ئبن تهیمیه و داعش
ڕێخۆشكرن:
ئێك ژ وان تشتێن دینێ ئیسلامێ ژ دینێن عهسمانى یێن بهرى خۆ جودا دكهت ئهوه خودێ ب خۆ كهفالهتا پاراستنا ژێدهرێ سهرهكى یێ ئیسلامێ كو قورئانه (و سوننهت تمامكهره بۆ وێ) كرییه، و ئهو نههێلایه ب هیڤییا مه ڤه( ههر چهنده مهعنا ڤێ ئهو نینه ئهم كارى بۆ پاراستنا وێ نهكهین، و بێژین: مانێ ئهڤه تشتهكه نهمایه ب هیڤییا مهڤه)، دهمێ گۆتى: ( إِنَّا نَحۡنُ نَزَّلۡنَا ٱلذِّكۡرَ وَإِنَّا لَهُۥ لَحَٰفِظُونَ ) (الحجر: 9)، نه وهكى كیتابێن بهرێ ئهوێن پاراستنا وان خودێ هێلایه ب هیڤییا دویكهفتییێن وان ڤه ژ تێگههشتى و زانایان، وهكى گۆتى: ( إِنَّآ أَنزَلۡنَا ٱلتَّوۡرَىٰةَ فِيهَا هُدٗى وَنُورٞۚ يَحۡكُمُ بِهَا ٱلنَّبِيُّونَ ٱلَّذِينَ أَسۡلَمُواْ لِلَّذِينَ هَادُواْ وَٱلرَّبَّٰنِيُّونَ وَٱلۡأَحۡبَارُ بِمَا ٱسۡتُحۡفِظُواْ مِن كِتَٰبِ ٱللَّهِ )(المائدة: 44) و ئهڤه ئهگهرا سهرهكى بوو د پشت مانا قورئانێ ڕا پاراستى، ههر چهنده پیلانێن دوژمنان گهلهك جاران هند دمهزن بوون كو نێزیك بوو چیا ژ بهر بحهلیێن!
د گهل هندێ ژى پێغهمبهر -سلاڤ لێ بن- د حهدیسهكا خۆ یا دورست دا ئاشكهرا دكهت كو ئێك ژ گرنگترین ئامیرهتێن خودێ دینێ خۆ پێ دپارێزت، زانایێن دینینه، دهمێ دبێژت: ( يَرِثُ هَذَا الْعِلْمَ مِنْ كُلِّ خَلَفٍ عُدُولُهُ، يَنْفُونَ عَنْهُ: تَأْوِيلَ الجَاهِلِينَ، وَانْتِحَالَ المُبْطِلِينَ، وَتَحْرِيفَ الْغَالِينَ )(بهیههقى ژ ئیبراهمێ عوذرى ڤهدگوهێزت، بهرێ خۆ بده: (السنن الكبرى 10 / 353) بهلێ وهكى حهدیس ئاشكهرا دكهت نه ههر كهسهكێ كراسێ زانایان بكهته بهر خۆ، ههژى ڤێ شهرهفا مهزن دبت: شهرهفا پاراستنا ڤى دینى، بهلكى ب تنێ یێن عادل ژ وان ڤــێ چـهنــدێ دكــهن، هــهر وهسا حهدیس ئاشكهرا دكهت كو ئهڤ ڕهنگێ زانایان د ناڤ ههر جیلهكى دا دێ ههبن، و ئهو بهرانبهر سێ ڕهنگێن دوژمنان ڕادوهستن:
