بهر ب صهحرایا عهرهبان ڤه
سێ ههیڤان پشتى مرنا سهیدایێ خۆ ئهو ما ل عهمووریێ، بهلێ بێى ئهو تامهكێ ژ مانا خۆ ببینت، وهكى وێ شتلێ یا تو ژ جهێ وێ بینیه دهرێ وببهى بدانیه جههكێ دى یێ غهریب.. گوهێ وى ل سهر بوو كانێ كهنگى كاروانهك دێ بهر ب وهلاتێ عهرهبان ڤه دا خۆ بدهته د گهل، ووى گهلهك كهس ل دهور وبهرێن خۆ ئاگههدار كربوون كو ههر جارهكا ئهو پێ حهسیان هندهك دێ بهر ب صهحرائا عهرهبان ڤه چن ئهو ئاگههداریا وى بكهن.
وپشتى سێ ههیڤان مزگینى بۆ وى هاتهدان كو هژمارهكا بازرگانێن عهرهبان یێن هاتینه باژێڕێ عهمووریێ، ههر زوى وى خۆ گههانده وان، و ب وێ پیچكا عهرهبیێ یا ئهو ل شامێ فێربوویێ ئهو شیا داخوازا خۆ بگههینته وان، گۆت:
- ئهز مرۆڤهكێ ب تنێمه، من دڤێت قهستا وهلاتێ ههوه بكهم، ئهگهر هوین من د گهل خۆ ببهن ههچى مالێ من ههى ئهز دێ پێشكێشى ههوه كهم..
وان گۆتێ: ئهم هندهك بازرگانێن ئویجاخا (بهنى كهلبین) چهند ڕۆژهكان ئهم دێ مینینه ل ڤى باژێڕى وپشتى بازرگانیا مه ب دویماهى دئێت ئهم دێ ڤهگهڕیێینه وهلاتێ خۆ، هنگى خۆ نیشا مه بده دێ ته د گهل خۆ بهین.
د وان ڕۆژێن كێم دا وى كاروبارێن خۆ ل عهمووریێ ب دویماهى ئینان، وڕۆژا ژڤانێ كاروانى هاتى ئهو یێ بهرههڤ بوو خۆ بدهته د گهل وان، پشتى تهرش وحهیوانێن خۆ فرۆتین، وپارێ وان دایه شێخێ كاروانى، ژبلى مالهكێ كێم یێ وى بۆ پێتڤیێن خۆ یێن فهر هێلاى.. وكاروانى دا ڕێ، ژۆردا ب لایێ شامێ ڤه چوو خارێ، بهر ب ڕێكهكا دویماهیا وێ یا نهدیار ڤه!
د ڤێ وهغهرێ دا یا گهلهك ڕۆژان ڤهكێشاى، زهلامێ فارسى فێرى عهرهبیهكا باش بوو ژ ههڤالێن خۆ یێن كهلبى، و ژ نێزیك ڤه ب سهر عورف وعهدهت وبیر وباوهرێن وان هلبوو، گهلهك تشت ل نك وان ههبوون كهیفا وى پێ هات، وهكى زیـرهكـیـێ وگـیـانـێ ئازادیێ یێ صهحرائا وان ل نك وان پهیدا كرى، بهلێ تشتێ ژ ههمیێ پتر دلێ وى دئێشاند ئهو نهزانینا مهزن بوو یا وان ب خودێ ودینێ دورسـت هـهى، وچـهنـد سـههـمـێ سهرێ وى دگرت دهمێ وى ددیت ههر زهلامهكى ژ كاروانیان صهنهمهك ژ دارى یان بهرى ب دهستێن خۆ یێ چێكرى ودبێژت: ئهڤه خودایێ منه، وگاڤا صهنهمێ وى بهرزه بوو یان شكهست ئهو دێ ڕابت صهنهمهكێ دى ژ خورمێ چێ كهت، وچى گاڤا برسى بوو ئهو دێ وى دهته بهر لهقان!!
وچهند كاروانێ وان پتر نێزیكى صهحرائێ دبوو وى ههست ب دلفرههیهكا مهزنتر دكر، گهلهك جاران ئهو ل دۆر وڕهخێن خۆ دزڤڕێ، و ب شهوقهكا مهزن ڤه د وان جهان دفوكرى یێن كهڤنه بهر چاڤێن وى، تو دا بێژى ئهو یێ ل هیڤیا خۆشتڤیهكێ خۆ یێ زێده عهزیز كو نێزیكه ل بهر چاڤان دیار ببت.. هیڤیا وى ئهو بوو جههكێ تژى دارقهسپ یێ كو دكهفته د ناڤبهرا دو لاتێن ڕهش دا ب بهر چاڤێن وى بكهڤت، دا ئهو بێژته ههڤالێن خۆ یێن (كهلبى): ڕاوهستن، ئهز گههشتمه وى جهى یێ من دڤێت، ئهز دێ مینمه ل ڤێرێ!! بهلێ ل ڤێ صهحرائا بـهرفـرههـ وهكـى بــهحــرهكا بـێ بـن، چاڤ ژ دیتنێ كهسیره دبن، و ب وهستیان ڤه ل خودانى دزڤڕن.
وڕۆژ ئهوا زهراتیا مرنێ ب لێڤان دا هاتیه خوارێ، هێدى هێدى خۆ دادهێلا سهر وان گركێن خیزى ئهوێن ل ڕۆژئاڤایێ دیار دكرن، دهمێ وى گوهـ لێ بووى ئهو زهلامێ سهرێ حێشترێ دهاژۆت، وستران دگۆتن، ژ نشكهكێ ڤه ڕاوهستیا.. ل ههڤالێن خۆ زڤڕى و ب دهنگهكێ بلند ڤه گۆت: ئهڤه ئهم گههشتینه (وادى لقورا) وێ هه ژ دویر ڤه یێ ئاشكهرا دكهت.
وههر چهنده وى نهدزانى كانێ (وادى لقورا) چیه ژى، بهلێ گاڤا وى دیتى كهیفا كاروانیێن ههڤالێن وى هات، كهیفهكا زێده بۆ وى ژى چێبوو، چونكى وى ب نیشانان تێ ئینادهر كو دیاره ئهو ژ قویناغێ نێزیك بوون.. وپیچ پیچه ڕۆژێ خۆ ژ بهر چاڤێن وان غهواره كر؛ دا ڕێكێ بۆ ههیڤا چارده شهڤى ڤهكهت دا كو بێت وتیشكێن خۆ یێن زهر وزهلال ب سهر وى خیزى دا بهردهت ئهوێ هندى چاڤ قهتره دكهت یێ بهرفرههـ.. نزا بۆچى ڤى دیمهنى بیرا وى ل دهشتا (زهندهرووزى) ئیناڤه دهمێ ل شهڤێن تاڤه ههیڤ دهشتا ئهصفهانێ یا بهرفرههـ دبڕى، و ل ههردو لایێن وى گوند وڕهز وبیستان دبهلاڤن، دهلیڤهیهكێ چاڤێن خۆ دانانه سهرێك ههر وهكى دڤیا بۆ دهمهكێ پتر وى دیمهنێ شرین بهێلته ل بهر چاڤێن خۆ.. وبهرى ئهو ژ ڤان هزرێن خۆ یێن نازك بزڤڕته ڤه، ئهو ل وێ ڕاستیا تهعل هشیار بوو یا چو جاران وى (تهوهقوع) نه دكر.
