ڤێ دگهل خۆ بكه
1. مرۆڤهكێ خودێ ناس شیرهتهكێ ل ههڤالێن خۆ دكهت ودبێژتێ: وێ سهرهدهریێ د گهل نهفسا خۆ بكه یا تو د گهل دهوارا خۆ دكهى، ههر جارهكا ئهو ژ ڕێكێ دهركهفت تو شفكهكێ لێ ددهى دا ل ڕێكا خۆ بزڤڕتهڤه، ووێ سهرهدهریێ یا تو د گهل كراسێ خۆ دكهى، ههر جارهكا ئهو قڕێژى بوو تو وى دشۆى، وههر جارهكا ئهو دڕیا تو وى پنى دكهى.. نهفس وهكى دهوارهكا شهنبۆزه، ئهگهر ئهو ب تۆبێ نهئێته لغاڤكرن، دێ خــودانــێ خــۆ د كـهنـدالهكێ ب ترس دا هاڤێت، وئـهگــهر د نڤێژێ دا تو نهشیایه دلێ خۆ، و د ڕۆژیێ دا تو نهشیایه ئــهزمــانــێ خــۆ، و د قـهنـجـیـێ دا تو یێ شوكردار نهبووى، و د موصیبهتێ دا ته صهبرێ نهكێشا.. چ ناڤ دێ یێ ژ ههژى ته بت؟
2. ئهوێ بڤێت ل سهر تۆبا خۆ یێ بهردهوام بت، ووهكى داركۆكهى ل نكراندنێ نهزڤڕتهڤه، دڤێت دو پێگاڤێن گرنگ بهاڤێژت: یا ئێكێ: دڤێت ئهو ههر د نهفسا خۆ دا زێرهڤانهكى ل سهر خۆ بدانت، ههر شهڤ بهرى سهرێ خۆ بدانت ئهو زێرهڤان حسێبێ د گهل وى بكهت، وگاڤا دیت شههوهتهكێ ئهو یێ ژ ڕێكێ لاداى، یان قڕێژهكێ دلێ وى یێ گرتى، ههر زوى شفكا ئهدهبدانێ لێ ڕاكهت، ولیفك وصابوینێن خۆ بهرههڤ بكهت، بهرى قڕێژ ڤهگرت، وئێدى شویشتن چو فایدهى لێ نهكهت. یا دووێ: ههر زوى بۆ خۆ ل هندهك مرۆڤێن وهسا بگهڕیێت هێزا مانا ل سـهر تـۆبـێ بـدهنــه دلێ وى، ب وان ڤه بێته گرێدان، و د گـهل وان بـژیــت، ونهبـێـژه: ئهو ڕهنگێ مرۆڤان نهمایه ما ژ كـیـڤـه بـیــنــم! ئــهوێ داخـوازا خۆشتڤیهكى بكهت، ههر دێ ل جههكى ب سهر هل بت.. بهلێ ل ڤێرێ تشتهكێ گرنگێ ههى ژ بیرا خۆ نهبه..
3. كا چاوا دنیایێ زهلامێن خۆ ههنه یێ پشتا خۆ ب وان گهرم بكهت ئهو دێ تێرا وى ههبن، وهسا ئاخرهتێ ژى زهلامێن خۆ یێن ههین ههچیێ دلێ خۆ ب وان ڤه گرێ دهت ئهو دێ وى دهولهمهند كهن.. ڕاسته ئهڤه وهكى یێن دى وهندى یێن دى دمشه وبهرچاڤ نینن، بهلێ یێ پسیار بكهت بهرزه نابت، وههر ئێك ل دویڤ (هیممهتا) خۆ دڤێت خۆشتڤیهكى بۆ خۆ بگرت، د چیرۆكێن رهمزى دا دئێته گۆتن: جارهكێ مشكهكى حهز ژ حێشترهكێ كر، ههڤسارێ وێ گرت وبره مالا خۆ، گاڤا گههشتینه بهر دهرى، تهبیعى حێشتر نهشیا دهرباز ببت، ئینا ئێكى گۆتێ: یا خۆشتڤیهكێ ل دویڤ مالا خۆ بۆ خۆ بگره، یان مالهكا ل دویڤ خۆشتڤیێ خۆ بۆ خۆ ئاڤا كه!! وهیڤیا من ئهوه (پهیام) گههشت بت!
