ كیڤه ئینان؟
ــ هش به، پسیار نهكه..
ــ تو ب خودێ كهى، من دڤێت بزانم.
ــ برایێت ته ئهوێت د گرتیخانا مهزن ڤه ئهو یێت بۆ ته كڕین، دهمێ وان زانى تو یێ ههوجهیى، نه بۆ ته ب تنێ بهلكى بۆ هندهكێت دى ژى.. سهد شرانقه من یێت ئیناین.. تو دزانى ب چهندێ؟
ــ ب چهندێ؟
ــ ب سهد جونهیهان!
ــ چاوا ئهو شیان بكڕن؟
ــ من گۆته ته پسیار نهكه، مه ژ دهرڤه یێت كڕین، ئهو گــران ل ســهر ون ڕاوهستیان، شرانقهكا ب چار قرشان وان ب جونهیههكى یا كڕى..
ــ بهلێ خۆ گرتیهكى پاره ڤێ نینن..
ــ بگره وخۆ بێ دهنگ بكه.. ما دێ تهحقیقێ د گهل من كهى..
بیرا مهحموودى ل وان شهڤان هات دهمێ تا ل وى دژوار بووى وئهو ژ بهر دئاخفت، جارهكێ گوهێت وى ئهڤ دهنگه گههاندێ:
ــ إنا لله وإنا إلیه راجعون.. أشهد أن لا إله إلا الله وأن محمداً رسول الله.. بهرێ وى بدهنه قیبلێ و ل سهر شاهده بدهن..
بهلێ ئهو نهمر.. چونكى ڕۆژا وى نههاتبوو.. ئهرێ ما عهطوه بهگ وسهرۆكێت وى یێت مهزن هزر ناكهن ئهو ڕۆژهكـــێ دێ مـــرن وڤــێ جیهانێ ب ههمى خۆشى ومهزنیا وێ ڤــه هێلن.. مهحموود ژ دالغێت خۆ هشیار بوو.. دختۆر د گهل عهطوه بهگێ یێ ڕاوهستاى بوو.. عهطوهى هزرێت خۆ د ئاخفتنێت دختۆرى دا دكرن.. وى گۆت:
ــ ل كۆچكا كۆمارى هزر دكهن مهحموودى تشتهكێ مهزن یێ ڤهشارتى..
ــ هزر تشتهكه وڕاستى تشتهكێ دیه..
ــ ما ئهز چ بكهم؟
ــ تو دشێى كاربدهستێت مـــهزن ب ئاخفتنا خـــۆ قــانـع بكهى، تو ژ وان چێتر دزانى تو یێ ل ڤێرێ د ناڤ دا..
ــ گۆتنا من چو بها نینه..گومانا وان یا د سهر پشت ڕاستیا مه دا كهس گوهێ خۆ نادهته مه..
چهند گاڤهكان عهطوه د گهل دختۆرى ژ جهێ وى دویر كهفتن، عهطوهى گۆت:
ــ چو ب دهستێ مه نینه.. یان ئهو دێ جهى چهكى نیشا مه دهت یان دڤێت ئهو بمرت دا ئهو چهك نهئێته ب كار ئینان.
ــ وئهگهر وى چهك نهبت.. عهطوه بهگ؟
عهطوهى ملێت خۆ هژاندن گۆت:
ــ چو زیان ناگههته مه..
ــ بهلێ ئێك ژ مه دێ كێم بت..
ــ ڤێجا ما چیه.. چپكهكه ژ دهریایهكێ.. دندكهكا خیزیه ژ هژمارهكا چیایێت تــژى خــیـــز.. دختۆر! عهرد وعهسمان ب مرنا مهحموودى تێك ناچن!
ــ جهریمهیه مرۆڤ بێ حهق رحهكێ بكوژت..
ــ حهقى شۆلا مه نینه.. حهقى ئهوه یا مهزن دبێژن، ئهو چێتر دزانن، دختۆر! گهلهك درێژ نهكه ئهگهر دێ ته ژى كهینه د زیندانهكێ دا، یان كێم كێم دێ ته ژ ڤێرێ ڤهگوهێزین..
بێى خۆ دختۆرى هند دیت گۆت:
ــ خوزى!!
