چهند بهرپهڕهكێن گهش
ژ دیرۆكا هندهك تۆبهداران
بهرى نوكه مه گۆتبوو: خواندن وگوهدارییا سهرهاتیێن مهزنه تۆبهدارێن ڤێ ئوممهتێ ژ زانا وزاهد وسهركردهیێن مهزن مفایهكێ مهزن ددهته مرۆڤى كو خۆڕاگرتى بمینت ل سهر ڕێكا تۆبێ، چونكى ژ ئاستهنگێن (نهفسى) یێن مهزن یێن دكهڤنه د ڕێكا مرۆڤى دا دهمێ ئهو قهستا خودێ دكهت ئهڤهیه ئهو د گهل خۆ دبێژت: ئهرێ پشتى ڤان ههمى گونههان وپشتى بۆرینا سالێن درێژ د بێ ئهمرییا خودێ دا ما دێ ب چ ڕوى قهستا خودێ كهم؟ ئاخرى چو نهمایه من نهكرى چاوا دێ خودێ ل من بۆرت؟ تو بێژى دهلیڤه بۆ من مابت ئهز ببمه مرۆڤهكێ دى؟
ئهڤ پسیاره هندهك جاران دبنه ڕێگر د ڕێكا مرۆڤى وتۆبێ دا، وحهتا مرۆڤ بزانت كو چهند چووبت ژى دهلیڤه یا ماى، وته چهند كربت رهحما خودێ مهزنتـره، ئهم دێ سهرهاتییا هندهك كهسان ب كورتى ڤهگێڕین، دهمـێ نـوكـه مـه ناڤێن وان گوه لـێ دبت ئێك ژ مه باوهر ناكهت ڕۆژهك د سهر خودانێن ڤان ناڤان دا هاتبوو ئهو ژ دویرى خودێ دژیان، یان گونهه كارێ وان بوو.. ئهڤ چیایێن علمى وزوهدێ وتهقوایێ ل دهمهكى ژ دهسپێكا عهمرێ خۆ قهست ڕێكا شهیتانى كربوو، هندهك ژ وان مهزنتـرین دز وجهرده بوون ل وهلاتێ خۆ، هندهك ژ وان چو عهرهق ڤهخۆران دهستێ وان نهدگرت، هندهكان كارێ وان خرابى وزولم وتهعدایى بوو.. پاشى خودێ خێرا وان ڤیا، وهسا چێكر نهفسا وان روهن كر، وچاڤێن وان ل حهقییێ ڤهكرن، ههر ئێكى ئهگهرهك د پشت گوهۆڕینا وى ڕا ههبوو، بهلـێ تشتێ ئهو ههمى گههاندینه ئێك ئهو بوو وان شیا ب ساناهى پشت بدهنه بۆرییێ خۆ یێ زێده تارى وئهو بهر ب پاشهڕۆژهكا زێده گهش ڤهچوون، نه بهس هنده بهلكى ئهو وهكى وێ نهدیرێ لـێ هاتن یا ژ دویر ڤه گهش دكهت، وبهرێ خهلكى ددهته ڕۆناهییێ، ڕۆناهییا خودێ!
ڤێجا كهرهم كهن ئهو وهوین وهندهك ژ ڤان نهدیرێن ڕێكێ.
