ناڤبرا بیست و ئێکێ
خێزان ههمى هژیا دهمێ ب مهسهلێ حهسیاین، دهیكێ گریهكا تهعل كر، ههر وهسا كوڕ وكچان نـهخاسم زارۆكـان، ب دهستهكێ لهرزى ڤه بابێ وێ ئهو كاغهز هلگرت یا نهبیلایێ بۆ وان هێلاى.. بۆ جارا پێنجێ یان شهشێ وی ئهو خواند:
" بابۆ.. دادێ.. خویشك وبرایێت من یێت خۆشتڤى..
ئهڤه حهزكرنا خودێ بوو.. چو ڕۆژان من هزرا ڤێ چهندێ نهدكر.. ئهز ب بێ دهنگى دژیام، من دخواند ودنڤیسى وگوداریا مۆسیقێ دكر.. وكچك فێر دكرن.. من نهدزانى ژیانێ لایهكێ دى یێ نهنیاس ههیه، بهلێ دهمێ بێى خۆ من ئهو لا نیاسى، خافلهتى ب من كهفت، بهلێ.. من جیهانهكا نوى یا ب ترس وسار دیت، یا تژى دهحل ودێو وئازاردان بوو.. من دیت ل وێرێ مرۆڤـ خرابتر ژ حهیوانهتان دئێنه ب ڕێڤهبرن.. مـن دیـت ژین وهكى بویكهكا لاستیكێیه د دهستێت بچویكێت مهزن دا، گهڕیانا من د ڤێ جیهانێ دا قویناغهكا ب ترس بوو، ڕاسته ئهو قویناغهكا كورت بوو بهلێ ل سهرى ئهز ڤهجنقیم، من هێز نهما، نێزیك بوو عهقلێ من بفڕت.. من هزر نهدكر ئهڤه ل چهرخێ بیستێ چێ دبت، ههر وهسا من باوهر نهدكر ئهڤه دێ بهایێ وێ ڤین وپشتگریێ بت یا ههر ل سهرى مه ب دلێ خۆ دایه شۆڕهشڤانان.. شۆڕهش دشیا گهش ببت وبهرى ژ خۆ بدهت ئهگهر مه ئهو ب ئاڤا ڤیان وئازادى وبراینیا ڕاست ئاڤـ دابا، بهلێ دفن بلندى وئــهزئــهزیــا مــرۆڤــى وبــێ ئــهخــلاقیا وى پاشهڕۆژا مه كره د دهستێت نهزان وحێنج وبێ رهحم دا، ئهو دهستێت وان ئهخلاقێت پاك وبلند نهنیاسن یێت مرۆڤینیێ ل درێژیا زهمانى خهبات بۆ بنهجهكرنا وان كرى.. هۆسا خودێ حهزكر ئهز ل گرتیخانهیا حهربى و ل ئاڤاهیێ موخابهراتا گشتى و ل ژۆرێت سهرۆكاتیا كۆمارێ وان تشتان ببینم یێت زارۆك ژ بهر وان پیر ببن.. من هندهك ههژارێت بێنفرهه دیتن نهخۆشى وعهزابهكا وهسا دبینن یا نه مرۆڤـ ونه حهیوان خۆ ل بهر نهگرن.. من چهند عهبدهك دیتن قامچى وهندهك ئامیرهتێت رهزیلكرن وزۆرداریێ د دهستان دا بوون. وان خهلك ساخ دكرن ودمراندن، ههر وهكى ئهو ــ حاشا ــ شوینا خودێ عهمرى ددهنه خهلكى. ب ڕاستى ل سهرى من باوه نهدكر ئهڤه چێ دبت.. یا ژ من ڤه ئهزا نڤستى بووم وئهڤا ئهز دبینم كابویسه یان ژى خهونهكا نهخۆشه.. ئهڤه بوو غهدر وخیانهت وسهرداچوونا كرێت، من چو ڕێ نهدیتن ئهز پێ ژ ڤێ نهخۆشیێ قورتال ببم ژ بلى ئێك ژ دو ڕێكان: یان ل گۆڕى ببمه مێڤان، یان ژى وهغهرێ بكهمه ژیانهكا نوى كو ئهز بشێم وهكى مرۆڤان لێ بژیم، وپاشى كارهكى بكهم بهلكى بشێم ڤان زنجیران یێت خهلك گرێداین بشكێنم.. ڕاسته ئهزا لاوازم ودهنگێ من یێ بێ هێزه نهشێته دهنگێ بلندێ ڕاگههاندنا درهوین، ودیعایهتێت بێ بناخه شهق كهت، بهلێ من هیڤیا ههى وئهزا ب باوهرم كو دبت كۆمهكا دهنگێت بێ هێز بشێن چیرۆكا غهدرا مهزن بۆ مرۆڤان ل لایێت جیهانێ ڤــهگــێــڕن.. یــان كــێــم كــێــم هــنــدهك ڕێزان ژ وێ چیرۆكێ.. ل جیهانێ هندهك خێر وئومێد یا ماى [ إنه لا ییئس من روح الله إلا القوم الكافرون ] نه دیره وهغهرا من ڤهكێشت ودرێژ ببت، ودبت ئهز ب سهركهڤم یان نه.. یا گرنگ ئهوه ئهز تشتهكى بكهم، چونكى د سهر لاوازى وبێ هێزیا خۆ ڕا ئهز پێ دحهسیێم كو بارهكێ گران یێ ب هیڤیا من ڤه بــهرانـبــهر خـــودێ وجیلێت بێن، وبهرانبهر وێ دیرۆكا ئهم ب خوه وخهبات وخۆگۆریكرنێ چێ دكهین..