عهطوه لێ زڤڕى ههر وهكى تشتهك ژ نوى هاتیه بیرێ:
ــ ژ بیر نهكه ته گۆتبوو وى بهێلن بهلكى ل پاشهڕۆژێ مفایى ژێ ببینن.. نهدویره ئهگهر جارهكا دى پشتى ئهو ساخ دبیت وه لێ بكهینهڤه ئهو ئعترافێ بكهت..
ــ من ژ بیر نهكریه عهطوه بهگ..
ــ پا ڤێجا؟!
ــ من گهلهك هزرێت خۆ یێت كرین..
ــ د چ تشتى دا؟
ــ ئهز دبێژم كهس رحا خۆ تێ نابهت دا هندهك پارچێت چهكى ڤهشێرت، ئهو عهزابا دژوار یا گههشتیه وى تێرا هندێ ههبوو ئهو ههمى تشتان بێژت.. لهو ئهز دبێژم ئهوێت مرین ههمیان چو تشت ل نك نهبوو بێژن.
لهشكهرهك ب نك عهطوه بهگێ ڤه هات تهمهنهك بۆ وى ڤهدا وگۆت:
ــ ئهز بهنى تهلهفوونه..
عهطوه بهگ ل هیڤیا تهلهفوونهكێ بوو لهو خۆش چوو.. مهحموود ژ بیر كر.. دختۆر ل پاش خۆ هێلا.. دختۆر ب نك مهحموودى ڤه چوو، تێ فوكرى وگۆتێ:
ــ چ حاله؟
ــ حهمد بۆ خودێ بت.. ئهز سوپاسیا ته دكهم..
ــ سوپاسى.. بۆچى؟
موژیلانكێت مهحموودى تهڕ بوون وگۆت:
ــ هندهك ژ ئاخفتنا ههوه من گوهــ لێ بوو.. ویا من گوهــ لێ نهبوو ژى ئهز تێ گههشتم.
دختۆرى ب مجدى ڤه گۆتێ:
ــ ته گوهــ ل چ بوو؟
مهحموودى چاڤێت خۆ ل قائیشێ گێڕاندن وگۆت:
ــ باپیرێ من صووفى بوو، ههرگاڤ وى شعرێت صووفیان ئهوێت بهحسێ ڤیانا خودێ دكهن دوباره دكرن، جارهكێ من گوهــ لێ دبوو وى دگۆت:
"ژ مهحبووب دووركرم چهرخێ فهلك وێ پوڕ هلاڤـێتم
نــزانــم دێ ل كــوو دت مــن د ڤـێ دهوران وچهرخێ دا
ل بال علمێ ته مهعلوومـه ژ ژینێ من تـو مهقصوودى
فدایێ جان مه دێ جان بت د قهستا وهصل ودینێ دا"
دختۆرى ب نهرمى ڤه دهستێ خۆ دانا سهر ملێ مهحموودى وگۆتێ:
ــ مهحموود تو یێ جحێلى، چهند سالان تو بمینیه گرتى ههر دێ دهركهڤى، زوى یان درهنگ.. ڤێجا یا پێتڤیه تو چاڤێ خۆ بدهیه خۆ..
مهحموودى گۆت:
ــ دختۆر، مهخسهدا ته چیه؟
ــ ئهگهر تو تشتهكى ژ چهكى دزانى نیشا وان بده دا رحا خۆ خلاس بكهى..
ب دو چاڤێت صافى ئهو تێ فوكرى وگۆت:
ــ تو ڕاستیێ دزانى..
ــ كوڕێ من، ئهو ژ ته باوهر ناكهن..
ــ ڤێجا ئهز چ بكهم؟
دختۆرى ژى نهزانى دێ چ بێژت، سهرێ خۆ هژاند وگۆت:
ــ ئهز ژى نزانم..
ــ ئهگهر تو ل شوینا من بایه دا چ كهى؟ سویند بت ئهگهر ئهز شیابام دهركهڤم دا هندهك چهكى كڕم وڤهشێرم بهس دا وان بهلا خۆ ژ من ڤهكربا.. بهلێ چ ب دهستێ من نینه ما دێ چ كهم؟
نێزیك بوو دختۆر بكهته گرى.. بهلێ ئهو شیا خۆ، ددانێت خۆ ل سهر لێڤا ژێرى شداندن، دهستێ خۆ ژ سهر ملێ مهحموودى ڕاكر و ب سهرێ وى دا ئینا خوار.. وبهرى دهركهڤت گۆت:
ــ خودێ د گهل ته بت.
