ل حصنێ (بهنى قورهیظه)
حصنێ (بهنى قورهیظه) ئهوێ دكهڤته ژێریا ڕۆژههلاتا باژێڕێ (یهثربێ) ئهو جهـ بوو یێ سهییدێ وى یێ جوهى ئهو لێ ئاكنجى كرى، وچاڤدان وسهخبێركرنا دارقهسپان ئهو كار بوو یێ سهییدێ وى یێ نوى ژى هێلایه ب هیڤیێ ڤه، ودهمهكێ درێـژ پـێـڤــه نــهچــوو ئــهو فـێـرى ژیـانـا خـۆ یـا نوى بوو.. سپێدێ زوى ژ حصنى دهردكهفت وقهستا بیسانى دكر، وڕۆژا خۆ ههمى ب چاڤدان وسهخبێركرنا دارقهسپان ڤه دبۆراند، وگاڤا دبـوو ئـێـڤـار جارهكا دى قهستا حصنى دكر وشهڤا خـۆ لـێ دقـهتـانـد.. و د گـهل وێ مهلهل ورووتینێ د ژینا وى دا هـهى ژى، وى ب دلساخى وڕاستگۆیى كارێ خۆ دكر، لهو سهییدێ وى زێده باوهرى ددایێ، تشتێ بارێ عهبدینیێ یێ گران چهندهكێ ل سهر ملێن وى سڤك دكر.
ل ڤى جهووێ نوى یێ ئهو تێدا دژیا تشتهك ههبوو بێنا وى تهنگ دكر، وخهم د دلێ وى دا زێده دكر، ئـهو ژى ئـهو رهفتارێ وهرباداى وئهخلاقێ خراب بوو یێ ل نك جوهیێن (قورهیظى) ههى، وهكى حهژێكرنا وان یا زێده بۆ مالى ئهوا دگههته دهرهجا عیبادهتى، وئـسـتـغـلالا وان یا كرێت بۆ ههوجهییا خهلكێ یهثربێ ژ ئهوس وخهزرهجیان ب ڕێكا تهعامولا ریبایێ د گهل وان، وهلكرنا وان بۆ فتنه وشهڕ ولێككهفتنا د ناڤبهرا خهلكى دا.. وتشتێ ئهو حێبهتى دكر ئهو بوو خۆ زانایێن وان یێن دینى ژى ئهوێن (تهورات) دخواند، خۆ ژ ڤێ چهندێ نهددا پاش، وئهو تشتێ وان د ناڤبهرا خۆ دا حهرام ددیت، د گهل خهلكێ بیانى حهلال ددیت، و د گهل هندێ ژى دگۆتن: ئهم شهعبێ خودێ یێ هلبژارتینه، جێگرێن پێغهمبهران! ئهرێ ما ئهڤه ڕێكا پێغهمبهرانه یا ئهو پێ ژ نك خودێ هاتین؟ بهلێ ئهو یا غـهریــب نــیـنـه ژ جوهیان، ما نه ههر ئهو بوون كار بۆ گرتن وكوشتنا مهسیحى ب دهستێن كافر وصهنهمپهڕێسان كری؟ ما نه ههر ئهو بوون یێن یهحیا وزهكهرییا كوشتین؟ ئهوێن دیرۆكا خۆ ب كوشتنا پێغهمبهران ڕهش كربت، بۆچى دلێ خۆ نابهنه كوشتنا هندهك صهنهمپهڕێسێن ئهوسى یان خهزرهجى؟! پشتى هنگى بۆچى ئهوس وخهزرهجى دێ هنده دساده بن ههڤسارێ خۆ كهنه د دهستێن جوهیان دا تڕانهیان بۆ خۆ ب مهصیرێ وان بكهن، و ل سهر حسێبا وان خۆ زهنگین وقهلهو كهن؟
وههر جارهكا ئهو دگههشته ڤى جهى ژ هزرێن خۆ وى ههست ب بێن تهنگیهكا مهزن دكر، و ب سۆتنى ڤه دگۆت: یا رهببى! خرابی یا گههشتیه كلۆڤانكێ، رهحما ته كهنگى دێ گههته مه؟!