دهیكا منا خۆشتڤى.. ماچهك ژ نك من بۆ دێمێ ته یێ پاقژ، دێمێ ته ههر یێ ل بهر چاڤێت من.. خویشك وبرایێت من یێت بچویك، دهنگێ ههوه یێ نهرم وئاوازێ ههوه یێ شرین ههر دێ د گوهێ من دا بت، وئهز دێ مینم دوعایان بۆ ههوه كهم كو خودێ سوباهیا ههوه گهشتر لێ بكهت ژ ئهڤرۆیا مــه.. وبــهرێ هــهوه بــدهتــه ڕێـكـا ڤـیـان وئاشتى وبراینیێ.. و ب خاترا ههوه..".
نهبیلا
نێزیك بوو عهقل ژ سهرێ عهطوهى بفڕت دهمێ ئهو پشتى نیڤرۆ هاتى دا سهر وبهرێ دویماهیێ یێ داوهتا خۆ دورست كهن، ووان گۆتیێ نهبیلایێ وهغهرا كریه كوێتێ، وى هزر كر ئهو یێ تڕانهیهكا ههستى گران ب وى دكهن، لهو وهكى مرۆڤهكێ دین بۆ حیل حیلا وى بهلێ دهمێ وان كاغهزا وێ یا گـــرتــى دایــهڤــێ ب كـهرب ڤه وى ئهو ڤهكر ودهست ب خواندنا وێ كر:
"عهطوه ئهو شرینیا سهركهفتنێ یا تو پێ دحهسیێى درهوهكا مهزنه.. ههردهم لهشكهر وصه وسهرۆكێت ته نهشێن ته ژ كهفتنێ وڕوى ڕهشیێ قورتال بكهن.. ئهو تڕ وتانجێت ب سنگێ تهڤه ههین نیشانا بێ عاریا تهنه، چونكى بهایێ وان یێ پیسه.. ئهو سهرهكانیا ڕوى ڕهشى وشهرمزاریێنه، نه نیشانا سهركهفتن وسهربلندیێنه..ژنهكا لاواز یا وهكى من ب ڕكدارى وباوهریا خۆ ب خودێ وهندهك هزركرنێ مهزنى ودفن بلندیا ته دههڕیێ ڤهدهت، ووه ل ته بكهت كو تو ب كێمیێ ونهخۆشیێ ودهست ڤالایێ بحهسیێى، تو نزانى مرۆڤـ كیه، چونكى قهت جارهكا ب تنێ ژى تــه خــۆ نــهكــریــه مــرۆڤـ، باوهریا ته ب صهیێت ته پـتـره ژ باوهریا ته ب كهس وكار وههڤالێت ته.. ئهى عهطوه تو حهیوانهكێ تامسار وصهیهكێ ڕهوڕهویى! ڕۆژهكێ تو ژنهكا وهسا نابینى قهدرێ ته بگرت.. رهزیلیا ته گههشته هندێ كو تو شهیتانێت موخابهراتێ بهردهیه من، دا ئهو وى دیمهنێ زارڤهكرى دهربهینن، پاشى تو ب خۆ دئێى ومن ژ وێ گرفتاریێ دئینیه دهر یا ته ب دهستێن خۆ ئهز كریمه تێدا؟! ئهڤه چ بێخێرى وبێ مهژیاتیه! مهعنا چیرۆك یا هۆسایه؟ وڕێبهرێت ههوه ژى ب ڤى ڕهنگینه؟ وهى نهخوزی وى مللهتى یێ هوین ب ڤى شێوهیێ پیس، و ب ڤێ فهلسهفا ڕهش وسهرداچووى حوكمى لێ دكهن! ژ ئهڤرۆ وێڤه دهستێ تــه یــێ گــهنــى نــاگــههــتــه مــن.. وهى خـــودێ! ئــهز چـهنــد ب دلڕهشى وبێنگهنیێ دحهسیام دهمێ من تو ددیتى؟! یێت وهكى ته نابت ببنه خودان مال وعهیال، چونكى تو مهعنایا ئهڤینداریێ ودلۆڤانیێ نزانى، چونكى تو یێ دلڕهق وشاژژى، بهلێ تو یێ هۆسایى، وتو ب خۆ ژى ڤێ چهندێ دزانى، وخهلك ل ههمى جها ڤێ گۆتنێ دبێژن.. بهلكى خۆ هندهك ڕۆژنامهیێت عهرهبى وجیهانى ئهڤ چهنده یا گۆتى..
