كتێبا (الفوائد) و گرنگیا وێ
كتێبا (الفوائد) ئێك ژ كتێبێن ناڤداره، یێن زانایێ مهزن ئیمام (ئبن قهییم ئهلجهوزییه)، ووهكى ژ ناڤێ وێ دیار ئهو كتێبهكا تژى فایده ومفایه بۆ ههر كهسهكێ بخوینت، چونكى خودانێ وێ بهرگهڕیان كریه كو هندى ژێ بێت، مفایێن علمى یێن مهزن وغهریب تێدا كۆم بكهت، كویر خۆ داهێلته ناڤ وان ڕاستى وحیكمهتێن عنتیكه یێن كو ژ ئایهتێن قورئانێ وحهدیسێن پێغهمبهرى -سلاڤ لێ بن- دئێنه وهرگرتن، ووان ب ڕهنگهكێ خۆش وساناهى بدانته بهر دهستێن خواندهڤانان، وتشتێ ئهڤ كتێبه ژ گهلهك كتـێـبـێـن دى یێن نڤیسهرى جـودا كـرى ئــهوه، ئــهو لێ دگـهڕیـێـت ڤان مفایێن ژ كیتابێ وسوننهتێ دئێنه وهرگرتن ب ڕۆناهیا دلى ولایێ رووحانى یێ مرۆڤى ڤه گرێددهت، تشتێ تامهكا خۆشتر وزێدهتر ددهته كتێبا وى.
وئیمامێ ناڤدار (ئبن قهییم)، ئهوێ دئێته هژمارتن ئێك ژ مهزنترین زانایێن پێشین وچهلهنگترین دهركهفتیێن مهدرهسا ب بهرهكهتا (شیخ الإسلام) ئبن تهیمیهى، ژ هندێ ناڤدارتر وبهرنیاستره كو ئهم وى بدهینه نیاسین، بهرهكهتا علمێ وى ونڤیسینێن وى ئوممهت ههمى ڤهگرتیه، وكتێبێن وى حهتا ئهڤرۆ وهك (دائرة المعارف) و (ئنسكلۆبیدیایهكا) مهزن لێ هاتینه بۆ ههمى موسلمانان، حهتا یێن زانا ژى ژ وان..
و ژ بهر گرنگیا كتێبا وى (الفوائد) ووان مفایێن ب قهدر وقیمهت یێن تێدا ههین، مه ڤیا هندهك مفایێن ڕهنگین، وزانینێن جودا جودا یێن تێدا هاتینه بهلاڤكرن، ژێ بگرین وبهرههڤ بكهین، و ب چهند گوهۆڕینهكێن سڤك ڤه -یێن كارى ل ناڤهرۆكێ نهكهن- وهرگێڕێنه سهر زمانێ كوردى، وبدانینه بهر دهستێن خواندهڤانان، و ژ بهر وان گوهۆڕینان مه ناڤێ كتێبا خۆ كره (كورته مفا ژ كتێبا الفوائد) دا وهسا بێته زانین كو ئهو ژ وهحیا كتێبا (الفوائد) هاتیه، نهكو وهرگێڕانهكا دهق ودهقا وێیه..
وئهڤ چهنده مه كر ب وێ مهرهمێ كو خواندهڤانێ كورد ژى یێ زمانێ عهرهبى نهزانت ژ فـایـده ومفایێن (فایدهیێن ئبن قهییمى) بێبار نهبت، هیڤیا مه ژ خودایێ مهزن ئهوه ئهو زانینهكا ب مفا وكارهكێ باش وقهبویلكرى ب رزقێ مه بكهت، و ل دنیایێ وئاخرهتێ مه سهرفهراز بكهت، ومه بكهته ژ وان كهسان یێن خهما خۆ یا سهرهكى دكهنه بهلاڤكرنا دینێ خودێ یێ ڕاست ودورست، دویر ژ سهرداچوون وئنحراف ولادانێن نهزان وبیدعهچیان ئێخستینێ..
وخودێ هاریكار وپشتهڤانێ مه ههمیان بت.
تهحسین ئیبراهیم دۆسكى
دهۆك 23/7/2009
