ڕێنیشانێن ڕێـكێ..
وپشتى تو بـیـرا خۆ ل هندێ دئینیهڤه كو ڕێكهكا دویر ودرێژ یا ل بهرا ته، و ل ڤى وارى تو یێ بنهجـهــ نابى، وته بیـرا خۆ ل هندێ ژى ئینایهڤه كو مرۆڤێ عهقلدار نه ئهوه یێ راحهتا بهردهوام ددهته ب خۆشییهكا بهروهخت، وپشتى تو نهفسا خۆ ب بیرئینانا (مهصیرێ) وێ ئهدهب ددهى.. هندهك ڕێـنـیـشـانـێـن ڕێـكـێ ههنه دڤێت تو یێ پێ زانا بى دا دهمێ تو ددهیه ڕێ ب سلامهتى بگههییه ئارمانجێ، وهكى وى كهسى یێ تورمبێلا خۆ ل ڕێكهكا چیایى دهاژۆت، دڤێت خۆ ل وان ڕێنیشانان هشیار بكهت ئهوێن ل سهر ڕهخ وڕوییێن ڕێكێ هاتینه دانان دا ل چو كهڤران نهدهت ونهچته د چو نهالان ژى دا.
تو ل ڤێ دنیایێ ڕێـڤنگى.. نهفس وعهقل ههردو ته دهاژۆن، هندى نهفسه بهرێ ته ددهته وى تشتى یێ بۆ ته خۆش بلا خرابییا ته تێدا ههبت ژى، وعهقل بهرێ ته ددهته وى تشتى یێ باشییا ته تێدا ههبت بلا ل بهر ته یێ نهخۆش بت ژى، لهو گهلهك جاران تو وهكى وى مرۆڤى لـێ دئێى ئهوێ بهرێ وى دكهفته دوڕیانهكێ وحێبهتى ڕادوهستت كانێ چهپ بچت یان ڕاست، ڤێجا هێشتا نهفسێ تو ب لایێ خۆ ڤه نهكێشاى تو ل ڕێنیشانان بزڤڕه.
وڕێنیشانا ئێكێ ئهوه یا دبێژت: ڕێكێ نهده نهفسێ گهلهك باخڤت..
نهفس وهكى وى مرۆڤێ پڕبێژه یێ چو جاران ژ ئاخفتنێ تێر نهبت، وئهگهر قاعیده ئهوه بت ههر كهسهكێ گهلهك باخڤت دێ گهلهك خهلهت بت، ڕێكێ نهده نهفسێ چى تشتێ بڤێت بێژت، هندهك جاران لغاڤ كه، گاڤا دلـێ ته چو ئاخفتنهكێ بهرى تو وێ ئاخفتنێ بێژى هزرا خۆ تێدا بكه، ئهرێ ڤێ ئاخفتنێ خێرهك تێدا ههیه یان نه؟ ئهرێ گۆتنا ڤێ ئاخفتنێ چێتـره یان نهگۆتنا وێ؟ وباش بزانه هندى تو یێ بێ دهنگ بى دێ یێ ب سلامهت بى، وگاڤا تو ئاخفتى ئهو ئاخفتن دێ ل سهر ته ئێته حسێبكرن، وپسیارا وێ دێ ژ ته ئێتهكرن، یا باش بت یا خراب، ڤێجا بارێ خۆ گران نهكه، وڕاوهستیانا خۆ ل مهحشهرێ درێژه نهكه.. كێم باخڤه.
ڕێنیشانا دووێ: بێدهنگییا خۆ ب هزركرنێ پڕ بكه..
ئهو هزركرنا بهرێ ته بدهته هلسهنگاندنا بۆرییێ ته، وته بۆ داهاتییێ ته بهرههڤ بكهت.. وئاشكهرایه كو ههر جارهكا بێدهنگییا مرۆڤى ژ ئاخفتنا وى پتـر لـێ هات، ئهڤ بێدهنگییه دێ ئێكا هند ژ وى چێ كهت ئهو بزانت كانێ چهند خهلهتى وتهحسین د وێ ئاخفتنێ دا ههبوو یا وى بهرى هنگى كرى، وههر جارهكا مرۆڤى د گهل خۆ ههست ب خهلهتییا خۆ كر، وئعتـراف پێ كر، مهعنا ئهو پێگاڤا ئێكێ بهر ب خۆڕاستكرنێ ڤه چوو.