دهمــێ تــو ڤــان ڕێــزكــا دخــویــنــى، ئــهز دێ یا دویر بم ژ پهنجێت ته یێن سۆربووین ژ خوینا وان شههیدێن چاك یێن ته ژ قهستا بهرێ وان دایه مهیدانا مرنێ، دێ بێژى تو یێ یاریا شهترهنجێ دكهى ئهوا جارهكا ب تنێ ژى تو تێدا سهرنهكهفتى، وهكى وێ مرۆڤا من گۆتى ئهوا بۆ جارا ئێكێ تو ب من دایه نیاسین.. ئهز دێ یا دویر بم، بهلێ قهلهمێ من دێ د دهسـتـێـن مـن دا بت، وئهز دێ تیرێت وى یێت كوژهك د ته وهرینم، ئهز ل كارێ خۆ یا ب لهز نینم، ڕۆژ د ناڤبهرا من وته دانه وڕێـك یــا دویـره.. هێژ ئهزا گهنجم، ومن هیڤى ب خودێ ههیه كو ئهو عـهمرێ من دێ درێژ كهت حهتا ئهز ب چاڤێت خۆ دبینم تو دبیه پێتڕانك، مهخسهدا من حهتا تو دبیه عیبرهت بۆ مهزنـێـت بـچـویـك، بـهلـكـى تــو یاریا بۆ خۆ ب گۆتنێت من بكهى، چونكى هێز ههمى نوكه یا د دهستێت ههوه دا وئالایێ سهركهفتنێ یێ ل گهل ههوه، بهلێ بلا ل بیرا ته بت كو ئهگهر ئهو بۆ ئێكى مابا نهدگههشته ته.. و ل بیرا خۆ بینهڤه كو تو ژ وى مهزنتر نینى یێ ئافراندى.. ئهى عهگوه، ل بیرا خۆ بینهڤه كو تو بهرى چهند سالهكان زارۆك بووى، ته دمیزته ب خۆ ڤه، وتو ل سهر چالهپكان ب ڕێڤه دچووى، وهكى بچویكهكێ پیس.. ژ بهر مهژى هشكیا ته ووێ قۆپیایا ته دكر، سهیدایێت ته ل خواندنگههێ پاتكا ته ژ زللههان ڕهش دكر.. ما سالهكێ تو ژ خواندنگههێ نه هاتبوویه دهرێخستن ژ بهر قۆپیایێ؟؟ من كر بوو دلێ خۆ كو دوعایان بۆ ته بكهم كو خودێ بهرێ ته بدهته ڕێكا ڕاست، بهلێ من باوهره ــ وبلا خودێ ل من نهگرت ــ كو یێن وهكى ته چو جاران نائێنه سهر ڕێكا دورست چو جاران، چونكى ته ئهو نهڤێت وتو بزاڤێ ژى بۆ ناكهى.. بهلكى تو هزر دكهى كو ژیانا ته ــ ئهوا تو دبۆرینى ــ كاكلكا ڕاستیێ یه، ڕویێت ته دڕهش بن! تو نزانى كو كهیفا ئێخسیرى چهنده دهمێ ئهو ژ نهیارێ خۆ دڕهڤت، ل عهسمانى ب ڕهخ عهوران ڤه دفڕت.. كهیفهكا مهزنه، ئهو بۆ مرۆڤى مسۆگهر دكهت كو ئازادى جوانترین تشته د ژیانێ دا.. دهمێ من ئهڤـ ڕێزكه دنڤیسین هێشتا من ئهو نهدیتیه بهلێ ئهزا ب هیڤیمه كو وێ ببینم، ومن باوهریهكا موكم ههیه كو تو ناگههیه من.. ژ بهر شكهستن وكهربا خۆ دا بمره.. كانێ بجهڕبینه دهمێ ژنهكا خودێناس، یا قهدرێ ئازادیێ دزانت، ودخوازت خهباتا خۆ ب ڕێڤه ببهت تف دكهته ڕویێ ته، دا كو مرۆڤـ ب ڤیان وئاشتى بژین و ل سهر خوین ومال ونامویسا خۆ دئێمن وپشت ڕاست بن.. گهلهك لهعنهت ژ نك من ل ته بن، پێش وان دلێت بهندهوار وههژار ڤه ئهوێت ب ئاگرێ زۆرداریا ته هاتینه داخكرن.