4. ههر جارهكا عیبادهت ل بهر ته یێ گران بوو، وته خۆشیا تاما طاعهتى د دلێ خۆ دا نهدیت، وگونههـ ل بهر ته یا سڤك بوو، وتاما وێ د دهڤێ ته دا یا خۆ بوو، بزانه تو د تۆبا خۆ دا یێ ڕاستگۆ نینى، چونكى ئاڤاهى یێ موكم نابت ئهگهر بـنـاخـه دسست بن، گاڤا پێغهمبهرى -سلاڤ لێ بن- ههست ب بێنتهنگیهكێ كربا، دگۆته بیلالى: قامهتا نڤێژێ بگره دا خهما خۆ ڤهڕهڤینین ودلێ خۆ رحهت كهین.. تو، بهرێ خۆ بده خۆ كانێ خهمێن ته ب چ ڤهدڕهڤن ودلێ ته ب چ رحهت دبت؟
5. بوخارى ژ عهبدللاهێ كوڕێ مهسعوودى ڤهدگوهێزت، دبێژت: پێغهمبهرى -سلاڤ لێ بن- گۆت: ( إِنَّ المُؤْمِنَ يَرَى ذُنُوبَهُ كَأَنَّهُ قَاعِدٌ تَحْتَ جَبَلٍ يَخَافُ أَنْ يَقَعَ عَلَيْهِ، وَإِنَّ الْفَاجِرَ يَرَى ذُنُوبَهُ كَذُبَابٍ مَرَّ عَلَى أَنْفِهِ فَقَالَ بِهِ هَكَذَا.. ) خودان باوهر دهمێ بهرێ خۆ ددهته گونههێن خــۆ هــزر دكــهت هــهر وهكى چیایهكێ ل هنداڤى وى نێزیكه ب سهر دا بێت، ومرۆڤێ فاجر گونههێن خۆ وهسا دبینت ههر وهكــى مێشهكه دادایــه ســهر دفــنــێ ووى هــۆ لێ كـریـه هه.. و ب دهستێ خۆ ژ سهر دفنا خۆ كشكرى. ڤێجا بهرێ خۆ بدێ كانێ تو ژ كیژ ههردووانى؟!
6. ئهوێ ههڤالینیا عاشقێن دنیایێ بكهت، ئهو دێ وى ب لایێ خۆ ڤه بهن، وئهوێ دۆستینیا حهژێكهرێن ئاخرهتێ بكهت، ئهو دێ وى وهكى خۆ لێ كهن، وپێغهمبهر -سلاڤ لێ بن- دبێژت: ههر ئێك ل سهر دینێ وییه یێ ئهو حهز ژێ بكهت، ڤێجا ههر ئێك ژ ههوه بلا بهرێ خۆ بدهتێ كانێ ئهو حهز ژ كێ دكهت. وههر ئێك ژ مه سێ خۆشتڤى ههنه: مال، ودهمێ مرۆڤ دمرت ئهو نامینت یێ مرۆڤى، وعهیال وكهس وكار، ودهمێ مرۆڤ دچته د قهبرى دا ئهو مرۆڤى دهێلن ودزڤڕنه خۆشیێن خۆ، وعهمهل، وئهوه پشتى مرنێ ژى دمینته د گهل مرۆڤى، ومرۆڤێ ب عهقل ئهوه یێ ههڤالینیا وى بكهت یێ د گهل وى دچته د قهبرى ژى دا وصهبرا وى پێ دئێت.
7. ههڤالینیا دنیایێ، وحهژێكهرێن وێ، ژ رهزیلى وشهرمزاریێ پێڤهتر چویێ ناگههینته خودانى، چونكى هندى مرۆڤێ سهر خۆ دنیا ژێ دخوت، وگاڤا ئهو كهفت، دنیا خۆ لێ ناكهته خودان، وهكى یارا ب فهند وفێل، وحهژێكهرێن دنیایێ ژى، تو چهند ههڤالێ وان بى، ئهو رازى نابن تو (مونافهسا) وان بكهى، ومرۆڤێ تێگههشتى گاڤا دهمهكى ههڤالینیا ئێكى كر وچو فایده ژێ نهدیت، ههڤالینیا وى دهێلت، ڤێجا ما نه دهمه تو بێژیه نهفسا خۆ: بلا بهس بت! د گهل مرۆڤێن ئاخرهتێ، وهكى زارۆكى به د گهل دهیكێ، هندى ئهو وى وێڤه لێ ددهت ئهو پتر خۆ دهاڤێته بهر سنگى!