* * *
عهطوهى دهستكێ تهلهفوونێ ڕاكر:
ــ ئهلۆ.. بهلێ، دێ باشه.. تو چ دبێژى؟ ل ئهسكهندهریێ؟ ل كیژ ئۆتێلێ؟ ل ئۆتێلا مصرێ؟ ئاه.. ئهڤ ئۆتێله ل كیژ جههنهمێ یه؟ تو یێ پشت ڕاستى؟ دێ باشه.. سلاڤێت من بگههینه عهبدلمهجید بهگێ، ئهز گهلهكێ مهمنونم ژ وى، گــوهــێ خـــۆ بــده من، هشیار بى هشیار.. زێرهڤانیهكا باش ل وێ ئۆتێلێ بكه.. ته زانى؟ ب خێر بچى.. ژ وێرێ نه لڤى حهتا ئهز ب خۆ بێم.. ئهرێ ئهرێ ئهز ب خۆ.. باى باى.
عهطوه بهگێ دهستكێ تهلهفوونێ دانا.. یێ عێجز بوو بهلێ یێ كهیفخۆش ژى بوو، خوه ژ ئهنیا خۆ ڤهمالى، پاشى جگارهك بهردایێ.. دوكێلا وێ ب خۆشى وخۆمهزنكرن ڤه هلكێشا.. بگــلێ خۆ یێ وێسكیێ ژ چهكمهچێ ئینادهر، پهرداغهك تژى كر و ب ئێك قورچێ ڤهخوار.. دهنگێ ئهفسهرێ ئهمنێ ل پشت هاته گوهان، گۆت:
ــ ههچیێ ب تنێ ڤهخۆت ئهو یێ..
عهطوهى نههێلا ئهو گۆتنا خۆ تمام كهت.. گۆتێ:
ــ دێ وهره د فنێت خۆ دانه.. ئهز دزانم تو چ قهلسێ پیسى وكوڕێ صهیى..
كهنیێت وان یێت ژ دل تێكهل بوون..
عهطوهى ب هاریكاریا جاسووسێت خۆ دهنگ وباسێت نهبیلایێ ههمى زانین، نهبیلا یا ل ئهسكهندهریێ، یا چوویه جههكێ بهرزه.. دلێ وى یێ دبێژتێ ئهو لهعنهتى یا ژ بهر وى ڕهڤى، ههر وهسا وى زانى كو دختۆرى یێ گۆتیه وێ دڤێت تو چهد ڕۆژهكان حهتا دو حهفتیان دهركهڤى، دێ باشه دختۆر ئهڤه ب ساناهى د سهر ته ڕا نابۆرت، بهلێ حهتا ڕۆژا ته دئێت..
ئهو ب هاریكاریا ههڤالهكێ خۆ ژ زهلامێت موخابـهراتـێ ل ئهسكهندهریێ زوى شیا ب جهێ وێ بكهڤت، گرفتارى گهلهكا ئالۆز نهبوو ل بهر وان.. ههر ئۆتێلهكا ههبت وان فـهرمان دایێ كو ناڤێت وان كهسان بدهنێ یێت هاتین لێ ئاكـنـجـى بــوویــن .. ب ڤــى د دو ســێ ڕۆژان دا ئــهو شـیـان ب جهێ خهزالا ڕهڤى ــ وهكى وى دگۆته نهبیلایێ ــ بكهڤن.. عهگوهى بڕیار دا ئهو سوباهى سپێدێ ب شهمهندهفڕا ڕاگههاندنێ بچته ئهسكهندهریێ، پاشى لێڤهبوو وگۆت: دێ ب تورمبێلا خۆ چم، ئهو تورمبێلا ژ جهێت بلند بۆ وى هاتى دیارى ژ بهر وهفادارى ووان كارێت باش یێت وى كرین.. گۆت: ئهز دێ هاژۆم.. دا ل دهمێ زڤڕینێ نهبیلا ب ڕهخ تهنشتا وى ڤه ڕوینت، و ب شهڤێ ژى دهمێ ئهو ب خۆشى ل مهلها وسینهمایێ دبۆرینن..