وسلاڤـ ل ته نهبن!! ".
نهبیلا
* * *
دنیا د چاڤێن عهطوهى دا زڤڕى، ب بێن تهنگى ڤه خۆ بهردا سهر كورسیكهكا نێزیك، ئهنى لێ سۆر بوو وخوهێ دا, چاڤـ لێ سۆر بوون، پیێ خۆ ل عهردى دا وڕهوى:
ــ عهطوه دزانت چاوا دێ تۆلێ ڤهكهت.
بابێ وێ هیڤى ژێ كرن وگۆت:
ــ عهطوه بهگ، بێنا خۆ فرههــ كه، ههر تشتهكێ ههبت چارهسهرى بۆ ههیه.
ب دو چاڤێت كهرب وكین ژێ دفڕت بهرێخۆ دایێ وگۆت:
ــ ته دیت چ یا نڤیسى؟
ــ حهقێ من نینه ئهز وێ بخوینم..
عهطوه ڕاست ڕابوو ڤه وخوڕى:
ــ هوین ب ههمى فێلێت وێ دحهسیان..
بابێ پیر گاڤێت خۆ ب نك وى ڤه هاڤێتن، و ب لهرزین ڤه گۆت:
ــ كوڕێ من، ب خودێ مه ژى وهكى ته چو ژێ نهدزانى، ههما مه هند دیت ئهو ب خافلهتى ڤه یا چووى..
عهطوه كولمهك ل دیوارى دا وگۆت:
ــ چاوا ژ مال دهركهفت؟ ما هوین دنڤستى بوون؟ چاوا پاسپۆرت بۆ خۆ دهرێخست؟ چاوا؟ چاوا؟ ئهز نه هندێ خشیمم.. هوین دێ بهایهكێ گران دهن.. كانێ وێ كاغهزێ بینه یا وێ بۆ ههوه هێلاى.
دهستێ پیرهمێرى ڤهدلهرزى دهمێ كاغهز دایه ڤێ، عهگوهى ژ لهپێن وى ڤهڕهڤاند، و ب لهز د سهر ڕێزكێت وێ دا چوو، ل دویماهیێ گۆت:
ــ ئهڤ نیشانه بهسن كو مهحكهما وێ پێ بێتهكرن..
ــ مهحكهما وێ؟
بابێ ب حێبهتى ڤه گۆت، عهطوهى ب ڕكدارى ڤه لێ ڤهگێڕا:
ــ بهلێ.. خۆ ئهگهر یا ئاماده نهبت ژى.
ــ كوڕێ من، ئهڤا وێ كرى خهلهتیهكه ژ بهر تشتهكى یا هاتیهكرن، ههیامهكه ودێ زڤڕته سهر هش وبیرێت خۆ.. هنگى ئهو دێ چانتێ خۆ هلگرت وزڤڕتهڤه، ئهز دێ كاغهزهكێ بۆ نڤیسم، یان دێ چمه نك وێ وئهز نازڤڕم حهتا وێ نهئینمهڤه.. عـهطـوه، بلا كهس ڤێ چهندێ نهزانت، ئهم ب عهقلى دێ چینێ حهتا مهسهلێ چاره بكهین.
