پێشگوتن
هەر كەسەكێ ب دورستی د ئیسلامێ گـەهشت بت دێ زانت كو ئێك ژ بەرچاڤـتـرین سالۆخەتێن ئیسلامێ (( شـمولییەتە )) ، ومەخسەد ب ڤی سالۆخەتی ئەوە ئیسلام دینەكە عەقلی ودلی ولەشی ڤەدگرت ، ولایێ عیبادی وسیاسی وئابـۆری وجـڤـاكـی ونەفسی وهەر لایەكی دی یێ هەبت د ژینا مرۆڤی دا ڕێك وپێك دكەت ، وڕۆژا خودێ پێغەمبەرێ خۆ موحەممەد ـ سـلاڤ لـێ بن ـ ب ئیسلامێ هنارتی بۆ هندێ نەبوو دا ئەو پەیوەندیێ د ناڤبەرا خودێ ومرۆڤان دا دورست بكەت ، و ژ وێرێ وێـڤـە مـرۆڤـان سـەربـەردای بهێلت دا ئـەو د مـەجـالـێ دورستكرنا پەیوەندیێن د ناڤبەرا ئێك ودو دا ب كەیفا خۆ بكەڤن ، ووێ بكەن یا وان دڤێت ! نەخێر .. خودێ بۆ مە رازی بوو ئیسلام ببتە ئەو دین یێ سەروبەرێ ژینا مە هەمیێ ڕێك دئێخت ، وئەو ڕێباز یا دنیایێ وئاخــرەتــێ ڤــەدگـرت ، وئەو مەنهەج یێ هەڤسەنگیێ د ئێختە د ناڤبەرا لایێ رووحی ولایێ ماددی یێ مرۆڤی دا .
و ژ ڕویێن شـمـولییەتێ د ئیسلامێ دا ئەڤەیە شەریعەتێ ئیسلامێ تشتەكێ پەیوەندی ب ژینا مرۆڤی ڤە هەی نەهێلایە ئەگەر حـوكـمـێ خۆ تێدا دیار نەكربت ، بۆ هندێ دا مرۆڤێ موسلمان ل سەرێن ڕێكان حێبەتی نەمینت ، وهەما بەسە بێژین : خۆ د دەر حەقا وان تشتان دا یێن مرۆڤ پشتی نڤستنێ دبینت ژی یێن ئەم دبێژینێ : ( خەون ) ئیسلامێ گۆتنا خۆ دایە ، وشەریعەتەكێ خودان هندەك تۆرە و ( ضهوابط ) بۆ موسلمانی دانایە دا ئەو نـەكـەفـتـە داڤێن هزرێن تێكەل وهەوایێ نەفسێ ووەسواسێن شەیتانی .
وڤان خەونێن هە یێن مرۆڤ دبینت د كەڤن دا سەرەنجا مرۆڤی ڕاكێشایە وئەو پالدایە كو هزرەكا كویر د ڕاستیا وان دا بكەت ، و ب وێ كارتێكرنێ ڤە بێتەگرێدان یا خەونا ئەو د خەوێ دا دبینت د ژینا وی یا هشیاریێ دا دكەت ، چ كارتێكرنەكا سلبی بت یان یا ئیجابی بت ، ودڤێت ژبیـر نەكەین كو هندەك جاران مرۆڤی تێكەلیەكا وەسا د گەل ڤان خەونان هەیە ژ بەر وێ خەونێ پشتی ئەو هشیار دبت شریعەت هندەك حوكمێن تایبەت ل سەر وی واجب دكەت !
وهەر ئەڤ خەونە هندەك جاران خەم وكەسەران ل خودانی ڤەدجەمینت حەتا وی نساخ دكەت ، وهندەك جاران وەسا وی دلـخـۆش دكەت ئەگەر ئەو دلـخـۆشی ب بهایەكێ مەزن هاتبا فرۆتن ئەو دا كڕت ..
خەون هندەك جاران دبنە مزگینیەكا خۆش یا پەردەیێ پاشەڕۆژێ ل بەر خودانی هلددەت ، ودبتە پشكەك ژ وێ كەرامەتێ یا خودێ ددەتە هندەك مرۆڤان ، وهندەك جاران ژی دبتە هشیاركرنەكا ب ترس بۆ وان كەسێن هشیاریێ ئەو غافل كرین دا ل خۆ بزڤڕن ..
وكا چاوا خـەون هــنـدەك جاران هندەك بەرپەڕێن ڤەشارتـی ژ دەمێ بۆری ل بەر مرۆڤی ڤەدكەت ، هندەك جاران ئەو ڕویدانێن دەمێ نەهاتی ژی ل بەر چاڤێن وی ددانت .
وپێتڤی ناكەت ئەم دەلیلان ل سەر ڤێ گۆتنا خۆ بینین ، چونكی بـارا پـتـر ژ مە ڕاستیا وێ ب چاڤێ سەرێ خۆ دیتیە ، ودبت ئــەڤ چـەنـدە ئەو ئەگەر بت یا مرۆڤ ب ڕەنگەكێ بەرچاڤ ب خـەونێ وجیهانا خەونان ڤە گرێدای ، وحەزا شرۆڤەكرنا خەونێ د دلـێ گەلەك ژ وان دا پەیدا كربت ، وئەو پالدا بن كو ل دویڤ ڤێ چەندێ بگەڕیێن .
وپێخەمەت هندێ كو ئەم بزانین كانێ چ تشتێ دورست د دەر حەقا خەونان وتەعبیرا وان د كیتابا خودێ وسوننەتا پـێـغـەمبەری دا ـ سلاڤ لـێ بن ـ هاتیە ، وحەتا ئەڤ ڕاستیە ژ وێ ( خورافە وشەعوەژێ ) بێتە جوداكرن یا ل دۆر خەونێ وفقها وێ د سەرێ هندەك كەسان دا هاتیە چاندن مە ڤیا ڤێ نڤیسینا تایبەت دەربارەی جیهانا خەونان بەرهەڤ بكەین ، و ب كوردیەكا رەهوان ل بەر دەست بدانین ، هیڤیا مە ئەوە مفا ژێ بێتە دیـتـن .
وهەژیە بێژین بۆ بەرهەڤكرنا ڤی بابەتی مە مفا ژ هژمارەكا كتێبێن تەفسیرێ وحەدیسان وەرگرتیە ژبلی چەند كتێبەكێن تایبەت یێن كو ل دۆر خەونێ وتەعبیرا وان ژ لایێ زانایێن ئیسلامێ یێن كەڤن و یێن نوی ڤە هاتینە دانان .