و ژ وێ ڕۆژێ وهره یا ئهو تێدا ب وهریسێ عهبدینیێ هاتیه گرێدان، ڤیانا ئازادیێ ڕۆژ بۆ ڕۆژێ زێدهتر لێ دهات، بهلێ وێ ڕۆژا خهبهرێ هاتنا (ئبن ههیبانى) بۆ حصنێ (بهنى قورهیظه) ب بهر گوهێ وى كهفتى ڤیانا وى بۆ ئازادیێ گهلهك وگهلهك زێدهتر لێ هات.. وى ژ ههڤالهكێ خۆ گوهـ لێ بوو كو زانایهكێ مهزن ژ شامێ یێ هاتى دبێژنێ: (ئبن ههیبان) مرۆڤهكێ تبهڕكه، لهو جوهیێن قورهیڤى ئهو دا بهرا خۆ دهمێ ڤیاین بچن نڤێژا بارانێ بكهن، بهلێ وى گۆته وان: ئهز د گهل ههوه نائێم حهتا هوین ههمى ژ دل تۆبه نهكهن، وخێران نهدهنه فهقیر وژاران.. وپشتى وان وه كرى ژ نوى ئهو د گهل وان دهركهفته چۆلى ودوعایێن بارانێ بۆ وان كرن، وهێشتا ئهو ژ جهێ خۆ نهلڤى بارانێ ژ عهرد وعهسمانان لێ كر.
ڤى زانایى بیرا وى ل ههر چار سهیدایێن وى یێن پیرۆز ئیناڤه، وخوزیا وى یا مهزن ئهو بوو ئهو شیابا بچته نك (ئبن ههیبانى) وخزمهتا وى بكهت كا چاوا وى خزمهتا سهیدایێن خۆ یێن دى دكر، بهلێ.. وێڤه ژ كیڤه دئێت؟! ئهو نوكه عهبدێ مرۆڤهكێ چڕیكه، ڤێجا چاوا دێ شێت خوزیا خۆ ب جهـ ئینت؟ وچته نك وى زانایى؟ ب تایبهتى دهمێ سهییدێ وى ئهو پیس پاشڤه برى دهمێ جارهكێ وى ژێ خواستى ئهو ڕێكێ بدهتێ دا بچته نك (ئبن ههیبانى) وگۆتێ: تو عهبدهكێ بێخێرى شۆلێ ته ب (ئبن ههیبانى) چیه؟ هنگى وى حهز دكر ئازادیا خۆ ڤهگهڕینت ئهگهر خۆ بهایێ وێ ژیانا وى ههمى با..
وچهند خهما وى یا مهزن بوو دهمێ ڕۆژهكێ خهبهرێ مرنا (ئبن ههیبانى) گههشتیێ بێى ئهو بشێت بچته نك و ژ نێزیك ڤه خزمهتا وى بكهت، بهلێ تشتێ دلێ وى زێده خۆش كرى ئهو گۆتن بوون یێن ژ كیس دهڤێ (ئبن ههیبانى) بۆ وى هاتینه ڤهگوهاستن، یێن وى ل بهر مرنێ گۆتین، ئهو مرۆڤێ خهبهرێ مرنێ گههاندیێ گۆت:
- دهمێ ئهو كهفتیه بهر مرنێ ومهزنێن قورهیظیان لێ كۆمبووین، وى گۆته وان: گهلى جوهیان! هوین دزانن بۆچى ئهز ژ شامێ وهلاتێ خێر وخێراتان، هاتمه ڤى عهردێ هشك وبهیار؟ وان گۆتێ: تو چێتر دزانى! وى گۆت: ئهزێ هاتیمه ڤى جهى دا چاڤهڕی هاتنا وى پێغهمبهرى بكهم ئهوێ زهمانێ وى نێزیك بووى؛ چونكى د كتێبێن مه دا هاتیه كو ئهو دێ مشهخت بته ڤى جهى، ونێزیكه ئهو دێ ئێت، وهیڤیا من ئهو بوو ئهو بێت هێشتا ئهزێ ساخ دا باوهریێ پێ بینم، ڤێجا گهلى جوهیان، ههوهئێمانهت گاڤا ئهو هات كهس بهرى ههوه باوهریێ پێ نهئینت، چونكى ئهو پێغهمهرهكه خودێ كوشتن وئێخسیركرنا نهیاران دێ بۆ وى حهلال كهت، وههچیێ دوژمناتیا وى بكهت خودێ دێ وى شكێنت، هشیار بن هشیار بن!
- مهعنا ئهز خهلهت نههاتیمه، وئهو هزرا من دكر یا د جهێ خۆ دایه!
هۆسا (عهبدێ فارسى) د گهل خۆ ئاخفت، بێى دهنگێ وى بگههته ههڤالێ وى، وئاخینكهك ژ كویراتیا دلى ڕاهێلا وگۆت: دیاره ئێغبالا منه، ئهز مرنا خۆشتڤیێن خۆ ئێك ئێكه ببینم، وپشتى وان بمینمه ب تنێ. وههڤالێ وى تێ نهگههشت وى چ گۆت، لهو سهرێ خۆ هژاند، وچوو..
