پێشگۆتن
حهمد وسوپاسى ههمى بۆ خودێ بن، خودایێ ههمى چێكریان، ئهوه ئهم داین، وههردو ڕێ: یا باش ویا خراب، نیشا مه دان وبهرێ مه دایێ، وفهرمان ل مه كر ئهم قهستا ڕێكا باش بكهین وسۆز ب خهلاتهكێ ب بها دا وى كهسى یێ قهست بكهتێ، وئهم ژ قهستكرنا ل ڕێكا خراب داینه پاش وگهف ب عهزابهكا دژوار ل وى كهسى كر یێ قهست بكهتێ..
حهمد بۆ وى بن وهكى ئهو یێ ژ ههژى، وصهلات وسهلام ل سهر پێغهمبهرێ وى یێ خۆشتڤى وهلبژارتى بن، ب گازیا ڕاست ودورست بۆ مه هات، وبهرێ مه دا حهقیێ، وئهم ژ ههمى ڕێكێن خوار وڤیچ داینه پاش، سلاڤ ل وى بن وههمى ههڤال وپشتهڤانێن وى، وههر ئێكێ ڕێكا وى بگرت هندى ئهڤ دنیایه ههبت.
•خواندهڤانێن هێژا:
ل وى دهمێ ژینا ماددى یا مرۆڤێ نوكه گهلهك پێشكهفتى، وئهو زانستى وتهكنهلۆژى ڤه گههشتیه هندهك دهرهجه وپێكێن ههر نهدهاته سهر هزرا مرۆڤێ بهرێ، و د ئهنجام دا ژین ب ساناهى كهفتى، ئهم دبینین مرۆڤ ژ لایێ رووحى ونهفسى ڤه -ب تایبهتى- یێ گههشتیه هندهك ژۆردانیێن گهلهك نزم، حهتا پێكهكێ نێزیكه بێژین: مرۆڤ یێ گههشتیه بهخت ڕهشیهكا وهسا یا ل چو دهمێن دیرۆكێ مرۆڤ نهگههشتیێ، وههما بهسه بێژین: رهنگه ئهو مرۆڤێن ل ڤێ سهدسالا دویماهیێ ژ ژیێ عهردێ مه ژ بهر زۆردارى وبێ وژدانیا مرۆڤان هاتینه كوشتن، د عهمرێ عهردێ مه ههمیێ دا نههاتبنه كوشتن، ویێ باوهر نهكهت ههما بـهس بلا بــهرێ خــۆ بدهته هژمارا وان مرۆڤان یێن ب تنێ د ههردو شهڕێن جیهانى دا هاتینه كوشتن، ئهو شهڕێن مللهتێن پێشكهفتى پێ ڕابووین نهكهسێ دى!
ودهمێ سوحبهت دئێته سهر ئهگهرێن ڤێ بهخت ڕهشیا نوكه ب سهر مرۆڤینیێ دا هاتى، دبت مرۆڤێن شارهزا وبسپۆر گهلهك ئهگهران بێژن و ب ڕێز كهن، بهلێ تشتێ ژ ههمیان پتر دئێته ژبیركرن و ب پشت گوهـ ڤه لێدان ئهم ئعترافێ بكهین كو ئهڤ واقعێ خراب ئهنجامێ دویركهفتنا مه بت ژ خودێ، وبهرههمێ وان گونههان بت یێن ب شهڤ وڕۆژ وڤهشارتى وئاشكهرا د ناڤ مه دا دئێنهكرن، نه بهس هنده..
بهلكى ئهگهر جارهكێ ئێك ژ مه بێژت: ئهو شهقائا نوكه ئهم تێدا دژین ژ بێ ئیفلهحیا وان گونههانه یێن د ناڤ مه دا دئێنهكرن گهلهك كهس دێ ههبن لێڤێن خۆ شۆڕ كهن وتڕانهیان بۆ خۆ ب گۆتنا وى كهن وبێژن: گونههـ مهسهلهكا شهخصیه، ووێ چو پهیوهندى ب واقعێ مه ڤه نینه، وههما هوین تهفسیرێن دینى ددهنه ههمى تشتان!
ڤێجا حهتا بۆ مه ئاشكهرا ببت كو بێ ئیفلهحیا گونـههێ -نه ب تنێ ل سهر گونههكارى، بهلكى ل سهر مللهتان- گهلهكه، وكارتێكرنا وێ یا خراب زێده یا دژواره، مه ڤیا ئهم بیرا خویشك وبرایێن خۆ ل ڤى بابهتێ گرنگ بینینه ڤه، ومه دیت باشترین نامیلكه د ڤى بابهتى دا هاتیه بهرههڤكرن ئهوه یا سهیدایێ دكتۆر (عبد الله بن محمد السدحان) ى نڤیسى، ژ بهر دهولهمهندیا وێ ب وان بابهتێن تێدا هاتین د گهل كورتیا وێ، لهو مه خواست ئهم وى ب چهند دهسكاری ڤه وهرگێڕینه سهر زمانێ كوردى و ل بهر دهستێ خواندهڤانان بدانین بۆ بیرئینان ومفاوهرگرتن، هیڤیا مه ژ خودایێ مهزن ئهوه ئهو هیدایهتێ ب رزقێ مه بكهت، ومه بكهته ژ وان كهسان یێن فایدهى ژ وى تشتى دكهن یێ ئهو دخوینن وگوهـ لێ دبن..
یا رهببى تو ڤى كارى بكهینه د تهرازیا خێرێن نڤیسهرى ووهرگێڕى دا ل وێ ڕۆژێ یا نه مال ونه عهیال چو فایدهى نهگههینته كهسێ، وخودێ خێرا ههر كهسهكى مهزن بكهت یێ د ناڤبهرا خۆ وخودێ دا دوعایا خێرێ وقهنجیێ بۆ مه ودهیبابێن مه بكهت، دا بهلكى بهرهكهتا وێ بگههته مه؛ چونكى دوعایا مرۆڤێ موسلمان ب بهرزهیی ڤه بۆ برایهكێ وى یێ دی یا قهبویلكریه.