عهطوهى ستویێ خۆ ب نك بابێ نهبیلایێ ڤه درێژ كر وگۆت:
ــ من دندكهكا عهقلى نهمایه.. ب ڕهنگهكێ رهسمى ئهم دێ داخوازێ ژ حوكمهتا كوێتێ كهین دا ئهو وێ بدهنه دهستێ كاربدهستێت مصرى بۆ دادگههكرنا وێ.
پاشى وى ئهو كاغهز یێت د ناڤـ دهستێ خۆ دا هژاندن وگۆت:
ــ وئهڤه دهلیله.
پاشى عهطوهى خوه ژ ئهنیا خۆ ڤهمالى، وبێنا خۆ هلكێشا وگۆت:
ــ ئهگهر ب ڕێكێت دبلۆماسى نهچته سهرى.. ئهم دێ وێ ڕهڤینین وئینین.. گهلهك جاران مه وه كریه.. ئهگهر ئهڤه ژى چێ نهبوو، دێ كوژین یان ژههرێ دینێ.. ههڤالێت مه ژ ژن ومێران ل ههمى جهان ژ دنیایێ ههنه.. پێتڤیه هوین ڤێ چهندێ بزانن.
بێ دهنگى دهسههلاتدار بوو، دهیكا نهبیلایێ ب گۆپال ڤه هات، ڕۆندكان دێمێ وێ یێ زهر تهڕ كربوون، وێ گۆت:
ــ عهطوه كوڕێ من.. ئهڤا تو دبێژى گرفتاریێ چارهسهر ناكهت.. دا ب حیلهبازى بچینێ.
عهطوهى گۆت:
ــ مرۆڤێت لاواز حیلهبازیان دكهن.. بهلێ ئهم ههچیا مه دڤێت دێ كهین.. ئهم دشێین دهسههلاتداریێت دهولهتان بگوهۆڕین، شۆڕهشێت مللى هلكهینێ دژى وان حاكمێن نه دویڤهلانك بن بۆ مه.. ئهمین ستوینێت (كۆچكا سپى) یا ئهمریكى و(كرملنا) رووسى دهژینین، ئهرێ تو بێژى ئهم بهرانبهر پێشیهكا دبێژنێ: نهبیلا، دێ لاواز بین؟ سویند بت ب شهرهفا من كو ئهز خوینا وێ فڕكهم.
ژنكێ خۆ نێزیك كر، وێ دڤیا دهستێ خۆ ب ملێ وى دا بینته خوارێ، بهلێ وى ب هشكى دهستێ وێ پاشڤهلێدا وگۆت:
ــ هوین ژى دێ ئێنه حوكمكرن..
ڕویێ پیرهمێرى زهر بوو، وگۆت:
ــ كوڕێ من، ما گونهها مه چیه؟
ــ ڤهشارتنا تاوانێ.
ــ تاوانا چ؟
ــ هێشتا ته نهزانیه؟
ــ ئهو بۆ خۆ یا دهركهفتیه ژ دهرڤهى وهلاتى.. و ژ مافێت ههر كهسێیه وێ چهندێ بكهت.
وهكى شهیتانى عهطوه كهنى، بهرێ خۆ دا بابێ نهبیلایێ وگۆت:
ــ ڤان گۆتنێت بێ مــهعـنـا تو دشێى ل مهحكهمێ بێژى، دهمێ پیسار ژ ته دئێنهكرن..
پاشى وى ههردو كاغهز بلندكرن وگۆت:
ــ وئــهڤــه؟مــانــه دژیاتیا رژێمێیه؟ وخهبهرێت ئاشكهرانه ب دهسخهتێ وێ ب خۆ بۆ هندهك كهسێت بهاگران وخودان دیرۆك دشۆڕهشێ دا؟
عهطوه ب نك زهلامى ڤه چوو وگۆت:
ــ نــه بــهس هــویــن، هــهر كــهسێ هاریكاریا وێ كرى بۆ دهرێخستنا پاسپۆرت وڤیزایێ، ئهو ژى دێ ئێته حوكمكرن، وهلات گێلهشۆك نینه.. ئهم ب دهستهكێ ژ ئاسنى حومكى لێ دكهین.
عهطوه ل سهر پێ خۆ زڤڕى، و ب نك دهرگههێ خانى ڤه چوو بهلێ بهرى دهرگههى ژ كهرب ڤه بگرت، گۆت:
ــ دهمێ نهبیلایێ ل كوێـتـێ گــوه لێ دبت كو بابێ وێ ودهیكا وێ وههمى مرۆڤێت وێ ل گرتیخانا حهربى بۆ پسیاركرنێ هاتنه ڕاكێشان.. هنگى ئهو ب خۆ ئهگهر یا خودان وژدان بت دێ زڤڕت، یان ژى دێ دین بت، یان دێ خۆ كوژت ئهگهر بڕیارا زڤڕینێ نهدهت.. چو ڕێكێت دى وێ نینن.
