نهێنیا مهزن
مانا وى ل عهمووریێ پتر ژ سێ سالان ڤهكێشا، د ڤان سێ سالان دا ئهو شیا ب وى پارهیێ كێم یێ ژ شڤانیێ دگههشتێ، هژمارهكا تهرش وحهیوانهتان بۆ خـۆ بـكــڕت، و ژ داهـاتـیـێ وان ژینهكا سهرفهراز ببۆرینت.. و ل وى دهمێ ئهو ب ڕۆژا خۆ یا ئهڤرۆ ڤه یێ موژیل وى هزر د سوباهیا خۆ دا نهدكر، ههر وهكى وى هزر دكر ههما ژینا وى هۆسا وهكى وى دڤێت دێ چته سهرى، حهتا ئهو ڕۆژ ب سهر دا هاتى یا (موفاجهئهكا ب خهم) تێدا بۆ وى چێبووى.. ل ئێڤاریا وێ ڕۆژێ دهمێ ئهو بهر ب كهنیسێ ڤه دچوو؛ دا وهكى ههر جار ل خزمهتا ئوسقوفێ تهقوادار ئاماده ببت، وى ئهو ل جهێ وى یێ ههر جار نهدیت، وگاڤا زانى كو ئهویێ نهخۆشه، دیمهنێ ههر سێ سهیدایێن وى یێن پێشیێ هاته بهرچاڤان، وڕهشهكا مرنێ ئهوا نێزیك بوو ژ بیرا وى بچت جارهكا دى ب ههمى كرێتیا خۆ ڤه هاته بهرچاڤان..
- ئهرێ تو بێژى ئهو ژى بچت، و ل نیڤا ڕێكێ من بهێلته ب تنێ؟ ڤێ جارێ ئهز دێ قهستا كێ كهم، وبهرێ من دێ كهفته كیژ ڕێكێ؟
وگاڤا ئهو ب ژۆر كهفتى وسهیدایێ خۆ درێژكرى دیتى ل سهر تهختهكێ كهڤنێ بێ سهروبهر، ما ودهمهكى د مهزهلێ فوكرى.. بێ دهنگیێ، ڤالاتیا مهزهلێ، ئهو ناڤمالیا (موتهواضع) ئهوا لێ ههى، ههر تشتهكێ بهرێ وى ڤێ كهفتى، بیرا وى ل هێلانێ ئیناڤه، تهزینكهكا ب ترس ب سهر لهشێ وى دا هات، بهرێ خۆ دا دێم وسهروچاڤێن پیرهمێرێ رازاى هیچ گومانهك ل نك وى نهما كو دیسا ئهو ڕوى ب ڕوى بهرانبهر دیاردا مرنێ یێ ڕاوهستایه، (مرن) ئهوا تام بۆ كهسێ د چو خۆشیان دا نههێلاى!
هێدى ئهو ب نك تهختێ سهیدایێ خۆ ڤه چوو.. ئهڤه جارا چارێیه ئهو شعوورێ ب نهخۆشیا ئێتیمیێ دكهت، ههست دكهت كو ژیان بهرانبهر گرانیا مرنێ یــا ژ هـهمـى ڕامـانــێــن خــۆ ڤالا دبت، چ بكهت؟ ڤێ جارێ چاوا ئهو پێشوازیێ ل موصیبهتا خۆ بكهت، ههر تشتهكێ مرۆڤ گهلهك ببینت ل بهر مرۆڤى بێ تام دبت، مرن تێ نهبت، هندى جارا وێڤهتره تاما وێ نهخۆشتره..
