بهر ب وهلاتێ عهرهبان ڤه
مانا وى ل باژێڕێ دیمهشقێ گهلهك ڤهنهكێشا.. دهمێ وى گوهـ لێ بووى كاروانهكێ ههى ژ وهلاتێ عهرهبان هاتیه، ونێزیكه ڤهگهڕیێت، وى خۆ ڤێڕا گههاند..
هندهك ژ كاروانیان گۆته مهزنێ خۆ عهبدللاهێ كوڕێ جودعانێ تهیمى یێ قورهیشى:
- بابێ زوههیرى، ئهڤه جحێلهكێ ڕۆمى یێ هاتى دڤێت ته ببینت..
وپشتى صوههیبى داخوازا خۆ گههاندیه مهزنێ كاروانى، وكو وى دڤێت ئهو قهستا وهلاتێ عهرهبان بكهت، كوڕێ جودعانى گۆتێ:
- كوڕێ من! تو یێ دبێژى ئهز عهرهبم، و ژ ئاخفتنا ته یا ئاشكهرایه كو تو عهرهبیێ باش نزانى، تو نابێژیه من چیرۆكا ته چیه؟
- تو ڕاست دبێژى.. ئهز نزانم باش ب عهرهبى باخڤم؛ چونكى ئهز د ناڤ ڕۆمیان دا یێ مهزن بوویم، ئهم ب خۆ عهسلێ مه ژ یهمهنێینه، ژ بابكێ (نهمرێ كوڕێ قاسطى) وئهم د كهڤن دا ل عیراقێینه، ل نك مهلكێن حیره، بهلێ ڕۆمیان ب سهر مه دا گرتبوو، ودهمێ هێشتا ئهز زارۆك وان ئهز ئێخسیر كربووم وبربوومه وهلاتێ خۆ.. و ل وێرێ ئهزێ مهزن بوویم، ومن ئهزمانێ وان یێ گرتى.
- باشه.. دهمێ ئهم دزڤڕینه وهلاتێ خۆ، دێ هنێرینه ب دویڤ ته ڕا و د گهل مه وهره..
وهۆسا صوههیبێ ڕۆمى خۆ دا دگهل كاروانێ قورهیشیان، ومهزنێ كاروانى عهبدللاهێ كوڕێ جودعانێ تهیمى، چاڤێ خۆ باش دایێ، ونههێلا ئهو ههوجهیى تشتهكى ببت، حهتا وى ئهو گههاندیه مهكههێ..
- ڕاسته مرۆڤێن باش چو جاران ژ دنیایێ خلاس نابن.. وخرابى چهند زێده ببت ژى باشى ههر دێ ههبت..
هۆسا صوههیبى د گهل خۆ گۆت، دهمێ كارێ خۆ كرى دا خاترا خۆ ژ مهزنێ كاروانى بكهت، پشتى ئهو گههشتینه مهكههێ.. ودهمێ كوڕێ جودعانى دیتى ئهو یێ كارێ چوونێ دكهت، گۆتێ:
- دێ كیڤه چى؟ ما تو ئێكى ل مهكههێ دنیاسى بچیه نك؟
صوههیبى گۆتێ:
- نهخێر!
- پا دێ كیڤه چى؟ تو مێڤانێ منى.. وتو یێ ل سهر بهختێ من، وبهرى چهند سالهكان د ڤێ مالا من ڤه یا نوكه تو لێ، من وهندهك مهزن ومێرچاكێن قورهیشیان پهیمانهكا گرێداى، كو ههر جارهكا ئهم مرۆڤهكێ ههوجه یان یێ تهعداییهك لێ هاتیهكرن ببینین، ئهم ب دهستێ خۆ ومالێ خۆ هاریكاریا وى بكهین، وئهڤرۆ ڕۆژ هات ئهز گۆتنا خۆ بكهمه كریار.. تو ژ ڤێ مالێ دهرناكهڤى حهتا ئهز ئێكا هند بۆ ته نهكهم تو ژ خهلكى بێ منهت ببى.. ڤى ههلویستێ كوڕێ جودعانى ئهو پتر د چاڤێن صوههیبى دا مهزن كر، وپتر بۆ وى مسۆگهر بوو كو هێشتا باشى د دنیایێ دا مایه.. ههر وهسا ڤى ههلویستێ وى صوههیب بسته كر كو بێژتێ:
- بابێ زوههیرى.. ئهز مرۆڤهكێ صنعهتكارم، ومن هۆستایى د چێكرنا شیران دا ههیه، ئهز ب دهستێ خۆ وكارێ خۆ دێ خۆ ژ خهلكى بێ منهت كهم، وتشتهكێ دى هـهیـه مـن دڤێت بێژمه ته، من تێرا خۆ مال ههیه، من ل وهلاتێ ڕۆمێ ئهو ب دهستێ خۆ بۆ خۆ كۆمكریه، دا ئهڤرۆ وجهكێ ژ من بگرت، بهلێ حهتا نوكه من ئهو ئاشكهرا نهدكر، ئهز دترسیام ژ گهمهعیێن وى دا ئێك دربهكى بدانته من، بهلێ مادهم تو هنده یێ جامێرى، ئهز دێ وى دانمه نك ته، تو بازرگانیێ پێ بكهم، وئهم دێ بینه شریكێن ئێك.. وهكى دى، تو ڕێكا بازارێ نیشا من بده، وته خهم ب من نهبت.
ڤێ گـۆتـنـا هـه.. گهلهك كهیفا مهزنێ تهیمى ب جحێلێ ڕۆمى ئینا، لهو وى د ناڤ خهلكێ مهكههێ دا ئاشكهرا كر كو صوههیب مهولایێ ویه، وپهیمانا شریكاتیێ د ناڤبهرا وان دا ههیه، وڤێ ڕاگههاندنێ بهایهكێ بهرچاڤ دا صوههیبێ ڕۆمى د چاڤێن خهلكێ مهكههێ دا.