عهطوهى دهرگەهــ دائێخست، باب كهفت ودهستێ خۆ دانا سهر سنگێ خۆ وگۆت:
ــ یا خودێ حهز بكهت دێ ئهو بت.
ژ دێمى وى دیار بوو كو ئهو یێ دئێشت، خوههكا سار ئهنیا وى گرت، ب دهنگهكێ نزم ڤه گۆت:
ــ فڕهكا ئاڤێ.. دهیكا نهبیلایێ..
ژنكێ گۆپال هاڤێت وخۆ ب نك ڤه چهماند وگۆت:
ــ ته خێره، ئهز قوربان.
ــ بــێـنـا من یا تهنگ دبــت، وئــهزێ نـهخــۆش دبم.. زوى هندهك ئاڤێ بگههینه من.
ب دهنگهكێ بلند وێ كره ههوار، خهلكێ مالێ ب ترس ڤه ل دویڤ دهنگێ وێ دهركهفتن، ههر ب لهز تهلهفوون بۆ دختۆرى كر.. دهم گران ب ڕێڤه دچوو، یێ تژى ترس وسههم بوو، بێن بۆ بێنێ دهیكا نهبیلایێ دا كهته گرى وبێژت:
ــ ئهز قوربان، تو كوشتى، خودێ د گهل وان بكهت، ئهو خودان هێزێ تۆلڤهكهره، مه كهس نینه ههوار بكهینێ ژبلى وى، ئهى خودێ ههما ژ بهر من وزارۆكان تو وى بپارێزه.. تویى شافى، ئهم داخوازێ ژ كهسێ دى ناكهین.
دهمێ دختۆر هاتى، وبهرێ خۆ دایێ، گۆت:
ــ نهترسن وعێجز نهبن، هندهك عێجزى یا بۆ وى چێبووى لهو دلێ وى یێ وهستیاى، دڤێت چهندهكێ رحهت ببت، ودهرمانى ل وهخت بدهنێ، ویا باش ئهوه ئامیرهتێ ئوكسجینێ بۆ بدانین.. لهو ئهز دبینم یا چێتره هوین سێ چار حهفتیهكان وى ڤهگوهێزنه خهستهخانێ دا ل وێرێ چاڤدێریێ لێ بكهن.. جارهكا دى دێ بێژمه ههوه: عێجز نهبن.
دهیكێ ب گرى ڤه گۆت:
ــ ئهز گۆرى ته بم.. خوزى ئهز ل شوینا ته بامه! خودێ د گهل وان بكهت..
باب گڕنژى وگۆت:
ــ نهگرى دهیكا نهبیلایێ.. عهمر ب دهستێ خودێیه.
جارهكا دى وى ب سوحبهت ڤه گۆت:
ــ مرۆڤێ خراب یێ عهمر درێژه.
* * *
عهطوهى قهستا ئاڤاهیێ موخابراتا گشتى كر، وگههشته ههڤالهكێ خۆ ، ومهسهله ب درێژى بۆ وى شرۆڤهكر، پاشى ههردو كاغهزێت نهبیلایێ ب دهستێ خۆ نڤیسین دانهڤێ، ههڤالێ وى گۆت:
ــ باشه.. ڤێجا چ بكهین؟؟
ــ صالح بهگ، تودزانى یا پێتڤى چیه ئهم بكهین..
صالح ل كاغهزان زڤڕى وگۆت:
ــ بێ گومان ئهڤـ ڕێزكه نهبیلایێ تاوانبار دكهن، بهلێ كوێت وسعوودی قهبویل ناكهن ئیخوانان تهسلیمى مه بكهن..
ــ نابت..
ــ ئهڤهیه تشتێ دبت ئهى عهطوه!!