مرۆڤێن جاهل یێن ڕاستییا دینى نزانن ڤێجا دینى ب ڕهنگهكێ خهلهت تهئویل دكهن، و مرۆڤێن (موبطل) ئهوێن نهحهقییێ دخوازن ودڤێن حهقییێ ل بهر خهلكی بهرزه كـــهن، و ئــهڤـــه وهكــى یـێـن بــهرى خۆ د خشیم و نهزان نینن، لهوا چهكێ وان د نهیارهتییا دینى دا -وهكى حهدیس دبێژت- ئنتحاله، و ئنتحالا وان ئـهوه ئــهو ب ناڤێ دینی تشتان ل دینی زێده دكهن دا دینی ژ ناڤ دا خراب بكهن، و یێن سـێـیـێ مــرۆڤــێـن تونـدكارن ئهوێن (غولووێ) د دینى دا دكهن، یهعنى: زێده ب ناڤ دینی دا دچن، و دینێ خودێ یێ ب ساناهی ل بهر خهلكی ب زهحمهت دئـێـخــن، و چـهكێ ڤان د نهیارهتییا دینى دا (تهحریفه)، و بهلكى ئهڤ ڕهنگه ژ ههردویێن بهرى خۆ پیستر و خرابتر بن؛ چونكى چهكێ وان دژوارتره.. چاوا؟
ڕهنگێ ئێكێ دنهزانن، و نهزانین چهند خۆ ل بهر خهلكى بخهملینت ژى، زوى ئاشكهرا دبت، و گاڤا زانین و زانا هاتنه مهیدانێ نهزانین و نهزان وهكى بویكا بهفرێ ل بهر چاڤێن خهلكى دحهلیێن..
ڕهنگێ دویێ پشتهڤانێن نهحهقییێنه، و ئهو چهند خۆ ل پشت پهردهیێ حهقییێ ڤهشێرن ههر دێ ئاشكهرا بن، چونكى وهریسێ درهوێ یێ كورته، و درهوین فراڤینهكێ دخۆت..
بهلێ ڕهنگێ سێیێ ژ دین دوژمنان ددژوارن، ژ بهر كو یا ب ساناهى نینه ل بهر عامییان ئهو وان ل سهر ڕاستییا وان بنیاسن، بۆچى؟
چونكى ئهو د كراسێ دیندارییێ دا خۆ نیشا خهلكى ددهن، و نه ههما دیندارییهكا عهدهتى ژى بهلكى دیندارییهكا زێدهى عهدهتى، یا كو خهلكێ عامى حسێب دكهن (تهقوادارى) و (دیندارییا دورست)، و ل ڤێرێ دهورێ زانایان ب زهحمهت دكهڤت، بۆچى؟
چونكى لایێ بهرانبهر یێ (نهزان) نینه، و ڕوى ب ڕوى (دوژمنێ دینى) ژى نینه، بهلكى هند ل دینى یێ مجده حهتا زێده ب ناڤ ڤه دچت، و (غولووێ) تێدا دكهت، و هزر دكهت ههر ئێكێ وهكى وان نهبت دینێ وى یێ سسته.. و ل ڤێرێ كاغهز تێكهل دبن -وهكى دئێته گۆتن- و خهلكێ عامى ڕێكێ ل بهر خۆ بهرزه دكهن، و ل ڤێرێ دهورێ زانایێن عادل دئێت.