وى سنبێلێت خۆ یێت زهر بادان وگۆت:
ــ ئهزم عهطوه ڕۆژ ددرێژن بۆ من وته..
عهطوه بهگێ گازى جێگرێ خۆ كر وگۆتێ:
ــ گوهێ خۆ بدێ.. سوباهى ئهز نائێم.. هشیارى صهیان بن ئێك نساخ بت یان تبلا ئێكى بێشت ئهز دزانم پاشى دێ چ كهم..
جێگرى گۆت:
ــ وتهحقیقان چ لێ بكهین؟
ــ بهردهوامیێ بدهنێ.. ئێك تهحقیقێ ڕانهوهستینن حهتا ئهز دئێم..
ــ وگرتیێت دى؟
ــ دهرگههێت زیندانان لێ بگرن وه نهبت ئێك ژ زیندانا خۆ دهركهڤت..
ــ خۆ دهرنهكهڤنه دهستاڤێ ژى؟
ــ گۆتنا من یا ئاشكهرایه.. دهركهفتن ژ زیندانێ نابت.. ما دێ چ چێ بت ئهگهر دانهكى مانه د ژۆرڤه؟
و ب یارى ڤه گۆت:
ــ مانێ ئـهو هــهمـــى حهز ژ خهلوێ دكهن، دا عیبادهتێ خودێ بكهن..
عهطوه دهركــهفــتــه مــهیــدانــا سۆر، ههر ئهو دیمهنه یێ ژ مێژه وهره نهئێته گوهۆڕین، بهس مرۆڤ یێت هاتینه گوهۆڕین.. بهرێ وى ل دیمهنى بوو بهلێ هزرا وى دویر چوو بوو، چوو بوو ئهسكهندهریێ ل نك ئاڤا دهریایا شین، جاده وكۆرنیشى، شهڤێت گهرم وسۆر ل بن ڕۆناهیێت نزم.. چیا ودهریا وداروبار چنه ل بهر ڤان جهێت خۆش؟!
پێ حهسیا كو بێنا وى هات وپشت ڕاست بوو.. مادهم هنده دهستێ وى دچت وهۆسا زوى ب جهێ وێ كهت.. لازم خۆ ل وێرێ نیشا بدهت، ووێ بكهته د ناڤ زهند وباسكێت خۆ دا وبدهته بهر سنگێ خۆ، ئهگهر شیابا وێ بخۆت وداعیرت دا وه كهت.. وه هندهك كهسێت پاشمایى ل هندهك جهان دكهن.. ئهگهر ئهو مصرى نهبا دا ئێك ژ وان بت یێت مرۆڤان دخۆن.. بێ گومان نوكه ئهو توخمه مرۆڤ چو ئاستهنگان ل بهراهیا خۆ نابینن.. دێ ڕویس دهكهڤن، نهدویره گۆشتێ مرۆڤان بخۆن.. و چ یا بۆ وان خۆش دێ كهن.. چ خۆشه هۆسا!!
ڕۆژهكێ عهطوهى دیمهنهكێ عنتیكه دیت، دیت لهشكهرهك یێ گوهێ محهمهد ئهلشاوى یێ گرتى شاگردێ كولیژا نۆژداریێ ددهته بهر لهقان و ب ددانێت خۆ یێ دبڕت، عهطوهی گهلهك پێ خۆش بوو، ب چاڤهكێ بلند بهرێ خۆ دا وى لهشكهرى، پێنجى قرش دانێ وروتبا وى بلند كر، خیتهكا دى ب زهندكا وى ڤهنا.. چهند ڕۆژهكان پشتى هنگى لهشكهر ههمى بوونه (لهقهاڤێژ).. حهتا ئهڤ چهنده بۆ عهطوهى وههڤالێت وى بوو جهێ پێكهنینێ.. دویماهیێ وى ئهڤ كاره ڕاوهستاند دهمێ گۆتى:
ــ گهلى لهشكهرى هوین ب ڤى كارێ خۆ پێ ل حهقێ صهیێ من ددانن.. لهق بهس بۆ صهیانه.. هوین وهكى وان باش لهقان نادانن..
ئێڤارى عەطوه زڤڕى مال دا كارێ خۆ بۆ وهغهرا سوباهى بكهت، بۆ ئهسكهندهریێ..