ــ ب چ حهق؟
ــ بـاش گـوهـێ خــۆ بــده مـن.. عهطوه مه گهلهك ڤهكۆلین د ڤى بابهتى دا كریه، ئهو ل ڤان وهلاتان هزر دكهن كو كهسێ خۆ بچته سهر بهختێ وان، چێ نابت بۆ وان ئهو وى تهسلیمى مه بكهن.. عهدهتێت وان یێت عهرهبى دهۆسانه.. ئهو خیانهتێ ل مێڤانى ناكهن، ئهگهر ئهو ب مانا وى دخۆش نهبن ژی، دێ بێژنێ: وهلاتهكێ دى بۆ خۆ هلبژێره.. بهلێ كو ئهو وى بدهنه مه، ئهڤه نابت، پشتى هنگى ژ بیر نهكه كو مه ژى هندهك نهیارێت وان حهواندینه، وئهم وان تهسلیم ناكهین..
عهطوهى ب ئهحمهقى ڤه گۆت:
ــ بۆچى ئهم ئێك وان ب نهبیلایێ ناگوهۆڕین؟
ــ ئهڤه سیاسهته بلنده، ئهم مایێ تێ ناكهین عهطوه، تو ڤى تشتى دزانى.
عهطوه ژ سهر كورسیكا خۆ ڕاست ڕابوو, وگۆت:
ــ پا ئهم دێ مرۆڤێت وێ گرین، بهلكى ئهڤـ چهنده ببته ئهگهرا زڤڕینا وێ.. ما گهلهك جاران مه وهكریه.
صالحى ئاڤڕهك لێدا وگۆت:
ــ عهطوه!!
ــ ئهمر بكه..
ــ ئهز نهشێم ڤى كارى بكهم..
ــ توكارێت مهزنتر و ب ترستر دكهى..
ــ ئهزدزانم.. بهلێ ڤێ مهسهلێ ئهز نهشێم..
ــ بۆچى؟
ــ چونكى سهرۆك ب كارێ مه یێ بۆرى حهسیابوو..
ــ كیژ كارى؟
ــ كارێ گرتنا نهبیلایێ..
عهطوه مستا خۆ ڕاكر و ل مێزێ دا، وگۆت:
ــ موستهحیله.. كێ گۆتیێ؟
ــ ئهز نزانم.. بــهلـێ گــهلــهك كـهنـیـا وى ب مهسهلێ هات.. د گهل هندێ ژى وى هندهك گهف وگوڕێت نهخۆش ل مه كرن..
ــ ئهڤه تشتهكێ عنتیكهیه.. چاوا وى زانى؟ نێزیكه دێ دین بم..
صالحى ب خهمسارى ڤه گۆت:
ــ ئو ههمى تشتان دزانت.. ب سهدان جیهاز ل وهلاتى ههنه عهگوه، ما تو نزانى؟! پشتى هنگى تو مرۆڤهكێ دهڤبهردایى..
عهطوهى ئیشارهت دا خۆ وگۆت:
ــ ئهز؟!
صالحى ملێت خۆ هژاندن، وگۆت:
ــ خودێ دزانت.
عهطوهى ب كهرب ڤه جگارهك ئینادهر، صالح بهگێ ئهو بۆ وى هلكرێ، عهطوهى جارهكا دى خۆ ڕهزیل كر وگۆت:
ــ بۆچى ئهم ڤێ جارێ ناجهڕبینین، ب ڕهنگهكێ وهسا بكهین سهرۆك پێ نهحهسیێت؟
ــ عهطوه هشێت خۆ بینه سهرێ خۆ..
ــ ئهم برایێت ئێكین صالح..
ــ ڕاسته بهلێ مالا مه خراب نهكه..
ــ ب ڤهشارتى ڤه.
ــ وئهو جیهازێت ل ههمى جهان بهلاڤكرین؟
ــ صالح، ئهز وتو ههر شۆلان بۆ ئێك ودو دكهین.
ــ ههر تشتهكى حهددێ خۆ ههیه.. ل من نهگره.
دهلیڤهیهكێ عهطوه كهفته هزران پاشى گۆت:
ــ ما ته پێ خۆشه ژنهكا كێمتر ژ پێنجى كیلۆیان بشێته من؟؟
ــ چو نینه دا فێر ببى..
ــ فێرى چ؟
ــ فــێـرى بێنفرههى وفێلبازیێ.. هــهمــى تشت ب هێزێ نائێنه وهرگرتن..
ــ من ئهو ژى كر، بهلێ ئهز ب سهرنهكهفتم.
ــ چونكى تو نهیارێ دهمى یى عهگوه، ته دڤێت بهرى وهختى ڕاكهى.
جارهكا دى عهطوهى كولما خۆ ل مێزێ دا وگۆت:
ــ من چارهیهكا بنبڕ دڤێت..