و ژ حــرصــا پـێـغـهمبهرێ خــودێ -سلاڤ لێ بن- ل سهر هندێ كو ڕێك ل بهر مه بهرزه نهبت، و ئهم ب (گۆتنا دهڤى) و (طوقووسێن شهكلى) د سهر دا نهچین، وى د گهلهك حهدیسێن خۆ دا تهركیز ل سهر هندێ كرییه، كو ئهو سهرداچوویێن وهكى تیرى ژ دینى دهردكهڤن، هندهك مرۆڤێن بێ دین و كێم عیبادهت نینن، و ئهو نـه هندهك مرۆڤێن نهزانن ب كیتاب و سوننهتێ، و بهلكى دوژمناتییا دینى د دلێن وان دا نهبت، چونكى ئهو هند نڤێژ و ڕۆژى و كــارێ چـاك دكهن كو یێ صهحابییان ل بهر یێ وان چو نهبت، و ئهو قورئانێ ژى گــهلــهك دخـوینن، بهلێ د گهل ڤێ ههمییێ كار و گۆتنێن وان د واقعى دا ل دینى دقولپن، و ب ڕهنگهكێ سهلبى لێ دزڤڕنن، و چ ئهو پێ بحهسیێن یان پێ نهحهسیێن ئهو دژوارترین دربى ل دینى ددهن: ( يَخْرُجُ فِيكُمْ قَوْمٌ تَحْقِرُونَ صَلاَتَكُمْ مَعَ صَلاَتِهِمْ، وَصِيَامَكُمْ مَعَ صِيَامِهِمْ، وَعَمَلَكُمْ مَعَ عَمَلِهِمْ، وَيَقْرَؤُونَ الْقُرْآنَ لاَ يُجَاوِزُ حَنَاجِرَهُمْ، يَمْرُقُونَ مِنَ الدِّينَ كَمَا يَمْرُقُ السَّهْمُ مِنَ الرَّمِيَّةِ )( بوخارى ژ ئهبوو سهعیدێ خودرى ڤهدگوهێزت، ل بن هژمارا (5058)).
و گـرفـتـاریـیـا وان یا مهزن ئهوه ئهو ب قورئانێ د سهر دا دچن.. بهلێ ب قورئانێ! و بهلكى ئهڤ گۆتنه ل بهر گهلهك كهسان یا غهریب بت، و بێژن: چاوا ئهو قورئانا هاتى دا ببته ڕێنیشاندهر هندهك پێ د سهر دا بچن؟
پێغهمبهر -سلاڤ لێ بن- د گۆتنهكا خۆ دا بهحسێ وى دوژمنى دكهت یێ ئهو ژێ دترست ل سهر مه و دبێژت: ( إن مَا أَتَخَوَّفُ عَلَيْكُمْ رَجُلٌ قَرَأَ الْقُرْآنَ، حَتَّى إِذَا رُئِيَتْ بَهْجَتُهُ عَلَيْهِ، وَكَانَ رِدْئًا لِلْإِسْلَامِ، غَيَّرَهُ إِلَى مَا شَاءَ الله، فَانْسَلَخَ مِنْهُ، وَنَبَذَهُ وَرَاءَ ظَهْرِهِ، وَسَعَى عَلَى جَارِهِ بِالسَّيْفِ، وَرَمَاهُ بِالشِّرْكِ ( قَالَ: قُلْتُ: يَا نَبِيَّ الله أيهمَا أَوْلَى بِالشِّرْكِ المَرْمِيُّ أَمِ الرَّامِي؟ قال: ( بَلِ الرامي)(ئبن حببان ژ حوذهیفهى ڤهدگوهێزت، (1/282) ) مهعنا: ئهو هند قورئانێ دخوینت حهتا كو گهشاتییا وێ ل سهر وى دئێته دیتن، و حهتا ئهو ل نك و د چاڤێن خهلكى ژى دا دبته پهرژان بۆ ئیسلامێ، بهلێ چونكى دیندارییا وى ل سـهر بناخهیهكێ موكم نههاتییهدانان، دهمهك ب سهر وى دا دئێت ئهو ئیسلامێ ژ بهر خۆ دكهت، و دهاڤێته پشت خۆ، و ئێكهمین و دژوارترین ئهنجامێ ڤێ لادانا وى ئهوه ئهو جیرانێ خۆ ب شركێ تاوانبار دكهت.. و بۆچى حهدیسێ گۆت: جیرانێ خۆ؟ چونكى ئهو نێزیكترین كهسه بۆ وى، یێ كو دڤێت ئهو وى باش بنیاست، و بزانت كو ئهو نه (موشركه)، بهلێ لادان و (ئنحرافا) وى ژ ڕێكا دورست ئهوه بهرێ وى ددهته ڤێ چهپدانا ب ترس و خراب..
