چارهسهریهكا بهروهخت
ئهڤه ئاستهنگ بوون.. وچارهسهرى چیه؟
ئهم دێ ژ دویماهییێ دهست پێ كهین.. گاڤا نهفسا ته جارهكێ گۆته ته: پاشى.. تو بێژێ: (پاشى..) نه د دهستێ من دایه ونه د دهستێ ته دایه، پاشى ملكێ خودێ یه، بهرپهڕهكێ ڤهشارتییه ل بهر مه، كهس نزانت كانێ ئهو دێ گههته (پاشییێ..) یان مرن دێ وێ (پاشییێ..) ژ دهستێن وى ئینته دهر، گوهدارییا ڤێ ئایهتێ بكه چ دبێژت: (يأيها الذين ءامنوا اتقوا الله حق تقاته ولا تموتن إلا وأنتم مسلمون)( آل عمران 102)ئهڤه گازیـیـهكـه بــۆ وان كـهسـان دئێته ئاراستهكرن ئهوێن باوهرى ب خودێ ئیناى، ودویكهفـتـنـا پێغهمبهرێ وى ـ سلاڤ لـێ بن ـ كرى، دبێژتێ: هوین تهقوا خودایێ خۆ بكهن، و ب دورستى ژ وى بـتـرسن، چاوا ب دورستى دێ تهقوا وى كهین؟ ئهگهر مه گوهدارییا وى كر وخۆ ژ بێ ئهمرییا وى دا پاش، وشوكرا نعمهتێن وى كر وكافرى پێ نهكر، وههردهم مه ئهو ل بیـرا خـۆ ئیناڤه ومه ئهو ژ بـیـر نهكر.. ئهو هنگى مه ب دورستى تهقوا وى كر، پاشى ئایهتێ گۆت: نه وه بت هوین بمرن ئهگهر هوین دموسلمان نهبن.
وپسیار ل ڤێرێ ئهڤهیه: ئهرێ ئێك ژ مه دزانت كهنگى دێ مرت، دا دهمێ دمرت یێ موسلمان بت؟
نه.. كهسێ چو ئهمان ژ مرنێ وهرنهگرتینه كو فلان دهمى بێت فلان دهمى نهئێت، ومرنێ چو ژڤان نهداینه كهسێ ژى كانێ دێ كهنگى ئێت، پا ڤێجا.. چاوا نهمرین ئهگهر دموسلمان نهبین؟
مهعنا: ڤێ گاڤێ بهرى بێنهكا دى موسلمان ببه، نوكه بهرى سهعهتهكا دى تۆبه بكه، چونكى تو نزانى كانێ كهنگى دێ مرى، وهكى وى مرۆڤى یێ وهغهرهك ل بهر بت ونهزانت كهنگى وهغهرا وى دێ دهست پێ كهت، ڤێجا كارێ خۆ بكهت وههردهم یێ ئاماده بت، چى گاڤا گۆتنێ: وهره.. دا یێ بهرههڤ بت. وپشتى ئهو نهفسا خۆ ل سهر هندێ پهروهرده دكهت كو ئهو ههردهم بۆ وهغهرا مرنێ یا بهرههڤ بت، دڤێت ئهو بیرا خۆ ل وێ ڕێكێ بینته ڤه یا مرن دێ بـهرێ وى دهتــێ، وێ وهغــهرا ب ترس وسههم ئهوا ل بهرا وى، كو ژ قـهبـرێ تـارى دهسـت پێ دكهت و ل بهحهشتێ یان جههنهمێ ب دویـمـاهـى دئێت، بلا ئهو پسیارێ ژ خۆ بكهت: ئهرێ ئهڤ خۆشییا وى ژ گونههێ ددیت دهمێ وى ل دنیایێ ب كهیف ڤه قهست دكرێ چهندێ دئینت دهمێ ل ئاخرهتێ دبته ئهگهرا شهرمزارییا وى یا بهردهوام؟
یان بهرى ئاخرهتێ.. دهمێ ئهو گاڤ د سهر وى ڕا دبۆرت یا وى خۆشى تێدا ب گونههێ برى، پشتى بۆرینا وى دهمى ئهو دهم دێ چ بۆ وى ل پاش خۆ هێلت ژبلى دلهكێ تژى كهسهر ل سهر نهمانا وێ خۆشییێ ژ لایهكى ڤه، وترسا ژ ڕۆژێ یا حسێبا وێ گونههێ د گهل دئێتهكرن؟ ته دیتییه مرۆڤهكێ عهقلدار ژ بهر خۆشییا دهلیڤهیهكا كورت مهصلحهتهكا خۆ یا (مهصیرى) تێ ببهت؟ ئهو كهسێ عهمرێ خۆ ههمییێ گۆرى تێڕكرنا شههوهتهكا خۆ یا بیست خهبهرى بكهت تو دێ چ ناڤى ل سهر دانى؟