ــ چاره بێنفرههیه.
ــ بێنفرههى چاره نینه.. ئهو بهنجهكه من نهڤێت ئهز فڕ كهم..
ــ مهسهلێ بهێله ب هیڤیا من ڤه.
ــ حهتا كهنگى؟
ــ جارهكا دى دڤێت بێنفرههى ههبت.
ــ یهعنى: مرۆڤێت وێ یاریان دێ بۆ خۆ ب من كهن، دێ هزر كهن ئهو گهفێت من ل وان كرین ژ قهستا بوون، ڤێجا ئاگرێ شكهستنێ وپاشڤهچوونێ ههر دێ من سوژت، ئهز عهطوهمه ئهوێ خهلك ههمى وى دنیاسن، ژ دهرڤهى وهلاتى نهبیلا دێ شهرما مه بهت، وگۆتاران نڤیست، وسرۆدان دژى مه ڤههینت، وخۆنیشادان دێ دهست پێ كهنهڤه..
پاشى ئهو ل صالح بهگێ زڤڕى وگۆت:
ــ تو ب خودێ كهیه، وجا سهرۆكى یان بهرژهوهندیا دهولهتێ د ڤێ چهندێ دا ههیه؟ ئهڤه چ ب سهرێ ههوه هاتیه؟ عهقلێ ههوه ل كیڤه مایه؟ خهمساریا مه ل دهمهكى هۆسا خیانهته..
صالح بهگێ ب مجدى ڤه گۆت:
ــ سهرۆكایهتى ب تنێ دشێت شۆلان بسهنگینت وفهرمان وبڕیاران بدهت.
عهطوهى ڤیا دهركهڤت، بهلێ بهرى ئهو بچت وى گۆت:
ــ ئهز ب خۆ مهسهلێ بۆ سهرۆكاتیێ دێ رۆن كهم.
ــ د خێرا ته دا نابت.
عهطوه زڤڕى جهێ خۆ دلێ وى ژ ترسان دا خۆ دهلاڤێت، وڕویێ وى یێ سۆر بههى..
ــ چاوا؟
صالحى برسڤا وى نهدا.. وى گۆت:
ــ ل درێژیا كارێ خۆ هێشتا من تشتهكێ وهسا نهكریه گومانێ بێخته دلسۆزیا من.. تو ڤێ چهندێ باش دزانى، جارهكا ب تنێ ژى من فهرمانهك ل عهردى نهدایه، ئهو ژى ڤى تشتى دزانن..
صالحى گۆت:
ــ مهسهلێ بهێله ب هیڤیا من ڤه، ئهزدێ خهمێ ژێ خوم، بهلكى ئهم وى تشتى بكهین یێ كهیفا ته پێ بێت.
عهطوه ڕابووڤه.. سهرێ صالحى گرت وپێڤه ماچى كر وگۆت:
ــ تــو هـــهر یـــێ چــهلــهنــگــى.. ئهز ته دنیاسم صالح، تو ب سهرێ بابێ خۆ كهیه توهارى من بكه..
صالح گڕنژى ولێڤا ژۆرى ل یا ژێرى نهدا.. عهطوه ههر ما دودل، بێنهكێ كویر چوو، پاشى گۆت:
ــ یهعنى ئهز ژ ڤێ بزانم كو سهرۆكایهتى یا ژ من رازى نینه؟
صالح كهنى وگۆت:
ــ جامیرۆ خۆ ب خهم نهئێخه..
ــ خهما من یا مهزن سهرۆكایهتیه.. ئهوه ههمى ژیانا من.
ــ نهترسه..
ــ بهلێ ئاخفتنا ته هندهك مهعنایێت ب ترس ژێ دچن.
ــ تونهیێ ئێكدلى وته دڤێت مهعنایان ژ ههمى ئاخفتنان ببهى.. مهخسهدا من ئهڤ ههمیه نهبوو.
ههردو پیچهكێ بێ دهنگ بوون، پاشى صالحى گۆت:
ــ ئهزێ ب شۆلم.. تو ژى، ما رێكخستیهكا نهێنى یا نوى یا ئیخوانان نههاتیه گرتن؟
عهطوهى سهرێ خۆ هژاند وگۆت:
ــ بهلێ، ئهز دێ چم.. تۆلا خۆ ژ نهبیلایێ ل وان ڤهكهم، ئێك ئێكه دێ وه ل وان كهم ئهو بهایهكێ گران بدهن.
