تۆرەیێن وی كەسێ خەونێ تەعبیر دكەت
مەخسەد ب تەعبیرا خەونێ ئەوە كەسەكێ شارەزا گوهداریا خەونێ بكەت پاشی ژ نیشانێن ڤێ خەونێ یێن ئاشكەرا دەرباز ببتە لایێن وێ یێن ڤـەشـارتـی ، وهەمی لایان بێختە بەرئێك دا بشێت بگەهتە وان مەعنایان یێن ژ خەونێ دئێنە وەرگرتن .
وچونكی خەون هندەك جاران دبتە ئیشارەت بۆ هندەك تشتێن چێبووین یان دێ ژ نوی چێ بن یا سوننەت ئەوە خەون بۆ كەسەكێ ب كێر تەعبیردانێ دئێت بێتەگۆتن دا ئەو خـەونـێ بـۆ وی تـەعبیر بكەت ، ودڤێت ژ بیـر نەكەین كو تەعبیركرنا خەونێ كارەكە پێغەمبەر ومرۆڤێن زانا وچاك ژی پێ ڕابووینە ..
بــەلـێ هـنـدەك تۆرە هەنە دڤێت ل نك وی كەسی هەبن یێن ب تەعبیركرنا خەونێ ڕادبت ، ئەگەر نە دڤێت ئەو خۆ ژ ڤی كاری دویر بكەت دا تووشی گونەهێ وخەلەتیێ نەبت ، و ژ وان تۆرەیان :
ئێك : دڤێت ئەو مرۆڤەكێ زانا وتێگەهشتی بت : وشەرت نینە هەر كەسەكێ د دینی دا شارەزا بت بزانت خەونێ تەعبیر بكەت ، لەو یا فەرە مرۆڤـێ بڤێت تەعبیرا خەونا خۆ بزانت بۆ خۆ ل كەسەكێ زانا ب تەعبیردانێ بگەڕیێت وژێ بخوازت ئەو وێ خەونێ بۆ وی تەعبیر بكەت ..
و ژ لایەكێ دی ڤە ئەو كەسێ زانـیـن ل دۆر تەعبیرێ نەبت دڤێت خۆ ژ تەعبیردانێ بدەتە پاش ، وچێ نابت بۆ وی ئەو پال بدەتە سەر هندەك نیشانان و ژ نك خۆ خەونێ تەعبیر بكەت ، پسیار ژ ئیمام مالكی هاتەكرن : ئەرێ هەر كەسەك دشیت خەونێ تەعبیر بكەت ؟ وی گۆت : ما ئەو دێ یاریان ب پێغەمبەرینیێ كەت ؟
ومەخسـەدا ئـیـمـامـی ئـەوە خـەون پشكەكە ژ پێغەمبەرینیێ ـ وەكی د حەدیسێن دورست دا هاتی ـ وئەو كەسێ بێ زانین مایێ د تەعـبـیـرا خــەونــێ بـكــەت وەكی وییە یێ یاریان بۆ خۆ ب پێغەمبەرینیێ دكەت .. ڤێجا دڤێت وی های ژ خۆ هەبت .
دو : ئەو كەسێ زانا ب تەعبیرا خەونان دەمێ ژێ دئێتە خواستن خەونەكێ تەعبیر بكەت دڤێت بەرێ خۆ بدەتێ هندی مـەجـالـێ خێرێ هەبت دڤێت ئەو تەعبیرێ ب لایێ خێرێ ڤە ببەت ، وئەگەر چو مەجال نەبوو یان دڤێت ئەو خۆ بێ دەنگ بكەت ، یان ژی هندەك شیرەتێن خێرێ ل خودانێ بكەت وبەرێ وی بدەتە وێ ڕێكێ یا خێرا وی تێدا ، ومەعنا ڤێ ئەو نینە ئەو خەونێ خەلەت بۆ وی تەعبیر بكەت دا كەیفا وی بینت یان بۆ وی خـۆش بكەت ، ژ خۆ ئەگەر خودانێ خەونێ ( ئلحاح ) كر كو تەعبیرا خەونا خۆ بـزانـت هنگی دڤێت ئەو ڕاستیێ بۆ بێژت ئەگەر خۆ بۆ وی یا نەخۆش ژی بت .
سێ : مرۆڤێ ب تەعبیرا خەونێ ڕابت مەتەلا وی وەكی مەتەلا دختۆری وموفتیە دڤێت نهێنیێن وی كەسی ڤەشێرت یێ خەونا خۆ بۆ دبێژت ، چونكی خەون وەكی مە گۆتی دبت هندەك جاران نهێنیێن خودانێ خۆ ئاشكەرا بكەت ، ڤێجا ئەگەر شرۆڤەكەرێ خەونێ ب ڕێكا خەونا بۆ دئێتە گۆتن هندەك نهێنیێن خودانێ خەونێ زانین دڤێت ئەو وان نهێنیان ڤەشێرت .
چار : یا سوننەت ئەوە خەون پشتی نڤێژا سپێدێ بێتە تەعبـیـركرن ، ژ بەر وێ حەدیسێ یا ( جەریرێ كوڕێ حازمی ) ژ پێغەمبەری ـ سلاڤ لـێ بن ـ ڤەدگوهێزت دبێژت : (( دەمێ پێغەمبەری ـ سلاڤ لـێ بن ـ نڤێژا سپێدێ دكر ل مە دزڤڕی وپسیار دكر : كێ ژ هەوە خەونەك دیتیە .. )) ، وزانا دبێژن : ئەڤ دەمە چێتـرە دا ژ بەر نێزیكیا دەمی وێ خودان وێ ژ بیـر نەكەت وچویێ ژێ كێم یان زێدە نەكەت .
پێنج : چێ نابت بۆ وی یێ خەونێ تەعبیر دكەت چو ئەحكامێن شـەرعی ژ خەونێ بینتەدەر و ل سەر وی یێ خەون دیتی فەر بكەت ئەو وان ئەحكامان ب جـه بـیـنـت ، چـونكی ژبلی خەونێن پێغەمبەران چو حوكم ب خەونێن كەسێ واجب نابن ، یەعنی ـ بۆ نـمـوونـە ـ : ئەگەر كەسەكی د خەونا خۆ دا دیت تشتەكی یێ دكەتە خێر ، چێ نابت ئەم بێژینێ : لازمە تو وی تشتی بكەیە خێر .. یان ئەگەر وی كەسەك دیت ـ ئەگەر خۆ ئەو كەس پێغەمبەر ژی بت ـ بێژتێ : فلان تشت بۆ تە حەلالە ، وئەو ب خۆ ئەو تشت د شریعەتی دا یێ حەرام بت ، چێ نابت ئەو وی تشتی بۆ خۆ حەلال بكەت ، چونكی ئەو حوكمێ پێغەمبەری ـ سلاڤ لـێ بن ـ ب هشیاری دای ب پێش وی حوكمی دكەڤت یێ د خەونێ دا ئێكی ژێ دیتی .
نـموونـەیــەكـا دی : ئــەگـەر تشتەك بێتە دزین ، وكەسەك د خەونا خۆ دا ببینت ( فلان ) كەسی ئەو دزی یا كری ، چێ نابــت حـوكمێ دزیێ د دەر حەقا وی كەسی دا بێتە ب كارئینان ژ لایێ حاكمی ڤە ، ئەگەر چو دەلیلێن ماددی ل سەر دزیا وی نەبن ..
مەعنا : چو حوكمێن شەرعی ب خەونێ بنەجـه نابن .