- سهیدایێ من! تو دزانى ئهڤه سێ ساله ژ كوڕهكى بۆ بابێ پتر ئهز یێ نێزیكى تهمه، چهرخا ئێغبالێ ئهز ژ دیمهشقێ هاڤێتمه مویسلێ، پاشى ژ وێڕێ ئهز هاڤێتمه نصێبینێ، و ژ نصێبینێ ئهز هاتمه نك ته، ل بهر دهستێ ههوه ههر چار ئوسقوفان هیڤى هێدى هێدى د دلێ من دا هاته چاندن، وهكى وى مرۆڤێ بهرزه ل دهشتهكا بهرفرههـ یا بێ ڕێنیشان ههوه دهستێ من گرت وبهرێ من دا وێ ڕێكێ یا من بلند بهر ب عهسمانى ڤه دبهت، ئهگهر هوین نهبانه ئهز ژى وهكى وان ههمى مرۆڤێن ل دۆر وڕهخێن مه دژین دا ژیم بێ ئارمانج، ههڤالێن ته ههر ئێكى پشتى مرنا خۆ ئهز دهنارتمه نك یێ دى، حهتا ئهز هاتیمه نك ته، وههر وهكى ئهڤه تو ژى یێ كارێ خۆ دكهى دا بگههیه وان ل جیهانا رحێ، ڤێجا تو بهرێ من دێ دهیه كێ؟ وئهز پشتى ته كیڤه بچم؟
گرانیا مرنێ بۆ دهمهكى ئهزمانێ ئوسقوفى گرێداى، هندى هاتێ نهشیا گۆتنا خۆ بگههینته شاگردهیێ خۆ یێ دلسۆز، ئهوێ ترسیاى مرن دهلیڤهیێ نهدهته سهیدایێ وى بهندكهكێ دى یێ وى ب عهسمانى ڤه گرێدهت بۆ دهسنیشان بكهت، (تهوهسسولهكا مهزن) د چاڤێن وى دا ههبوو كو مرن هند دهلیڤهیێ بدهته سهیدایێ وى كو بشێت مرادا وى حاسل بكهت، چهند دهردهكێ گرانه دهمێ مرن دبته ئهو ئاستهنگ یا دكهفته د ناڤبهرا مرۆڤى وهیڤیێ دا..
دویماهیێ سهیدا شیا لێڤێن خۆ ب گرانى ڤه ژ سهرێك ڕاكهت، بێى بهرێ خۆ ژ گاریتهى وهرگێڕت وبهرێ خۆ بدهته شاگردهیێ خۆ ئهوێ مهوقفى مهندههووش هێلاى، گۆت:
- كوڕێ من! ب خودێ هندى ئهزێ دئێمێ كو ناڤهكى بینمه بیرا خۆ ل سهر ڤێ ڕێكێ بت یا ئهم ل سهر وبهرێ ته بدهمێ، چو ناڤ نائێنه بیرا من.. ئهز كهسێ نانیاسم ل سهر ڕێكا ڕاست مابت.. بهلێ ئهز دێ تشتهكى بۆ ته بێژم بهلكى تو مفایى بۆ خۆ ژێ ببینى، دهم یێ نێزیك بووى پێغهمبهرهك ب دینێ ئیبراهیمى بێت، ئهگهر تو بشێى خۆ ڤێڕا بگههینى وه بكه..
- پێغهمبهرهك؟ ب دینێ ئیبراهیمى؟ چاوا و ل كیڤه؟ وچاوا ئهز دێ شێم وى نیاسم؟
ب شهوق ڤه وى ئهڤ پسیاره ژ ئوسقوفى كرن.. دا بێژى ئوسقوف ب تهعدایى یێ پهیڤان ژ دلێ خۆ دكێشته دهر، وگاڤا وى دیتى ئوسقوف بێ دهنگ بوو، دلێ وى نێزیك بوو ژ ترسان دا ژ جهێ خۆ بێتهدهر، وى هزركر ئوسقوف تمام بوو بهرى ڤێ سررا مهزن بگههینتێ..
- كوڕێ من! ئشعیایێ پێغهمبهر د مزگینیا خۆ دا ئاشكهرا دكهت كو وهحیا دویماهیێ ژ لایێ وهلاتێ عهرهبان ڤه دێ ئێت..
- وهلاتێ عهرهبان، ل كیڤه؟ وچاوا ئهز دێ ب سهر هلبم؟
- ئهو پێغهمبهر دهمێ دئێت مرۆڤێن وى دێ وى ژ جهێ خۆ دهرێخن، لهو دێ نهچار بت مشهخت بته جههكى دكهفته د ناڤبهرا دو عهردێن ڕهش دا، تژى ناڤبهرا وان دارقهسپن، وئهگهر ته بڤێت وى بنیاسى ئهو ژ خێر وصهدهقاتان ناخوت، بهلێ دیاریان وهردگرت، ب ناڤ ملێن وى ڤه نیشانا پێغهمبهراتیێ ههیه، و..
و.. ل ڤێرێ ئوسقوفى بۆ جارا دویماهیێ چاڤێن خۆ دانانه سهرێك، وقهستا وهغهرا خۆ یا دویماهیێ كر، پشتى شاگردێ خۆ هێلایه د ناڤ پێلهكا دژوار دا یا خهم وخیال، وهزر وبیران دا.
