چیرۆکا جادۆیا ژنەکا سعودی
ئەڤ چیرۆکە بەحسا رویدانەکا راستی دکەت کو ل وەلاتێ سعودییێ چێبوویە. چیرۆک لسەر ژنەکێ یە بناڤێ ئەمینە، کو دبن پەردەیا دینداری و خودێ نیاسیێ دا کارێن سێحر و جادویێ دکرن.
دەستپێکا چیرۆکێ
چیرۆک ل سالا ۲۰۰٦ دەست پێ دکەت، دەمێ بازرگانەکێ گەنج یێ سعودی بناڤێ سعود سەرەدانا وەلاتێ مسرێ دکەت. ل وێرێ، ل کافیەکێ، ئەو عاشقی کچەکا مسری دبیت کو ناڤێ وێ ئەمینە بوو. پشتی دەمەکێ ژ نیاسینێ، سعود داخوازێ ژ ئەمینێ دکەت کو ببنە هەڤژین. ئەمینە رازی دبیت، لێ دوو نهێنیان بۆ ئاشکرا دکەت:
ئەو بەری نوکە شوویکری بوو و ژ هەڤژینێ خۆ جودا ببوو.
ئەگەرێ جودا بوونێ ژی ئەوبوو کو زارۆک بۆ نەدبوون.
سعود گونهـ نادەتە ڤان تشتان و دگەل وێ دزەوجیت و دبەتە سعودیێ.
ژیانا نوی و پلانا ئەمینێ
ل سعودیێ، سعود ژیانەکا خۆش و تژی بۆ ئەمینێ پەیدا دکەت. ئەمینە، کو دراستی دا ژنەکا سێحرکەر بوو، پلانەکێ دادانیت دا کو باوەرییا سعود و خەلکێ دەڤەرێ ب دەستخۆڤە بینیت. ئەو ب بکارئینانا گیایێن دەرمانی و خاندنا قورئانێ، خۆ وەکی ژنەکا شارەزا د نوژداریا پێغەمبەری (طب النبوي) دا نیشا ددەت.
پشتی دەمەکی، ئەمینە ئیدعا دکەت کو یا ب دووگیانە. ئەڤ چەندە دبیتە جهێ حێبەتبوون و کەیفخۆشییا سعود، و ناڤ و دەنگێ ئەمینێ وەکی چارەسەرکەرەکا رۆحانی ل هەمی دەڤەرێ بەلاڤ دبیت. گەلەک کەس، بتایبەت ژن، بۆ چارەسەرکرنا ئاریشێن خۆ قەستا وێ دکەن. ئەمینە ژی دەست ب گۆتنا وانەیێن قورئانێ بۆ زارۆکان دکەت و خۆ وەکی ژنەکا خێرخواز نیشا ددەت کو مریان بێ بەرامبەر دشۆت و کەفن دکر.
ئاشکرابوونا راستیێ
رۆژەکێ، پشتی مرنا دایکا کچەکا ١٤ سالی، ئەمینە دچیتە مالا وان دا تەرمێ وێ بشۆت. ئەو داخوازێ ژ هەمیان دکەت کو ژ ژوورێ بچنە دەرێ. لێ، کچا مری گومانێ ژێ دکەت و ب نهێنی ژ کونترکا دەرگەهی سەحدکەتێ. ئەو دببینیت کو ئەمینە کاغەزێن نڤیسی و تشتێن سەیر دئێخیتە دناڤ دەڤێ دایکا خۆ یا مری.
کچک ب ترساڤە ڤێ چەندێ بۆ بابێ خۆ دبێژیت، و ئەو ژی پولیسان ئاگەهدار دکەن. پشتی دەرئینانا تەرمی ژ قەبری، پولیس بەلگێن سێحر و جادویێ د لەشێ مری دا دبینن. پاشی، ئەو مالا ئەمینێ دپشکینن و ژوورەکا ڤەشارتی یا تژی ژ کەرەستێن سێحرکەریێ، وەکی هەستیێن سەران و تەلسما، دبینن.
تاکە وێنێ بەلافکری ئەمینەیێ
دوماهییا چیرۆکێ
ئاشکرا دبیت کو ئەمینە سێحرکەر بوویە و ب سالانە ڤی کاری دکەت. وێ ب ڤەشارتنا تەلسما د لەشێ مریان دا، نەخۆشی و ئاریشە بۆ خێزانێن وان چێدکرن، دا کو پاشی ئەو کەس بزڤرنە دەف وێ و ئەو ب پارە وان "چارەسەر بکەت".
پشتی دادگەهکرنێ، ئەمینە ب تاوانا سێحرکەریێ سزایێ سێدارەدانێ لسەر دهێتە سەپاندن و ل سالا ۲۰۱۱ ل بەرچاڤێ خەلکی سەرێ وێ دهێتە ژێکرن.
