(3) یێ جوانه و وى جوانى دڤێت
مه گۆت: خودێ یێ جوانه، و(جهمیل) ناڤهكه ژ ناڤێن وى، ووى جوانى دڤێت ژى، وهكى د وێ حهدیسا دورست دا هاتى یا د گهل مه بۆرى: ( إن الله جمیل یحب الجمال (، وئهگهر ئهم بیرا خۆ ل ئهگهرا گۆتنا ڤێ حهدیسێ بینینه ڤه دێ زانین كو ئهو د بهرسڤا وى كهسى دا هاتبوو گۆتن یێ پسیارا جوانیا جلكان كرى، دهمێ مرۆڤ حهز دكهت جلكێن وى وسهروبهرێ وی یێ جوان بت.. وپێغهمبهرى -سلاڤ لێ بن- بهرسڤهكا گشتى دایێ، نه گۆتێ: خودێ حهز ژ جلكێن جوان دكهت، بهلكى مهسهله بهرفرههـ كر وگۆتێ: خودێ یێ جوانه، وئهو حهز ژ جوانیێ دكهت.. یهعنى: چونكى ئهو یێ جوانه، وجوانى ل نك وى ههیه، ئهو حهز دكهت جوانى ل نك عهبدێ وى ژى دیار ببت، چ جوانیا جلكى بت، چ جوانیا مالێ وسهروبهرى بت، چ جوانیا ئاخفتنێ و(تهعامولا) د گهل خهلكى بت.
ئیمامێ نهسائى ژ (ئهبوولئهحوهصێ جوشهمى) ڤهدگوهێزت، دبێژت: جارهكێ پێغهمبهرى -سلاڤ لێ بن- ئهز دیتم، هندهك جلكێن كهڤن ودڕیاى ل بهر من بوون، ئینا وى گۆته من: ته مال ههیه؟ من گۆتێ: بهلێ، گۆت: چ ڕهنگێ مالى؟ من گۆتێ: چى تشتێ خودێ داى ژ حێشتر وپهزى، وى گۆته من: پا دێ بلا قهدرگرتن ونعمهتا وى ل سهر ته بێته دیتن.
مهعنا: خودێ حهز دكهت شوینوارێن نعمهتا خۆ ل سهر عهبدێ خۆ ببینت، چونكى ئهو ژ وێ جوانیێیه یا ئهو حهز ژێ دكهت، ودیاركرنا عهبدى بۆ شوینوارێن نعمهتا خودێ ل سهر خۆ پشكهكه ژ شوكرا وى ل سهر وێ نعمهتێ، ونعمهت جوانیهكا ڤهشارتیه، وشوكرا ل سهر وێ جوانیهكا ئاشكهرایه، وخودێ حهز دكهت جوانیا ئاشكهرا وڤهشارتى ژ عهبدێ خۆ ببینت.
و ژ بهر ڤیانا خودێ بۆ جوانیێ، وى ئهو جلك وخهملا دنیایێ دا بهنیێن خۆ یا سهرڤهییا وان جوان دكهت، وئهو تهقوا دا وان یا ناڤخۆییا وان جوان دكهت، خودێ دبێژت: (يَا بَنِي آدَمَ قَدْ أَنْزَلْنَا عَلَيْكُمْ لِبَاسًا يُوَارِي سَوْآتِكُمْ وَرِيشًا وَلِبَاسُ التَّقْوَىٰ ذَٰلِكَ خَيْرٌ ذَٰلِكَ مِنْ آيَاتِ اللَّهِ لَعَلَّهُمْ يَذَّكَّرُونَ)(الأعراف 26) وبهحسێ خهلكێ بهحهشتێ ژى دكهت ووان نعمهتێن ئهو ل وێرێ دبینن، ودبێژت: (فَوَقَاهُمُ اللَّهُ شَرَّ ذَٰلِكَ الْيَوْمِ وَلَقَّاهُمْ نَضْرَةً وَسُرُورًا(11)وَجَزَاهُمْ بِمَا صَبَرُوا جَنَّةً وَحَرِيرًا)(12) ( الأعراف 11-12)
مهعنا خودێ سهر وچاڤێن وان ب گهشیێ جوان كرن، ودلێن وان ب كهیفخۆشى وتهناهیێ، ولهشێن وان ب حهریر وئارمیشى.
وكانێ چاوا خودێ حهز ژ جوانیا د گۆتن وكریار وجلكى وسهرو بهرى دا دكهت، وهسا ئهو حهز ژ كرێتیا د گۆتن وكریار وجلكى وسهر وبهرى ژى دا ناكهت، ئهو حهز ژ جوانیێ وجوانان دكهت، وحهز ژ كرێتیێ وكرێتان ناكهت.
و د دنیایێ دا جوانى ب سێ ڕهنگان دئێته پێش چاڤ:
ڕهنگهك ئـهوه یێ بۆ خودێ بت، و ژ بهر وى بت، وهاریكاریا مرۆڤى ل سهر طاعهتێ وى بكهت، و ژ ڤێیه دهمێ خودێ فهرمان ل مه كرى كو ئهم خهملهكا جوان ل خۆ بكهین دهمێ ئهم دچینه مزگهفتان، دا ب ڕهنگهكێ ساخلهم بێینه دیتن. وئهڤه ئهو ڕهنگه یێ خودێ حهز ژێ دكهت، وفهرمان پێ ل مه كرى.
وڕهنگهك ئهوه یێ بۆ دنیایێ ومهزنیێ بت، وبۆ مهدحه وخۆمهزنكرنێ، ودا خودان پێ بگههته وان شهههواتێن دلێ وى دچتێ.. وئهڤه ئهوه یا خودێ نهڤیاى وئهم ژێ داینه پاش.
وڕهنگهك ئهوه یێ شورستى، نه ژ وێیه ونه ژ وێ؛ چونكى ئهو نه بۆ خودێیه، ونه بۆ دنیایێ..
مهخسهد: ئهو حهدیسا مه ل سهرى ڤهگێڕاى ( إن الله جمیل یحب الجمال ( دو بناخهیێن مهزن ب خۆ ڤه دگرت: نیڤهك مهعرفهت وزانینه، ونیڤا دى سلووكه.. خودایێ پاك وبلند ب وێ جوانیێ دئێته نیاسین یا كهس تێدا وهكى وى نـیـنـه، وپــهرســتــنـا وى ب وێ جـوانـیـێ دئێتهكرن یا وى دڤێت ژ گـۆتـن وكـریـار وئـهخـلاقـان، وئــهو حــهز دكــهت عهبدێ وى ئهزمانێ خۆ ب ڕاستیێ جوان بكهت، ودلێ خۆ ب ئیخلاصێ وڤیانێ وتۆبێ وتهوهكوللێ، وئهندامێن خۆ ب طاعهتى، ولهشێ خۆ ب دیاركرنا شوینوارێن نعمهتان، وپاقژكرنا ژ ههمى ڕهنگێن قڕێژ وكرێتیان.
حهدیس ئاشكهرا دكهت كو دڤێت عهبد وى جوانیێ بنیاست ئهوا بۆ وى بوویه وهصف، وپهرستنا وى ب جوانیێ بكهت ئهوا بۆ وى بوویه دین وشریعهت، مهعنا: حهدیسێ (مهعریفهت) و (سلووك) وهك دو (قاعیده) ب خۆ ڤه گرتن.