پێگاڤا دووێ كو دبته ڕێنیشانا سییێ لۆمهكرنا ل نهفسێ یه سهرا كارێ وێ یێ خراب ئهوێ بهرى نوكه وێ ب مرۆڤى دایهكرن..
گهلهك جاران مرۆڤ هێجهتان پێش خهلهتى وخرابییێن خۆ ڤه دگرت، دا دلـێ خۆ پێ خۆش بكهت، وقهناعهتێ بۆ خۆ چێ بكهت كو د ڤان خهلهتییان ژى دا ئهو یێ حهقه! بهلـێ ئهگهر مرۆڤى زێده لۆمه ل نهفسا خۆ كر سهرا كارێ وێ یێ خراب، ههر دێ دهمهك ئێت ئهڤ نهفسه چوننه چوننه د گهل خۆ ئعتـرافێ بكهت ئهو غهفلهتا ئهو كهفتییه تێدا وبهرێ وى دایه گونههێ ههر چاوا بت نائێته (تهبریركرن) وچو هێجهت بۆ نائێنه گرتن، وگاڤا تو گههشتییه ڤێرێ د حسێبكرنا خۆ دا د گهل نهفسێ بیرا وێ ل وان تاوانان بینهڤه یێن وێ د گهل ته كرین، ووێ ب دویماهییا خرابا وان كاران ژى بتـرسینه یێن وێ د دهر حهقا خودایێ خۆ دا كرین، وهنگى ڕاوهسته حهتا ئهو ب دورستى ئـعـتـرافـهكا تـمـام ب ههمى خرابیێن خۆ بكهت، وهزرێ د هندێ دا بكهت كو ل خۆ بزڤڕت وتۆبه بكهت.
پشتى نهفسێ هزر د تۆبهكرنێ دا كر، دڤێت نهفس ل هندێ بێته ئاگههداركرن كو (گونههــ) ئهگهر خۆ یا دهمهكێ بۆرى ژى بت دبته ئهگهرا هندێ مرۆڤ یێ ئهمین نهبت ژ غهزهبا خودێ، ئهڤه ئهگهر گونهه یا بۆرى بت، پا دێ چاوا بت ئهگهر گونهه یا نوكه بت؟ یان دێ چاوا بت ئهگهر مرۆڤى دل تێ ههبت سوباهى ژى ل سهر وێ گونههێ یێ بهردهوام بت؟
ههر وهسا نهفس دڤێت ل هندێ بێته ئاگههداركرن كو (تۆبه) یا دورست نابت، وخودان نهشێت ب تمامى ل خودایێ خۆ بزڤڕت حهتا سێ شهرتان ب جـه نهئینت:
یێ ئێكێ: ئهو ئێكسهر گونهها خۆ بهێلت.
یێ دووێ: ئهو ژ گونهها خۆ یا بۆرى پهشێمان ببت، وحهز بكهت كو وى ئهو گونهه نهكربا.
یێ سییێ: ئهو بكهته دلـێ خۆ ئێدى ئهو ل وێ گونههێ نهزڤڕتهڤه..
ونائێته هزركرن مرۆڤهك ههبت تۆبه بكهت وپشت نهدهته وى كارى یێ غهزهبا خودێ پێڤه دئێت، یان بێژت: ئهز دێ ل خودایێ خۆ زڤڕم بێى كو وى كارى بهێلم یێ وى پێ خۆش نهبت!
ههر وهسا نائێته هـزركرن تـۆبا وى كهسى یا دورست بت ئهوێ تۆبا خۆ ب دهمهكێ دهسنیشانكرى ڤه گرێ بدهت، وهكى بێژت: یا رهببى من تۆبهیه ههیڤهكێ ب تنێ گوهدارییا ته بكهم، وئهگهر ئهو ههیڤ خلاس ئهزێ ب كهیفا خۆمه!!
