(ئستدلالا مونحهرف!)
و ئێك ژ بـهرچـاڤـتـریـن ڕویێن ئنحرافێ ل نك ڤان مرۆڤان، ب تایبهتى ل دهمێ مه یێ نوكه ئهوه حهتا ئهو (باطلێ خۆ) د هزرا خهلكى ڕا دهرباس بكهن، و چونكى ڕێبازا وان یا ئهصلى ئنحرافه، و ژ بهر دویركهفتنا دهستهكا مهزنترا ئوممهتێ ژ ژێدهرێن وان یێن دینى و توراثێ وان یێ علمى، ئهڤ مونحهرفه د ئهدهبییاتێن خۆ دا پالددهنه سهر (ئستدلالا مونحهرف) و مهخسهدا مه ب ئستدلالا مونحهرف ئهڤهیه: ئێك ژ وان دهمێ كارهكى دكهت، و حهتا ئهو خۆ و خهلكى ژى ب دورستییا ڤى كارى قانع بكهت، ئهو ڕادبت هندهك دهقێن شهرعى ژ قورئانێ و سوننهتێ، و ژ گۆتنا زانایێن موعتهبهر دئینت، بهلێ پشتى ئهو وهربادان و ئنحرافێ دئێختێ:
- ب ئینانا وان نه ل جهێ وان یێ دورست.
- یان ب وهربادانا مهعنایا وان.
- یان ژى ب كهزاختن و كێمكرن و بڕینا ئاخفتنێ ل دویڤ دلێ خۆ.
و ئهو ب ڤى كارێ خۆ یێ نه د ڕێ دا، زیانهكا دو لایى پهیدا دكهن، ئهگهر زانا بهرانبهر وان ب دهورێ خۆ یێ شهرعى ڕانهبن، ترسا وان ل سهر ئوممهتێ ب گشتى زێده دبت، و ئهو ههردو لا ژى ئهڤهنه:
1- بهرێخۆدانا خهلكى بۆ خودانێ ڤێ گۆتنێ یا ئهڤ مونحهرفه بۆ خۆ دكهنه دهلیل دئێته گوهاڕتن، ئهگهر خۆ خودێ و پێغهمبهرى ژى بن، و د ئهجام دا حوكمێ وان ژى ل ســهر وى دئــێـتـه گـــوهــاڕتــن، و بـاشترین دهلیل ل سهر ڤێ چهندێ ئهو بوو یا مه ل ڤێ دووماهییێ دیتى د ڕویدانا كۆما (القاعدة) و پشتى وان (داعش) دا پهیدابووى دهمێ وان پهنا برییه بهر (ئستدلالا مونحهرف) دا كرێتییێن خۆ پێ ل بهر خهلكى دورست بكهن، و مهسهله گههشته هندێ مه دیت گهلهك كهسان ب هێجهتا وان ئهزمان درێژى د دهر حهقا قورئانێ و سوننهتێ دا كرن.
2- ئهو كهسێ ب (ئستدلالا مونحهرف) ڕادبت، و خهلك ژى گهلهك جاران، هزر دكهن ئهڤ كهسێ دهلیلى دئینت، ههما ڤى كارێ هه یێ كرێت دكهت؛ چونكى ئهو دویكهفتنا خودانێ دهلیلى دكهت، یهعنى: هندهك جاران ئهو و گهلهك جاران خهلك هزر دكهن ئهگهر ڤێ ئایهتێ یان ڤێ حهدیسێ یان ڤى زانایى ئهڤ گۆتنه نهگۆتبا، ڤى مونحهرفێ هه ئهڤ كارێ هه یێ كرێت نهدكر.. ڤێجا مادهم هۆسایه مهعنا تاوانا دورست تاوانا ئایهت و حهدیس و وى زانایییه، ئهون ژێدهر و پالدهرێن ئهصلى یێن ئهڤ ئنحرافه پهیداكرى، ڤێجا یا دورست ئهوه ئهم بهرێ تڤهنگا كهربا خۆ بدهینه قورئان و سوننهت و زانایێن ئیسلامێ، نه كو ڤان كهسێن مونحهرف چونكى ههما ئهو هندهك ئامیرهتن بۆ ب جهئینانا وێ تیرۆرێ یا ئیسلام بهرێ خهلكى ددهتێ! و د ڕویدانا داعشێ دا مه ب ئاشكهرایى دیت گهلهك كهسێن حهتا ئهڤرۆ كهربا ئیسلامێ د هناڤێن خۆ دا ڤهدشارت، ب هێجهتا داعشێ ئاشكهرا كر، و گۆتن: ههما ئیسلاما دورست ئهوه یا داعش ب جهـ دئینت.
و ل ڤێرێ بهلكى پسیارهك بێتهكرن: بۆچى ههر دهمهكێ ئهڤ مونحهرفه د دیرۆكێ دا پهیدابووین، وان وهسا خۆ نیشا خهلكى دایه كو ئهو دویكهفتنا قــورئـانـێ و سوننهتێ و زانایێن موجتههدێن ئیسلامێ دكهن؟ و دهلیلێن خۆ (ب ئستدلالهكا مونحهرف وهكى مه گۆتى) ژ ڤان ههر سێ ژێدهران وهردگرن؟
د بهرسڤێ دا دێ بێژین: ههر كهسهكێ ئیسلام ب دورستى نیاسى بت، دێ زانت كو ئهو ل سهر دو بناخهیێن ڕهسهن یا ئاڤاكرییه، كیتاب و سوننهت، و ب تـنـێ زانـایـێـن موجتههد و موعتهبهر نوینهراتییا ئیسلامێ دكهن، و دشێن ب ناڤێ وێ باخڤن، نه مرۆڤێن سیاسى و نه ژى سهرۆكێن كۆم و پارت و دهســتــهكان، ژ بـــهر ڤــێ چــهنــدێ هــهر ئێكێ د دیرۆكێ دا ڤیا بت عامییان ب بۆچوونهكا خۆ قانع بكهت، یان ژى حهز كربت خهلكى وه تێ بگههینت كو ئــهو یـــێ دورســتــه، وى كــار بــۆ هندێ كرییه دهلیلهكى ژ ڤان ڕهنگه زانایان ب دهست خۆ بێخت، و چهند ئهڤ زانایه ل نك خهلكى پتر یێ مهقبوول بت، و گۆتنا وى پتر جهێ باوهرێ بت، ئهو دێ كارى بۆ هندێ كهت خۆ بگههینتێ ئهگهر ئهو یێ زێندى بت، یان ژى خۆ ب گههینته كتێب و فهتوایێن وى ئهگهر ئهو یێ مرى بت، دا ئهو پتر شهرعییهتێ بدهته بۆچوونا خۆ، و خهلكى ب لایێ خۆ ڤه بكێشت، وهكى مهسهلا پارتێن سیاسى و دهسنیشانكرنا بهربژێران بۆ هلبژارتنان!
و ئێك ژ مهزنترین زانایێن ئیسلامێ یێن ژ كهڤن دا ڤێ بگر و ڤهكێشێ ژێ گرتى ئبن تهیمیهیه، لهو مه دڤێت ل ڤێرێ وى وهك نموونه ل سهر ڤێ دیاردێ هلبژێرین، و بهحس ژێ بكهین، دا بزانین كانێ چاوایه دهمێ زانا دكهڤنه ناڤبهرا (كهربا كینداران) و (تهحریفا نهزانان).
